Ардчилсан намын төв байрны дотор болон гадна талд нь эсэргүүцэл илэрхийлэн, суулт хийж буй Баянзүрх, Хан-Уул, Чингэлтэй дүүргийн намын хорооны гишүүд рүү өчигдөр 15 цагийн үед хэсэг хүмүүс дайрчээ. Үл таних хүмүүс суулт зарлагчдын заримыг нь зодож гэмтээн, зассан индэр, лоозонг нь нураасан байна. Тэдгээр залуус гурван машинтай байсан бөгөөд хэн ямар зорилгоор суулт хийж буй намын хороон гишүүд рүү халдсан талаар тодорхой тайлбар хэлэх боломжгүй байна. Ямартай ч бидэнд өгсөн мэдээллээр суултад оролцож буй иргэд тэдэн рүү халдсан залуусын унаж явсан машины дугаарыг Сүхбаатар дүүргийн цагдаад мэдэгдээд байгаа аж.