“Гал үндэстэн холбоо”, “Монголын гол нууруудын нэгдсэн холбоо”-ноос 2009 оны долдугаар сард батлагдсан урт нэртэй хуулийн хэрэгжилт хяналт тавихыг шаардан мэдээлэл хийлээ. Тэдний зүгээс энэ хуулийн хэрэгжилт хангалтгүй байгаад гомдолтой байгаа ажээ. Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль батлагдсаны дараа Ашигт малтмалын газраас хууль хэрэгжих хилийн заагт 391 ашиглалтын зөвшөөрөл, 1391 хайгуулын зөвшөөрөл нийт 1782 тусгай зөвшөөрөл байх талаар мэдээлж байсан.

Түүнчлэн Монгол Улсын Засгийн газрын 2011 оны 6 сарын хилийн заагийг хэсэгчлэн тогтоосон 174 дүгээр тогтоол батлагдсан. Хуулийн 4.3-ийг үндэслэн тогтоосон хилийн зааг нь 242 алтны шороон ордны талбайн хэсэгт хамаарч байгаа бөгөөд ашиглалтын 391 зөвшөөрлөөс алтны 34, барилгын материалын 43, нүүрсний 31, бусад ашигт малтмалын 41 гээд нийт ашиглалтын 149 тусгай зөвшөөрөл хамрагдаагүй байна. Мөн хайгуулын 1391 тусгай зөвшөөрөлтэй талбайг яах нь тодорхойгүй байгаа гэнэ. Тэгвэл энэ бүхнээс дээрх хууль бүхэлдээ хэрэгжихгүй байна хэмээн тус холбооныхон үзэж байгаа аж.