ᠮᠣᠩᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠶᠢᠯᠡᠭᠴᠢ ᠠᠰᠠᠨ ᠴ᠊·ᠡᠯᠪᠡᠭᠳᠣᠷᠵᠢ ᠥᠩᠭᠡᠷᠡᠭᠰᠡᠨ ᠪᠠᠰᠠᠩ ᠭᠠᠷᠠᠭ ᠲᠤ ᠲᠣᠣᠺᠢᠣ᠋ ᠤᠯᠠᠭᠠᠨᠪᠠᠭᠠᠲᠤᠷ ᠴᠢᠭᠯᠡᠯ ᠤᠨ ᠲᠤᠰᠬᠠᠢ ᠡᠭᠦᠷᠭᠡ ᠶ᠋ᠢᠨ ᠨᠢᠰᠦᠯᠭᠡ ᠪᠡᠷ ᠮᠣᠩᠭᠣᠯ ᠳ᠋ᠤ ᠪᠠᠨ ᠢᠷᠡᠭᠡᠳ ᠪᠠᠶᠢᠭᠠ ᠪᠢᠯᠡ᠃ ᠲᠡᠷᠡ ᠪᠡᠷ 21 ᠬᠣᠨᠣᠭ ᠤᠨ ᠲᠤᠰᠠᠭᠠᠷᠯᠠᠯᠲᠠ ᠳ᠋ᠤ ᠣᠷᠣᠭᠠᠳ ᠪᠠᠶᠢᠭᠠ ᠪᠥᠭᠡᠳ ᠡᠬᠡ ᠣᠷᠣᠨ ᠳᠤ ᠪᠠᠨ ᠢᠷᠡᠭᠰᠡᠨ ᠲᠤᠬᠠᠢ ᠲᠡᠮᠳᠡᠭᠯᠡᠯ ᠬᠥᠲᠥᠯᠥᠨ ᠥᠪᠡᠷ ᠤᠨ ᠴᠠᠬᠢᠮ ᠬᠠᠭᠤᠳᠠᠰᠤᠨᠠ ᠨᠡᠶᠢᠲᠡᠯᠡᠵᠡᠢ ᠃
ᠰᠠᠶᠢᠨ ᠪᠠᠶᠢᠵᠠᠭᠠᠨᠠ ᠦᠦ︕ ᠲᠣᠣᠺᠢᠣ᠋ ᠡᠴᠠ ᠤᠯᠠᠭᠠᠨᠪᠠᠭᠠᠲᠤᠷ᠂ ᠺᠠᠷᠠᠨ᠋ᠲ᠋ᠢᠨ᠃ ᠪᠢᠴᠢᠬᠠᠨ ᠲᠡᠮᠳᠡᠭᠯᠡᠯ ᠪᠢᠴᠢᠭᠰᠡᠨ ᠢᠶ᠋ᠡᠨ ᠬᠦᠷᠭᠡᠶᠡ᠃ ᠲᠠᠭᠠᠯᠠᠵᠤ᠂ ᠲᠦᠭᠡᠭᠡᠵᠦ ᠰᠣᠶᠣᠷᠬᠠᠨᠠ ᠦᠦ᠃ ᠰᠠᠶᠢᠨ ᠶᠠᠪᠤᠵᠤ ᠢᠷᠠᠯᠠ᠃ ᠥᠷᠯᠥᠭᠡ 4 ᠴᠠᠭ ᠲᠤ ᠪᠣᠰᠣᠯᠠ᠃ ᠶᠠᠭᠤᠮᠠ ᠪᠠᠨ ᠡᠮᠬᠢᠯᠡᠭᠡᠳ 5 ᠭᠡᠬᠦ ᠳ᠋ᠥ ᠨᠠᠷᠢᠲ᠋ᠠ ᠣᠯᠠᠨ ᠤᠯᠤᠰ ᠤᠨ ᠣᠩᠭᠣᠴᠠᠨ ᠤ ᠪᠠᠭᠤᠳᠠᠯ ᠤᠷᠤᠭᠤ ᠭᠠᠷᠤᠯᠠ᠃ ᠲᠣᠣᠺᠢᠣ᠋ ᠳᠤ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢ ᠬᠠᠷᠠᠭᠠ ᠦᠭᠡᠢ ᠶᠠᠪᠤᠭᠰᠠᠨ ᠶᠤᠮ ᠪᠣᠯᠪᠠ ᠦᠦ᠂ ᠵᠢᠯᠣᠭᠣ ᠪᠠᠷᠢᠵᠤ ᠶᠠᠪᠤᠭᠰᠠᠨ ᠵᠠᠯᠠᠭᠤ ᠭᠡᠨᠡᠳᠲᠡ ᠥᠭᠡᠳᠡ ᠡᠴᠡ ᠪᠦᠲᠦᠨ ᠢᠶ᠋ᠡᠷ ᠢᠶ᠋ᠡᠨ ᠳᠤᠭᠤᠶᠢᠷᠠᠨ ᠰᠠᠴᠤᠷᠠᠵᠤ ᠲᠤᠰᠬᠤ ᠨᠠᠷᠠ ᠶᠢ ᠬᠠᠷᠠᠭᠠᠳ ᠰᠡᠳᠬᠢᠯ ᠨᠢ ᠬᠥᠳᠡᠯᠦᠭᠰᠡᠨ ᠪᠣᠯᠣᠯᠲᠠᠢ᠃ ᠶᠠᠪᠤᠭᠤᠲᠠ ᠳᠤᠮᠳᠠ ᠪᠠᠨ ᠵᠢᠷᠤᠭ ᠳᠠᠷᠤᠬᠤ ᠭᠡᠵᠦ ᠦᠵᠡᠪᠡ᠃ ᠨᠠᠷᠠᠨ ᠤᠯᠤᠰ ᠤᠨ ᠨᠠᠷᠠ ᠡᠨᠡ ᠥᠷᠯᠥᠭᠡ ᠲᠣᠳᠣ ᠮᠠᠨᠳᠤᠯᠠ᠃ ᠣᠩᠭᠣᠴᠠᠨ ᠤ ᠪᠠᠭᠤᠳᠠᠯ ᠳ᠋ᠤ ᠢᠷᠡᠬᠦ ᠳ᠋ᠥ ᠮᠠᠨ ᠤ ᠠᠬᠠ ᠳᠡᠭᠦᠦ ᠨᠠᠷ ᠠᠷᠤ ᠠᠷᠤ ᠡᠴᠠ ᠪᠠᠨ ᠴᠤᠪᠤᠷᠠᠵᠤ ᠢᠷᠡᠭᠰᠡᠭᠡᠷ ᠤᠷᠲᠤ ᠳᠠᠷᠠᠭᠠᠯᠠᠯ ᠪᠣᠯᠣᠯᠠ᠃ ᠲᠦᠮᠡ ᠲᠦᠵᠢᠭᠢᠨᠡᠵᠦ ᠪᠤᠮ ᠪᠤᠵᠢᠭᠢᠨᠠᠵᠤ ᠪᠠᠶᠢᠳᠠᠭ ᠣᠩᠭᠣᠴᠠᠨ ᠤ ᠪᠠᠭᠤᠳᠠᠯ ᠡᠯᠤᠢ ᠬᠤᠯᠤᠢ᠃ ᠪᠠᠭᠤᠳᠠᠯ᠂ ᠳᠡᠯᠭᠡᠭᠦᠷ᠂ ᠴᠠᠢ ᠶ᠋ᠢᠨ ᠭᠠᠵᠠᠷ᠂ ᠬᠤᠳᠠᠯᠳᠤᠭᠠᠨ ᠤ ᠮᠤᠬᠤᠯᠠᠭ ᠤᠳ ᠪᠠᠷᠤᠭ ᠲᠣᠯᠣᠭᠠᠢ ᠳᠠᠷᠠᠭᠠᠯᠠᠨ ᠬᠠᠭᠠᠯᠭᠠ ᠪᠠᠨ ᠪᠠᠷᠢᠵᠠᠢ᠃ ᠥᠷᠯᠥᠭᠡ 6 ᠳ᠋ᠥ ᠪᠦᠷᠢᠳᠬᠡᠭᠡᠳ 8.30 ᠭᠡᠳ ᠣᠩᠭᠣᠴᠠ ᠬᠥᠭᠡᠷᠬᠦ ᠵᠠᠷ ᠲᠠᠢ᠃ ᠬᠥᠯ ᠪᠠᠭᠠ ᠲᠠᠢ ᠤᠴᠢᠷ ᠶᠠᠭᠠᠷᠠᠬᠤ ᠴᠦ ᠶᠠᠭᠤᠮᠠ ᠠᠯᠠᠭᠠ᠃ ᠪᠢᠲᠡᠭᠦᠦ ᠴᠠᠭᠠᠨ ᠬᠤᠪᠴᠠᠰᠤ᠂ ᠨᠢᠭᠤᠷ ᠠᠮᠠᠨ ᠤ ᠬᠠᠭᠠᠯᠲᠠ ᠲᠠᠢ ᠬᠥᠮᠥᠰ ᠤᠭᠲᠤᠵᠤ ᠦᠢᠯᠡᠴᠢᠯᠡᠪᠡ ᠃ ᠳ᠋ᠤᠭᠠᠷ ᠳᠠᠷᠠᠭᠠᠯᠠᠯ ᠳᠠᠭᠠᠷᠢᠬᠤ ᠶᠠᠭᠤᠮᠠ ᠦᠭᠡᠢ᠂ ᠪᠦᠭᠦᠳᠡ ᠴᠡᠭᠴᠡᠲᠡᠢ ᠂ ᠪᠡᠶᠡᠰ ᠢᠶ᠋ᠡᠨ ᠬᠦᠨᠳᠦᠯᠡᠭᠰᠡᠨ ᠰᠠᠶᠢᠬᠠᠨ ᠠᠭᠤᠷ ᠠᠮᠢᠰᠬᠤᠯ ᠃
ᠰᠠᠶᠢᠨ ᠪᠠᠶᠢᠨᠠ ᠦᠦ᠂ ᠵᠠ ᠣᠳᠣ ᠲᠠ ᠭᠡᠰᠡᠨ ᠰᠠᠶᠢᠬᠠᠨ ᠮᠣᠩᠭᠣᠯ ᠮᠡᠨᠳᠦᠴᠢᠯᠡᠭᠡ᠂ ᠬᠠᠷᠢᠴᠠᠭᠠ ᠃ ᠵᠢᠷ ᠤᠨ ᠦᠶᠡ ᠶ᠋ᠢ ᠪᠣᠳᠣᠪᠠᠯ ᠨᠡᠮᠡᠭᠳᠡᠭᠰᠡᠨ ᠠᠵᠢᠯ ᠪᠠᠰᠠ ᠪᠠᠶᠢᠨᠠ᠃ ᠬᠠᠯᠠᠭᠤᠨ ᠦᠵᠡᠨᠡ ᠂ ᠠᠯᠪᠠᠨ ᠤ ᠵᠢᠭᠠᠪᠤᠷᠢ ᠲᠠᠨᠢᠯᠴᠠᠭᠤᠯᠤᠨᠠ᠂ ᠠᠰᠠᠭᠤᠮᠵᠢ ᠪᠦᠭᠯᠡᠭᠦᠯᠦᠨᠡ᠃ ᠮᠢᠨᠤ ᠬᠠᠯᠠᠭᠤᠨ 36.4 ᠪᠠᠶᠢᠪᠠ᠃ ᠭᠡᠨᠡᠳᠲᠡ ᠬᠠᠯᠠᠭᠤᠷᠠᠭᠠᠳ ᠡᠬᠢᠯᠡᠬᠦ ᠪᠤᠢ᠂ ᠣᠯᠠᠨ ᠬᠥᠮᠥᠨ ᠳ᠋ᠥ ᠭᠠᠢ ᠪᠣᠯᠬᠤ ᠪᠤᠢ ᠭᠡᠵᠦ ᠶᠠᠭᠠᠬᠢᠭᠠᠳ ᠴᠦ ᠶᠤᠮ ᠪᠣᠳᠣᠭᠳᠠᠵᠤ ᠪᠠᠶᠢᠪᠠ᠃
ᠭᠠᠶᠢᠲᠤ ᠡᠪᠡᠳᠴᠢᠨ ᠲᠠᠷᠬᠠᠵᠤ ᠡᠬᠢᠯᠡᠬᠦ ᠦᠶᠡ ᠡᠴᠡ ᠯᠡ ᠬᠤᠪᠢ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ᠂ ᠳᠢᠭᠯᠢᠮ ᠢ ᠰᠠᠶᠢᠨ ᠰᠠᠬᠢᠵᠤ ᠶᠠᠪᠤᠭᠠ ᠶᠤᠮ᠃ ᠪᠣᠯᠭᠣᠮᠵᠢᠯᠠᠬᠤ ᠶᠠᠮᠠᠷ ᠴᠦ ᠰᠢᠨᠵᠢ ᠲᠡᠮᠳᠡᠭ ᠥᠪᠡᠷ ᠲᠥ ᠪᠠᠶᠢᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠴᠦ᠂ ᠴᠠᠭ ᠨᠢ ᠪᠤᠯᠪᠠᠯ ᠬᠥᠮᠥᠨ ᠪᠣᠳᠣᠳᠠᠭ ᠯᠡ ᠶᠤᠮ ᠪᠠᠶᠢᠨᠠ᠃ ᠭᠣᠣᠯ ᠨᠢ ᠥᠪᠡᠷᠲᠡᠭᠡᠨ ᠰᠠᠨᠠᠭᠠ ᠵᠣᠪᠠᠵᠤ ᠪᠢᠰᠢ᠂ ᠪᠤᠰᠤᠳ ᠲᠤ ᠰᠠᠨᠠᠭᠠ ᠵᠣᠪᠠᠵᠤ᠃
