Европын хөлбөмбөгийн холбооны хамгийн нэр хүндтэй тэмцээн болох Аваргуудын лигийн шөвгийн найман багийн сугалааг тодруулах арга хэмжээ баасан гаригийн үдэш Швейцарийн Ньон хотноо боллоо. Дөрвөн оноолтоос гурав нь урьд өмнө Аваргуудын лигт гарч байгаагүй учраа болсон бол цомын эзэн “Барселона” болон “АС Милан” “хайнаагаа хагалах” боломжтой болж байна.

Аваргуудын лигт улиран түрүүлсэн гэх агуу амжилтын эзэд болох зорилго тээсэн “Барселона” Лионель Мессигээр ахлуулж, эхний тоглолтоо “Милан”-ы “Сан Сиро” цэнгэлдэхэд хийнэ. Хуваарийн дагуу шөвгийн найман эхний тоглолтууд гуравдугаар сарын 27, 28-нд, хариу тоглолтууд дөрөвдүгээр сарын 3, 4-нд болох юм.

Аваргуудын лигт хамгийн олон буюу нийт 28 удаа шөвгийн наймын шатанд тоглож байсан “Реал Мадрид” харин энэ шатанд анх удаа шалгараад буй туршлага нимгэн “АПОЭЛ”-тэй сугалаа таарчээ. Мөн энэ шатанд шалгарсан найман багаас аваргын цом өргөөгүй хоёрхон багийн нэг болох “Челси”-гийн тухайд Португалийн “Бенфика”-тай учраа таарсан. Өмнөх шатанд Италийн “Наполи” багийг ид шидийн гэмээр гайхалтай тоглолт үзүүлж, буулгаж авсан тэд энэ удаад ч өрсөлдөгчөө ялна гэдэгт итгэлтэй байна.

Харин Германы “Баейрн Мюнхен” Францын “Марсель”-тай тоглоно. Энэ улирлын Аваргуудын лигийн финалын тоглолт тавдугаар сарын 19-нд Мюнхен хотноо болно. Тиймээс өөрийнхөө үндсэн цэнгэлдэхэд аваргын цом өргөх хүсэлтэй тэд хагас шигшээд “АПОЭЛ” болон “Реал Мадрид”-ын хожсонтой тоглох юм.