“Олон улсын  хөрөнгө оруулалтын чуулган-2012” өнгөрсөн баасан гарагт боллоо. Энэхүү чуулганд гадаад, дотоодын 190 гаруй байгууллага оролцож, санал бодлоо солилцсон юм. Энэ үеэр хөрөнгө оруулагчдад Улаанбаатар хотод хийхээр төлөвлөсөн төсөл хөтөлбөр, хөрсний усыг ашиглах, цэвэр усны хангамж, цэвэрлэх байгууламжийг сайжруулах, нийтийн тээврийн шинэ төрөл нэвтрүүлэх, метро барих техник эдийн засгийн үндэслэлийг танилцуулсан юм. Түүнчлэн Сэлбэ голын урсацыг нэмэгдүүлэх, Туул голд минж нутагшуулах, Үндэсний цэцэрлэгт хүрээлэнд хийхээр төлөвлөсөн ажлын талаар танилцуулав. Чуулганы нээлтийн үеэр Монгол Улсын Ерөнхий сайд С.Батболд үг хэлсэн юм. Тэрбээр “Монгол Улсын нийгэм, эдийн засгийн хөгжилд тэргүүлэх үүрэг гүйцэтгэгч нийслэл Улаанбаатар хотын тогтвортой хөгжлийг хангах, тулгамдаж буй асуудлыг шийдвэрлэхэд онцгой анхаарал хандуулахаар ирсэнд баярлалаа. Улаанбаатар хотын тулгамдсан асуудал нь хот төлөвлөлтийн зохистой бодлогыг хэрэгжүүлэн гэр хорооллыг барилгажуулах, агаар, хөрсний бохирдол болон авто замын түгжрэлийг дорвитой бууруулах, инженерийн шугам сүлжээг иж бүрэн шинэчлэх зэрэг юм. Харин эдгээрийг хэрэгжүүлэхэд хүндрэл нь иргэдийн хөдөөнөөс нийслэлд шилжин ирэлт нэмэгдсэнтэй холбоотой. Хүн амын төвлөрөл нь эдийн засагт эргэлт бий болгодог эерэг нөлөөтэй. Гэвч энэ нь Улаанбаатар хотын хувьд дэд бүтцийн хэт ачаалал, байгаль экологийн тэнцвэрт байдлыг алдагдуулах сөрөг хүчин зүйл болж байна. Цаашид бид хүн амын өндөр нягтралтай хотын нийтлэг жишигт хүрсэн хот байгуулалтын оновчтой төлөвлөлтийн дагуу хөрөнгө оруулалтын хэмжээг нэмэгдүүлэх шаардлагатай. Түүнчлэн нийслэлийн эдийн засгийн бие даасан, эрх зүйн таатай орчныг бүрдүүлэх болно” гэлээ. Үүнтэй холбогдуулан Засгийн газраас нийслэлд хэрэгжүүлэх шаардлагатай төсөл, хөтөлбөрүүдийг санхүүжүүлэх зорилгоор Хөгжлийн банк 5.75-6 хувийн хүүтэй 580 сая ам.долларын бондыг олон улсын зах зээлд арилжжээ. Мөн “100 мянган айлын орон сууц” хөтөлбөрийг хэрэгжүүлэх ажлын хүрээнд зээлийн хүүг зургаан хувь болгох шийдвэр гаргасан билээ. Энэ хүрээнд гэр хорооллыг барилгажуулахад шаардлагатай инженерийн шугам сүлжээг барих ажлыг эхлэх юм байна. Энэ мэтчилэн нийслэлд хийх бүтээн байгуулалтын ажилд хөрөнгө оруулалт шаардлагатай. Энэ бүгдийг хөрөнгө оруулагчдад танилцуулснаар хөрөнгө оруулалт татах юм. Ийнхүү өөрсдийн нөөц бололцоогоо ашиглан хөрөнгө оруулагчид зөв бодлого тодорхойлон хэрэгжүүлбэл амжилтанд хүрнэ гэж Ерөнхий сайд үзэж байгаа аж.  

Чуулганы үеэр нийслэлийн Засаг даргын нэгдүгээр орлогч Б.Баатарзоригоос зарим асуултад хариулт авлаа.
    
-“Олон улсын хөрөнгө оруулагчдын чуулган-2012” зөвлөлгөөний гол онцлог нь юу байв?

-Хөрөнгө оруулалтын зөвлөл­гөөнийг гурав дахь жилдээ зохион байгуулж байна.  Энэхүү зөвлөлгөөн нь дотоод, гадаадын гэсэн хоёр салбартай юм. Өнгөрсөн нэгдүгээр сард дотоодын хөрөнгө оруулагчдын зөвлөлгөөнийг зохион байгуулсан. Энэ үеэр хөрөнгө оруулалтыг хэрхэн татан оролцуулах вэ, хууль эрх зүйн орчин ямар байгаа тухай санал солилцсон. Өөрөөр хэлбэл, ногоон байгууламж, зам гүү­рийн асуудал, сургууль цэцэрлэгийн барилгыг дотоодын ямар байгууллагууд хийх бололцоо байгаа талаар ярилцсан юм. Харин энэхүү чуулганы тухайд хөрөнгө оруулалтын үр ашгаа дээшлүүлж, нээлттэй, ил тод байдлыг хангах, гадаадын хөрөнгө оруулагчдыг татах, тэднийг дотоодын хөрөнгө оруулагчтайгаа холбох зорилготой. Иймээс чуулганыг Азийн хөгжлийн банктай хамтарч зохион байгууллаа. Ер нь хурлыг зохион байгуулахдаа Азийн хөгжлийн банк, Дэлхийн банк, ЖАЙКА, КОЙКА зэрэг олон улсын санхүүгийн байгууллагатай хамтардгаараа онцлогтой.

-Хөрөнгө оруулалтын чуулга­наас гарах үр дүн юу байх бол? 

-Нийслэлийн хувьд нийтийн тээвэр, замын түгжрэл, орчны бохирдлын асуудал гэх мэт 151 тулгамдсан асуудал бий. Үүнийг судалж үзээд усан хангамж, давхар замын төсөл болон бусад орны жишигт нийцүүлж нийтийн тээврийн шинэ төрлийг нэвтрүүлэх, метро барих зэрэг хэдэн төслийг хөрөнгө оруулагчдад санал болгож байна. Чуулганаар төсөв хязгаардлагдмал боловч ирээдүйд үр ашгаа өгөх нийгмийн салбар, дэд бүтэцтэй зэрэг томоохон салбаруудтай холбоотой 48 ажлыг  төр, хувийн хэвшлийн түншлэлийн хүрээнд хийж байгааг хэлсэн.

-Улаанбаатар хотод энэ жилийн тухайд хэчнээн төгрөгийн хөрөнгө оруулалт хийхээр төлөвлөсөн бэ?

-Нийслэлд жилд дунджаар 979 тэрбум төгрөгийн хөрөнгө оруулалтын хэрэгцээ байдаг. Гэтэл бид зарим жилд дөнгөж 79 тэрбум төгрөгийг төсөвлөдөг. Гэхдээ сүүлийн жилүүдэд хөрөнгө оруулалт харьцангуй өсөж байгаа. Ер нь хүний хэрэгцээ, шаардлага хязгааргүй байдагтай адил хотод жилээс жилд хүн амын төвлөрөл ихсэж, үйлдвэрлэл үйлчилгээ нэмэгдэж буйтай холбоотойгоор хөрөнгө оруулалт илүү их хэрэгцээтэй болсоор байна. Энэ жил гэхэд нийслэлд хөрөнгө оруулалтад 1.7 их наяд төгрөгийн хэрэгцээ байгаа ч нөөцдөө тулгуурлан 259 тэрбум төгрөгийн ажил хийхээр төлөвлөсөн.

“Гауф” судалгааны багийн ерөнхий менежер Холгер Людвигээс цөөн асуултад хариулт авлаа.
    
-Та хөрсний усыг ашиглах техник, эдийн засгийн үндэслэлийг боловсруулж байгаа гэсэн. Өөрийнхөө төслийн талаар ярихгүй юу?

-Бидний санал болгож буй төсөл хөрсний усыг ашиглан өртөг багатайгаар ирээдүйдээ ундны усны нөөцийг бүрдүүлж байгаагаар онцлог. Түүнчлэн үүнийг ашигласнаар удаан хугацаанд ашиглах боломжтой юм. Мөн улаанбаатарчуудын хувьд хөрснийхөө усыг ашигласнаар дэд бүтцийнхээ гэмтлийг засаж чадна. Үүгээрээ ач холбогдолтой төсөл.

-Тэгэхээр ундны усны хэрэглээг ахуйн хэрэглээнээс салгаж ойлгоно гэсэн үг үү?

-Машин угаах, угаалгын өрөөндөө ашиглах гэх мэт ахуйн хэрэгцээнд заавал ундны ус ашиглах шаардлагагүй. Тиймээс саарал ус буюу ахуйн зориулалттай усыг зориулалтаар нь ашиглаж болно. Харин ундны усыг нөөцөлж зөвхөн ундандаа ашиглах боломжтой.