Францын Тулуз хотноо лалын шашинт гурван цэрэг болон еврейн сургуулийн гурван сурагч, нэг багшийг хөнөөсөн гурван өөр халдлага арав гаруй хоногийн хугацаанд дараалан гарсан нь олон нийтийг түгшээж орхисон юм.

Эдгээр халдлагыг үйлдэж, долоон хүний амь насыг хөнөөсөн хэрэгт сэжиглэгдэж байсан Мохаммед Мера буудуулжээ. Алжир гаралтай, Францын иргэн болох 23 настай Мохаммед Мерагийн амьдарч байсан байрыг бараг хоёр хоногийн турш цагдаа нар болон тусгай албаныхан бүслээд байсан юм. Пүрэв гаригт Францын Дотоод Хэргийн Сайд Клод Геан мэдэгдэхдээ М.Мера тусгай албаны цэргүүд руу гал нээж, улмаар өөрөө цонхоор үсэхийг завдсан байна. Буудалцааны үеэр гурван цэрэг шархадсан бөгөөд нэг нь хүнд гэмтэл авчээ. Засаг захиргаанаас Мераг амьдаар нь барина хэмээн мэдэгдэж байсан ч байранд болсон буудалцааны үеэр толгойдоо буудуулж, алагдсан байна.

Буудалцаан болохоос өмнө цагдаа нар сэжигтэнтэй олон цагийн турш ярилцсан байна. Мера өөрийгөө исламистуудтай холбоотой бөгөөд Аль-Каедагийн цэргийн лагерьт бэлтгэл хийхийн тулд Афганистан болон Пакистанд очиж байсан гэжээ. Афганистанд байх үедээ Мера америк цэргүүдэд олзлогдож байсан гэж албаны хүмүүс хэлсэн байна. Харин хэзээ, яагаад олзлогдож байсан талаар тодорхой мэдээлэл өгөөгүй юм. Мохаммед Мерагийн хөрш 18 настай залуу сэтгүүлчдэд ярихдаа сэжигтэн ердөө ч гэмтэн шиг харагддаггүй байсан. Байшинд амьдарч байсан хүмүүст тэрээр аятайхан сэтгэгдэл төрүүлдэг байсан гэжээ.

Түүний нэр АНУ-д орох эрхгүй хүмүүсийн нэрсийн жагсаалтад бичигдсэн байсан талаар Ройтерс агентлаг мэдээлсэн байна. Алжир гаралтай Францын иргэн 23 настай Мохаммед Мера юуны учир АНУ-д орох эрхгүй хүмүүсийн нэрсийн жагсаалтад бичигдсэн талаар албаны хүмүүс одоогоор тайлбар өгөөгүй байна.