ЭЕШ-ын бүртгэл дөрөвдүгээр сарын 16-ны 18.00 цагт дуусах бөгөөд цагийг сунгахгүй, нэмэлт бүртгэл хийхгүй тухай албаныхан анхааруулж байна. Бүртгэлийг  www.eec.mn вебсайтаар хийж байгаа бөгөөд шалгуулагч нь шалгалтын хураамжийг “ХААН” банкнаас бусад банкны төлбөрийн мастер болон виза картаар шилжүүлэх юм. Нэг шалгалтын хураамж 4800 төгрөг,харин батламж карт 700 төгрөг байх бөгөөд хэдэн ч шалгалт өгсөн нэг батламж карттай байна. Өнөөдрийн байдлаар 11 мянга гаруй шалгуулагч бүртгүүлээд байгаа ажээ. Энэ жилийн Элсэлтийн ерөнхий шалгалт БСШУ-ны сайдын 2012 оны гуравдугаар сарын 6-ны өдрийн  97 тоот  тушаалын хавсралтаар баталсны дагуу  зургадугаар сарын 8-10-ны өдрүүдэд тус тус болох юм.

Баянгол дүүрэгт  “Өнөөдрийн Баянгол” сонинд ЭЕШ-ын журмыг алдаатай, буруу ташаа нийтэлсэн нь шалгуулагч болон иргэдийг төөрөгдүүлэхэд хүргэж байгаа гэнэ. Түүнчлэн “Ёхова” ТББ, “Цахим сорилго” ХХК зэрэг байгууллага нь БҮТ-ийн нэрийг барьж ерөнхий шалгалтанд бэлтгэхэд зориулж өвлийн сорилго, тандалт шалгалт гэх мэт шалгалтыг зохион байгуулж шалгуулагчдаас ихээхэн хэмжээний хураамж авч чирэгдүүлж байгаа нь БҮТ-тэй ямар нэг байдлаар холбоогүй болохыг албаныхан мэдэгдэж байна.

Боловсролын үнэлгээний төвөөс энэ жил ЭЕШ-ын бүртгэлийн талаар найман дүүргийн хэмжээнд гуравдугаар сарын 9-нөөс дөрөвдүгээр сарын 13-ыг дуустал 130 гаруй сургуульд сургалт яриа, мэдээ мэдээллийг хийсэн гэнэ.  Орон нутагт БСГ-ын дэргэдэх ЭЕШ хариуцсан ажилтан биечлэн ажиллаж, зөвлөгөө мэдээллийг биечлэн болон 70119498, 70119484  дугаарын утсаар, www.eec.mn сайтын онлайн туслах болон 30 гаруй хэвлэл мэдээллийн байгууллагаар дамжуулан мэдээлэл хүргэж байгаа юм байна.