ᠣᠩᠭᠣᠴᠠᠨ ᠤ ᠬᠠᠭᠠᠯᠭᠠ ᠪᠡᠷ ᠣᠷᠣᠬᠤ ᠳᠤ ᠵᠡᠭᠦᠵᠦ ᠢᠷᠡᠭᠰᠡᠨ ᠠᠮᠠᠨ ᠤ ᠬᠠᠭᠠᠯᠲᠠ ᠶ᠋ᠢ ᠰᠣᠯᠢᠵᠤ ᠰᠢᠨᠡ ᠮᠠᠰᠺ ᠥᠭᠭᠦᠯᠡ᠃ ᠮᠠᠨ ᠤ ᠣᠩᠭᠣᠴᠠᠨ ᠤ ᠪᠠᠭ ᠤᠨ ᠬᠢᠨ ᠡᠮᠦᠨᠡ ᠣᠷᠣᠢ ᠢᠷᠡᠭᠰᠡᠨ ᠶᠤᠮ ᠪᠠᠶᠢᠨᠠ᠃ ᠲᠠ ᠰᠠᠶᠢᠨ ᠶᠠᠪᠤᠵᠤ ᠪᠠᠶᠢᠨᠠ ᠦᠦ᠂ ᠪᠡᠶᠡ ᠰᠠᠶᠢᠨ ᠦᠦ ᠭᠡᠳ ᠯᠡ᠃ ᠵᠠᠷᠢᠮ ᠨᠢ᠄ ᠰᠣᠰᠢᠶᠠᠯ ︵ᠤᠯᠠᠨ ᠨᠡᠶᠢᠲᠡ ᠶᠢᠨ ᠮᠡᠳᠡᠭᠡᠯᠡᠯ ᠦᠨ ᠬᠡᠷᠡᠭᠰᠡᠯ︶ ᠡᠴᠠ ᠲᠠᠨ ᠢ ᠬᠠᠷᠠᠭᠠᠳ ᠪᠠᠶᠢᠭᠠ᠂ ᠬᠥᠮᠥᠰ ᠰᠡᠳᠬᠢᠭᠳᠡᠯ ᠶᠡᠬᠡ ᠪᠢᠴᠢᠬᠦ ᠶᠤᠮ ᠭᠡᠵᠦ ᠪᠠᠶᠢᠪᠠ᠃ ᠮᠠᠨᠠᠶᠢᠬᠢᠨ ᠨᠢᠭᠡ ᠯᠡ ᠳᠣᠲᠣᠨᠣ᠂ ᠨᠢᠭᠡ ᠯᠡ ᠰᠠᠶᠢᠬᠠᠨ᠃ ᠣᠩᠭᠣᠴᠠᠨ ᠳᠤ ᠣᠷᠣᠭᠠᠳ ᠰᠠᠭᠤᠳᠠᠯ ᠢᠶᠡᠨ ᠡᠵᠡᠯᠡᠬᠦ ᠳ᠋ᠥ ᠡᠨᠡ ᠨᠢᠰᠦᠯᠭᠡ ᠶᠡᠷᠦ ᠪᠤᠰᠤ ᠶ᠋ᠢᠨ ᠴᠠᠭ ᠲᠤ ᠪᠣᠯᠵᠤ ᠪᠠᠶᠢᠭᠠ᠂ ᠶᠡᠷᠦ ᠪᠤᠰᠤ ᠶ᠋ᠢᠨ ᠨᠢᠰᠦᠯᠭᠡ ᠪᠣᠯᠬᠤ ᠨᠢ ᠢᠯᠡᠳᠲᠡ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠥᠭᠦᠯᠡᠭᠰᠡᠨ ᠢ ᠦᠯᠦ ᠳᠠᠪᠲᠠᠨ ᠪᠢᠴᠢᠬᠦ ᠳ᠋ᠦ ᠣᠩᠭᠣᠴᠠᠨ ᠤ ᠨᠢᠰᠬᠡᠭᠴᠢᠳ᠂ ᠦᠢᠯᠡᠴᠢᠯᠡᠭᠴᠢᠳ᠂ ᠪᠠᠭ ᠤᠨ ᠬᠢᠨ ᠪᠦᠭᠦᠳᠡ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠪᠢᠲᠡᠭᠦᠦ ᠬᠤᠪᠴᠠᠰᠤ ᠲᠠᠢ᠃ ᠬᠡᠨ ᠨᠢ ᠣᠩᠭᠣᠴᠠᠨ ᠤ᠂ ᠬᠡᠨ ᠨᠢ ᠮᠡᠷᠭᠡᠵᠢᠯ ᠤᠨ ᠬᠢᠨᠠᠯᠲᠠ ᠶ᠋ᠢᠨ ᠪᠣᠯᠣᠨ ᠡᠮᠴᠢ ᠠᠯᠪᠠᠨ ᠤ ᠪᠣᠯᠬᠤ ᠨᠢ ᠲᠠᠨᠢᠬᠤ ᠠᠷᠭᠠ ᠦᠭᠡᠢ᠃ ᠭᠡᠬᠦ ᠳ᠋ᠦ ᠪᠡᠨ ᠰᠢᠯᠤᠨ ᠤ ᠴᠠᠭᠠᠨᠠ ᠡᠴᠠ ᠲᠣᠷᠮᠣᠯᠵᠠᠨ ᠬᠠᠷᠠᠬᠤ ᠂ ᠬᠠᠷᠢᠴᠠᠬᠤ ᠡᠶᠡᠯᠳᠡᠭ ᠪᠠᠶᠢᠳᠠᠯ ᠨᠢ ᠰᠡᠳᠬᠢᠯ ᠳᠤᠯᠠᠭᠠᠴᠠᠭᠤᠯᠤᠮᠠᠷ ᠃
ᠣᠩᠭᠣᠴᠠ ᠲᠣᠣᠺᠢᠣ᠋ ᠶ᠋ᠢᠨ ᠴᠠᠭ ᠢᠶᠠᠷ11.25 ᠳ᠋ᠥ ᠭᠠᠵᠠᠷ ᠡᠴᠠ ᠲᠠᠰᠤᠷᠠᠪᠠ᠃ ᠣᠩᠭᠣᠴᠠᠨ ᠳᠤ ᠬᠠᠯᠠᠭᠤᠨ ᠦᠵᠡᠬᠦ ᠂ ᠮᠡᠷᠭᠡᠵᠢᠯ ᠤᠨ ᠬᠥᠮᠥᠰ ᠠᠵᠢᠭᠯᠠᠯᠲᠠ ᠬᠢᠬᠦ ᠂ ᠠᠰᠠᠭᠤᠮᠵᠢ ᠪᠦᠭᠯᠡᠭᠦᠯᠬᠦ ᠡᠴᠡ ᠥᠭᠡᠷᠡ ᠦᠢᠯᠡᠴᠢᠯᠡᠭᠡ ᠂ ᠬᠥᠳᠡᠯᠭᠡᠭᠡᠨ ᠪᠠᠷᠤᠭ ᠦᠭᠡᠢ᠃ ᠪᠦᠬᠦ ᠬᠥᠮᠥᠨ ᠣ ᠫᠠᠰᠫᠣᠷᠲ ᠢ ᠣᠩᠭᠣᠴᠠᠨ ᠳᠤ ᠬᠤᠷᠢᠶᠠᠵᠤ ᠠᠪᠤᠯᠠ᠃ ᠬᠢᠯᠢ ᠶ᠋ᠢᠨ ᠪᠦᠷᠢᠳᠬᠡᠯ ᠢ ᠬᠦᠷᠲᠡᠯᠡ ᠣᠨᠴᠠᠭᠠᠢ ᠳᠢᠭᠯᠢᠮ ᠳ᠋ᠥ ᠵᠣᠬᠢᠴᠠᠭᠤᠯᠤᠭᠰᠠᠨ ᠠᠵᠠᠢ᠃ ᠬᠣᠭᠣᠷᠣᠨᠳᠤ ᠪᠠᠨ ᠶᠠᠷᠢᠵᠤ ᠬᠥᠭᠡᠷᠦᠭᠰᠡᠨ᠂ ᠪᠣᠰᠴᠤ ᠪᠤᠵᠢᠭᠢᠨᠠᠭᠰᠠᠨ ᠶᠠᠭᠤᠮᠠ ᠲᠤᠩ ᠪᠠᠭᠠ᠃ ᠳᠣᠣᠷᠠ ᠨᠢᠭᠡ ᠬᠡᠰᠡᠭ ᠳᠠᠯᠠᠢ᠂ ᠨᠢᠭᠡ ᠬᠡᠰᠡᠭ ᠲᠣᠮᠣ ᠰᠠᠭᠤᠷᠢᠨ᠂ ᠬᠠᠭᠠᠯᠤᠭᠰᠠᠨ ᠭᠠᠵᠠᠷ ᠃ ᠶᠠᠪᠤᠭᠰᠠᠭᠠᠷ ᠮᠣᠩᠭᠣᠯ ᠤᠨ ᠲᠠᠯᠠ ᠨᠤᠲᠤᠭ ᠤᠷᠤᠭᠤ ᠣᠷᠣᠵᠤ ᠢᠷᠠᠵᠤ ᠪᠠᠶᠢᠭᠠ ᠨᠢ ᠠᠨᠳᠠᠰᠢ ᠦᠭᠡᠢ᠃ ᠦᠶᠡ ᠦᠶᠡ ᠳᠤᠭᠬᠢᠵᠤ ᠶᠠᠪᠤᠭᠰᠠᠨ ᠪᠣᠯᠣᠭᠠᠳ ᠴᠦ ᠲᠡᠷᠡ ᠦᠦ ᠴᠠᠭ ᠬᠤᠷᠳᠤᠨ ᠥᠩᠭᠡᠷᠡᠵᠡᠢ᠃ ᠲᠠᠪᠤᠨ ᠴᠠᠭ ᠣᠷᠴᠢᠮ ᠨᠢᠰᠦᠭᠡᠳ ᠭᠠᠵᠠᠷᠳᠠᠯᠠ᠃ ᠣᠩᠭᠣᠴᠠ ᠶᠠᠪᠠᠭᠠᠯᠠᠭᠰᠠᠭᠠᠷ ᠬᠠᠭᠤᠴᠢᠨ ᠨᠢᠰᠬᠦ ᠪᠠᠭᠤᠳᠠᠯ ᠤᠨ ᠬᠠᠷᠠᠯᠳᠠᠭᠠ ᠢᠷᠠᠵᠤ ᠵᠣᠭᠰᠣᠪᠠ᠃ ᠭᠠᠵᠠᠷ ᠤᠨ ᠦᠢᠯᠡᠴᠢᠯᠡᠭᠡ ᠬᠦᠷᠲᠡᠯᠡ ᠥᠭᠡᠷᠡ᠃ ᠳᠠᠩᠳᠠ ᠪᠢᠲᠡᠭᠦᠦ ᠴᠠᠭᠠᠨ ᠬᠤᠪᠴᠠᠰᠤ᠂ ᠨᠢᠭᠤᠷ ᠨᠢᠳᠦᠨ ᠣ ᠬᠠᠭᠠᠯᠲᠠ ᠲᠠᠢ ᠬᠥᠮᠥᠰ᠃ ᠪᠠᠭᠴᠠᠭᠠᠯᠠᠬᠤ ᠳ᠋ᠤ ᠬᠠᠭᠠᠰ ᠵᠠᠭᠤ ᠣᠷᠴᠢᠮ ᠬᠥᠮᠥᠨ ᠪᠢᠳᠠᠨ ᠳᠤ ᠦᠢᠯᠡᠴᠢᠯᠡᠬᠦ ᠪᠣᠯᠣᠯᠲᠠᠢ᠃ ᠬᠡᠶᠢᠯᠡᠳᠡᠭ ᠲᠤᠰᠬᠠᠢ ᠮᠠᠶᠢᠬᠠᠨ ᠴᠦ ᠪᠣᠰᠬᠠᠯᠠ᠃ ᠠᠷᠢᠭᠤᠳᠬᠠᠬᠤ ᠪᠣᠳᠠᠰ᠂ ᠬᠣᠭᠣᠯᠠᠢ᠂ ᠰᠠᠪᠠ ᠪᠠᠷᠢᠭᠰᠠᠨ ᠬᠥᠮᠥᠰ ᠪᠡᠯᠡᠳᠬᠡᠯ ᠢᠶ᠋ᠡᠨ ᠬᠠᠩᠭᠠᠵᠤ ᠪᠠᠶᠢᠪᠠ᠃ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠨᠡᠷᠡ ᠳᠠᠭᠤᠳᠠᠵᠤ ᠭᠠᠷ ᠠᠴᠢᠶᠠ ᠲᠠᠢ ᠨᠢ ᠪᠠᠭᠤᠯᠭᠠᠵᠤ ᠪᠠᠶᠢᠭᠠ ᠤᠴᠢᠷ ᠶᠠᠭᠠᠷᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠳ᠋ᠤᠭᠠᠷ ᠢᠶᠠᠨ ᠬᠦᠯᠢᠶᠡᠵᠦ ᠣᠩᠭᠣᠴᠠᠨ ᠳ᠋ᠤ ᠪᠠᠨ ᠬᠣᠶᠠᠷ ᠴᠠᠭ ᠣᠷᠴᠢᠮ ᠰᠠᠭᠤᠯᠠ᠃ ᠡᠭᠡᠯᠵᠢ ᠪᠣᠯᠣᠭᠰᠠᠨ ᠤᠴᠢᠷ ᠣᠩᠭᠣᠴᠠᠨ ᠤ ᠱᠠᠲᠤ ᠪᠡᠷ ᠠᠴᠢᠶᠠ ᠪᠠᠨ ᠠᠪᠴᠤ ᠪᠠᠭᠤᠪᠠ᠃ ᠠᠴᠢᠶᠠ ᠶ᠋ᠢ᠂ ᠪᠡᠶᠡ ᠶ᠋ᠢ᠂ ᠭᠠᠷ ᠤᠲᠠᠰᠤ ᠶ᠋ᠢ ᠲᠤᠰ ᠲᠦ ᠨᠢ ᠠᠷᠢᠭᠤᠳᠬᠠᠵᠤ ᠴᠡᠪᠡᠷᠯᠡᠪᠡ᠃ ᠲᠤᠰᠬᠠᠶᠢᠯᠠᠨ ᠪᠡᠯᠡᠳᠦᠭᠰᠡᠨ ᠪᠠᠶᠢᠷᠢ᠂ ᠵᠠᠮ ᠢᠶᠠᠷ ᠶᠠᠪᠤᠵᠤ ᠠᠦ᠋ᠲ᠋ᠣᠪᠦ᠋ᠰ ᠲᠤ ᠣᠷᠣᠯᠠ᠃ ᠵᠢᠯᠣᠭᠣᠴᠢ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠪᠢᠲᠡᠭᠦᠦ ᠬᠤᠪᠴᠠᠰᠤ ᠲᠠᠢ᠃ ᠦᠢᠯᠡᠴᠢᠯᠡᠵᠦ ᠪᠠᠶᠢᠭᠠ ᠬᠥᠮᠥᠨ ᠪᠦᠷᠢ ᠮᠡᠨᠳᠦ ᠤᠰᠤ ᠰᠠᠶᠢᠲᠠᠢ ᠂ ᠮᠡᠷᠭᠡᠰᠢᠭᠰᠡᠨ ᠨᠢ ᠬᠠᠷᠠᠭᠳᠠᠵᠤ ᠪᠠᠶᠢᠪᠠ᠃ ᠬᠠᠮᠤᠭ ᠤᠨ ᠲᠦᠷᠦᠭᠦᠨ ᠳ᠋ᠥ ᠴᠠᠭᠠᠨ ᠬᠤᠪᠴᠠᠰᠤᠲᠤ ᠪᠠᠭᠠᠲᠤᠷ ᠤᠳ ᠲᠤ ᠪᠠᠨ ᠪᠠᠶᠠᠷᠯᠠᠵᠤ ᠰᠠᠭᠤᠪᠠ ᠃ ᠠᠦ᠋ᠲ᠋ᠤᠪᠦ᠋ᠰ ᠤᠨ ᠣᠨᠣᠭᠠᠭᠰᠠᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠡᠴᠡ ᠲᠡᠳᠡᠨ ᠢ ᠪᠤᠰᠤᠳ ᠬᠥᠮᠥᠰ ᠬᠥᠭᠰᠢᠨ ᠵᠠᠯᠠᠭᠤ ᠂ ᠬᠡᠦᠬᠡᠳ ᠨᠢᠯᠬᠠᠰ ᠲᠤ ᠲᠤᠰᠠᠯᠠᠵᠤ ᠦᠢᠯᠡᠴᠢᠯᠡᠵᠦ ᠪᠠᠶᠢᠭᠠ ᠶ᠋ᠢ ᠨᠢ ᠬᠠᠷᠠᠬᠤ ᠳᠤ ᠪᠠᠬᠠᠳᠤᠮᠠ᠃ ᠡᠮᠦᠨᠡ ᠨᠢ ᠪᠢᠳᠠ ᠡᠮᠨᠡᠯᠭᠡ ᠳ᠋ᠥ ᠡᠮᠴᠢ᠂ ᠰᠤᠪᠢᠯᠠᠭᠴᠢ᠂ ᠠᠰᠠᠷᠠᠭᠴᠢ ᠨᠠᠷ ᠢ ᠴᠠᠭᠠᠨ ᠨᠥᠮᠥᠷᠭᠡ ᠲᠠᠢ ᠬᠠᠷᠠᠳᠠᠭ ᠪᠠᠶᠢᠪᠠ᠃ ᠣᠳᠣ ᠪᠣᠯ ᠨᠢᠰᠬᠡᠭᠴᠢ᠂ ᠵᠢᠯᠣᠭᠣᠴᠢ᠂ ᠠᠷᠢᠭᠤᠳᠬᠠᠭᠴᠢ᠂ ᠰᠢᠯᠭᠠᠭᠴᠢ᠂ ᠬᠢᠯᠢᠴᠢᠨ᠂ ᠣᠹᠢᠼᠧᠷ᠂ ᠬᠢᠨᠠᠭᠴᠢ᠂ ᠪᠠᠶᠢᠴᠠᠭᠠᠭᠴᠢ᠂ ᠦᠢᠯᠡᠴᠢᠯᠡᠭᠴᠢ᠂ ᠳᠠᠷᠤᠭᠠ᠂ ᠴᠡᠷᠢᠭ ᠂ ᠵᠣᠬᠢᠴᠠᠭᠤᠯᠤᠭᠴᠢ ᠭᠡᠳ ᠪᠦᠭᠦᠳᠡ ᠴᠠᠭᠠᠨ ᠨᠥᠮᠥᠷᠭᠡ ᠲᠠᠢ ᠪᠠᠭᠠᠲᠤᠷ ᠤᠳ ᠃
ᠥᠨᠥᠳᠥᠷ 2020 ᠣᠨ ᠤ ᠳᠦᠷᠪᠡᠳᠦᠭᠡᠷ ᠰᠠᠷᠠ ᠶ᠋ᠢᠨ 3 ᠤ ᠡᠳᠦᠷ᠃ ᠶᠡᠷᠦ ᠪᠤᠰᠤ ᠶ᠋ᠢᠨ ᠡᠳᠦᠷ᠃ ᠵᠥᠪᠬᠡᠨ ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ ᠶ᠋ᠢᠨ ᠨᠢᠰᠦᠯᠭᠡ᠂ ᠡᠷᠭᠢᠨ ᠲᠣᠭᠣᠷᠢᠨ ᠶᠡᠷᠦ ᠪᠤᠰᠤ ᠪᠠᠶᠢᠭᠰᠠᠨ ᠶᠤᠮ ᠪᠢᠰᠢ᠃ ᠥᠨᠥᠳᠥᠷ ᠠᠶᠤᠯᠲᠤ ᠡᠪᠡᠳᠴᠢᠨ ᠳ᠋ᠥ ᠨᠡᠷᠪᠡᠭᠳᠡᠭᠰᠡᠨ ᠬᠥᠮᠥᠨ ᠣ ᠲᠣᠭᠠ ᠳᠡᠯᠡᠬᠡᠢ ᠳ᠋ᠥ ᠨᠢᠭᠡ ᠰᠠᠶᠠ ᠶ᠋ᠢᠨ ᠪᠣᠱᠣᠭᠠ ᠶ᠋ᠢ ᠠᠯᠬᠤᠪᠠ᠃ ᠬᠠᠯᠳᠠᠪᠤᠷᠢ ᠠᠪᠤᠭᠰᠠᠨ ᠰᠠᠶᠠ ᠬᠥᠮᠥᠨ ᠣ 270 ᠮᠢᠩᠭᠠ ᠨᠢ ᠡᠳᠡᠭᠡᠷᠡᠵᠦ ᠂ 56 ᠮᠢᠩᠭᠠ ᠨᠠᠰᠤ ᠪᠠᠷᠠᠵᠤ ᠂ 40 ᠮᠢᠩᠭᠠ ᠦᠬᠦᠬᠦ ᠰᠡᠷᠡᠬᠦ ᠶ᠋ᠢᠨ ᠢᠷᠮᠡᠭ ᠲᠦ᠂760 ᠮᠢᠩᠭᠠ ᠨᠢ ᠬᠥᠩᠭᠡᠨ ᠡᠪᠡᠳᠴᠢᠯᠡᠯ ᠲᠠᠢ ᠪᠠᠶᠢᠨᠠ᠃ ᠡᠨᠡ ᠬᠠᠯᠳᠠᠪᠤᠷᠢ ᠬᠦᠷᠦᠭᠡ ᠦᠭᠡᠢ ᠤᠯᠤᠰ ᠣᠷᠣᠨ᠂ ᠲᠢᠪ ᠭᠡᠵᠦ ᠦᠯᠡᠳᠡᠭᠰᠡᠨ ᠦᠭᠡᠢ᠃ ᠳᠡᠯᠡᠬᠡᠢ ᠶ᠋ᠢᠨ ᠤᠯᠤᠰ ᠣᠷᠣᠨ ᠨᠣᠭᠣᠳ ᠡᠨᠡ ᠡᠪᠡᠳᠴᠢᠨ ᠲᠠᠢ ᠭᠤᠷᠪᠠᠨ ᠦᠨᠳᠦᠰᠦᠨ ᠶᠠᠩᠵᠤ ᠪᠡᠷ ᠲᠡᠮᠡᠴᠡᠵᠦ ᠪᠠᠶᠢᠨᠠ᠃
1.ᠬᠠᠲᠠᠭᠤ᠂ ᠬᠠᠭᠠᠯᠲᠠ ᠲᠠᠢ ᠠᠷᠭᠠ ᠪᠡᠷ᠃ ᠡᠭᠦᠨ ᠳ᠋ᠥ ᠮᠣᠩᠭᠣᠯ ᠤᠯᠤᠰ ᠣᠷᠣᠨᠠ᠃ ᠢᠷᠭᠡᠳ ᠦᠨ ᠢᠶ᠋ᠡᠨ ᠠᠮᠢ ᠨᠠᠰᠤ᠂ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠲᠡᠷᠢᠭᠦᠨ ᠵᠡᠷᠭᠡ ᠳ᠋ᠥ ᠲᠠᠯᠪᠢᠬᠤ᠃ ᠡᠨᠡ ᠵᠠᠮ ᠣᠳᠣ ᠪᠡᠷ ᠦᠷᠡ ᠳ᠋ᠦᠩ ᠲᠠᠢ ᠪᠠᠶᠢᠨᠠ ᠃
2.ᠵᠥᠭᠡᠯᠡᠨ᠂ ᠨᠡᠭᠡᠭᠡᠯᠲᠡ ᠲᠠᠢ ᠪᠠᠶᠢᠳᠠᠯ ᠢᠶᠠᠷ᠃ ᠬᠠᠯᠳᠠᠪᠤᠷᠢ ᠶ᠋ᠢᠨ ᠬᠥᠩᠭᠡᠨ ᠬᠡᠯᠪᠡᠷᠢ ᠶ᠋ᠢ ᠲᠡᠪᠴᠢᠵᠦ ᠂ ᠬᠦᠨᠳᠦᠷᠡᠭᠰᠡᠨ ᠢ ᠡᠷᠴᠢᠮᠲᠦ ᠠᠷᠭᠠ ᠪᠡᠷ ᠡᠮᠴᠢᠯᠡᠵᠦ ᠪᠠᠶᠢᠨᠠ᠃ ᠸᠠᠺᠼᠢᠨ᠂ ᠡᠮ ᠲᠠᠩ ᠭᠠᠷᠤᠭᠠ ᠦᠭᠡᠢ ᠦᠶᠡ ᠳ᠋ᠥ ᠬᠥᠮᠥᠨ ᠠᠮᠠ ᠶ᠋ᠢᠨ ᠢᠶᠡᠨ ᠶᠡᠬᠡᠩᠬᠢ ᠳ᠋ᠥ ᠳᠠᠷᠬᠠᠯᠠᠭᠠ ᠡᠭᠦᠰᠬᠡᠬᠦ ᠃
3.ᠠᠯᠢ ᠴᠦ ᠤᠴᠢᠷ ᠢᠶᠡᠨ ᠣᠯᠬᠤ ᠦᠭᠡᠢ᠂ ᠠᠶᠤᠵᠤ ᠰᠠᠨᠳᠤᠷᠴᠤ ᠪᠠᠶᠢᠭᠠ ᠭᠠᠵᠠᠷ ᠴᠦ ᠪᠠᠶᠢᠨᠠ ᠃ ᠳᠡᠭᠡᠷᠡᠬᠢ ᠪᠠᠶᠢᠳᠠᠯ ᠢ ᠬᠣᠣᠰᠯᠠᠭᠤᠯᠵᠤ ᠪᠠᠶᠢᠭᠠ ᠭᠡᠵᠦ ᠣᠶᠢᠯᠠᠭᠠᠵᠤ ᠬᠠᠷᠠᠵᠤ ᠪᠣᠯᠬᠤ ᠶᠤᠮ᠃ ᠭᠡᠬᠦ ᠳ᠋ᠦ ᠪᠡᠨ ᠳᠡᠯᠡᠬᠡᠢ ᠶ᠋ᠢᠨ ᠪᠦᠬᠦ ᠤᠯᠤᠰ ᠣᠷᠣᠨ᠂ ᠭᠠᠵᠠᠷ᠂ ᠬᠥᠮᠥᠨ ᠠᠮᠠ ᠳᠤ ᠪᠠᠷᠢᠮᠲᠠᠯᠠᠵᠤ ᠪᠣᠯᠬᠤ᠂ ᠪᠠᠶᠢᠭᠠ ᠨᠡᠶᠢᠲᠡᠯᠢᠭ ᠴᠢᠭ ᠬᠠᠨᠳᠤᠯᠭᠠ ᠴᠦ ᠪᠤᠢ ᠪᠣᠯᠣᠯᠠ᠃ ᠠᠯᠢ ᠪᠣᠯᠬᠤ ᠬᠠᠪᠢᠳᠠᠯ ᠢ ᠪᠠᠭᠠ ᠪᠠᠶᠢᠯᠭᠠᠬᠤ social distancing ᠭᠡᠳ ᠪᠠᠶᠢᠭᠠ ᠶ᠋ᠢ ᠬᠡᠷᠡᠭᠵᠢᠭᠦᠯᠬᠦ ᠃ ᠠᠬᠠᠮᠠᠳ ᠨᠠᠰᠤᠲᠠᠨ᠂ ᠡᠷᠡᠰᠳᠡᠯ ᠲᠠᠢ ᠬᠡᠰᠡᠭ ᠢᠶ᠋ᠡᠨ ᠢᠯᠡᠭᠦᠦ ᠬᠠᠮᠠᠭᠠᠯᠠᠬᠤ ᠠᠩᠬᠠᠷᠬᠤ᠃ ᠬᠤᠪᠢ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ᠂ ᠳᠢᠭᠯᠢᠮ᠂ ᠰᠠᠬᠢᠯᠭᠠ ᠤᠬᠠᠮᠰᠠᠷ ᠢ ᠳᠡᠭᠡᠳᠦ ᠵᠡᠷᠭᠡ ᠪᠡᠷ ᠰᠠᠬᠢᠵᠤ ᠡᠷᠬᠢᠮᠯᠡᠬᠦ ᠃ ᠡᠭᠦᠨ ᠲᠠᠢ ᠢᠵᠢᠯᠢ ᠲᠡᠩᠴᠡᠭᠦᠦ ᠶᠠᠪᠤᠭᠤᠯᠵᠤ ᠪᠠᠶᠢᠭᠠ ᠠᠵᠢᠯ ᠪᠣᠯ ᠢᠷᠭᠡᠳ᠂ ᠬᠥᠮᠥᠨ ᠠᠮᠠ ᠶ᠋ᠢᠨ ᠢᠶᠡᠨ ᠠᠮᠢᠵᠢᠷᠠᠭᠠ᠂ ᠠᠵᠢᠯ᠂ ᠪᠢᠽᠢᠨᠧᠰ ᠢ ᠬᠠᠮᠠᠭᠠᠯᠠᠬᠤ᠃ ᠶᠠᠭ ᠯᠡ ᠳᠠᠶᠢᠨ ᠲᠤᠯᠤᠭᠠᠨ᠂ ᠣᠨᠴᠠᠭᠠᠢ᠂ ᠶᠡᠷᠦ ᠪᠤᠰᠤ ᠶ᠋ᠢᠨ ᠴᠠᠭ ᠦᠶᠡ ᠶ᠋ᠢᠨ ᠬᠢ ᠰᠢᠭ ᠪᠦᠬᠦᠨ ᠢᠶ᠋ᠡᠨ ᠳᠠᠶᠢᠴᠢᠯᠠᠬᠤ᠂ ᠬᠡᠮᠨᠡᠬᠦ ᠂ ᠤᠬᠠᠭᠠᠯᠢᠭ ᠠᠯᠳᠠᠭᠠ ᠮᠠᠳᠠᠭ ᠦᠭᠡᠢ ᠠᠵᠢᠯᠯᠠᠬᠤ᠃ ᠪᠦᠬᠦᠨ ᠢ ᠬᠥᠮᠥᠨ ᠢᠶ᠋ᠡᠨ ᠢᠷᠭᠡᠳ ᠢᠶ᠋ᠡᠨ ᠲᠣᠭᠣᠷᠢᠭᠤᠯᠵᠤ᠂ ᠣᠨᠴᠠᠭᠠᠢ ᠨᠥᠬᠥᠴᠡᠯ᠂ ᠭᠠᠷᠴᠤ ᠪᠣᠯᠵᠣᠰᠢ ᠦᠭᠡᠢ ᠠᠶᠤᠯ ᠲᠠᠢ ᠤᠶᠠᠵᠤ ᠰᠢᠢᠳᠬᠦ ᠃ ᠠᠰᠢᠭ ᠴᠠᠪᠴᠢᠭᠠ ᠬᠠᠷᠠᠭᠰᠠᠨ ᠦᠢᠯᠡᠳᠦᠯ ᠂ ᠴᠠᠭ ᠢᠶᠡᠨ ᠣᠯᠣᠭᠠ ᠦᠭᠡᠢ ᠠᠵᠢᠯ ᠦᠢᠯᠡᠴᠢᠯᠡᠭᠡ ᠶ᠋ᠢ ᠲᠡᠪᠴᠢᠬᠦ ᠂ ᠪᠦᠷ ᠲᠢᠭᠯᠡᠵᠦ ᠵᠣᠭᠰᠣᠭᠠᠬᠤ ᠃ ᠳᠡᠯᠡᠬᠡᠢ ᠶ᠋ᠢᠨ ᠤᠯᠤᠰ ᠣᠷᠣᠨ ᠨᠣᠭᠣᠳ᠂ ᠲᠥᠷᠥ ᠵᠠᠰᠠᠭ᠂ ᠤᠳᠤᠷᠢᠳᠤᠭᠴᠢᠳ ᠬᠦᠷᠲᠡᠯᠡ ᠺᠣᠷᠣᠨᠠ ᠶ᠋ᠢᠨ ᠬᠥᠯ ᠢᠶ᠋ᠡᠷ ᠶᠠᠩᠵᠤ ᠶᠠᠩᠵᠤ ᠪᠡᠷ ᠢᠯᠭᠠᠷᠠᠵᠤ ᠬᠠᠷᠠᠭᠳᠠᠵᠤ ᠪᠠᠶᠢᠨᠠ᠃ ᠪᠦᠷ ᠠᠯᠢ ᠬᠡᠵᠢᠶᠡᠨ ᠣ ᠡᠶᠢᠮᠦ ᠡᠪᠡᠳᠴᠢᠨ ᠭᠠᠮᠰᠢᠭ ᠲᠠᠢ ᠨᠢᠭᠤᠷ ᠲᠤᠯᠵᠤ᠂ ᠲᠤᠭᠤᠯᠤᠭᠠᠳ ᠳᠠᠪᠠᠭᠠᠳ ᠭᠠᠷᠴᠤ ᠪᠠᠶᠢᠭᠰᠠᠨ ᠶᠤᠮ ᠰᠢᠭ᠋᠂ ᠤᠭ ᠠᠶᠤᠯ ᠡᠴᠠ ᠬᠥᠮᠥᠨ ᠠᠮᠠ᠂ ᠡᠷᠡᠭᠦᠯ ᠮᠡᠨᠳᠦ᠂ ᠡᠳ᠋ ᠤᠨ ᠵᠠᠰᠠᠭ ᠢᠶᠡᠨ ᠶᠠᠭᠠᠬᠢᠵᠤ ᠠᠪᠤᠷᠠᠬᠤ ᠪᠠᠨ ᠮᠡᠳᠡᠳᠡᠭ ᠂ ᠢᠵᠢ ᠪᠦᠷᠢᠨ ᠪᠡᠯᠡᠳᠬᠡᠯ ᠲᠠᠢ ᠃ ᠲᠡᠭᠦᠨ ᠢᠶᠡᠨ ᠬᠡᠷᠡᠭᠵᠢᠭᠦᠯᠦᠭᠡᠳ ᠬᠢᠭᠡᠳ ᠂ ᠶᠠᠪᠤᠴᠠ ᠶ᠋ᠢᠨ ᠳᠤᠮᠳᠠ ᠤᠯᠠᠮ ᠰᠠᠶᠢᠨ ᠪᠣᠯᠭᠠᠭᠠᠳ ᠶᠠᠪᠤᠵᠤ ᠪᠠᠶᠢᠭᠠ ᠪᠣᠳᠣᠯᠭᠠ ᠲᠣᠳᠣᠷᠬᠠᠶᠢᠯᠠᠭᠴᠢᠳ ᠂ ᠤᠳᠤᠷᠢᠳᠤᠭᠴᠢᠳ ᠲᠠᠢ ᠤᠯᠤᠰ ᠣᠷᠣᠨ ᠨᠣᠭᠣᠳ ᠪᠠᠶᠢᠨᠠ᠃
ᠭᠡᠲᠡᠯᠡ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠳ᠋ᠤ ᠴᠣᠬᠢᠭᠤᠯᠤᠭᠰᠠᠨ ᠶᠤᠮ ᠰᠢᠭ᠋ ᠪᠡᠯᠡᠳᠬᠡᠯ ᠦᠭᠡᠢ᠂ ᠠᠶᠤᠯ ᠤᠨ ᠲᠥᠯᠥᠪᠯᠡᠭᠡ᠂ ᠨᠥᠭᠡᠴᠡ ᠦᠭᠡᠢ᠂ ᠲᠡᠶᠢᠮᠦ ᠪᠣᠳᠣᠯᠭᠠ ᠦᠭᠡᠢ ᠭᠠᠵᠠᠷ ᠂ ᠭᠠᠷ ᠤᠳ ᠴᠦ ᠪᠠᠶᠢᠨᠠ ᠃ ᠺᠤᠷᠤᠨᠠ ᠶᠢ ᠠᠰᠢᠭᠯᠠᠬᠤ ᠬᠤᠪᠢ ᠶ᠋ᠢᠨ ᠪᠠᠰᠢᠷ ᠠᠷᠭᠠ ᠂ ᠠᠮᠪᠢᠼ᠂ PR ᠢᠶᠠᠨ ᠠᠵᠢᠯ ᠬᠢᠵᠦ᠂ ᠠᠰᠠᠭᠤᠳᠠᠯ ᠰᠢᠢᠳᠴᠤ ᠪᠠᠶᠢᠨᠠ ᠭᠡᠳ ᠪᠣᠳᠣᠳᠠᠭ᠃ ᠡᠷᠭᠢᠭᠡᠳ ᠬᠡᠷᠰᠡᠦ ᠠᠷᠠᠳ ᠢᠶᠠᠷ ᠢᠶᠡᠨ ᠵᠠᠩᠨᠠᠭᠤᠯᠵᠤ᠂ ᠵᠦᠬᠡᠭᠦᠯᠵᠤ ᠂ ᠱᠣᠣᠯᠠᠭᠤᠯᠵᠤ ᠶᠠᠪᠤᠭᠠ ᠨᠢ ᠴᠦ ᠮᠡᠳᠡᠭᠡ ᠬᠠᠷᠠᠵᠤ ᠪᠠᠶᠢᠬᠤ ᠳᠤ ᠲᠠᠭᠠᠷᠠᠬᠤ᠃ ᠮᠥᠨ ᠠᠵᠢᠯ ᠢ ᠬᠢᠬᠦ ᠶᠢᠨ ᠳᠠᠭᠠᠤ ᠰᠤᠷᠤᠯᠴᠠᠨᠠ ᠭᠡᠳᠡᠭ ᠰᠢᠭ ᠡᠳᠦᠷ ᠢᠷᠡᠬᠦ ᠪᠦᠷᠢ ᠬᠠᠨᠳᠤᠯᠭᠠ ᠨᠢ ᠥᠭᠡᠷᠡᠴᠢᠯᠡᠭᠳᠡᠬᠦ ᠨᠥᠬᠥᠳ ᠴᠦ ᠴᠥᠭᠡᠨ ᠦᠭᠡᠢ ᠃ ᠮᠠᠨ ᠤ ᠣᠨᠴᠠᠭᠠᠢ ᠪᠠᠶᠢᠳᠠᠯ ᠤᠨ ᠬᠢᠨ᠂ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢᠨ ᠰᠠᠯᠪᠤᠷᠢ ᠶ᠋ᠢᠨ ᠬᠢᠨ᠂ ᠬᠠᠤᠯᠢ ᠳᠦᠷᠢᠮ ᠰᠠᠬᠢᠭᠤᠯᠤᠭᠴᠢᠳ ᠪᠦᠲᠦᠨ ᠤᠯᠠᠷᠢᠯ ᠳᠡᠮᠵᠢᠨ ᠦᠷᠭᠦᠯᠵᠢᠯᠡᠵᠦ ᠪᠠᠶᠢᠭᠠ ᠲᠤᠯᠤᠭᠠᠨ ᠤ ᠲᠠᠯᠠᠪᠤᠷ ᠲᠤ ᠮᠠᠭᠲᠠᠭᠠᠯ ᠪᠠᠭᠠᠳᠠᠮᠠ ᠰᠠᠶᠢᠨ ᠠᠵᠢᠯᠯᠠᠵᠤ ᠪᠠᠶᠢᠨᠠ᠃
ᠡᠳᠡᠨ ᠳᠦ ᠳᠤᠲᠠᠬᠤ ᠭᠠᠴᠢᠬᠤ ᠶᠠᠭᠤᠮᠠ ᠪᠤᠢ ᠪᠠᠶᠢᠬᠤ᠃ ᠭᠡᠬᠦ ᠳ᠋ᠦ ᠪᠡᠨ ᠬᠠᠲᠠᠭᠤ ᠶᠠᠭᠤᠮᠠ ᠲᠠᠢ ᠲᠤᠯᠤᠭᠠᠳ᠂ ᠲᠤᠭᠤᠯᠤᠭᠠᠳ ᠶᠠᠪᠤᠳᠠᠭ ᠲᠡᠷᠡ ᠭᠦᠵᠢᠷᠮᠡᠭ ᠪᠠᠶᠢᠳᠠᠯ ᠭᠠᠶᠢᠬᠠᠯᠲᠠᠢ ᠃ ᠠᠵᠢᠯ ᠠᠯᠪᠠ ᠪᠠᠨ ᠮᠡᠷᠭᠡᠵᠢᠯ ᠤᠨ ᠲᠦᠪᠰᠢᠨ ᠳ᠋ᠦ ᠭᠦᠢᠴᠡᠳᠬᠡᠵᠦ ᠪᠠᠶᠢᠭᠠ ᠨᠢ ᠳᠡᠯᠡᠬᠡᠢ ᠳ᠋ᠥ ᠢᠵᠢᠯᠢ ᠠᠵᠢᠯ ᠮᠡᠷᠭᠡᠵᠢᠯ ᠦᠨ ᠬᠢᠨ ᠳᠣᠲᠣᠷᠠ ᠪᠠᠨ ᠲᠦᠷᠦᠭᠦᠨ ᠳᠦ ᠣᠷᠣᠬᠤ ᠪᠡᠷ᠃ ᠰᠢᠲᠦᠮᠡᠷ ᠬᠥᠮᠥᠰ ᠢ ᠰᠢᠲᠦᠮᠡᠷ ᠭᠡᠵᠦ ᠬᠡᠯᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠭᠡᠬᠦ ᠪᠤᠢ ᠃ ᠺᠣᠷᠣᠨᠠ ᠳᠡᠯᠡᠬᠡᠢ ᠶ᠋ᠢ ᠣᠯᠠᠨ ᠵᠦᠢᠯ ᠢᠶ᠋ᠡᠷ ᠥᠭᠡᠷᠡᠴᠢᠯᠡᠵᠦ ᠪᠠᠰᠠ ᠰᠣᠷᠲᠣᠭᠣ ᠲᠠᠢ᠂ ᠤᠬᠠᠭᠠᠨ ᠲᠠᠢ ᠳ᠋ᠤ ᠨᠢ ᠴᠠᠭᠠᠰᠢ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠵᠤ ᠠᠵᠢᠯᠯᠠᠬᠤ᠂ ᠢᠷᠠᠵᠤ ᠶᠠᠪᠤᠭᠠ ᠴᠠᠭ ᠲᠤ ᠶᠠᠭᠤ ᠬᠦᠯᠢᠶᠡᠵᠦ ᠪᠣᠯᠬᠤ ᠶ᠋ᠢ ᠰᠠᠨᠠᠭᠤᠯᠵᠤ ᠪᠠᠶᠢᠨᠠ᠃ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠺᠤᠷᠤᠨᠠ ᠠᠴᠠ ᠡᠮᠦᠨᠡ ᠪᠠ ᠬᠣᠶᠢᠨᠠ ᠭᠡᠳᠡᠭ ᠬᠣᠶᠠᠷ ᠴᠠᠭ ᠲᠣᠭᠠᠯᠠᠯ ᠲᠠᠢ ᠪᠠᠶᠢᠬᠤ ᠨᠢ ᠣᠶᠢᠯᠠᠭᠠᠮᠵᠢᠲᠠᠢ ᠪᠣᠯᠣᠯᠠ᠃ ᠨᠢᠭᠡᠨᠲᠡ ᠨᠢᠭᠤᠷᠯᠠᠭᠰᠠᠨ᠂ ᠨᠢᠭᠤᠷᠯᠠᠵᠤ ᠪᠣᠯᠬᠤ ᠠᠶᠤᠯ ᠢ ᠠᠮᠵᠢᠯᠲᠠᠲᠠᠢ ᠳᠠᠪᠠᠵᠤ ᠡᠭᠦᠨ ᠡᠴᠡ ᠠᠪᠤᠭᠰᠠᠨ ᠰᠤᠷᠭᠠᠮᠵᠢ ᠮᠡᠳᠡᠯᠭᠡ ᠪᠡᠨ ᠴᠠᠭᠠᠰᠢ ᠴᠢᠯᠠᠭᠤ ᠪᠣᠯᠭᠠᠵᠤ ᠠᠰᠢᠭᠯᠠᠬᠤ ᠨᠢ ᠴᠢᠬᠤᠯᠠ᠃ ᠡᠨᠳᠡ ᠮᠣᠩᠭᠣᠯ ᠤᠯᠤᠰ ᠤᠨ ᠬᠤᠪᠢ ᠳᠤ ᠪᠤᠰᠤᠳ ᠲᠠᠢ ᠬᠠᠷᠢᠴᠠᠭᠤᠯᠤᠰᠢ ᠦᠭᠡᠢ ᠨᠢᠭᠡ ᠳᠠᠪᠠᠭᠤ ᠲᠠᠯᠠ᠂ ᠰᠦᠫᠸᠷ ᠪᠣᠯᠣᠮᠵᠢ᠂ ᠠᠷᠭᠠ ᠪᠠᠶᠢᠭᠠ ᠶ᠋ᠢ ᠳᠠᠷᠠᠭᠠᠴᠢ ᠶ᠋ᠢᠨ ᠤᠳᠠᠭᠠ ᠳ᠋ᠤ ᠬᠤᠪᠢᠶᠠᠯᠴᠠᠶᠠ᠃
