ᠬᠡᠦᠬᠡᠳ ᠦᠨ ᠢᠶᠡᠨ EQ ᠬᠦᠭᠵᠢᠯ ᠳᠦ ᠠᠩᠬᠠᠷᠬᠤ ᠵᠦᠢᠯᠡᠰ ᠦᠨ ᠲᠠᠯᠠ ᠪᠠᠷ Focus on the Family Mongolia ᠪᠠᠶᠢᠭᠤᠯᠤᠯᠭᠠ ᠶᠢᠨ ᠲᠡᠷᠢᠭᠦᠨ᠂ ᠺᠯᠢᠨᠢᠺ ᠰᠡᠳᠬᠢᠯ ᠵᠦᠢᠴᠢ ᠲ∙ᠬᠣᠩᠭᠣᠷᠵᠤᠯᠠ ᠲᠠᠢ ᠶᠠᠷᠢᠯᠴᠠᠯᠠ᠃
– ᠰᠠᠶᠢᠨ ᠪᠠᠶᠢᠨᠠ ᠤᠤ᠂ ᠶᠠᠭᠤᠨ ᠤ ᠡᠮᠦᠨᠡ EQ ᠭᠡᠵᠦ ᠴᠤᠬᠤᠮ ᠶᠠᠮᠠᠷ ᠴᠢᠳᠠᠪᠤᠷᠢ ᠪᠣᠯᠬᠤ ᠲᠠᠯᠠ ᠪᠠᠷ ᠤᠩᠰᠢᠭᠴᠢᠳ ᠲᠤ ᠮᠡᠳᠡᠭᠡᠯᠡᠯ ᠥᠭᠬᠦ ᠦᠭᠡᠢ ᠤᠤ︖
– EQ ᠭᠡᠳᠡᠭ ᠨᠢ ᠥᠪᠡᠷ ᠦᠨ ᠪᠣᠯᠤᠨ ᠪᠤᠰᠤᠳ ᠤᠨ ᠰᠡᠳᠬᠢᠯ ᠬᠥᠳᠡᠯᠦᠯ ᠢ ᠤᠶᠢᠯᠠᠭᠠᠬᠤ ᠂ ᠵᠣᠬᠢᠴᠠᠭᠤᠯᠬᠤ᠂ ᠬᠠᠷᠢᠯᠴᠠᠭᠠᠨ ᠤ ᠤᠷᠠ ᠴᠢᠳᠠᠪᠤᠷᠢ᠂ ᠳᠣᠲᠣᠭᠠᠳᠤ ᠮᠣᠲ᠋ᠢᠸᠠᠼᠢ ᠪᠤᠶᠤ ᠰᠡᠳᠦᠯ ᠰᠠᠨᠠᠭᠠᠴᠢᠯᠠᠭᠠ ᠶᠤᠮ᠃ ᠲᠤᠬᠠᠶᠢᠯᠠᠪᠠᠯ᠂ ᠮᠣᠩᠭᠣᠯᠴᠤᠳ ᠤᠨ ᠬᠤᠪᠢ ᠳᠤ ᠠᠯᠢᠪᠠ ᠵᠦᠢᠯ ᠳᠦ ᠳᠣᠭᠰᠢᠨ ᠰᠢᠷᠦᠭᠦᠨ ᠪᠠᠶᠢᠳᠠᠯ ᠢᠶᠠᠷ ᠬᠠᠷᠢᠯᠴᠠᠵᠤ᠂ ᠨᠢᠳᠤᠷᠭᠠ ᠵᠥᠷᠢᠭᠦᠯᠵᠦ᠂ ᠬᠤᠷᠳᠤᠨ ᠲᠠᠶᠢᠪᠤᠰᠢᠷᠠᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠣᠯᠠᠨ ᠨᠡᠶᠢᠲᠡ ᠶᠢᠨ ᠰᠦᠯᠵᠢᠶᠡᠨ ᠳᠦ ᠪᠤᠰᠤᠳ ᠢ ᠳᠣᠷᠣᠮᠵᠢᠯᠠᠵᠤ᠂ ᠪᠤᠷᠤᠭᠤᠳᠬᠠᠳᠠᠭ᠂ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠯ ᠬᠥᠳᠡᠯᠦᠯ ᠢᠶᠡᠨ ᠨᠢᠭᠤᠵᠤ ᠳᠠᠷᠤᠳᠠᠭ᠂ ᠤᠬᠢᠯᠠᠬᠤ ᠶᠢ ᠰᠤᠯᠠ ᠳᠣᠷᠣᠢ ᠭᠡᠵᠦ ᠦᠵᠡᠳᠡᠭ᠂ ᠠᠯᠢᠪᠠ ᠵᠦᠢᠯ ᠢ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠪᠠᠷ ᠥᠪᠡᠷ ᠦᠨ ᠬᠦᠰᠡᠯ ᠦᠨ ᠳᠠᠭᠠᠤ ᠬᠢᠳᠡᠭ ᠦᠭᠡᠢ ᠵᠡᠷᠭᠡ ᠨᠢ EQ ᠦᠨ ᠬᠥᠭᠵᠢᠯ ᠲᠠᠭᠠᠷᠠᠤ ᠪᠠᠶᠢᠭᠠ ᠲᠠᠢ ᠬᠣᠯᠪᠣᠭᠠ ᠲᠠᠢ᠃
– ᠲᠡᠭᠡᠪᠡᠯ ᠡᠴᠢᠭᠡ᠂ ᠡᠬᠡᠴᠦᠳ ᠬᠡᠦᠬᠡᠳ ᠲᠦ ᠪᠡᠨ EQ ᠴᠢᠳᠠᠪᠤᠷᠢ ᠰᠠᠭᠤᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠬᠡᠷᠬᠢᠨ ᠬᠠᠷᠢᠯᠴᠠᠵᠤ᠂ ᠣᠶᠢᠯᠠᠭᠠᠯᠴᠠᠵᠤ᠂ ᠰᠤᠷᠭᠠᠬᠤ ᠶᠣᠰᠣᠲᠠᠢ ᠪᠠᠶᠢᠳᠠᠭ ᠪᠤᠢ︖
– EQ ᠦᠨ ᠬᠦᠭᠵᠢᠯ ᠳᠦ ᠬᠠᠮᠤᠭ ᠤᠨ ᠭᠣᠣᠯ ᠵᠦᠢᠯ ᠨᠢ ᠡᠴᠢᠭᠡ᠂ ᠡᠬᠡ ᠶᠢᠨ ᠬᠠᠷᠢᠯᠴᠠᠭᠠ᠂ ᠭᠡᠷ ᠪᠦᠯᠢ ᠶᠢᠨ ᠣᠷᠴᠢᠨ᠃ ᠬᠠᠷᠢᠯᠴᠠᠭᠠ ᠪᠠᠶᠢᠬᠤ ᠦᠭᠡᠢ ᠪᠣᠯ ᠬᠦᠮᠦᠨ ᠥᠪᠡᠷ ᠲᠦ ᠲᠦᠷᠦᠵᠦ ᠪᠤᠢ ᠰᠡᠳᠬᠢᠭᠳᠡᠯ ᠢᠶᠡᠨ ᠢᠯᠡᠷᠬᠡᠶᠢᠯᠡᠬᠦ ᠶᠠᠮᠠᠷ ᠴᠤ ᠪᠣᠯᠤᠮᠵᠢ ᠦᠭᠡᠢ ᠰᠢᠦ ᠳ᠋ᠡ᠃ ᠵᠢᠱᠢᠶᠡ ᠨᠢ ᠬᠡᠦᠬᠡᠳ ᠦᠳ ᠭᠡᠷ ᠲᠦ ᠪᠡᠨ ᠲᠠᠭᠠ ᠦᠭᠡᠢ ᠰᠡᠳᠬᠢᠭᠳᠡᠯ ᠢᠶᠡᠨ ᠢᠯᠡᠷᠬᠡᠶᠢᠯᠡᠬᠦ ᠪᠡᠷ ᠡᠴᠢᠭᠡ᠂ ᠡᠬᠡᠴᠦᠳ ᠨᠢ ᠲᠡᠷᠡ ᠪᠣᠯᠭᠠᠨ ᠬᠦᠯᠢᠶᠡᠵᠦ ᠠᠪᠴᠤ ᠴᠢᠳᠠᠳᠠᠭ ᠦᠭᠡᠢ᠃ ︽ᠴᠢ ᠶᠠᠭᠠᠬᠢᠭᠰᠠᠨ ᠭᠡᠵᠦ ᠤᠬᠢᠯᠠᠳᠠᠭ ᠶᠤᠮ᠂ ᠮᠢᠨᠦ ᠡᠮᠦᠨᠡ ᠠᠴᠠ ᠶᠠᠭᠠᠬᠢᠭᠰᠠᠨ ᠭᠡᠵᠦ ᠶᠠᠭᠤᠮᠠ ᠬᠡᠯᠡᠭᠡᠳ ᠪᠠᠶᠢᠭᠠ ᠶᠤᠮ᠂ ᠬᠤᠷᠳᠤᠨ ᠳᠠᠭᠤ ᠦᠭᠡᠢ ᠪᠣᠯ ︾ ᠭᠡᠬᠦ ᠮᠡᠲᠦ ᠪᠡᠷ ᠡᠰᠡᠷᠭᠦ ᠬᠦᠮᠦᠨ ᠨᠢ ᠲᠠᠭᠠ ᠦᠭᠡᠢ ᠰᠡᠳᠬᠢᠯ ᠬᠥᠳᠡᠯᠦᠯ ᠢᠶᠡᠨ ᠢᠯᠡᠷᠬᠡᠶᠢᠯᠡᠬᠦ ᠪᠣᠯᠤᠮᠵᠢ ᠣᠯᠭᠤᠳᠠᠭ ᠦᠭᠡᠢ᠃
ᠲᠡᠭᠡᠭᠡᠳ ᠬᠡᠦᠬᠡᠳ ᠲᠠᠶᠢᠪᠤᠰᠢᠷᠠᠵᠤ ᠴᠢᠳᠠᠳᠠᠭ ᠦᠭᠡᠢ᠃ ᠢᠩᠭᠢᠭᠰᠡᠨ ᠢᠶᠡᠷ ᠬᠡᠦᠬᠡᠳ ᠳᠣᠲᠣᠷᠠ ᠪᠠᠨ ᠪᠤᠬᠢᠨᠢᠳᠤᠯ ᠲᠠᠢ᠂ ᠡᠵᠢ ᠠᠪᠤ ᠳᠤ ᠪᠠᠨ ᠭᠣᠮᠣᠳᠠᠯ ᠲᠠᠢ ᠶᠠᠪᠤᠭᠰᠠᠭᠠᠷ ᠰᠡᠭᠦᠯ ᠳᠦ ᠪᠡᠨ ᠥᠪᠡᠷ ᠦᠨ ᠢᠶᠡᠨ ᠳᠣᠲᠣᠷᠠ ᠪᠣᠯᠵᠤ ᠪᠠᠶᠢᠭᠠ ᠵᠦᠢᠯ ᠢᠶᠡᠨ ᠨᠡᠭᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠪᠤᠰᠤᠳ ᠲᠠᠢ ᠶᠠᠷᠢᠯᠴᠠᠵᠤ ᠣᠶᠢᠯᠠᠭᠠᠯᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠰᠡᠳᠬᠢᠯ ᠭᠤᠲᠤᠷᠠᠯ ᠳᠤ ᠣᠷᠣᠳᠠᠭ᠃ ᠲᠡᠶᠢᠮᠦ ᠳᠦ ᠡᠴᠢᠭᠡ ᠡᠬᠡᠴᠦᠳ ᠡᠬᠢᠯᠡᠭᠡᠳ ᠥᠪᠡᠷᠰᠡᠳ ᠦᠨ ᠢᠶᠡᠨ ᠰᠡᠳᠬᠢᠯ ᠬᠥᠳᠡᠯᠦᠯ ᠢ ᠲᠠᠨᠢᠵᠤ ᠮᠡᠳᠡᠭᠡᠳ ᠢᠯᠡᠷᠬᠡᠶᠢᠯᠡᠵᠦ ᠴᠢᠳᠠᠳᠠᠭ ᠪᠣᠯᠤᠭᠰᠠᠨ ᠤ ᠳᠠᠷᠠᠭᠠ ᠬᠡᠦᠬᠡᠳ ᠦᠨ ᠢᠶᠡᠨ ᠰᠥᠷᠭᠦ ᠰᠡᠳᠬᠢᠯ ᠬᠥᠳᠡᠯᠦᠯ ᠢ ᠬᠦᠯᠢᠶᠡᠨ ᠠᠪᠴᠤ᠂ ᠵᠥᠪᠯᠡᠵᠦ ᠴᠢᠳᠠᠳᠠᠭ ᠴᠢᠳᠠᠪᠤᠷᠢ ᠲᠠᠢ ᠪᠣᠯᠬᠤ ᠬᠡᠷᠡᠭᠲᠡᠢ᠃ ᠬᠡᠦᠬᠡᠳ ᠠᠶᠤᠵᠤ ᠡᠮᠢᠶᠡᠯ ᠦᠭᠡᠢ ᠪᠡᠷ ᠰᠡᠳᠬᠢᠯ ᠬᠥᠳᠡᠯᠦᠯ ᠢᠶᠡᠨ ᠢᠯᠡᠷᠬᠡᠶᠢᠯᠡᠬᠦ ᠣᠷᠴᠢᠨ ᠳᠤᠲᠠᠭᠳᠠᠵᠤ ᠪᠠᠶᠢᠨᠠ᠃ ᠶᠠᠮᠠᠷ ᠴᠤ ᠦᠶᠡ ᠳᠦ ᠬᠡᠦᠬᠡᠳ ᠡᠴᠢᠭᠡ᠂ ᠡᠬᠡ ᠲᠡᠢ ᠪᠡᠨ ᠠᠶᠤᠵᠤ ᠡᠮᠢᠶᠡᠯ ᠦᠭᠡᠢ ᠪᠡᠷ ᠰᠡᠳᠬᠢᠯ ᠬᠥᠳᠡᠯᠦᠯ ᠪᠣᠯᠤᠨ ᠦᠵᠡᠯ ᠪᠣᠳᠣᠯ ᠢᠶᠠᠨ ᠴᠢᠯᠦᠭᠡᠲᠡᠢ ᠢᠯᠡᠷᠬᠡᠶᠢᠯᠡᠬᠦ ᠪᠣᠯᠤᠮᠵᠢ ᠣᠯᠭᠣᠬᠤ ᠶᠣᠰᠣᠲᠠᠢ᠃ ᠵᠢᠱᠢᠶᠡ ᠨᠢ ᠬᠡᠦᠬᠡᠳ ᠤᠬᠢᠯᠠᠬᠤ ᠳᠤ ᠶᠠᠭᠤᠨ ᠠᠴᠠ ᠪᠣᠯᠤᠭᠰᠠᠨ ᠰᠢᠯᠲᠠᠭᠠᠨ ᠢ ᠨᠢ ᠠᠰᠠᠭᠤᠵᠤ᠂ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠶᠠᠮᠠᠷ ᠪᠠᠶᠢᠭᠠ ᠶᠢ ᠨᠢ᠂ ᠪᠤᠬᠢᠨᠢᠳᠤᠯ ᠳᠤ ᠬᠦᠷᠭᠡᠭᠰᠡᠨ ᠰᠢᠯᠲᠠᠭᠠᠨ ᠢ ᠨᠢ ᠵᠠᠪᠠᠯ ᠰᠣᠨᠣᠰᠴᠤ ᠰᠤᠷᠬᠤ ᠬᠡᠷᠡᠭᠲᠡᠢ᠃ ᠮᠥᠨ ᠬᠦᠮᠦᠰ ᠡᠶᠡᠷᠭᠦ ᠪᠠᠶᠢᠶᠠ᠂ ᠡᠶᠡᠷᠭᠦ ᠵᠦᠢᠯ ᠢ ᠪᠣᠳᠣᠶᠠ ᠭᠡᠳ ᠰᠥᠷᠭᠦ ᠰᠡᠳᠬᠢᠯ ᠬᠥᠳᠡᠯᠦᠯ ᠮᠡᠳᠡᠷᠡᠮᠵᠢ ᠪᠡᠨ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ ᠦᠭᠡᠶᠢᠰᠭᠡᠬᠦ ᠬᠠᠨᠳᠤᠯᠭᠠ ᠶᠡᠬᠡ ᠠᠵᠢᠭᠯᠠᠭᠳᠠᠳᠠᠭ᠃ ᠦᠨᠡᠨ ᠬᠡᠷᠡᠭ ᠲᠦ ᠪᠡᠨ ᠬᠦᠮᠦᠨ ᠭᠤᠨᠢᠭᠯᠠᠬᠤ᠂ ᠲᠠᠭᠠ ᠦᠭᠡᠢ ᠰᠡᠳᠬᠢᠯ ᠬᠥᠳᠡᠯᠦᠯ ᠢᠶᠡᠨ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠢᠯᠡᠷᠬᠡᠶᠢᠯᠡᠬᠦ ᠦᠶᠡ ᠳᠦ ᠲᠠᠭᠠᠯᠠᠮᠵᠢᠲᠠᠢ ᠰᠡᠳᠬᠢᠯ ᠬᠥᠳᠡᠯᠦᠯ ᠮᠡᠳᠡᠷᠡᠮᠵᠢ ᠪᠤᠢ ᠪᠣᠯᠳᠠᠭ ᠶᠤᠮ᠃ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ ᠭᠡᠳ ᠪᠠᠶᠢᠭᠠ ᠰᠥᠷᠭᠦ ᠮᠡᠳᠡᠷᠡᠮᠵᠢ ᠨᠢ ᠡᠰᠡᠷᠭᠦ ᠪᠡᠷ ᠢᠶᠡᠨ ᠲᠡᠷᠡ ᠬᠦᠮᠦᠨ ᠦ ᠪᠦᠬᠦ ᠵᠦᠢᠯ ᠳᠦ ᠰᠦᠷᠭᠦ ᠪᠡᠷ ᠨᠥᠯᠦᠭᠡᠯᠡᠳᠡᠭ ᠢ ᠮᠠᠨᠠᠶᠢᠬᠢᠨ ᠮᠡᠳᠡᠳᠡᠭ ᠦᠭᠡᠢ᠃ ᠡᠬᠢᠯᠡᠭᠡᠳ ᠰᠥᠷᠭᠦ ᠮᠡᠳᠡᠷᠡᠮᠵᠢ ᠪᠡᠨ ᠢᠯᠡᠷᠬᠡᠶᠢᠯᠡᠵᠦ ᠪᠠᠶᠢᠵᠤ᠂ ᠳᠠᠷᠠᠭᠠ ᠨᠢ ᠡᠶᠡᠷᠭᠦ ᠰᠡᠳᠬᠢᠭᠳᠡᠯ ᠢ ᠣᠯᠵᠤ ᠠᠪᠳᠠᠭ ᠪᠤᠶᠤ ᠬᠦᠮᠦᠨ ᠲᠠᠭᠠ ᠦᠭᠡᠢ ᠵᠦᠢᠯ ᠢᠶᠡᠨ ᠭᠠᠷᠭᠠᠵᠤ ᠶᠠᠷᠢᠬᠤ ᠨᠢ ᠰᠠᠶᠢᠨ ᠬᠡᠷᠡᠭ᠃
ᠡᠴᠢᠭᠡ᠂ ᠡᠬᠡ᠂ ᠪᠠᠭᠰᠢ ᠰᠤᠷᠭᠠᠨ ᠬᠦᠮᠦᠵᠢᠭᠦᠯᠦᠭᠴᠢ ᠪᠦᠭᠦᠳᠡ ᠯᠠ ᠬᠡᠦᠬᠡᠳ ᠢ ᠰᠠᠶᠢᠨ ᠬᠦᠮᠦᠨ ᠪᠣᠯᠤᠭᠠᠰᠠᠢ ᠭᠡᠵᠦ ᠬᠦᠰᠡᠳᠡᠭ᠃ ᠬᠢᠴᠢᠶᠡᠯ ᠢᠶᠡᠨ ᠰᠠᠶᠢᠨ ᠬᠢᠭᠡᠳ᠂ ᠱᠠᠩᠨᠠᠯ ᠤᠷᠮᠠᠰᠢᠭᠤᠯᠤᠯ ᠠᠪᠠᠪᠠᠯ ᠰᠠᠶᠢᠨ ᠬᠦᠮᠦᠨ ᠶᠤᠮ ᠰᠢᠭ᠋ ᠣᠶᠢᠯᠠᠭᠠᠵᠤ᠂ ᠰᠢᠬᠠᠵᠤ ᠱᠠᠭᠠᠷᠳᠠᠳᠠᠭ᠃ ᠭᠡᠪᠡᠴᠦ ᠲᠤᠬᠠᠢ ᠶᠢᠨ ᠬᠡᠦᠬᠡᠳ ᠡᠴᠢᠭᠡ᠂ ᠡᠬᠡ ᠪᠠᠭᠰᠢ ᠰᠤᠷᠭᠠᠨ ᠬᠦᠮᠦᠵᠢᠭᠦᠯᠦᠭᠴᠢ ᠨᠠᠷ ᠠᠴᠠ ᠥᠪᠡᠷ ᠢ ᠨᠢ ᠲᠠᠨᠢᠵᠤ ᠮᠡᠳᠡᠵᠦ ᠣᠶᠢᠯᠠᠭᠠᠭᠠᠰᠠᠢ᠂ ᠢᠯᠠᠩᠭᠤᠶᠠ ᠳᠣᠲᠣᠭᠠᠳᠤ ᠬᠦᠮᠦᠨ ᠪᠤᠶᠤ ᠶᠠᠮᠠᠷ ᠰᠡᠳᠬᠢᠯ ᠬᠥᠳᠡᠯᠦᠯ ᠮᠡᠳᠡᠷᠡᠮᠵᠢ ᠲᠥᠷᠦᠭᠡᠳ ᠪᠠᠶᠢᠭᠠ ᠶᠢ ᠮᠡᠳᠡᠭᠡᠰᠡᠢ ᠭᠡᠵᠦ ᠬᠦᠰᠡᠳᠡᠭ᠃ ᠬᠡᠦᠬᠡᠳ ᠢᠶᠡᠨ ᠨᠥᠬᠥᠴᠡᠯ ᠲᠠᠯᠪᠢᠯ ᠦᠭᠡᠢ ᠪᠡᠷ ᠪᠠᠶᠢᠭᠠ ᠪᠠᠷ ᠨᠢ ᠣᠶᠢᠯᠠᠭᠠᠵᠤ ᠬᠦᠯᠢᠶᠡᠵᠦ ᠠᠪᠳᠠᠭ ᠭᠡᠰᠡᠨ ᠮᠧᠰᠰᠧᠵ ᠨᠢ ᠬᠡᠦᠬᠡᠳ ᠥᠪᠡᠷ ᠦᠨ ᠢᠶᠡᠨ ᠲᠠᠯᠠ ᠪᠠᠷ ᠪᠤᠶᠤ ᠪᠤᠰᠤᠳ ᠤᠨ ᠲᠠᠯᠠ ᠪᠠᠷ ᠡᠶᠡᠷᠭᠦ ᠮᠡᠳᠡᠷᠡᠮᠵᠢ ᠪᠣᠳᠣᠯ ᠰᠠᠨᠠᠭᠠ ᠲᠠᠢ ᠪᠠᠶᠢᠬᠤ ᠳᠤ ᠨᠥᠯᠦᠭᠡᠯᠡᠳᠡᠭ᠃ ᠲᠡᠶᠢᠮᠦ ᠡᠴᠡ ᠬᠡᠦᠬᠡᠳ ᠢ ᠠᠮᠵᠢᠯᠲᠠ ᠳᠤ ᠬᠦᠷᠭᠡᠬᠦ ᠭᠣᠣᠯ ᠬᠥᠰᠢᠭᠦᠷᠭᠡ ᠪᠣᠯ ᠳ᠋ᠦᠩ᠂ ᠱᠠᠩᠨᠠᠯ ᠤᠷᠮᠠᠰᠢᠭᠤᠯᠤᠯ ᠪᠢᠰᠢ ᠬᠠᠷᠢᠨ ᠥᠪᠡᠷ ᠢ ᠨᠢ ᠬᠠᠶᠢᠷᠠᠯᠠᠵᠤ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠬᠠᠷᠢᠯᠴᠠᠭᠠ ᠶᠤᠮ᠃ ᠮᠥᠨ ᠬᠡᠦᠬᠡᠳ ᠢᠶᠡᠨ ᠶᠠᠮᠠᠷ ᠴᠤ ᠦᠶᠡ ᠳᠦ ᠶᠡᠬᠡ ᠲᠡᠪᠡᠷᠢᠳᠡᠭ ᠪᠠᠶᠢᠭᠠᠷᠠᠢ᠃ ᠢᠩᠭᠢᠭᠰᠡᠨ ᠢᠶᠡᠷ ᠢᠲᠡᠭᠡᠯᠴᠡᠯ ᠪᠠ ᠰᠡᠳᠬᠢᠯ ᠦᠨ ᠬᠣᠯᠪᠣᠭᠠᠰᠤ ᠪᠣᠯᠬᠤ ᠬᠤᠷᠮᠤᠨ ᠢ ᠪᠡᠶᠡ ᠳᠦ ᠢᠯᠭᠠᠷᠠᠭᠤᠯᠳᠠᠭ᠃