Хойд Солонгосын хиймэл дагуултай пуужингийн нислэгийн зам өөрчлөгдөн Өмнөд Солонгосын дээгүүр нисвэл түүнийг угтуулан устгана гэж Өмнөд Солонгосын Батлан хамгаалах яамны албан ёсны төлөөлөгч энэ сарын 26-нд мэдэгдсэн байна. Уг мэдэгдэл нь Сөүл хотноо Цөмийн аюулгүй байдлын олон улсын саммит нээгдэхийн өмнө хийжээ.

БНАСАУ гуравдугаар сарын дундуур “Ынха-3” (“Тэнгэрийн заадас”) зөөгч пуужингаар  “Кванменсон-3” (“Хурц од”) нэртэй холбооны хиймэл дагуул хөөргөнө гэж мэдэгдсэн юм. Хиймэл дагуулыг дөрөвдүгээр сарын 12-16-ны хооронд хөөргөх бололтой. Хойд Солонгос пуужингийн нислэгээ бусад улсын нутаг дэвсгэр дээгүүр явагдахгүй гэж мэдээлсэн байв. Үүнээс өмнө нутаг дээгүүрээ нисвэл Хойд Солонгосын пуужинг устгана гэдгээ Япон мэдэгдсэн байлаа.