Монгол Улсын баруун бүсийн босоо тэнхлэгийн 743.1 км авто замын 403.8 км автозамыг Азийн хөгжлийн банкны санхүүжилтээр хэрэгжүүлэхээр болсон. Энэ хөтөлбөрийн эхний үе шат болох 45 сая ам.долларын хөнгөлөлттэй зээлийн хэлэлцээрт Сангийн сайд Д.Хаянхярваа, Азийн хөгжлийн банкны Монгол дахь Суурин төлөөлөгч Роберт Шоэлхаммэр нар өчигдөр гарын үсэг зурлаа. Дээрх хэлэлцээрийн  хүрээнд ямар ажлуудыг хийхээр төлөвлөж байгаа талаар  Сангийн сайд Д.Хаянхярваа “Монгол Улсын баруун бүсийн босоо тэнхлэгийн 743.1 км авто замын 403.8 км авто замыг Азийн хөгжлийн банкны санхүүжилтээр барихаар болсон. Тухайлбал, Ховд аймгийн Алтай сумын нутаг дахь Тэмээн хүзүү-Бага улаан даваа чиглэлийн 110.8 км авто замыг уг банкны буцалтгүй тусламжийн хөрөнгөөр тавьж байгаа. Үлдсэн 293 км автозамыг тус  банкны 170 сая ам.долларын санхүүжилт Монгол Улсын Засгийн газрын 92 сая ам.долларын хөрөнгө оруулалтаар “Баруун бүсийн босоо тэнхлэгийн автозамыг хөгжүүлэх хөрөнгө оруулалтын хөтөлбөр”-ийг гурван үе шаттайгаар хэрэгжүүлэх юм. Дээрх мөнгөөр Ховд аймгийн Бага Улаан даваа–Манхан чиглэлд 103.3 км автозам барина. Мөн замын салбарын институцийг сайжруулах чиглэлд нэлээд зүйлийг хийхээр төлөвлөсөн” хэмээн ярилаа.

ХБНГУ-ын Засгийн газраас Монгол Улсад нийтдээ 265 сая орчим еврогийн хөнгөлөлттэй зээл, буцалтгүй тусламжийг олгоод байгаа гэнэ. Түүний 8.5 сая хүртэлх еврогийн хөнгөлөлттэй зээлийг Улаанбаатар хотын IV дулааны цахилгаан станц дээр хэрэгжих “Эрчим хүчний үр ашиг II” төсөлд олгохоор төлөвлөжээ. Харин 2006 онд амласан 4.5 сая еврогийн хөрөнгийн  анхны зориулалтыг өөрчлөн “Улаанбаатар хотын хүнс­ний хангамжийг сайжруулах зорилгоор бүс нутгийн тээврийн дэд бүтцийг хөгжүүлэх” төсөлд нэмж олгохоор болсон байна. Ингэснээр нэгж цахилгаан, дулааны эрчим хүч үйлдвэрлэхэд зарцуулагдах нүүрсний хувийн зарцуулалт, нүүрс хүчлийн хийн ялгаралт багасч, дотоод хэрэгцээний цахилгаан эрчим хүч ч буурах аж. Түүхий нүүрсний хэрэглээ ч багасах аж.  Уг хөрөнгөөр Азийн автозамын АН-3 чиглэл буюу Улаанбаатар-Дархан-Алтанбулаг, чиглэлийн замаас салаалан Төв аймгийн Борнуур сум хүртэлх 7.45 км, Жаргалант сум чиглэлийн 24.73 км хуучин асфальтобетон хучилттай авто замыг шинэчлэх, Улаанбаатар хотын Сонгинохайрхан дүүргийн Жаргалант тосгон хүртлэх 17 км асфальтобетон хучилттай шинэ автозам барих гэнэ. Нэмэлт 4.5 сая еврогийн зээлийн хөрөнгөөр Сонгинохайрхан дүүргийн Жаргалант тосгоноос Төв аймгийн Батсүмбэр сум хүртлэх 29.4 км асфальтобетон хучилттай шинэ автозам барихаар болжээ. Эдгээр зээл жилийн 0.75 хувийн хүүтэй, эргэн төлөх хугацаа 40 жил гэнэ.