Цагдаагийн ерөнхий газрын дар­гын үүрэг гүйцэтгэгч асан, хошууч генерал Ч.Амарболд нарыг шүүх хурал уржигдар болсон. Сүхбаатар дүүргийн шүү­хээс тэднийг цаг­дан хорих шийдвэр гаргасан юм. Шүүгдэгчид үүнийг хүлээн зөв­шөөрөхгүй байгаагаа илэрхийлсэн. Мөн шүүхийн байрны гадаа жагс­сан цагдаа нар “Ч.Амарболд нарыг хоривол ажил хаялт зарлаж, тэмцэл хийнэ” гэсэн  юм. Тиймээс зарим хүнээс “Цагдаа нар, шүүгдэгчид шүү­хийн шийдвэрийг эсэргүүцэх эрхтэй юү. Цагдаа нар ажил хаялт зарлахаа мэ­дэгдсэн нь шүүхийн шийдвэрт нөлөөлөх, төрийн эргэлт хийх гэсэн оролд­лого мөн үү” гэсэн асуултад хариулт авлаа.

Цагдаагийн ерөнхий газрын Тамгын газрын дарга Ц.Арвинбуудай: Цагдаа нар албан үүргээ гүйцэтгэсэн

-Шалгуулж байгаа албан хааг­чид болон ар гэрийнхнийх нь зүгээс эрүү­гийн хуулийн зүйлчлэлээр бу­руут­гаж байгаа талаар санал, хү­сэлт тавьж байгаа. Цагдаагийн ерөнхий газраас мөрдөн бай­цаалт, прокурор, шүүхийнхэнд зүйлчлэлтэй холбоотой асуудлыг су­далж үзэх талаар хүсэлт тавьж байна. Шүүхийн байр­ны гадна байсан цагдаа нарын хувьд шүүх хуралдааны дэгийг сахиу­лах, шүүх бүрэлдэхүүн болон шүүг­дэгч­дийн аюулгүй байдлыг хангах чиг үүрэгтэй ажиллаж байсан. “Шүүх үйл ажиллагааг тасалдуулахад оролц­сон, хэвийн үйл ажиллагааг ал­даг­дуулсан” гэж мэдээлж байгаа нь үн­дэслэлгүй. Мөн үзэл бодлоо илэрхийлэхээр очсон. Цаг­даагийн албан хаагчид ажил хаяхыг хуулиар хориглосон байдаг. Одоо­гийн байдлаар цагдаагийн бие бүрэл­дэхүүний хэмжээнд “Ажил хая­сан. Ажил хаяна. Тэмцэл хийнэ” гэсэн мэдээлэл байхгүй байна.

УИХ-ын гишүүн Х.Тэмүүжин: Цагдаа нар шүүн таслах үйл ажиллагааг тасалдуулж болохгүй

-Шүүхийн шийдвэрийг хүлээн зөв­шөөрөхгүй байгаа тохиолдолд гомдол гаргах эрх нь нээлттэй. Харин шүүн таслах үйл ажиллагааг тасалдуулж, шүүгчдийг заналхийлээд байж бо­лох­гүй. Зарим нэг хүмүүст цагдаа нарыг бослого, тэм­цэлд турхирах сонирхол байх шиг байна. Цагдаагийн удирдах ал­бан тушаалтнууд, цагдаагийн ху­ран­даа нар арьсаа хамгаалахын тулд албаа хааж байгаа цагдаа на­рыг хөөргөж байгаа нь зохисгүй үйл­дэл. Цагдаа нарыг дуртай үедээ иймэр­хүү байдлаар ашиглаад, зодож, зан­чаад, тушаагаад байж болохгүй. Энэ системийг өөрчлөх зайлшгүй шаардлага байна. Цагдаагийн дарга нарыг шүүх үеэр жирийн цагдаа нарыг ажлаа хийж байхад нь ав­чирч зогсоосон байна лээ. “Цөөн хэдэн хурандаа нар шантааж, занал­хийлэлээр хөрөнгөжиж, цаг­дааг цагдаа биш болгож байгаа” гэ­сэн шүүмжлэлийг жирийн цагдаа нар хэлж байгаа. Энэ хөрөнгөлөг хурандаа нар болон тэдэнд базуулсан улс төрчид цагдаагийн нэр хүндийг шавхайтай хутгаж байна.

Хууль зүй, дотоод хэргийн яамны Төрийн нарийн бичгийн дарга Г.Баясгалан: Цэргийн гэмт хэргээр зүйлчилж болохгүй

-Шүүн таслах ажиллагаанд Хууль зүй, дотоод хэргийн яам хөндлөнгийн дүгнэлт хийх эрх байхгүй. Цагдаагийн албан хаагчдын ар гэрийнхний зүгээс шалгагдаж байгаа цагдаагийн албан хаагч нарт хууль, эрх зүйн туслалцаа өгөх  хүсэлт гаргасан байдаг. Албан тушаалтнуудыг цэргийн гэмт хэргээр зүйлчлэн яллаж байгаа. Албан үүр­гээ гүйцэтгэж байсан цагдаагийн албан хаагчийг цэргийн гэмт хэргээр зүйлчилж, ял шийтгэхгүй гэсэн хуулийн заалт бий. Ийм хууль зүйн орчин 2008 оны хоёрдугаар сард байхгүй болсон. Долоодугаар сарын 1-нд албан үүргээ гүйцэтгэж байсан цагдаагийн удирдлагууд нийтийг хамарсан эмх замбараагүй үйлдлийг таслан зогсоохдоо галт зэвсэг хэрэглэх тушаал огт өгөөгүй, буу тавьж олгоогүй.