Долдугаар сарын 1-ний буюу иргэдийг буудан хөнөөсөн хэрэгт шүүгдэж байгаа цагдаагийн хурандаа нарыг шүүх хурал болтол цагдан хорих шийдвэрийг энэ сарын 14-ний өдөр гаргасан. Эл шийдвэрийг эсэргүүцсэн өмгөөлөгчдийн гомдлыг шүүх өнөөдөр хэлэлцээд өмнөх буюу цагдан хорих шийдвэрээ хэвээр үлдээснээ мэдэгдсэний дараа шүүгдэгчдийн өмгөөлөгчид хэвлэлийн хурал зарлан сэтгүүлчдэд мэдээлэл хийлээ. Өмгөөлөгчдийн зүгээс эл шийдвэрийг эсэргүүцэн дараагийн шатанд гомдол гаргана гэдгээ мэдэгдлээ. Учир нь цагдан хорих шийдвэр гаргах болсон үндэслэлийг буруутгаж байгаа бөгөөд хэргийн оролцогч нарын зүгээс татгалзсан хууль бус бүрэлдэхүүн тэрхүү тогтоолыг гаргасан гэж үзэж байна.  

Шүүгчдэгчдийн зүгээс өмгөөлөгч өвдсөн, гадаадад явсан зэрэг шалтгаанаар шүүх хурлыг удаа дараа хойшлуулж ирсэн нь шүүн таслан үйл ажиллагааг тасалдуулах үйлдэл гэж үзэж цагдан хорих шийдвэрийг гаргасан юм. Тэгвэл энэ нь хууль ёсны эрхээ эдэлсэн өмгөөлөгчдийг үндэслэлгүйгээр буруутгаж байгаа хэрэг гэж үзэж байна. Өмгөөлөгч нь шүүх хуралд оролцох боломжгүй байгаа тухай хүндэтгэн үзэх шалтгаанаа нотолсоор байтал үйлчлүүлэгчийг нь дарамтлах, цагдан хорих явдал хавтгайрч байгаа гэж мөн мэдэгдлээ. Дээрх хэрэгт шүүгдэж буй цагдаагийн хурандаа нарыг цагдан хорих шийдвэрийн талаар Монголын шүүгчдийн холбооноос гаргасан мэдэгдэлд бас шүүмжлэлтэй хандаж байгаа гэв. Цагдан хорих тухай тогтоолын талаар гаргасан гомдлыг албан ёсоор хэлэлцээгүй байхад тэрхүү тогтоолын зорилго, үндэслэлийн талаар шүүгчдийн холбоо зөвтгөсөн шинжтэй мэдэгдэл гаргаж байгаа үйлдэл нь энэ хэргийн талаар гарах эцсийн шийдвэр нь урьдчилан төлөвлөгдсөн гэж харагдуулахуйц үйл явдал гэж н.Алтангэрэл нарын өмгөөлөгчид мэдээллээ.