Дархан-Уул аймгийн Дархан сумын айл өрх, аж ахуйн нэгж байгууллагууд хог хаягдлаа ил задгай асгаж, байгаль орчныг бохирдуулж, иргэдийн эрүүл мэндэд ноцтой хохирол учруулж байгаа зөрчлийг таслан зогсоох, эрүүл ахуйн аюулгүй орчин бүрдүүлэх зорилгоор бүх нийтийн цэвэрлэгээг өнөөдөр зохион байгуулж байна. Нэг өдрийн хугацаанд хотынхоо хог хаягдлаас бүрэн салж чадахгүй ч цасан дороос ил гарсан, нийтийн эзэмшлийн зам талбайд үүссэн хур хогноосоо эхний ээлжинд сална гэж тооцож байна.

Сумын нутаг дэвсгэрт үйл ажиллагаа явуулж байгаа ААНБ-ууд, орон сууцны  нэгдүгээр давхарт үйлдвэр, үйлчилгээ эрхэлдэг цэгүүд, ЕБС, их дээд сургуулиуд  орчин тойрныхоо газрын хог хаягдал, цас, мөсний цэвэрлэгээ хийж байгаа юм. Брак байрууд, эзэнгүй гражууд, гэр хорооллын гудамж талбай, замын хогийг НААҮГ, багийн Засаг дарга нар хариуцжээ. СӨХ-үүд хог цэвэрлэх ажлыг зохион байгуулж, оршин суугчдыг өргөнөөр оролцуулах юм байна. Мөн эрүүлжүүлэх баривчлах байранд саатуулагдсан иргэдийг цэвэрлэгээнд дайчилж буй ажээ.