Долдугаар сарын 1-ний гэх тодотголтой цагдаагийн экс удирдлагуудад холбогдох хэргийг шүүх хурал гуравдугаар сарын 14-нд Сүхбаатар дүүргийн шүүхэд болох байсан ч шүүгдэгчдийн өмгөөлөгчдийн зүгээс шүүх бүрэлдэхүүнээс татгалзсанаар хурлыг тодорхой бус хугацаагаар хойшлуулсан билээ. Тухайн өдөр Нийслэлийн цагдаагийн газрын Хэв журмын хэлтсийн дарга асан, цагдаагийн дэд хурандаа Г.Ганбаатарын өмгөөлөгч Д.Оросоо гадаад улсад томилолтоор ажиллаж байсан тул түүний хэргийг тусгаарласан юм. Харин бусад гурван шүүгдэгчийг цагдан хорих шийдвэр гаргасан бөгөөд өчигдөр тэднийг цагдан хорих 461 дүгээр анги руу ачсан билээ.

Харин Г.Ганбаатарт холбогдох хэргийг шүүх хурал өнөөдөр 10.00 цагт Сүхбаатар дүүргийн шүүхэд эхэлсэн ч тодорхой бус хугацаагаар хойшиллоо. Учир нь гуравдугаар сарын 14-нд Г.Ганбаатар нь нэмж өмгөөлөгч авах хүсэлт гаргасныг шүүх бүрэлдэхүүн хүлээн авч, улмаар Ц.Мөнхдэлгэр гэгч өмгөөлөгч түүний хэрэгт ажиллах болсон байна. Шинэ өмгөөлөгч нь саяхнаас хэргийг хүлээж авсан тул хавтаст хэрэгтэй танилцаж амжаагүй, улмаар шүүх бүрэлдэхүүнд хэрэгтэй танилцах хугацаа олгохыг хүсчээ. Шүүх бүрэлдэхүүн өмгөөлөгчийн хүсэлтийг хүлээн авч, хавтаст хэрэгтэй танилцах боломжоор хангах үүднээс шүүх хурлын товыг тодорхой бус хугацаанд хойшлуулсан байна. Ингэхдээ цагдаагийн дэд хурандаа Г.Ганбаатар цагдан хорих захирамж гаргажээ.

Долдугаар сарын 1-ний хэрэгт холбогдсон цагдаагийн экс удирдлагуудыг шүүх хурлын товыг эргэн зарлах учиртай. Ингэхдээ дээрх дөрвөн эрхмийн хэргийг нэгтгэж, хамтад нь шүүх юм.