Монгол Улсын Гавьяат тамирчин, бөхийн чөлөөт барилдааны дэлхийн аваргын хошой мөнгөн медальт, Азийн аварга, Азийн наадмын аварга Оюунбилэгийн Пүрэвбаатарын нэрэмжит хөнгөн жингийн олон хотын тэмцээн өчигдөр Спортын төв ордонд боллоо. Дөрөв дэх жилдээ зохион байгуулсан “Ооскагийн тэмцээн”-д уламжлал ёсоор  эрэгтэйчүүдийн 50, 55, 60, 66 кг-д барилддаг бөхчүүд зодоглов. Тэмцээнд Монголын хөнгөн жингийн тамирчдаас гадна ОХУ-ын Буриад болон БНХАУ-ын Өвөрмонголын тамирчид ирж, оролцсон юм.

Тэмцээний нээлтийн ёслолын үеэр Монголын чөлөөт бөхийн холбооны дээд шагнал болох “Ялалт” медалийг тус холбооны дэд ерөнхийлөгч Б.Болд О.Пүрэвбаатар гавьяатад гардуулсан. Түүнчлэн нэгэн үе чөлөөт бөхийн дэвжээнээ барилдаж явсан жин жавууд нь хүндэтгэл үзүүлж, тив, дэлхийн дэвжээнд өрсөлдөгч, басхүү найз нь явсан Буриадын чөлөөт бөхийн шигшээ багийн дасгалжуулагч А.Г. Жамц ирж, хүндэтгэл үзүүлсэн юм.

Хөнгөн дөрвөн жинд болсон тус тэмцээнд О.Пүрэвбаатар гавяьатын дасгалжуулдаг “Олимп” сургуулийн баг 26 оноогоор түрүүлсэн. Харин хоёрдугаар байрт Ц.Баярсайхан дасгалжуулагчтай ҮБТДС /17 оноо/, гуравдугаар байрт Г.Пүрэвбаатар дасгалжуулагчтай Дархан-Уул аймгийн “Хасу мегаватт” клубын тамирчид /12 оноо/ шалгарсан юм.

Тэмцээний дүнг танилцуулж байна.