Азийн Оюутны аварга шалгаруулах эмэгтэй волейболчдын хоёрдугаар тэмцээн 2012 оны 4 дүгээр сарын 09-15-ны өдрүүдэд Улаанбаатар хотноо болно. Тус тэмцээнийг Монгол Улсад зохион явуулахыг Азийн оюутны спортын холбооны Ерөнхий Ассамблейн хурлаас шийдвэрлэж, Монгол улсын Засгийн газрын 2011 оны 07 сарын 27-ны өдрийн 242 дүгээр тогтоол, Эрүүл мэндийн сайдын 435 тоот тушаал гаргасан юм.

Тэмцээний үйл ажиллагааг шууд нэвтрүүлэх телевизүүд саналаа ЗБХороонд ирүүлсээр байгаа бөгөөд одоогоор оюутны Азийн аваргын тэмцээнийг “Боловсрол суваг” телевиз, “Sport box” телевиз, Ийгл телевиз шууд дамжуулах эрхээ авч, урьдчилсан реклам зар, сурталчилгаагаа хоёрдугаар сарын 20-ноос цацаж эхлээд байна. Мөн ТВ5, ТВ 9 телевизүүд шууд дамжуулах сонирхолтой байгаа бол МҮОНРТ хэсэгчлэн дамжуулах гэнэ. Олон улсын байгууллагаас тогтоогдсон журмын дагуу эрх авсан телевизүүд ЗБХ-той хамтран эртнээс телевизийн сурталчилгаагаа хийж эхлэн гэрээ байгуулан хамтран ажилладаг ажээ.