Цагдаа нар жагсах нь хол­гүй юм боллоо, уржигдар. Тэгсэн бол балрахгүй юу. Хэн тэднийг болиулах юм. Цагдаа цагдаагаа өмөөрөөд үймээн самуун дэгдээхээс наахнуур юм болж байхад цагдаа нар ирж цагдаагаа тараана гэж юу байх билээ. Гэхдээ азаар ийм зүйл болоогүй. Уг нь тэнд цугларсан цагдаа нарыг эмх замбараагүй байдал гаргахаас урьдчилан сэргийлж албан үүр­гээ гүйцэтгэж байгаа юм байх гэж шүүх хурал эхлэхийн өм­нө олон хүн бодсон. Гэтэл тийм биш байлаа. Харин тэд экс дарга нараа өмөөрч энд ир­сэн нь тодорхой болсон. Шүү­хийн байрны өмнө бөө­нөөрөө “Яавал ч яана шүү” гэсэн шиг хөлхөлдөөд л. Бас Н.Энхбаярын намын шта­бын­хан ч тэдний бөөрөнд наалд­чихсан бичиг, цаас барьж ори­­лол­доод л. Сүртэй юм бо­лох шахлаа. Хохирогч, шүүг­дэгч­дийн ар гэрийнхэн ч тэнд бас байсан. “Хоол болтол шийр зугаа” гэдэг шиг  хоёр талд зогс­чихсон хэл, амаа би­лүүдээд л зүгээр байгаагүй. Сүүл­дээ ч хонь, хурга нийлсэн л дээ.  
 
Тэгсэн телевизийн сур­валж­лагч охинд ярилцлага өгч байгаа МАХН-ын хөгжөөн дэмжигч хэдэн хөгшний да­ралт дээш, доошоо болсон уу яасан, ам нь “халж” гарав. “Ер нь тэр үед Ерөнхийлөгч байсан Н.Энхбаярт хариуцлага тооцох хэрэгтэй. Энэ муусайн цагдаа хүүхдүүдийн буруу гэж юу байх юм. Тушаал өгсөн бол биелүүлэхээс аргагүй. Гол нь тэр тушаалыг Н.Энхбаяр л өгсөн байх” хэмээн хөгшдийн  нэг нь сурвалжлагчид ярив. Түүний хажууд зогсож байсан бас нэг өвгөн яриаг нь өлгөж аваад л явчихлаа. “Н.Энхбаяр шүүх хуралд гэрчээр ирж оролцоно гэж хоёр хоногийн өмнө яриад байсан. Одоо хаана байна. Энэ луйварчид ийм байх..г..үй юу, муу..сай..н”. Байдал бишдээд явчихав бололтой. Тэндээс өөр нэг хөгшин санд мэнд хүрч ирэн тэдний яриаг ийн болиулав. Өнөөх “манарсан” хоёр өвгөн ч болохгүй зүйл ярьснаа тэр­хэн зуур ойлгов бололтой. Хэдэн минутын өмнөх дүр төрх нь эрс өөр болж гэм хийсэн хүүхэд шиг царайлав. Гартаа барьсан бичиг, цаасаа дээш өргөх “ажилтай” яваагаа гэнэт санав бололтой нэгийгээ сугадан “Одоо ч баларсан байх аа, хө” хэмээн бүг, бүг ханиасаар цааш явж одов. Тэд ч “цалин”-гаасаа хасуулсан байх даа, зайлуул. Уг нь хоёр хөгшний буруу ч гэж юу байх вэ. Магадгүй тэдэнд “хүчээр” ам дөрвөлжин цаас бариулсан хүмүүс нь “Цагдааг л өмөөрөөд байгаарай” гэснээс биш на­мын даргыг хэрхэвч муулж бо­лохгүй гэж сануулаагүй байж болно шүү дээ.