Тив, дэлхийн төвшний алдартай бөхчүүдийг сургаж, бэлтгэсэн дасгалжуулагч нарыг шагнаж байх медалийг Олон улсын бөхийн төрлүүдийн нэгдсэн холбоо буюу FILA-гаас бий болгожээ. Уг медалийг анх удаа ЗХУ болон ОХУ-ын Гавьяат дасгалжуулагч Юрий Шахмурадов, Дэги Багаев нарт ФИЛА-гийн ерөнхийлөгч Рафаэль Мартинетти саяхан Серби улсын Белград хотод болсон Европийн аварга шалгаруулах тэмцээний үеэр гардуулжээ.

Юрий Шахмурадов нь 1966-1967, 1969 онд Европийн аварга болж, ДАШТ-нд 1970 онд түрүүлж байсан юм. Түүнийг 1972-1981 онд ЗХУ-ын шигшээ багийн дасгалжуулагчаар ажиллаж байх хугацаанд нь зөвлөлтийн бөхчүүд  олимпиос 12медаль хүртэж байв. Ерээд оны үед Турк, Итали улсад дасгалжуулагчаар ажиллаж байгаад 1993 оноос ОХУ-ын шигшээ багийн ахлах дасгалжуулагчаар, дараа нь Дагестан улсын Олимпийн бэлтгэлийн төвийн захирлаар ажиллаж байжээ.

Дэги Багаев нь чөлөөт бөхийн чеченийн дэгийг үндэслэгч гэж тооцогддог хийгээд 27 настайдаа Гавьяат дасгалжуулагч цол хүртэж байжээ. Тэрбээр дэлхийн аварга Асланбек Бисултанов, Хасан Оруцев, Салман Хасимиков, Тарам Магомедов, Адлан Вараев нарын дасгалжуулагч байв. Тэрбээр олимпийн гурван удаагийн аварга Бувайсар Сайтиев, түүний ах олимпийн аварга Адам Сайтиев, Европийн дөрвөн удаагийн аварга Жамал Отарсултанов зэрэг алдартай бөхчүүдийг чөлөөт бөхийн спортод бэлтгэсэн юм.