МҮОНРТ-ийн нэрэмжит 2012 оны өсвөр үеийн гандболын улсын аварга шалгаруулах тэмцээний нээлтийн ажиллагаа өнөөдөр Дорноговь аймгийн Сайншанд хотын “Хүүхдийн ордон”-д тус аймгийн авьяаслаг хүүхдүүдийн төрөл бүрийн урлагийн тоглолтын хамт боллоо. Нээлтийн ажиллагаанд аймгийн Засаг даргын орлогч, Зохион байгуулах хорооны дарга Ж.Галбадрах, Монголын Гандболын холбооны ерөнхий нарийн бичгийн дарга Д.Энэбиш болон МҮОНРТ-ийн инженер техникийн алба, аймгийн ЗДТГ-ын агентлаг, газрын дарга нар оролцож, баг тамирчдад спортын өндөр амжилт хүссэн юм.  

Энэхүү тэмцээнд нийслэлийн Хан-Уул дүүргийн 52-р сургуулийн дөрвөн баг, Сонгино-Хайрхан дүүргийн “Ирээдүй” цогцолбор сургуулийн хоёр, Сүхбаатар дүүргийн 1-р сургуулийн хоёр, Сэлэнгэ аймгийн 1-р сургуулийн дөрөв, Сэлэнгэ аймгийн Зүүнхараа хотын хоёр, Дархан- уул аймгийн “Оюуны ирээдүй” цогцолбор сургуулийн дөрөв, Дорноговь аймгийн Сайншанд хотын нэг, Замын-Үүд хотын дөрөв, нийт 23 багийн тамирчид оролцож байна. Тэмцээн охид, хөвгүүдийн 14-15 нас, 16-17 насны хоёр ангилалд явагдаж байгаа юм.

Тэмцээний ерөнхий шүүгчээр Спортын мастер, Улсын шүүгч Г.Амарсанаа ажиллаж байна гэж Монголын гандболын холбооноос мэдээллээ.