ᠠᠦ᠋ᠲ᠋ᠣᠪᠦ᠋ᠰ ᠲᠤ ᠰᠠᠭᠤᠬᠤ ᠬᠥᠮᠥᠨ ᠪᠦᠷᠢᠳᠬᠡᠯ ᠢᠶ᠋ᠡᠷ ᠪᠦᠷᠢᠳᠴᠦ ᠪᠢᠳᠠ ᠬᠥᠳᠡᠯᠬᠦ ᠪᠣᠯᠪᠠ᠃ ᠣᠩᠭᠣᠴᠠᠨ ᠤ ᠪᠠᠭᠤᠳᠠᠯ ᠳᠣᠲᠣᠷᠠ ᠬᠥᠲᠥᠯᠥᠭᠴᠢ ᠨᠢᠭᠡ ᠮᠠᠰᠢᠨ ᠦᠯᠡᠳᠡᠵᠦ᠂ ᠬᠠᠰᠢᠶᠠ ᠭᠠᠷᠤᠭᠠᠳ ᠴᠠᠭᠳᠠᠭᠠ ᠶ᠋ᠢᠨ ᠬᠠᠮᠠᠭᠠᠯᠠᠯᠲᠠ ᠲᠠᠢ ᠵᠠᠮ ᠳᠤ ᠨᠡᠶᠢᠯᠡᠪᠡ᠃ ᠡᠮᠦᠨᠡ ᠨᠢ ᠢᠩᠭᠢᠵᠦ ᠶᠠᠪᠤᠳᠠᠭ ᠪᠠᠶᠢᠭᠰᠠᠨ ᠳᠤᠷᠠᠰᠤᠮᠵᠢ ᠰᠡᠷᠡᠬᠦ ᠴᠦ ᠰᠢᠭ ᠃ ︽ ᠴᠠᠭᠳᠠᠭᠠ ᠪᠠᠷ ᠬᠠᠮᠠᠭᠠᠯᠠᠭᠤᠯᠤᠭᠠᠳ ᠶᠠᠪᠤᠬᠤ ᠴᠦ ᠬᠤᠷᠳᠤᠨ ᠶᠤᠮ᠃ ᠲᠦᠭᠵᠢᠷᠡᠵᠦ ᠵᠣᠭᠰᠣᠬᠤ ᠦᠭᠡᠢ ︾ ᠭᠡᠵᠦ ᠠᠦ᠋ᠲ᠋ᠤᠪᠦ᠋ᠰ ᠤᠨ ᠵᠢᠯᠣᠭᠣᠴᠢ ᠬᠣᠱᠣᠩᠨᠠᠬᠤ ᠨᠢ ᠰᠣᠨᠣᠷ ᠮᠢᠯᠢᠶᠠᠨᠠ᠃ ᠬᠠᠯᠴᠠᠷᠠᠲᠠᠯᠠ ᠪᠠᠨ ᠦᠢᠯᠡᠴᠢᠯᠡᠭᠡᠨ ᠳ᠋ᠥ ᠵᠢᠳᠬᠦᠵᠦ ᠪᠠᠶᠢᠭᠠ ᠠᠲ᠋ᠤᠤᠰ ︵ᠠᠦ᠋ᠲ᠋ᠣᠪᠦ᠋ᠰ︶ ᠪᠣᠯᠣᠯᠲᠠᠢ᠃ ᠡᠪᠦᠯ ᠵᠤᠨ ᠦᠭᠡᠢ ᠲᠦᠭᠵᠢᠷᠡᠭᠡ᠂ ᠰᠢᠪᠬᠠᠢ᠂ ᠬᠠᠯᠲᠤᠷᠢᠭᠠ ᠢᠯᠭᠠᠯ ᠦᠭᠡᠢ ᠵᠢᠳᠬᠦᠵᠦ ᠪᠠᠶᠢᠳᠠᠭ ᠬᠣᠶᠠᠷ ᠪᠣᠯᠬᠤ ᠨᠢ ᠠᠨᠳᠠᠰᠢ ᠦᠭᠡᠢ ᠃ ᠣᠳᠣ ᠪᠣᠳᠣᠬᠤ ᠳᠤ ᠠᠦ᠋ᠲ᠋ᠣᠪᠦ᠋ᠰ ᠲᠤ ᠰᠠᠭᠤᠯ ᠦᠭᠡᠢ ᠤᠳᠠᠭᠰᠠᠨ ᠶᠤᠮ ᠰᠢᠭ᠋ ᠃ ᠠᠦ᠋ᠲ᠋ᠣᠪᠦ᠋ᠰ ᠲᠤ ᠰᠠᠭᠤᠭᠠᠳ ᠶᠠᠪᠤᠬᠤ ᠰᠠᠶᠢᠬᠠᠨ ᠪᠠᠶᠢᠯᠠ ᠃ ᠵᠢᠯᠣᠭᠣᠴᠢ ᠨᠢ ᠮᠠᠰᠢ ᠰᠤᠷᠮᠠᠭ᠃ ᠤᠷᠢᠳᠤᠬᠢ ᠮᠠᠰᠢᠨ ᠢᠶᠡᠨ ᠮᠦᠷᠭᠦᠴᠢᠬᠡᠬᠦ ᠪᠤᠢ ᠭᠡᠮᠡᠷ ᠣᠶᠢᠷᠠᠳᠬᠤ ᠶᠤᠮ ᠃ ᠤᠷᠳᠤᠭᠤᠷ ᠳᠠᠷᠤᠵᠤ ᠣᠷᠣᠵᠤ ᠢᠷᠡᠭᠰᠡᠨ ᠮᠠᠰᠢᠨ ᠢ ᠲᠣᠭᠣᠷᠢᠭᠠᠳ ᠭᠠᠷᠬᠤ ᠨᠢ ᠪᠦᠷ ᠡᠯᠳᠡᠪ ᠲᠠᠢ ᠃ ᠥ᠂ ᠵᠠᠮ ᠤᠨ ᠬᠠᠵᠠᠭᠤ ᠳ᠋ᠤ ᠬᠠᠳᠠᠭ ᠰᠦ᠂ ᠴᠡᠴᠡᠭ᠂ ᠲᠤᠭ ᠪᠣᠯᠣᠭᠰᠠᠨ ᠬᠥᠮᠥᠰ ᠭᠡᠬᠦ ᠴᠢᠮᠡᠭᠡᠨ ᠢᠶ᠋ᠡᠷ ᠬᠠᠷᠠᠪᠠᠯ ᠲᠠᠨᠢᠳᠠᠭ ᠭᠣᠣᠯᠳᠠᠭᠤ ᠬᠥᠮᠥᠰ᠃
ᠣᠷᠣᠢ ᠰᠤ ︵ᠰᠤᠰᠤᠷᠪᠠᠷᠠᠮ︶ ᠮᠡᠨᠳᠦ ᠮᠡᠳᠡᠵᠦ ᠶᠠᠷᠢᠬᠤ ᠳ᠋ᠤ ᠪᠠᠨ᠄ ᠪᠦ᠋ᠷᠢ ᠣᠯᠠᠨ ᠬᠥᠮᠥᠨ ᠪᠠᠶᠢᠭᠰᠠᠨ᠃ ᠵᠠᠷᠢᠮ ᠨᠢ ᠬᠦᠯᠢᠶᠡᠵᠦ ᠶᠠᠳᠠᠵᠤ᠂ ᠵᠠᠷᠢᠮ ᠨᠢ ᠴᠠᠭᠳᠠᠭᠠ ᠳᠤ ᠬᠥᠭᠡᠭᠡᠭᠳᠡᠭᠡᠳ ᠶᠠᠪᠤᠭᠰᠠᠨ ᠃ ᠮᠠᠨ ᠤ ᠠᠷᠠᠳᠴᠢᠯᠠᠭᠰᠠᠨ ᠬᠣᠯᠪᠣᠭᠠᠨ ᠤ ᠬᠢᠨ ᠪᠠᠷᠤᠭ ᠨᠢ ᠪᠠᠶᠢᠭᠰᠠᠨ ᠰᠢᠦ᠃ ᠪᠠᠷᠤᠭ ᠵᠠᠭᠤᠭᠠᠳ ᠬᠥᠮᠥᠨ ᠭᠡᠵᠦ ᠲᠣᠳᠣᠷᠠᠭᠤᠯᠪᠠ᠃ ᠪᠢ ᠴᠦ ᠬᠠᠷᠠᠭᠰᠠᠨ᠃ ᠡᠷᠳᠡᠨᠢᠲᠦ ᠡᠴᠡ ᠪᠠᠲᠤᠯᠦᠩᠳᠦᠨ ᠵᠣᠷᠢᠵᠤ ᠢᠷᠡᠭᠰᠡᠨ ᠢᠶ᠋ᠡᠨ ᠪᠢᠴᠢᠭᠰᠡᠨ ᠪᠠᠶᠢᠪᠠ ᠃ ᠪᠠᠷᠢᠭᠰᠠᠨ ᠴᠡᠩᠬᠡᠷ ᠬᠠᠳᠠᠭ᠂ ᠤᠷᠲᠤ ᠴᠠᠭᠠᠨ ᠰᠠᠬᠠᠯ ᠨᠢ ᠳᠡᠷᠪᠡᠭᠡᠳ ᠠᠶᠠᠭᠠ ᠲᠠᠢ ᠰᠦ ᠪᠡᠷ ᠳᠠᠯᠠᠯᠵᠤ ᠬᠠᠷᠠᠭᠳᠠᠭᠰᠠᠨ ᠃
ᠸᠢᠳᠢᠣ᠋ ᠶ᠋ᠢ ᠨᠢ ᠤᠳᠠᠭᠠᠰᠢᠷᠠᠭᠤᠯᠤᠭᠠᠳ ᠬᠠᠷᠠᠬᠤ ᠳᠤ ᠲᠦᠪᠰᠢᠨ᠂ ᠲᠠᠪᠠᠬᠠᠢ᠂ ᠬᠢᠺᠢ ᠂ ᠰᠤᠶᠤᠩᠪᠤ ᠂ ᠭᠠᠩ ᠣᠳᠣ ᠂ ᠪᠠᠲᠤᠳᠣᠷᠵᠢ ᠂ ᠡᠩᠬᠡᠪᠠᠶᠠᠷ ᠂ ᠡᠩᠬᠡᠲᠤᠶᠠᠭᠠ ᠂ ᠵᠤᠩᠳᠤᠢ ᠂ ᠣᠷᠭᠢᠯ ᠂ ᠮᠥᠩᠬᠡᠪᠠᠭᠠᠲᠤᠷ ᠂ ᠪᠠᠲᠤᠰᠠᠶᠢᠬᠠᠨ ᠂ ᠠᠯᠲᠠᠨᠰᠦ᠋ᠬᠡ ᠂ ᠯᠾᠬᠠᠪᠠ ᠂ ᠬᠠᠳᠠ ᠭᠡᠳ ᠲᠠᠨᠢᠯ ᠤᠳ ᠃ ᠥᠷᠯᠥᠭᠡ ᠬᠡᠰᠢᠭᠪᠠᠲᠤ ᠨᠠᠳᠠ ᠤᠷᠤᠭᠤ ᠵᠠᠯᠭᠠᠵᠤ ᠵᠠᠷᠢᠮ ᠬᠥᠮᠥᠨ ᠳᠡᠭᠡᠷᠡᠬᠢ ᠶ᠋ᠢ ᠮᠤᠰᠬᠢᠵᠤ ᠪᠠᠶᠢᠭᠠ ᠳᠤ ᠪᠤᠬᠢᠨᠢᠳᠤᠵᠤ ᠶᠠᠷᠢᠪᠠ ᠃ ᠬᠡᠨ ᠢ ᠬᠡᠨ ᠲᠤᠰᠤᠭᠰᠠᠨ ᠳᠤ ᠪᠠᠨ ᠭᠣᠣᠯ ᠪᠢᠰᠢ᠃ ᠬᠣᠯᠠ ᠡᠴᠠ ᠢᠷᠡᠬᠦ ᠨᠢᠭᠡᠨ ᠢᠶ᠋ᠡᠨ ᠬᠥᠭᠡᠭᠡᠭᠳᠡᠨ ᠲᠤᠭᠤᠭᠳᠠᠨ ᠂ ᠬᠠᠪᠤᠷ ᠤᠨ ᠬᠠᠪᠰᠠᠷᠭᠠᠨ ᠳ᠋ᠤ ᠬᠦᠯᠢᠶᠡᠵᠦ ᠵᠣᠭᠰᠣᠵᠤ ᠪᠠᠶᠢᠳᠠᠭ ᠨᠢ ᠰᠠᠶᠢᠬᠠᠨ ᠶᠤᠮ ᠳ᠋ᠠ᠃
