-Газар тариалангийн ажил эхлэхэд сарын хуга­цаа үлдлээ. Тариа­лан­чид тариа­лал­тандаа хэр бэлт­гэж байгаа бол?

-Иргэд хаврын тариа­лал­тынхаа бэлтгэл ажлыг аль хэдийн базааж эхэлсэн. Техник хэрэгслийнхээ бүрэн бүтэн байдлыг хангах, шинээр худал­дан авахад анхаарч байна. Дөрөвдүгээр сарын 12-нд Дархан-Уул аймагт тариланчдын улсын зөвлөлгөөн болно. Жил бүр тариаланчдын улсын зөв­лөлгөөн болдог. Тариаланчид энэхүү зөвлөгөөнөөр тулгарч байгаа саад бэрхшээлийнхээ талаар ярилцаж, өөр хоорондоо туршлагаа хуваалцдаг. Манай яамны зүгээс тариаланчдын улсын зөвлөгөөнөөр яригдаж байгаа асуудалд нэлээд анхаарал тавьдаг. Мэдээж, хөрөнгө мөнгөний асуудлаас эхлээд тех­ник хэрэгслийн хангалт гээд тариаланчдад асуудал их байгаа. Тэр  бүх асуудлыг нь шийдвэрлэхэд  манай яам болом­жийн хэрээр тусалдаг.

-Тариалалт хэзээнээс эхлэх вэ?

-Таван сар гаргаад тариалалт эхлэх байх.  Энэ жил 318 мянган га талбайд уринш бэлтгэсэн. Тэгэхээр 320 мянган га талбайд улаан буудай тариалах зорилт тавьсан байгаа. Улаан буудайн үрийг дотоодоосоо 100 хувь хангах боломжтой.  Тариалан эрхлэлтийн сан болон улсын нөөцөд хангалттай үрийн нөөц бий. Гадаадаас үр худалдаж авахааргүй болсон.Энэ бол Монголын хүнс, хөдөө аж ахуйн салбарт гарсан нэг том амжилт юм. Урьд өмнө нь улаан буудайн үрийг Оросоос худалдан авч тариалдаг байсан. Одоо бол хүнээс гуйхааргүй болсон.

-Танай яам хаврын тариалалтад зориулж техник хэрэгсэл шинээр худалдан авсан уу. Гад­наас шинэ техник хэрэг­сэл худалдаж аваад та­риа­ланчдад хөнгө­лөл­төө үнээр худалддаг байх аа?

-Техник төхөөрөмжийн хувьд энэ хаврын тариалалтад зориулж 20 ширхэг үр тариа хураах комбайн худалдаж авсан. Мөн төмс, хүнсний ногоо хураах иж бүрэн хэрэгсэл худалдаж авсан байгаа. Манай яамны зүгээс тариаланчдаа хөнгөлөлттэй нөхцөлөөр техник хэрэгслээр хангахад багагүй анхаардаг. Нэг үеэ бодоход иргэд болон аж ахуйн нэгжүүдийн техник хэрэгсэл сайжирсан.