ОХУ-ын Буриад улсын Ерөнхийлөгчийн нэрэмжит чөлөөт бөхийн 17 дахь удаагийн олон улсын тэмцээн энэ сарын 23-25-нд Улаан-Үд хотод болно. 1996 оноос зохион байгуулагдаж эхэлсэн тэмцээн 2003 оноос “А” зэрэглэлийн ангилалд багтах болсон бөгөөд түрүүлсэн тамирчин 2000 ам.долларын шагнал хүртэх бол мөнгөн медалийн эзэнд 1000, хүрэл медальд 500 “ногоон” дагалдах юм.

Буриадад болох тэмцээнд манай улсаас Үндэсний шигшээ баг, “Алдар” спорт хороо, “Гацуурт олимп” сургууль, “Тэмүүжин”, “Хангарьд” клубийн тамирчид оролцохоор өчигдөр эх орноосоо мордлоо. Эрэгтэйчүүдийн 55 кг-ын жинд гавъяат тамирчин Б.Наранбаатар, ОУХМ Т.Даваахуяг, спортын мастер Э.Бэхбаяр, Б.Номин 60 кг-д ОУХМ Э.Ням-Очир, Б.Нэмэхбаяр, 66 кг-д ОУХМ А.Анхбаяр, спортын мастер Х.Мөнхжаргал, 74 кг-д ОУХМ П.Өнөрбат, 84 кг-д ОУХМ П.Өсөхбаатар, спортын мастер М.Батмөнх, 96 кг-д ОУХМ Ж.Чулуунбат дасгалжуулагчаар Үндэсний шигшээ багийн дасгалжуулагч Ц.Баярсайхан, Т.Гансүх, залуучуудын шигшээ багийн дасгалжуулагч Ц.Баярсайхан, шүүгчээр олон улсын шүүгч Б.Төмөрбаатар, Х.Ганболд, Р.Нэргүй, Х.Чойжилжав нар ажиллахаар болжээ.