ᠬᠥᠮᠥᠨ ᠢ ᠬᠦᠴᠦ ᠪᠡᠷ ᠢᠨᠢᠶᠡᠯᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠰᠢᠭ ᠲᠡᠷᠡ ᠲᠣᠰᠣᠭᠰᠠᠨ ᠬᠥᠮᠥᠰ ᠨᠢᠭᠡ ᠳᠠᠷᠤᠭᠠ ᠶ᠋ᠢᠨ ᠬᠡᠯᠡᠭᠰᠡᠨ ᠢᠶ᠋ᠡᠷ ᠬᠥᠳᠡᠯᠳᠡᠭ ᠴᠦ ᠤᠯᠤᠰ ᠪᠢᠰᠢ᠃ ᠰᠡᠳᠬᠢᠯ ᠤᠨ ᠰᠠᠶᠢᠬᠠᠨ ᠂ ᠨᠥᠬᠥᠷᠯᠡᠯ ᠤᠨ ᠦᠨᠡ ᠴᠡᠨᠡ ᠶ᠋ᠢ ᠮᠡᠳᠡᠳᠡᠭ ᠬᠥᠮᠥᠰ᠃ ᠱᠣᠭ ᠵᠢᠷᠤᠭᠠᠴᠢ ᠱ᠊·ᠴᠣᠭᠲᠤᠪᠠᠶᠠᠷ ᠄ ᠰᠤ ᠮᠠᠨᠢ ᠲᠣᠷᠣᠶᠢᠭᠠᠳ ᠯᠡ ᠵᠣᠭᠰᠣᠵᠤ ᠪᠠᠶᠢᠨᠠ ᠃ ᠶᠠᠮᠠᠷ ᠴᠦ ᠬᠦᠨᠳᠦ ᠪᠡᠷᠬᠡ ᠴᠠᠭ ᠲᠤ ᠨᠥᠬᠥᠳ ᠢᠶ᠋ᠡᠨ ᠣᠷᠬᠢᠳᠠᠭ ᠦᠭᠡᠢ ᠭᠠᠶᠢᠬᠠᠯᠲᠠᠢ ᠮᠥᠨ ᠴᠢᠨᠠᠷᠲᠠᠢ ᠬᠥᠮᠥᠨ ᠰᠢᠦ ᠃ ᠪᠠᠷᠠᠸᠤ᠋᠂ Welcome ᠭᠡᠵᠦ ᠬᠠᠷᠢᠭᠤ ᠪᠢᠴᠢᠭᠰᠡᠨ ᠪᠠᠶᠢᠨᠠ ᠪᠢᠯᠡ᠃ ᠲᠠᠨᠢᠬᠤ ᠦᠭᠡᠢ ᠬᠥᠮᠥᠨ ᠴᠦ ᠴᠥᠭᠡᠨ ᠦᠭᠡᠢ ᠪᠠᠶᠢᠪᠠ ᠃ ᠭᠠᠷ ᠢᠶᠡᠨ ᠳᠠᠯᠠᠯᠵᠤ᠂ ᠴᠡᠴᠡᠭ ᠢᠶ᠋ᠡᠨ ᠪᠠᠷᠢᠵᠤ᠂ ᠲᠤᠭ ᠢᠶᠡᠨ ᠬᠡᠶᠢᠰᠬᠡᠵᠦ ᠲᠡᠨᠳᠡ ᠵᠣᠭᠰᠣᠭᠰᠠᠨ ᠂ ᠲᠣᠰᠣᠭᠰᠠᠨ ᠬᠥᠮᠥᠨ ᠨᠢᠭᠡ ᠪᠦᠷᠢ ᠳ᠋ᠥ ᠨᠠᠳᠠ ᠲᠠᠢ ᠴᠤᠭ ᠲᠤᠰᠬᠠᠢ ᠨᠢᠰᠦᠯᠭᠡ ᠪᠡᠷ ᠢᠷᠡᠭᠰᠡᠨ ᠪᠦᠬᠦ ᠬᠥᠮᠥᠨ ᠣ ᠡᠮᠦᠨᠡ ᠡᠴᠡ ᠪᠠᠶᠠᠷᠯᠠᠭᠰᠠᠨ ᠢᠶᠡᠨ ᠳᠠᠬᠢᠨ ᠢᠯᠡᠷᠬᠡᠶᠢᠯᠡᠶᠡ᠃ ᠮᠣᠩᠭᠣᠯ ᠬᠥᠮᠥᠨ ᠪᠣᠯ ᠰᠠᠶᠢᠨ ᠢ ᠰᠠᠶᠢᠨ ᠂ ᠮᠠᠭᠤ ᠶ᠋ᠢ ᠮᠠᠭᠤ ᠭᠡᠵᠦ ᠬᠡᠯᠡᠵᠦ ᠴᠢᠳᠠᠳᠠᠭ ᠃ ᠰᠡᠳᠬᠢᠯ ᠨᠢ ᠭᠡᠷᠡᠯᠲᠦᠬᠦ ᠳ᠋ᠦ ᠪᠡᠨ ᠣᠶᠢᠷᠠᠬᠠᠨ ᠭᠠᠶᠢᠬᠠᠯᠲᠠᠢ ᠴᠢᠨᠠᠷᠲᠠᠢ ᠯᠡ ᠳ᠋ᠠ ᠃
ᠣᠷᠣᠢ 20 ᠴᠠᠭ ᠥᠩᠭᠡᠷᠡᠵᠦ ᠪᠠᠶᠢᠬᠤ ᠳᠤ ᠥᠷᠥᠭᠡᠨ ᠳ᠋ᠦ ᠪᠡᠨ ᠣᠷᠣᠬᠤ ᠫᠷᠦᠼᠸᠰᠰ ᠥᠨᠳᠥᠷᠯᠡᠵᠦ᠂ 21 ᠬᠣᠨᠣᠭ ᠺᠠᠷᠠᠨ᠋ᠲ᠋ᠢᠨ ᠳᠤ ᠪᠠᠶᠢᠬᠤ ᠭᠠᠵᠠᠷ ᠲᠠᠢ ᠪᠣᠯᠪᠠ ᠃ ᠪᠠᠰᠠ ᠯᠡ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠬᠤᠪᠴᠠᠰᠤ ᠲᠠᠢ ᠴᠥᠭᠡᠨ ᠦᠭᠡᠢ ᠬᠥᠮᠥᠨ ᠲᠣᠰᠴᠤ ᠦᠢᠯᠡᠴᠢᠯᠡᠪᠡ ᠃ ᠣᠯᠠᠨ ᠬᠥᠮᠥᠨ ᠳ᠋ᠥ ᠲᠦᠪᠡᠭ ᠤᠳᠠᠵᠤ ᠪᠠᠶᠢᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠤ ᠶᠠᠰᠤ ᠬᠠᠪᠲᠠᠶᠢᠵᠤ ᠶᠠᠪᠤᠪᠠ ᠃ ᠪᠦᠷ ᠰᠡᠭᠦᠯ ᠳ᠋ᠦ ᠪᠡᠨ ᠥᠪᠡᠷ ᠢ ᠪᠡᠨ ᠠᠩᠵᠠᠭᠠᠷᠠᠭᠰᠠᠨ ᠴᠢᠨᠢ ᠢᠨᠢᠶᠡᠳᠦ ᠴᠦ ᠬᠦᠷᠬᠦ ᠰᠢᠭ ᠃ ᠭᠠᠷ ᠪᠠᠷᠢᠵᠤ ᠂ ᠶᠠᠷᠢᠵᠤ ᠰᠠᠭᠠᠲᠠᠵᠤ ᠪᠣᠯᠬᠤ ᠦᠭᠡᠢ᠂ ᠲᠡᠪᠡᠷᠢᠵᠦ ᠨᠠᠭᠠᠯᠳᠤᠵᠤ ᠂ ᠹᠸᠪᠷᠢᠲ ᠡᠨᠡ ᠲᠡᠷᠡ ᠭᠡᠵᠦ ᠳᠠᠯᠤ ᠮᠥᠷᠥ ᠶ᠋ᠢ ᠨᠢ ᠴᠣᠬᠢᠵᠤ ᠪᠣᠯᠬᠤ ᠦᠭᠡᠢ ᠃ ᠡᠶᠢᠮᠦ ᠡᠴᠡ ︽ᠪᠠᠶᠠᠷᠯᠠᠯᠠ︾ ᠂ ︽ᠶᠡᠬᠡ ᠪᠠᠶᠠᠷᠯᠠᠯᠠ︾ ᠭᠡᠵᠦ ᠵᠠᠷᠢᠮ ᠦᠶᠡ ᠳ᠋ᠥ ᠶᠠᠫᠤᠨ ᠮᠠᠶ᠋ᠢᠭ ᠭᠠᠷᠭᠠᠵᠤ ᠠᠯᠠᠭᠠ ᠬᠠᠪᠰᠤᠷᠴᠤ ᠨᠠᠬᠢᠯᠵᠠᠭᠰᠠᠨ ᠴᠦ ᠪᠠᠶᠢᠬᠤ ᠰᠢᠭ᠋᠃ ᠬᠥᠮᠥᠨ ᠬᠣᠭᠣᠷᠣᠨᠳᠤ ᠶ᠋ᠢᠨ ᠬᠠᠷᠢᠴᠠᠭᠠ ᠨᠢᠭᠡᠨ ᠲᠠᠢ ᠪᠠᠨ ᠶᠠᠭᠠᠬᠢᠵᠤ ᠠᠭᠤᠯᠵᠠᠬᠤ ᠮᠡᠨᠳᠦᠯᠡᠬᠦ ᠂ ᠤᠭᠲᠤᠬᠤ ᠬᠠᠨᠳᠤᠬᠤ ᠡᠴᠠ ᠡᠬᠢᠯᠡᠳᠡᠭ ᠶᠤᠮ ᠰᠢᠭ᠃ ᠬᠥᠮᠥᠨ ᠳ᠋ᠥ ᠬᠥᠮᠥᠨ ᠶᠣᠰᠣ ᠪᠡᠷ ᠬᠠᠨᠳᠤᠬᠤ ᠪᠠᠷ ᠯᠡ ᠬᠥᠮᠥᠨ ᠲᠡᠭᠡᠵᠦ ᠬᠠᠷᠢᠭᠤ ᠪᠠᠷᠢᠳᠠᠭ ᠪᠣᠯᠣᠯᠲᠠᠢ᠃ ᠤᠯᠠᠮ ᠡᠪᠲᠡᠶᠢᠬᠡᠨ ᠬᠠᠷᠢᠭᠤ ᠪᠠᠷᠢᠴᠢᠬᠠᠬᠤ ᠭᠡᠳ ᠯᠡ ᠦᠢᠯᠡᠴᠢᠯᠡᠵᠦ ᠪᠤᠢ ᠵᠠᠷᠢᠮ ᠬᠥᠮᠥᠨ ᠡᠴᠡ ᠪᠠᠶᠠᠷᠯᠠᠭᠰᠠᠨ ᠳ᠋ᠤ ᠪᠠᠨ ᠪᠣᠯᠣᠭᠠᠳ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠴᠢᠬᠠᠬᠤ ᠳᠥᠬᠥᠭᠡᠳ ᠯᠡ ᠪᠠᠶᠢᠯᠠ᠃ ᠲᠤᠰᠠᠲᠠᠢ ᠬᠥᠮᠥᠨ ᠳ᠋ᠥ ᠡᠷᠭᠢᠵᠦ ᠲᠤᠰᠠᠲᠠᠢ ᠶᠠᠪᠤᠮᠠᠷ ᠰᠠᠨᠠᠭᠳᠠᠳᠠᠭ ᠬᠥᠮᠥᠨ ᠶᠣᠰᠣᠨ ᠤ ᠯᠡ ᠬᠠᠷᠢᠴᠠᠭᠠ ᠶᠤᠮ ᠳ᠋ᠠ ᠃
ᠶᠠᠪᠤᠵᠤ ᠶᠠᠪᠤᠵᠤ ᠬᠥᠮᠥᠨ ᠣ ᠰᠠᠶᠢᠬᠠᠨ ᠬᠠᠷᠢᠴᠠᠭᠠ᠂ ᠬᠥᠮᠥᠯᠢᠭ ᠵᠠᠩ ᠴᠢᠨᠠᠷ᠂ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠰᠡᠳᠬᠢᠯ ᠯᠡ ᠡᠨᠡ ᠮᠠᠭᠤᠬᠠᠢ ᠡᠪᠡᠳᠴᠢᠨ ᠸᠢᠷᠦ᠋ᠰ ᠢ ᠨᠠᠮ ᠴᠣᠬᠢᠵᠤ ᠤᠨᠠᠭᠠᠬᠤ ᠶᠤᠮ ᠪᠠᠶᠢᠨᠠ ᠭᠡᠵᠦ ᠪᠣᠳᠣᠯᠠ᠃ ᠳᠡᠭᠡᠷᠡ ᠨᠢ ᠰᠠᠶᠢᠨ ᠵᠣᠬᠢᠶᠠᠨ ᠪᠠᠶᠢᠭᠤᠯᠤᠯᠲᠠ᠂ ᠮᠡᠷᠭᠡᠵᠢᠯ ᠤᠨ ᠠᠵᠢᠯᠯᠠᠭᠠ᠂ ᠤᠬᠠᠭᠠᠯᠢᠭ ᠤᠳᠤᠷᠢᠳᠤᠯᠭᠠ᠃ ᠮᠥᠨ ᠭᠠᠷ ᠨᠡᠶᠢᠯᠡᠭᠰᠡᠨ ᠬᠠᠮᠲᠤᠴᠢ ᠪᠠᠶᠢᠳᠠᠯ ᠂ ᠬᠥᠮᠥᠨ ᠨᠢᠭᠡ ᠪᠦᠷᠢ ᠶ᠋ᠢᠨ ᠪᠡᠶᠡ ᠪᠡᠨ ᠠᠪᠴᠤ ᠶᠠᠪᠤᠬᠤ ᠴᠢᠳᠠᠪᠤᠷᠢ ᠤᠬᠠᠮᠰᠠᠷ ᠂ ᠲᠡᠭᠦᠨ ᠡᠴᠡ ᠡᠭᠦᠳᠦᠭᠰᠡᠨ ᠡᠷᠡᠭᠦᠯ ᠵᠥᠪ ᠦᠢᠯᠡᠳᠦᠯ᠃ ᠡᠨᠡ ᠪᠦᠬᠦᠨ ᠢᠷᠡᠭᠡᠳᠦᠢ ᠳ᠋ᠥ ᠤᠴᠠᠷᠠᠬᠤ ᠠᠶᠤᠯ ᠢ ᠳᠠᠪᠠᠵᠤ ᠭᠠᠷᠬᠤ ᠲᠦᠯᠬᠢᠭᠦᠷ ᠶᠤᠮ ᠃
