Барилгын чиглэлээр үйл ажиллагаа явуулдаг байгууллагууд гуравдугаар сарын 15-19-ний өдрүүдэд “Мишээл экспо”-д  цуглах гэж байна. Энэ өдрүүдэд Зам тээвэр, барилга хот байгуулалтын яамнаас “Барилга экспо 2012” үзэсгэлэн, худалдааг зохион байгуулах юм. Үзэсгэлэн, худалдаанд барилгын материалын үйлдвэрлэл, импорт, худалдаа эрхлэгчид, барилга орон сууцны захиалга авч буй байгууллагууд болон үл хөдлөх хөрөнгийн зуучлагч аж ахуй нэгжүүд оролцох юм байна. Түүнчлэн барилгын засвар үйлчилгээ, засал чимэглэл, интерьер, даатгалын компаниуд оролцох гэнэ.

“Барилга экспо-2012” хүн амыг орон сууцжуулж, барилгын салбарт хэрэгцээт шинэ техник технологийг танилцуулах, ард иргэдийн хэрэгцээ, шаардлагыг хангах, зах зээлийг өргөжүүлэх талаар цогц мэдээлэл өгч, хооронд нь холбох зорилготой юм. Жил бүр зохион байгуулдаг уг үзэсгэлэн энэ жил иргэдэд ихээхэн ач холбогдолтой болох хандлагатай байгаа тухай албаныхан мэдээлж байна. Учир нь 100 мянган айлын орон сууцны зээлд хамрагдах хүсэлтэй ард иргэд байрны чанар, стандартын талаарх мэдээллийг авах шаардлагатай байгаа энэ үетэй зэрэгцэн болж буйгаараа онцлог гэнэ.