Монгол Улсын хэмжээнд 30-60 насны бүх эмэгтэйчүүдэд умай болон хөхний хавдар, цусны даралт, чихрийн шижин гэсэн өвчлөлийн оношлогоог хийж эхлэхээр болжээ. Үзлэг ирэх дөрөвдүгээр сарын 7-нд эхлэх юм байна. Энэ чиглэлээр үзлэг оношлогоо хийх эмч мэргэжилтнүүдийг бэлтгэж эхэлсэн байна. Үзлэг хийхэд шаардлагатай тоног төхөөрөмжийг хангах ажил үргэлжилж байгаа юм. Орон нутагт үзлэгт хамрагдах насны эмэгтэйчүүдийн тооцоо, судалгааг гаргах ажил эхэлсэн байна.

 Өнгөрсөн жил “Хавдрын эсрэг үндэсний аян” -ы хүрээнд дээрх дөрвөн чиглэлээр үзлэг оношлогоо явагдсан. ДЭМБ-ын тодорхойлсноор умайн хүзүүний хорт хавдар эмэгтэйчүүдийн хувьд хамгийн аюултай хавдарт тооцогддог. Энэ хавдарт 35-55 насныхан өртөх магадлал хамгийн өндөр байдаг ажээ. Уг хавдраар жилд дэлхийн хэмжээнд 470 мянган эмэгтэй шинээр бүртгэгддэг байна. Тэдний 233 мянга нь амиа алддаг тухай  судалгаа гарчээ.