ᠬᠥᠮᠥᠨ ᠳ᠋ᠥ ᠬᠡᠷᠡᠭᠲᠡᠢ ᠪᠦᠬᠦᠨ ᠪᠦᠷᠢᠳᠦᠭᠰᠡᠨ ᠵᠢᠵᠢᠭ ᠥᠷᠥᠭᠡᠨ ᠳ᠋ᠦ ᠪᠡᠨ ᠣᠷᠣᠵᠤ ᠢᠷᠠᠯᠠ᠃ ᠪᠢᠽᠢᠨᠧᠰ ᠭᠡᠵᠦ ᠶᠠᠷᠢᠳᠠᠭ᠂ ᠬᠣᠨᠣᠭ ᠲᠣᠭᠣᠷᠢᠭᠤᠯᠤᠭᠠᠳ ᠠᠵᠢᠯ ᠠᠯᠪᠠ ᠪᠠᠨ ᠵᠠᠯᠭᠠᠭᠤᠯᠬᠤ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠪᠠᠭᠤᠳᠠᠯ ᠶᠤᠮ ᠃ ᠨᠠᠳᠠ ᠡᠴᠠ ᠬᠠᠮᠢᠭᠠ ᠣᠴᠢᠬᠤ ᠪᠠᠶᠢᠷᠢᠯᠠᠬᠤ ᠲᠤᠬᠠᠢ ᠬᠡᠨ ᠴᠦ ᠠᠰᠠᠭᠤᠭᠠ ᠦᠭᠡᠢ᠃ ᠴᠠᠭᠠᠨᠠ ᠡᠴᠠ ᠭᠠᠷᠭᠠᠭᠰᠠᠨ ᠬᠤᠪᠢᠶᠠᠷᠢ ᠶ᠋ᠢᠨ ᠳᠠᠭᠠᠤ ᠯᠡ ᠡᠨᠳᠡ ᠢᠷᠠᠪᠠ ᠃ ᠭᠠᠷ ᠠᠴᠢᠶᠠ ᠪᠠᠷᠠᠭᠠ ᠪᠠᠨ ᠶᠠᠩᠵᠤᠯᠠᠵᠤ᠂ ᠠᠷᠢᠭᠤᠳᠬᠠᠯ ᠡᠨᠡ ᠲᠡᠷᠡ ᠪᠣᠯᠵᠤ ᠪᠠᠶᠢᠲᠠᠯᠠ ᠶᠡᠬᠡ ᠥᠯᠥᠰᠴᠦ ᠪᠠᠶᠢᠭᠠ ᠪᠠᠨ ᠮᠡᠳᠡᠷᠡᠪᠡ᠃ ᠨᠥᠭᠡᠴᠡᠯᠡᠵᠦ ᠴᠦᠩᠬᠦᠯᠡᠭᠰᠡᠨ ᠰᠢᠯ ᠤᠰᠤ ᠪᠠᠨ ᠵᠠᠯᠭᠢᠯᠠᠪᠠ᠃ ᠥᠷᠯᠥᠭᠡ 4 ᠴᠠᠭ ᠡᠴᠠ ᠬᠣᠶᠢᠰᠢ ᠬᠡᠯᠡᠨ ᠳᠡᠭᠡᠷᠡ ᠪᠡᠨ ᠶᠠᠭᠤᠮᠠ ᠲᠠᠯᠪᠢᠭᠠ ᠦᠭᠡᠢ ᠶᠠᠪᠤᠭᠠ ᠪᠠᠨ ᠰᠠᠨᠠᠯᠠ ᠃ ᠬᠣᠭᠣᠯᠠᠨ ᠤ ᠬᠤᠪᠢᠶᠠᠷᠢ ᠬᠠᠷᠠᠭᠰᠠᠨ ᠴᠢᠨᠢ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠤ ᠴᠠᠭ ᠠᠯᠢ ᠬᠡᠳᠦᠶᠢᠨ ᠥᠩᠭᠡᠷᠡᠵᠦ᠃ ︽ᠵᠠ᠂ ᠶᠠᠭᠠᠬᠢᠬᠤ ᠪᠤᠢ᠂ ᠭᠦᠷᠡᠶᠢᠨᠡ ᠳ᠋ᠸ︾ ᠭᠡᠵᠦ ᠪᠣᠳᠣᠭᠠᠳ᠂ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠳᠤᠤᠭᠠᠷᠬᠤ ᠤᠲᠠᠰᠤ ᠂ ᠮᠸᠰᠰᠸᠵ ᠳᠦ ᠬᠠᠷᠢᠭᠤ ᠥᠭᠭᠦᠭᠰᠡᠨ ᠰᠢᠭ ᠰᠠᠭᠤᠪᠠ᠃ ᠬᠠᠭᠠᠯᠭᠠ ᠴᠣᠬᠢᠯᠠ᠃ ᠣᠩᠭᠣᠶᠢᠯᠭᠠᠵᠤ ᠬᠠᠷᠠᠪᠠᠯ ᠬᠠᠯᠠᠭᠤᠨ ᠦᠵᠡᠬᠦ ᠭᠡᠵᠦ ᠶᠠᠪᠤᠭᠠ ᠶᠤᠮ ᠪᠠᠶᠢᠨᠠ᠃ ᠬᠠᠯᠠᠭᠤᠨ 36.1 ᠵᠢᠭᠠᠭᠠᠳ ᠰᠡᠮᠪᠡᠶᠢᠵᠤ ᠪᠠᠶᠢᠨᠠ᠃ ᠰᠡᠭᠦᠵᠢ ᠠᠮᠠᠷᠠᠭᠠᠬᠤ ᠴᠠᠭ ᠪᠣᠯᠣᠯᠠ ᠭᠡᠵᠦ ᠪᠣᠳᠣᠲᠠᠯᠠ ᠳᠠᠬᠢᠭᠠᠳ ᠬᠠᠭᠠᠯᠭᠠ ᠲᠣᠭᠰᠢᠪᠠ᠃
ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠬᠤᠪᠴᠠᠰᠤᠲᠤ᠄ ︽ᠲᠠ ᠠᠶᠠᠭᠠ ᠲᠠᠪᠠᠭ ᠢᠶᠡᠨ︾ ᠭᠡᠪᠡ᠃ ᠪᠤᠰᠢᠭᠤᠬᠠᠨ ᠠᠶᠠᠭᠠ ᠲᠠᠪᠠᠭ ᠢᠶᠡᠨ ᠬᠠᠭᠠᠯᠭᠠᠨ ᠤ ᠬᠠᠵᠠᠭᠤ ᠳ᠋ᠤ ᠪᠡᠯᠡᠳᠦᠭᠰᠡᠨ ᠭᠠᠵᠠᠷ ᠲᠠᠯᠪᠢᠭᠠᠳ ᠡᠷᠭᠢᠵᠦ ᠦᠵᠡᠬᠦ ᠳ᠋ᠥ ᠠᠶᠠᠭᠠᠨ ᠳᠤ ᠰᠦ ᠲᠠᠢ ᠴᠠᠢ᠂ ᠲᠠᠪᠠᠭ ᠲᠤ ᠭᠤᠯᠢᠷ ᠲᠠᠢ ᠱᠥᠯᠥ ᠪᠠᠶᠢᠵᠤ ᠪᠠᠶᠢᠳᠠᠭ ᠪᠠᠶᠢᠭᠠ᠃ ᠪᠢ ᠨᠢᠭᠡ ᠤᠳᠠᠭᠠ᠂ ᠵᠠᠶᠢᠷᠮᠠᠭ ᠠᠩᠬᠠ ᠢᠳᠡᠵᠦ᠂ ᠡᠵᠢ ᠳ᠋ᠦ ᠪᠡᠨ ᠬᠦᠷᠭᠡᠵᠦ ᠥᠭᠬᠦ ᠰᠠᠨ ᠭᠡᠵᠦ ᠪᠣᠳᠣᠭᠰᠠᠨ ᠢᠶᠡᠨ ᠶᠠᠷᠢᠭᠰᠠᠨ ᠡᠴᠠ ᠪᠠᠨ ᠬᠣᠶᠢᠰᠢ ᠡᠳᠦᠢ ᠶ᠋ᠢ ᠬᠦᠷᠲᠡᠯᠡ ᠡᠯᠳᠡᠪ ᠢᠶ᠋ᠡᠷ ᠬᠡᠯᠡᠭᠦᠯᠵᠦ ᠶᠠᠪᠤᠭᠠ᠃ ᠶᠠᠭᠤᠮᠠ ᠦᠵᠡᠵᠦ᠂ ᠨᠢᠳᠦ ᠲᠠᠶᠢᠯᠤᠭᠰᠠᠨ ᠣᠳᠣ ᠶ᠋ᠢᠨ ᠬᠥᠮᠥᠰ ᠲᠥ ᠬᠥᠳᠡᠭᠡ ᠶ᠋ᠢᠨ ᠪᠣᠷᠣᠭ ᠠᠮᠢᠳᠤᠷᠠᠯ ᠡᠴᠠ ᠶᠡᠬᠡ ᠬᠣᠲᠠ ᠳᠤ ᠢᠷᠡᠭᠰᠡᠨ ᠮᠢᠨᠤ ᠡᠷᠲᠡ ᠦᠶᠡ ᠶ᠋ᠢᠨ ᠳᠤᠷᠠᠰᠤᠮᠵᠢ ᠲᠤᠩ ᠬᠥᠭ ᠦᠨ᠂ ᠦᠨᠡᠮᠰᠢᠯ ᠦᠭᠡᠢ ᠰᠠᠨᠠᠭᠳᠠᠳᠠᠭ ᠶᠤᠮ ᠰᠢᠭ᠋ ᠪᠢᠯᠡ ᠃ ᠡᠨᠳᠡ ᠢᠷᠡᠭᠡᠳ ᠢᠳᠡᠭᠰᠡᠨ ᠭᠤᠯᠢᠷ ᠲᠠᠢ ᠱᠥᠯᠥ ᠶ᠋ᠢ ᠲᠡᠭᠡᠵᠦ ᠪᠢᠴᠢᠯᠲᠡᠢ ᠪᠢᠰᠢ᠃ ᠲᠤᠩ ᠠᠮᠲᠠᠲᠠᠢ ᠪᠠᠶᠢᠭᠰᠠᠨ᠃ ᠨᠢᠭᠡ ᠬᠠᠷᠠᠬᠤ ᠳᠦ ᠯᠡ ᠭᠤᠯᠢᠷ ᠲᠠᠢ ᠱᠥᠯᠥ ᠺᠤᠨᠧᠼ᠃ ᠶᠠᠭ ᠦᠨᠡᠨᠳᠡᠭᠡᠨ ᠳᠤᠷᠠᠲᠠᠢ ᠦᠶᠡ ᠳ᠋ᠦ ᠪᠡᠨ ᠭᠤᠯᠢᠷ ᠲᠠᠢ ᠱᠥᠯᠥ ᠪᠡᠨ ᠢᠳᠡᠵᠦ ᠪᠠᠶᠢᠭᠠ ᠮᠠᠨ ᠤ ᠮᠡᠷᠭᠡᠨ ᠠᠷᠠᠳ ᠤᠳ ᠲᠤ ᠪᠣᠯ ᠡᠨᠡ ᠶᠠᠮᠠᠷ ᠶᠠᠭᠤᠮᠠᠨ ᠤ ᠬᠢᠨᠢ ᠰᠣᠨᠢᠨ ᠪᠠᠶᠢᠬᠤᠪ᠃ ᠨᠤᠲᠤᠭ ᠤᠨ ᠮᠢᠬᠠ ᠭᠤᠯᠢᠷ ᠱᠥᠯᠥ ᠃ ᠴᠢᠨᠦᠠ ᠬᠦᠷᠲᠡᠯᠡ ︽ᠬᠣᠨᠢ ᠭᠠᠲᠤᠯᠤᠭᠰᠠᠨ ᠭᠣᠣᠯ ᠭᠡᠰᠡᠨ ᠳ᠋ᠦ ᠪᠡᠨ ᠥᠭᠡᠷᠡ ᠪᠠᠶᠢᠨᠠ︾ ᠭᠡᠵᠦ ᠪᠣᠳᠣᠳᠠᠭ ᠭᠡᠳᠡᠭ ᠰᠢᠭ ᠃
ᠭᠤᠯᠢᠷ ᠲᠠᠢ ᠱᠥᠯᠥ ᠦᠨᠡᠬᠡᠷ ᠵᠦᠢᠷᠯᠡᠰᠢ ᠦᠭᠡᠢ ᠪᠠᠶᠢᠪᠠ᠃ ᠨᠢᠭᠡ ᠬᠠᠷᠠᠬᠤ ᠳᠤ ᠠᠶᠠᠭᠠ ᠲᠠᠪᠠᠭ ᠢᠶᠡᠨ ᠤᠬᠢᠶᠠᠯ ᠦᠭᠡᠢ ᠂ ᠤᠲᠠᠰᠤ ᠪᠠᠨ ᠮᠠᠭᠠᠵᠢᠭᠠᠳ ᠰᠠᠭᠤᠵᠤ᠃ ᠥᠷᠥᠭᠡᠨ ᠳ᠋ᠥ 21 ᠬᠣᠨᠣᠭ ᠴᠡᠪᠡᠷᠯᠡᠭᠡ ᠣᠷᠣᠬᠤ ᠦᠭᠡᠢ᠃ ᠥᠷᠥᠭᠡᠨ ᠦ ᠪᠡᠨ ᠪᠣᠯᠣᠨ ᠥᠪᠡᠷ ᠤᠨ ᠠᠷᠢᠭᠤᠨ ᠴᠡᠪᠡᠷ ᠢ ᠺᠠᠷᠠᠨ᠋ᠲ᠋ᠢᠨ ᠳᠤ ᠪᠠᠶᠢᠭᠴᠢ ᠬᠠᠷᠢᠭᠤᠴᠠᠬᠤ ᠲᠤᠬᠠᠢ ᠠᠯᠪᠠᠨ ᠪᠢᠴᠢᠭ ᠪᠠᠶᠢᠭᠰᠠᠨ ᠢ ᠰᠠᠨᠠᠪᠠ᠃ ᠠᠶᠠᠭᠠ ᠲᠠᠪᠠᠭ ᠢᠶᠡᠨ ᠵᠢᠮᠪᠢᠢᠲᠡᠯᠡ ᠤᠬᠢᠶᠠᠵᠤ ᠲᠠᠯᠪᠢᠯᠠ᠃ ᠬᠣᠶᠢᠰᠢᠳᠠ ᠬᠣᠭᠣᠯᠠ ᠴᠠᠢ ᠢᠳᠡᠵᠦ ᠤᠤᠭᠤᠬᠤ ᠪᠦᠷᠢ ᠳ᠋ᠦ ᠪᠡᠨ ᠠᠶᠠᠭᠠ ᠲᠠᠪᠠᠭ᠂ ᠬᠠᠯᠪᠠᠭᠠ ᠰᠡᠷᠡᠭᠡ ᠪᠡᠨ ᠤᠬᠢᠶᠠᠵᠤ ᠂ ᠡᠷᠭᠢᠨ ᠲᠣᠭᠣᠷᠢᠨ ᠢᠶᠡᠨ ᠴᠡᠪᠡᠷᠯᠡᠬᠦ ᠶᠤᠮ ᠪᠠᠶᠢᠨᠠ᠃ ᠬᠥᠮᠥᠨ ᠨᠡᠷᠡ ᠪᠡᠨ ᠪᠠᠭᠠ ᠶᠠᠭᠤᠮᠠᠨ ᠳᠡᠭᠡᠷᠡ ᠴᠦ ᠪᠣᠳᠣᠬᠤ ᠶᠤᠮ᠃ ᠠᠶᠠᠭᠠ ᠲᠠᠪᠠᠭ ᠢᠶᠡᠨ ᠰᠠᠶᠢᠨ ᠤᠬᠢᠶᠠᠵᠤ ᠲᠠᠯᠪᠢᠬᠤ ᠦᠭᠡᠢ ᠪᠣᠯ ᠬᠣᠭᠣᠯᠠ ᠵᠥᠭᠡᠭᠡᠵᠦ ᠠᠶᠠᠭᠠᠯᠠᠵᠤ ᠪᠠᠶᠢᠭᠠ ᠬᠥᠮᠥᠨ ᠶᠠᠭᠤ ᠴᠦ ᠭᠡᠵᠦ ᠪᠣᠳᠣᠬᠤ ᠶᠤᠮ ᠪᠢᠯᠡ ᠃
ᠥᠷᠯᠥᠭᠡ ᠪᠣᠯᠵᠠᠢ᠃ ᠰᠠᠶᠢᠬᠠᠨ ᠦᠷᠯᠦᠭᠡ᠃ ᠠᠯᠤᠰ ᠲᠤ ᠪᠣᠭᠳᠠ ᠬᠠᠶᠢᠷᠬᠠᠨ ᠤ ᠣᠷᠣᠢ ᠮᠠᠨᠳᠤᠬᠤ ᠨᠠᠷᠠᠨ ᠤ ᠭᠡᠷᠡᠯ ᠳ᠋ᠥ ᠰᠢᠷᠭᠠᠯᠲᠤᠨ ᠬᠦᠷᠡᠩᠲᠦᠵᠦ ᠬᠠᠷᠠᠭᠳᠠᠨᠠ᠃ ᠠᠮᠠᠷᠠᠯᠲᠠ ᠶ᠋ᠢᠨ ᠡᠳᠦᠷ ᠪᠣᠯᠪᠠᠴᠤ᠂ ᠶᠡᠬᠡ ᠬᠣᠲᠠ ᠶ᠋ᠢᠨ ᠬᠥᠯ ᠬᠥᠳᠡᠯᠭᠡᠭᠡᠨ ᠬᠡᠳᠦᠶᠢᠨ ᠡᠬᠢᠯᠡᠵᠡᠢ᠃ ᠮᠠᠰᠢᠨ ᠤ ᠳᠣᠬᠢᠶᠠ᠂ ᠰᠥᠨᠢ ᠶᠠᠮᠠᠷ ᠠᠵᠢᠯ ᠲᠠᠢ ᠬᠣᠨᠣᠭᠰᠠᠨ ᠶᠤᠮ ᠬᠠᠪᠲᠠᠰᠤ ᠰᠤᠭᠤᠪᠴᠢᠯᠠᠭᠰᠠᠨ ᠭᠦᠶᠦᠬᠦ ᠪᠡᠨ ᠰᠢᠬᠠᠭᠤ ᠶᠠᠪᠤᠭᠠ ᠬᠥᠮᠥᠨ᠂ ᠬᠡᠦᠬᠡᠳ ᠲᠦᠷᠢᠭᠰᠡᠨ ᠨᠢᠭᠡ ᠡᠮᠡᠭᠲᠡᠢ᠂ ᠤᠭᠤᠬᠢᠯᠠᠨ ᠵᠣᠭᠰᠣᠬᠤ ᠠᠦ᠋ᠲ᠋ᠣᠪᠤᠰ᠂ ᠤᠯᠠᠭᠠᠨ ᠭᠡᠷᠡᠯ ᠢᠶ᠋ᠡᠷ ᠭᠦᠶᠦᠵᠦ ᠴᠠᠭᠠᠨ ᠵᠢᠫ ᠲᠤ ᠮᠥᠷᠭᠦᠭᠦᠯᠬᠦ ᠰᠢᠬᠠᠭᠰᠠᠨ ᠰᠢᠷᠠ ᠬᠦᠷᠮᠡ ᠲᠠᠢ ᠪᠦᠰᠡᠭᠦᠢ᠂ ᠪᠠᠷᠠᠭᠤᠨ ᠲᠡᠰᠢ ᠡᠷᠭᠢᠨ ᠬᠤᠷᠳᠤᠯᠠᠨ ᠣᠳᠬᠤ ᠰᠠᠭᠠᠷᠠᠯ ᠫᠷᠢᠦᠰ᠃ ᠡᠶᠢᠮᠦᠷᠬᠦᠦ ᠵᠦᠢᠯ ᠴᠣᠩᠬᠣ ᠪᠡᠷ ᠬᠠᠯᠲᠤ ᠬᠠᠷᠠᠭᠳᠠᠪᠠ᠃ ᠥᠷᠯᠥᠭᠡᠨ ᠣ ᠳᠠᠰᠬᠠᠯ ᠬᠢᠬᠦ ᠰᠢᠨᠡ ᠰᠠᠨᠠᠭᠠ ᠲᠥᠷᠥᠪᠡ᠃ ᠰᠣᠨᠣᠰᠬᠤ ᠳᠤᠷᠠᠲᠠᠢ Trace urban ᠰᠤᠪᠠᠭ ᠢᠶᠡᠨ ᠣᠯᠵᠤ ᠬᠢᠷᠢ ᠳ᠋ᠦ ᠪᠡᠨ ᠪᠠᠶᠠᠷᠯᠠᠪᠠ᠃ Selena᠂ Dua᠂ Ariana᠂ Justin ᠂ Bruno᠂ Roddy᠂ Billie᠂ Saint᠂ Jennifer ᠭᠡᠳ ᠣᠯᠠᠨ ᠬᠥᠮᠥᠨ ᠣ ᠳᠠᠭᠤᠤ ᠳᠠᠭᠠᠵᠤ᠂ ᠳᠠᠭᠤᠷᠢᠶᠠᠵᠤ ᠬᠥᠳᠡᠯᠭᠡᠭᠡᠨ ᠬᠢᠵᠦ ᠪᠡᠶᠡ ᠪᠡᠨ ᠬᠠᠯᠠᠭᠠᠪᠠ ᠃ ᠵᠢᠵᠢᠭ ᠥᠷᠥᠭᠡᠨ ᠳ᠋ᠦ ᠪᠡᠨ ᠬᠢᠵᠦ ᠪᠣᠯᠬᠤ ᠳᠠᠰᠬᠠᠯ ᠢᠶᠡᠨ ᠥᠪᠡᠷ ᠢᠶ᠋ᠡᠨ ᠹᠠᠨᠲ᠋ᠠᠽᠠᠯᠠᠵᠤ ᠬᠢᠭᠰᠡᠨ ᠴᠢᠨᠢ ᠪᠣᠯᠣᠭᠠᠳ ᠶᠠᠪᠤᠴᠢᠬᠠᠯᠠ ᠃ ᠪᠠᠷᠤᠭ ᠴᠠᠭ ᠣᠷᠴᠢᠮ ᠳᠠᠰᠬᠠᠯ ᠬᠢᠴᠢᠬᠡᠵᠡᠢ ᠃ ᠥᠷᠯᠥᠭᠡᠨ ᠣ ᠴᠠᠢ ᠢᠷᠠᠵᠤ ᠪᠠᠶᠢᠭᠠ ᠪᠣᠯᠣᠯᠲᠠᠢ᠃ ᠬᠠᠭᠠᠯᠭᠠ ᠲᠣᠭᠰᠢᠪᠠ᠃ ᠮᠠᠰᠺ ᠢᠶᠡᠨ ᠬᠤᠷᠳᠤᠨ ᠵᠡᠭᠦᠭᠡᠳ ᠬᠠᠭᠠᠯᠭᠠ ᠪᠠᠨ ᠨᠡᠭᠡᠭᠡᠪᠡ ᠃ ᠬᠠᠯᠠᠭᠤᠨ ᠦᠵᠡᠳᠡᠭ ᠬᠥᠮᠥᠨ ᠡᠬᠢᠯᠡᠵᠦ ᠢᠷᠠᠪᠠ ᠃ ᠠᠷᠤ ᠡᠴᠠ ᠨᠢ ᠥᠷᠯᠥᠭᠡᠨ ᠣ ᠴᠠᠢ᠃ ︽ᠰᠦ ᠲᠠᠢ ᠬᠡᠦᠬᠡᠳ ᠤᠨ ᠪᠤᠳᠠᠭᠠ᠂ ᠸᠠᠷᠸᠨ ᠲᠠᠢ ᠲᠠᠯᠬᠠ᠂ ᠰᠦ ᠲᠠᠢ ᠴᠠᠢ︾ ᠭᠡᠵᠦ ᠪᠢᠴᠢᠭᠰᠡᠨ ᠪᠠᠶᠢᠭᠰᠠᠨ᠃ ᠲᠠᠯᠬᠠᠨ ᠳᠡᠭᠡᠷᠡ ᠸᠠᠷᠸᠨ ᠢᠷᠡᠭᠰᠡᠨ ᠦᠭᠡᠢ ᠃ ᠪᠤᠰᠤᠳ ᠨᠢ ᠲᠣᠭᠠ ᠶᠣᠰᠣ ᠪᠡᠷ ᠃ ᠠᠮᠲᠠ ᠭᠡᠵᠦ ᠸᠠᠩᠯᠢ᠃ 11 ᠴᠠᠭ ᠪᠣᠯᠵᠤ ᠪᠠᠶᠢᠬᠤ ᠳᠤ ᠳᠠᠬᠢᠭᠠᠳ ᠲᠠᠪᠠᠭ ᠢᠶᠡᠨ ᠭᠠᠷᠭᠠᠵᠤ ᠲᠠᠯᠪᠢᠯᠠ᠃ ᠥᠨᠳᠡᠭᠡᠨ ᠣ ᠴᠠᠭᠠᠨ ᠬᠥᠪᠥᠭᠰᠡᠨ ᠰᠢᠩᠭᠡᠨ ᠪᠠᠨᠲᠠᠩ᠃ ︽ᠰᠠᠶᠢᠬᠠᠨ ᠬᠣᠭᠣᠯᠠᠯᠠᠭᠠᠷᠠᠢ︾ ᠭᠡᠵᠦ ᠪᠠᠶᠢᠨᠠ ᠃ ᠶᠡᠬᠡ ᠪᠠᠶᠠᠷᠯᠠᠯᠠ ᠭᠡᠭᠰᠡᠭᠡᠷ ᠦᠯᠡᠳᠡᠯᠡ ᠃ ᠬᠣᠭᠣᠯᠠ ᠠᠶᠠᠭᠠᠯᠠᠭᠴᠢ ᠶᠢᠨ ᠬᠣᠭᠣᠯᠠ ᠠᠪᠴᠤ ᠢᠷᠡᠭᠰᠡᠨ ᠰᠠᠪᠠ ᠨᠢᠳᠦᠨ ᠳ᠋ᠥ ᠲᠤᠰᠪᠠ ᠃ ᠭᠠᠳᠠᠭᠤᠷ ᠨᠢ ᠭᠢᠯᠠᠭᠠᠷ ᠤᠭᠤᠲᠠ ᠪᠠᠷ ᠬᠠᠮᠠᠭᠠᠯᠠᠯᠲᠠ ᠬᠢᠵᠡᠢ᠃ ᠴᠡᠷᠢᠭ ᠤᠨ ᠠᠩᠭᠢ ᠰᠠᠯᠪᠤᠷᠢ ᠨᠣᠭᠣᠳ ᠬᠡᠭᠡᠷᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠳᠤ ᠭᠠᠷᠬᠤ ᠳᠤ ᠬᠡᠷᠡᠭᠯᠡᠳᠡᠭ᠂ ᠡᠷᠭᠢᠳᠡᠭ ᠬᠣᠶᠠᠷ ᠪᠣᠰᠣᠭᠠ ᠲᠦᠭᠵᠢᠭᠡ ᠲᠠᠢ ᠴᠡᠷᠢᠭ ᠨᠣᠭᠣᠭᠠᠨ ᠰᠠᠪᠠ᠃
ᠠᠷᠭᠠ ᠦᠭᠡᠢ ᠯᠡ ᠶᠡᠷᠦ ᠪᠤᠰᠤ ᠶ᠋ᠢᠨ ᠦᠶᠡ ᠶᠤᠮ ᠳ᠋ᠠ᠃ ᠬᠡᠳᠦᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠴᠠᠭ ᠪᠣᠯᠪᠠᠴᠤ ᠥᠴᠥᠭᠡᠳᠦᠷ᠂ ᠥᠨᠥᠳᠥᠷ ᠨᠢᠭᠡ ᠶᠠᠭᠤᠮᠠ ᠨᠢᠳᠦᠨ ᠳ᠋ᠥ ᠣᠨᠴᠠᠭᠠᠢ ᠲᠤᠰᠬᠤ᠃ ᠳᠡᠯᠡᠬᠡᠢ ᠰᠠᠨᠳᠤᠷᠴᠤ ᠣᠯᠠᠨ ᠣᠷᠣᠨ ᠬᠣᠷᠢᠭ ᠳᠢᠭᠯᠢᠮ ᠢᠶ᠋ᠡᠨ ᠬᠠᠳᠠᠭᠠᠯᠠᠵᠤ᠂ ᠵᠠᠷᠢᠮ ᠭᠠᠵᠠᠷ ᠤᠯᠠᠮ ᠴᠢᠩᠭᠠᠯᠠᠵᠤ ᠪᠠᠶᠢᠬᠤ ᠳᠤ ᠮᠠᠨ ᠤ ᠨᠡᠶᠢᠰᠯᠡᠯ ᠳ᠋ᠥ ᠣᠭᠲᠣ ᠬᠥᠳᠡᠯᠭᠡᠭᠡᠨ ᠲᠠᠲᠠᠷᠠᠭᠰᠠᠨ ᠰᠢᠨᠵᠢ ᠦᠭᠡᠢ᠃ ᠥᠴᠥᠭᠡᠳᠦᠷ ᠨᠢᠰᠬᠦ ᠡᠴᠡ ᠠᠦ᠋ᠲ᠋ᠣᠪᠦ᠋ᠰ ᠢᠶᠠᠷ ᠢᠷᠠᠵᠤ ᠶᠠᠪᠤᠬᠤ ᠳᠤ ᠵᠠᠮ ᠤᠨ ᠲᠦᠭᠵᠢᠷᠡᠭᠡ ᠪᠠᠷᠤᠭ ᠤᠷᠢᠳᠤ ᠶ᠋ᠢᠨ ᠠᠳᠠᠯᠢ ᠪᠠᠶᠢᠯᠠ᠃ ᠠᠮᠠᠨ ᠤ ᠬᠠᠭᠠᠯᠲᠠ ᠦᠭᠡᠢ ᠬᠥᠯᠬᠢᠬᠦ ᠬᠥᠮᠥᠰ ᠴᠦ ᠪᠠᠭᠠ ᠦᠭᠡᠢ ᠬᠠᠷᠠᠭᠳᠠᠭᠰᠠᠨ᠃ ᠥᠨᠥᠳᠥᠷ ᠴᠦ ᠴᠣᠩᠬᠣ ᠪᠡᠷ ᠠᠵᠢᠬᠤ ᠳ᠋ᠤ ᠬᠥᠳᠡᠯᠭᠡᠭᠡᠨ᠂ ᠬᠥᠮᠥᠨ ᠰᠠᠭᠠᠷᠠᠭᠰᠠᠨ ᠰᠢᠨᠵᠢ ᠦᠭᠡᠢ᠃ ᠪᠣᠯᠭᠣᠮᠵᠢ ᠢᠯᠡᠭᠦᠳᠡᠬᠦ ᠦᠭᠡᠢ ᠃ ᠳᠡᠯᠡᠬᠡᠢ ᠡᠴᠡ ᠴᠠᠷᠠ ᠲᠠᠬᠤᠯ ᠶᠠᠪᠤᠴᠢᠬᠠᠭᠠ ᠦᠭᠡᠢ ᠪᠠᠶᠢᠭᠠ ᠰᠢᠦ᠃
