БСШУ-ны сайд Ё.Отгонбаяр Их, дээд сургуулийн оюутнуудад олгож буй 70 мянган төгрөгийн олголт зохих журмын дагуу тараагдаж байгаа эсэхэд шалгалт хийхийг үүрэг болгосон байна. Үүн дагуу өнөөдрөөс БСШУЯ, Монголын оюутны холбоо хамтран 32 Их,дээд сургуульд шалгалт хийж эхэлжээ. Шалгалтын дөрвөн ажлын хэсэг байгуулагдсан ба хамгийн олон оюутантай МУИС, СУИС, ХИС зэрэг сургуулийг эхний ээлжинд шалгах аж. Тус шалгалт ойролцоогоор долоо хоног үргэлжлэх бөгөөд долоо хоногийн эцсээр шалгалтын дүнг танилцуулах ажээ.

Сануулахад, өнгөрсөн сард 84 их, дээд сургуулийн 136,637 суралцагчийн нэг сарын тэтгэлгийн мөнгө болох 9.6 тэрбум төгрөгийг сургуулиудын дансанд шилжүүлснийг тухайн сургуулиуд бэлнээр болон банкны цахим картаар тараасан байгаа аж. Оюутнуудын зүгээс 70 мянган төгрөгийн тэтгэлэгтэй холбоотой асуудлаар МОХ-нд цөөнгүй гомдол ирүүлсэн байна. Тухайлбал, “70 мянган төгрөгөө авахын тулд шимтгэл төлсөн”, “Дутуу олгож байна”  “Сургууль шууд төлбөрт авч байна” зэрэг гомдол их байгаа учраас Монголын оюутаны холбоо шалгалтад хамтран оролцохоор болсон байна.