Долдугаар сарын 1-ний үймээний хэрэгт холбогдсон тухайн үеийн цагдаагийн удирдлагууд болох Ч.Амарболд, О.Зоригт, Ш.Батсүх,  Г.Ганбаатар  нарыг шүүх хурал энэ сарын 14-нд болох байсан ч шүүх бүрэлдэхүүнээс татгалзнаар тодорхойгүй хугацаагаар хойшилсон. Шүүх хурал эхлэхийн өмнө шүүгдэгч Г.Ганбаатарын өмгөөлөгч ирээгүй учир түүний хэргийг тусгаарлаж шийдэхээр болсон ч өмгөөлөгч бүгд эсэргүүцсэн юм. Үүний дараа шүүх бүрэлдэхүүн Ч.Амарболд, О.Зоригт, Ш.Батсүх нарыг цагдан хорих шийдвэр гаргав. Эл шийдвэрийг эсэргүүцэж шүүгдэгч нарын өмгөөлөгч Ерөнхий шүүгчид хандсан ч цагдан хорих шийдвэрийг хэвээр үлдээжээ.

Сүхбаатар дүүргийн шүүхийн Ерөнхий шүүгч С.Соёмбо-Эрдэнэ шүүгдэгчдийн өмгөөлөгчидтэй өчигдөр уулзаж,  цагдан хорих шийдвэрийг хэвээр үлдээснээ танилцуулжээ. Гэхдээ тэднийг Сүхбаатар дүүргийн  нэгдсэн эмнэлэгт шүүх хурал болтол цагдаагийн хяналт дор эмчилгээ хийлгэхээр болсон байна. Түүнчлэн шүүх бүрэлдэхүүнээс татгалзсан нь хууль зүйн  үндэстэй байвал, шүүх бүрэлдэхүүнийг өөрчлөөд, шүүх хурлын товыг зарлах аж.

Одоогоор Сүхбаатар дүүргийн нэгдсэн эмнэлэгт эмчлүүлж буй дээрх нэр бүхий гурван хүний биеийн байдал сайнгүй байгаа гэнэ. Хошууч генерал Ч.Амарболдын эхнэрээс биеийн байдлын талаар тодруулахад “Даралт нь буурахгүй гэнэт өсч байна. Сахар нь ихсээд 18-20 хувьд байгаа. Энэ бол хүнд  байна гэсэн үг. Олон жил цагдаагийн байгууллагад эрүүл мэндээ умартан ажилласан. Одоо энэ  өвчин нь сэдэрч байна. Нөхрийн маань биеийн байдал дээрдээгүй учир би байнга сахиж, хоол цайг нь зөөж байгаа” гэлээ.