Дундговь аймгийн Сайхан-Овоо сумын харьяат улсын начин Ц.Улаанхүү хар тамхи зөөвөрлөсөн, бусдад дамжуулсан хэргээр Баянзүрх дүүргийн шүүхээс 11 жилийн хорих ял сонссон. Тэрбээр шүүхийн шийдвэрийг хэсэргүүцэж шат шатны шүүхэд хандсанаар Дээд шүүхээс хэргийг нэмэлт мөрдөн байцаалтад буцаасан юм. Тэгвэл уг хэрэг дахин анхан шатны шүүхэд иржээ. Түүнд холбогдох хэргийг шүүх хурал Баянзүрх дүүргийн шүүхэд өнөөдөр 16.00 цагт болох  байсан ч энэ сарын 26-ны өдөр болтол хойшилжээ. Учир  нь  уг хуралд гэрчээр оролцох байсан Н.Болдбаатар шүүх хуралд ирээгүй учир хойшлуулсан байна. Түүнийг хүндэтгэх шалтгаангүйгээр хуралд ирээгүй гэж үзээд  торгуулийн арга хэмжээ авахаар болсон байна. Түүнд  өнгөрөгч онд хоёр шатны шүүхээс Эрүүгийн хуулийн 192.3.1-д зааснаар сэтгэцэд нөлөөлөх эм, бэлдмэл, бодисыг борлуулах зорилгоор хууль бусаар бэлтгэсэн, олж авсан, хадгалсан, тээвэрлэсэн, илгээсэн, борлуулсан гэх үндэслэлээр буруутган, 11 жилийн хорих ялыг чанга дэглэмтэй хорих ангид эдлүүлэх шийдвэр гарч байсан билээ.