Хятадын Шаньдун мужийн тариачин, 27 настай Ши Байкуй “Хориотой хот”-ын үзмэрээс хулгайлсан учир 13 жилийн ял сонссон талаар Франс Пресс агентлаг бичжээ. Тариачин шоронд орохоос гадна 13 мянган юанийн төлбөр төлж, улс төрийн эрхээ гурван жил хасуулах юм. Ши Байкуй 2011 оны тавдугаар сард Хятадын Эзэн хааны ордны музейгээс есөн үзмэр хулгайлсан ажээ. 20-р зууны эхэн үеийн эмэгтэй хүний гоёл чимэглэлийн зүйлүүд, алтан эдлэл болон бусад зүйлсийг тариачин залуу авсан байна.

“Синьхуа” агентлагийн мэдээлснээр хулгайлагдсан үзмэрүүдийн нийт үнэлгээ 10 сая юань болсон юм. Хулгайлагдсан эдлэлээс зургааг нь цагдаа нар олж, музейд буцаан өгсөн ажээ. Одоог хүртэл олдоогүй байгаа гурван үзмэрийн үнэ 150 мянган юаниар тооцоологдож байна. Ши Байкуй хулгай хийснээсээ хоёр хоногийн дараа Бээжингийн нэгэн интернэт кафед сууж байгаад цагдаа нарт баригдсан гэнэ. Хориотой хотоос өмнө нь 1987 онд эд зүйлс хулгайлсан тохиолдол гарч байсан бөгөөд хулгайчид цаазын ял өгч байжээ. Нийтдээ таван удаагийн хулгай Эзэн хааны ордон музейд гарч байсан байна.