“Энэ бол кино урлаг, захиалгынх биш. Бид аль нэг намын захиалгаар кино бүтээдэггүй. Дахин хэлэхэд “Бурхан өршөөг” кино Ардчилсан намын захиалгаар хийсэн кино биш гэдгийг албан ёсоор хэлмээр байна” хэмээн найруулагч З.Батболд өнөөдөр сэтгүүлчдэд мэдээлэл хийлээ. Учир нь энэ сарын 1-нд “Өргөө” кино театрт нээлтээ хийсэн “Бурхан өршөөг” киног цаашид гаргахыг хориглосон гэнэ. “Өргөө” кино театрын зүгээс киног нь гаргах боломжгүй гэдгийг найруулагч З.Батболдод мэдэгдсэн гэнэ. Шалтгаан нь Ардчилсан намын захиалгын кино гэх ярианаас болсон аж. Энэ талаараа найруулагч З.Батолд хэлэхдээ “Манай киног Ардчилсан намын кино гэж ойлгоод цаашид гаргах боломжгүй боллоо. “Өргөө-1” театрт дахиж гаргахгүй, харин “Өргөө-2” театрт энэ сарын 23-ныг хүртэл гаргана. Тэрнээс цааш гаргах эсэх нь тус кино театрын шийдвэр байх юм. Манай киноны хувь заяа хаашаа эргэх юм байгаа юм. Тиймээс бид өнөөдөр “Өргөө” кино театрт “Бурхан өршөөг” кино Ардчилсан намын захиалгат кино биш гэдгийг нотлох энэхүү бичгийг хүргүүлэх гэж байна. Бид Ардчилсан намд энэ кино захиалгынх биш гэдгийг нотлох бичиг хийж өгөхийг хүссэн. Өнөөдөр энэхүү нотлох баримтаа авлаа. Үүнд “Бурхан өршөөг” киног Ардчилсан нам захиалж хийлгээгүй бөгөөд энэ кинотой холбоотойгоор уран бүтээлчидтэй холбогдсон зүйл байхгүй хэмээн тусгасан байгаа. Өнөөдөр бид нотлох баримтаа “Өргөө” кино театрын захиргаанд хүргэж өгөх болно” хэмээн мэдэгдлээ.

 “Бурхан өршөөг” кино нь улс төр, нийгмийн амьдралыг харуулсан, эмгэнэлт, инээдмийн кино юм. Кинонд ардчиллын үнэ цэнэ Монголд үгүй болж, албан тушаалын араас гүйдэг зусарч бялдуучууд энэ нийгэмд зонхилж байгаа тухай уран сайхны аргаар харуулжээ. Хамарсалтай нь, энэхүү киног цаашид “Өргөө-1” кино театр гаргахгүй нь.