Сар бүрийн 10-15-ны хоо­ронд арилжааны банкуудаар дамжин олгодог “Хүний хөгжил сан”-гийн гуравдугаар сарын мөнгөө иргэд авч чадахгүй байгаа гэнэ. Учир нь банкууд санхүүжилт нь орж ирээгүй гэдэг тайлбарыг өгч байгаа аж. Өгөх ёстой хугацаанаасаа 10-аад хоногоор  саатаж, гуравдугаар сарын 22 болчихоод байхад “Хүний хөгжил сан”-гийн мөнгө юунаас болоод хойшлогдоод байгаа талаар холбогдох албаны хүмүүсээс тодруулсан юм.  Албаны хүмүү­сийн хэлснээр ямар ч байсан ирэх долоо хоногийн эхнээс иргэд “Хүний хөгжил сан”-гийн 21 мянган төгрөгөө гар дээрээ авах бололтой. Харин хөгшид, хөгжлийн бэрхшээлтэй ир­г­э­дийн хувьд  Засгийн газар амалсан сая төгрөгөө хэзээ өгөхийг нь тэвчээртэйгээр хүлээх хэрэгтэй болох нь. Учир нь сая төгрөгийг тараах журам өнөөг хүртэл батлагдаагүй байгаа. Журамд ахмад настан, хөгжлийн бэрхшээлтэй иргэн гэж хэнийг хэлэх вэ, ямар банкаар яаж олгох вэ гэдгийг нарийвчлан тусгах ёстой гэнэ. Гэхдээ журам батлагдлаа ч сая төгрөг өгөх боломж хомсхон байна. “Хүний хөгжил сан”-гаас сар бүхэн олгодог 21 мянган төгрөгөө тарааж чадахгүйд хүрчихээд байхад юун сая төгрөг вэ хэмээн албаны хүн ундууцаж байна лээ. Тэгэхээр  сая төгрөг гэдэг сайхан  гэгчийн  “хууралт” биш байгаасай гэж  найдья  даа.

Улсын хөдөлмөр халамж үйлчилгээний газрын ХХҮГ-ын хэлтсийн дарга Д.Чойжилсүрэн

-“Хүний хөгжил сан”-гаас олгодог гуравдугаар сарын мөнгөө иргэд авч чадахгүй бай­гаа гэсэн. Арилжааны бан­кууд болохоор танайхыг сан­хүү­жилтээ хийхгүй байгаа гэдэг тайлбарыг өгч байна. Яагаад  гуравдугаар сарынхаа мөн­гийг өгч чадахгүй байдалд хүрчихэв?

-Мэдэхгүй ээ. Сангийн яамнаас санхүүжилтээ хийхгүй байгаа.  Энэ талаар асууж тод­ру­лахаар яамныхан  мөнгө байхгүй гэдэг тайлбарыг өгч байна лээ. Сангийн яам санхүүжилтыг нь хийчихвэл манайх арилжааны бан­куудын дансад тэр даруйхан хийчихнэ.

-Тэгээд “Хүний хөгжил сан”-гийн мөнгийг яг хэзээ өгөх вэ?

-Хэлж мэдэхгүй байна. Сан­гийн яам санхүүжилтээ хэзээ хийх нь мэдэгдэхгүй байна. Сан­гийн яамнаас энэ асуудлаар тайлбар авсан нь дээр байх. Тэд л ямар учраас саатаад байгааг хэлэх биз. Одоогоор  “Хүний хөгжил сан”-гийн дансанд ямар ч мөнгө байхгүй.

-“Хүний хөгжил сан”-гаас сар бүр тараадаг 21 мянган төгрөгийг хэдэн сар хүртэл олгох билээ?

-Зургадугаар сар хүртэл олго­но. Өөрөөр хэлбэл, Хүний хөг­жил сан”-аас  тараадаг 21 мян­ган төг­­рөгөө иргэд дөрвөн сар л авах  юм.

-Хөгшид болоод хөгжлийн бэрхшээлтэй иргэдэд тараах сая төгрөгийн асуудал юу болсон бэ. Уг нь цагаан сараас өмнө сая төгрөг тараана гэж байсан биз дээ. Гэтэл сар шинэ өнгөрөөд бараг сар боллоо?

-Тэр асуудлыг Сангийн яам, Засгийн газраас асуусан нь дээр байх. Сар бүр олгодог 21 мянган төгрөгөө тавьж чадахгүй шахам болчихоод байхад юун сая төгрөг вэ.  Тэгээд ч Засгийн газар хөгшид, хөгжлийн бэрх­шээлтэй иргэдэд өгөх сая төг­рөгийнхөө журмыг одоо хүртэл бат­лаагүй байгаа шүү дээ. Журам батлагдаж, мөнгө орж ирсэн цагт л сая төгрөгийг тараах байх даа. Ямар ч байсан ойрын хугацаанд сая төгрөгийг тарааж чадахгүй л болов уу.