ᠬᠣᠪᠳᠣ ᠠᠶᠢᠮᠠᠭ ᠤᠨ ᠮᠠᠩᠬᠠᠨ᠂ ᠪᠤᠶᠠᠨᠲᠤ᠂ ᠮᠥᠰᠦᠲᠦ᠂ ᠠᠯᠲᠠᠢ᠂ ᠦᠶᠡᠩᠴᠢ ᠰᠤᠮᠤ ᠶᠢᠨ ᠵᠠᠷᠢᠮ ᠮᠠᠯᠴᠢᠳ ᠡᠪᠦᠯ᠂ ᠬᠠᠪᠤᠷ ᠤᠨ ᠴᠠᠭ ᠠᠭᠠᠷ ᠤᠨ ᠰᠢᠨᠵᠢ ᠲᠡᠮᠳᠡᠭ ᠢ ᠥᠪᠡᠷ ᠥᠪᠡᠷ ᠦᠨ ᠠᠵᠢᠭᠯᠠᠯᠲᠠ ᠪᠠᠷ ᠲᠠᠶᠢᠯᠪᠤᠷᠢᠯᠠᠵᠤ ᠪᠠᠶᠢᠨᠠ᠃ ᠡᠨᠡ ᠵᠤᠨ ᠨᠡᠶᠢᠲᠡ ᠨᠤᠲᠤᠭ ᠢᠶᠠᠷ ᠪᠣᠷᠣᠭᠠ ᠬᠤᠷᠠ ᠲᠠᠢ᠂ ᠡᠪᠡᠰᠦ ᠤᠷᠭᠤᠮᠠᠯ ᠰᠠᠶᠢᠨ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠮᠣᠳᠣᠷᠬᠠᠭ ᠡᠰᠢ ᠲᠡᠢ ᠤᠷᠭᠤᠮᠠᠯ ᠡᠯᠪᠡᠭ ᠤᠷᠭᠤᠵᠠᠢ᠃ ᠮᠥᠨ ᠬᠣᠭ ᠤᠨ ᠤᠷᠭᠤᠮᠠᠯ ᠭᠡᠵᠦ ᠶᠠᠷᠢᠭᠳᠠᠳᠠᠭ ᠨᠢᠭᠡ ᠨᠠᠰᠤᠲᠤ ᠬᠠᠮᠬᠤᠤᠯ᠂ ᠰᠢᠷᠠᠯᠵᠢ᠂ ᠠᠭᠢ ᠮᠠᠰᠢ ᠶᠡᠬᠡ ᠤᠷᠭᠤᠭᠰᠠᠨ᠃ ᠡᠨᠡ ᠨᠢ ᠴᠠᠰᠤ ᠶᠡᠬᠡ ᠵᠤᠵᠠᠭᠠᠨ ᠣᠷᠣᠵᠤ᠂ ᠬᠦᠢᠲᠡᠨ ᠡᠪᠦᠯ ᠪᠣᠯᠬᠤ ᠶᠢᠨ ᠰᠢᠨᠵᠢ ᠭᠡᠵᠦ ᠮᠠᠯᠴᠢᠳ ᠬᠡᠯᠡᠯᠡ᠃ ᠪᠠᠰᠠ ᠶᠥᠷᠬᠥᠭ ᠬᠥᠮᠡᠯᠢ᠂ ᠲᠠᠭᠠᠨᠠ᠂ ᠣᠯᠠᠨ ᠨᠠᠰᠤᠲᠤ ᠤᠷᠭᠤᠮᠠᠯ ᠵᠡᠷᠭᠡ ᠭᠠᠵᠠᠷ ᠤᠨ ᠬᠦᠷᠦᠰᠦᠨ ᠳᠦ ᠦᠷᠡᠵᠢᠯ ᠰᠢᠮᠡ ᠲᠡᠢ ᠡᠪᠡᠰᠦ ᠤᠷᠭᠤᠬᠤ ᠪᠠᠨ ᠪᠣᠯᠢᠵᠠᠢ ᠬᠡᠮᠡᠨ ᠮᠠᠯᠴᠢᠳ ᠶᠠᠷᠢᠵᠤ ᠪᠠᠶᠢᠨᠠ᠃ ᠡᠭᠦᠨ ᠦ ᠤᠴᠢᠷ ᠢ ᠲᠡᠳᠡ ᠲᠠᠶᠢᠯᠪᠤᠷᠢᠯᠠᠬᠤ ᠳᠤ ᠪᠠᠨ᠂ ᠪᠡᠯᠴᠢᠭᠡᠷ ᠬᠤᠪᠢᠶᠠᠷᠢ ᠲᠠᠢ ᠠᠰᠢᠭᠯᠠᠭᠠ ᠦᠭᠡᠢ᠂ ᠮᠠᠯ ᠤᠨ ᠲᠣᠭᠠᠨ ᠤ ᠠᠷᠤ ᠠᠴᠠ ᠬᠡᠲᠦ ᠬᠥᠭᠡᠭᠡᠴᠡᠯᠳᠦᠭᠰᠡᠨ᠃ ᠤᠯᠠᠮ ᠢᠶᠠᠷ ᠴᠥᠭᠡᠨ ᠲᠣᠭᠠᠨ ᠤ ᠮᠠᠯ ᠤᠨ ᠪᠡᠯᠴᠢᠭᠡᠷ ᠢ ᠰᠢᠬᠠᠵᠤ᠂ 1500-2000 ᠮᠠᠯ ᠲᠠᠢ ᠠᠶᠢᠯ ᠢᠷᠡᠭᠡᠳ ᠬᠠᠮᠠᠷ ᠬᠠᠳᠬᠤᠬᠤ ᠡᠪᠡᠰᠦ ᠦᠭᠡᠢ ᠪᠣᠯᠭᠠᠵᠤ᠂ ᠴᠠᠭᠠᠨ ᠲᠣᠭᠣᠰᠣ ᠲᠠᠲᠠᠭᠤᠯᠬᠤ᠂ ᠭᠠᠵᠠᠷ ᠤᠨ ᠬᠥᠷᠥᠰᠥ᠂ ᠡᠪᠡᠰᠦᠨ ᠦ ᠦᠨᠳᠦᠰᠦ ᠶᠢ ᠪᠠᠷᠤᠭ ᠤᠭ ᠢᠶᠠᠷ ᠨᠢ ᠢᠳᠡᠵᠦ ᠤᠰᠠᠳᠬᠠᠵᠤ ᠪᠠᠶᠢᠭᠠ ᠲᠠᠢ ᠬᠣᠯᠪᠣᠭᠠᠲᠠᠢ ᠭᠡᠯᠡ᠃ ᠮᠥᠨ ᠢᠮᠠᠭᠠ᠂ ᠠᠳᠤᠭᠤ ᠡᠪᠡᠰᠦ ᠶᠢ ᠰᠣᠷᠴᠢᠯᠠᠵᠤ ᠢᠳᠡᠳᠡᠭ ᠪᠠᠶᠢᠭᠰᠠᠨ ᠪᠣᠯ ᠣᠳᠣ ᠭᠠᠵᠠᠷ ᠤᠨ ᠬᠥᠷᠥᠰᠥ ᠶᠢ ᠪᠠᠷᠤᠭ ᠯᠠ ᠬᠣᠪᠬᠣ ᠲᠠᠲᠠᠵᠤ ᠪᠠᠶᠢᠨᠠ᠃ ᠡᠶᠢᠮᠦ ᠡᠴᠡ ᠪᠡᠯᠴᠢᠭᠡᠷ ᠦᠨ ᠳᠠᠭᠠᠭᠠᠴᠠ ᠬᠡᠲᠦᠷᠡᠵᠦ᠂ ᠪᠡᠯᠴᠢᠭᠡᠷ ᠲᠦ ᠤᠷᠭᠤᠳᠠᠭ ᠰᠢᠮᠡᠲᠦ ᠡᠪᠡᠰᠦ ᠤᠷᠭᠤᠬᠤ ᠦᠭᠡᠢ ᠪᠠᠶᠢᠨᠠ᠃ ᠢᠩᠭᠢᠬᠦ ᠪᠡᠷ ᠮᠠᠯᠴᠢᠳ ᠡᠪᠦᠯ ᠦᠨ ᠤᠯᠠᠷᠢᠯ ᠢ ᠥᠩ ᠲᠡᠢ ᠳᠠᠪᠠᠬᠤ᠂ ᠴᠢᠨᠠᠭᠰᠢᠯᠠᠭᠠᠳ ᠨᠢᠭᠡᠨᠲᠡ ᠳᠣᠷᠣᠶᠢᠲᠠᠭᠰᠠᠨ ᠪᠡᠯᠴᠢᠭᠡᠷ ᠢ ᠰᠡᠷᠭᠦᠭᠡᠬᠦ ᠠᠰᠠᠭᠤᠳᠠᠯ ᠳᠤ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠶᠢᠭᠠ ᠪᠠᠨ ᠶᠠᠷᠢᠯᠠ᠃
ᠡᠨᠡ ᠵᠢᠯ ᠢᠯᠡᠭᠦᠦ ᠰᠠᠷᠠ ᠲᠠᠢ ᠨᠠᠮᠤᠷ ᠭᠡᠵᠦ ᠴᠠᠭ ᠲᠣᠭᠠᠯᠠᠯ ᠳᠤ ᠲᠣᠬᠢᠶᠠᠭᠰᠠᠨ ᠬᠡᠳᠦᠢ ᠴᠤ ᠠᠯᠪᠠᠨ ᠤ ᠡᠬᠢ ᠰᠤᠷᠪᠤᠯᠵᠢ᠂ ᠮᠠᠯᠴᠢᠳ ᠤᠨ ᠥᠪᠡᠷᠰᠡᠳ ᠦᠨ ᠠᠵᠢᠭᠯᠠᠯᠲᠠ ᠪᠠᠷ ᠨᠠᠮᠤᠷ ᠤᠨ ᠰᠠᠷᠠ ᠳᠤ ᠨᠠᠯᠠᠶᠢᠵᠤ᠂ ᠴᠠᠭ ᠠᠯᠳᠠᠯ ᠦᠭᠡᠢ ᠡᠪᠦᠯ᠂ ᠬᠠᠪᠤᠷ ᠲᠤ ᠪᠠᠨ ᠰᠠᠶᠢᠲᠤᠷ ᠪᠡᠯᠡᠳᠬᠦ ᠨᠢ ᠴᠢᠬᠤᠯᠠ ᠭᠡᠵᠦ ᠰᠠᠯᠪᠤᠷᠢ ᠶᠢᠨ ᠮᠡᠷᠭᠡᠵᠢᠯᠲᠡᠨ ᠨᠦᠭᠦᠳ ᠠᠩᠬᠠᠷᠤᠭᠤᠯᠤᠯᠠ᠃ ᠮᠥᠨ ᠡᠨᠡ ᠵᠢᠯ ᠦᠲᠦᠭ ᠪᠠᠭᠤᠴᠠ ᠬᠠᠷᠠ ᠪᠠᠲᠠᠭᠠᠨᠠ ᠶᠡᠬᠡ ᠲᠡᠢ ᠪᠥᠭᠡᠳ ᠬᠣᠷᠣᠬᠠᠢ ᠶᠡᠬᠡ ᠭᠠᠷᠤᠭᠰᠠᠨ᠃ ᠡᠨᠡ ᠰᠢᠨᠵᠢ ᠲᠡᠮᠳᠡᠭ ᠨᠢ ᠬᠠᠴᠢᠭ᠂ ᠬᠠᠮᠠᠭᠤ ᠭᠡᠬᠦ ᠮᠡᠲᠦ ᠡᠪᠡᠳᠴᠢᠨ ᠭᠠᠷᠬᠤ ᠮᠠᠭᠠᠳᠯᠠᠯ ᠲᠠᠢ ᠶᠢ ᠬᠠᠷᠠᠭᠤᠯᠵᠤ ᠪᠠᠶᠢᠨᠠ᠃ ᠲᠡᠶᠢᠮᠦ ᠡᠴᠡ ᠮᠠᠯ ᠤᠨ ᠡᠷᠡᠭᠦᠯ ᠮᠡᠨᠳᠦ ᠳᠦ ᠠᠩᠬᠠᠷᠴᠤ ᠠᠵᠢᠯᠯᠠᠪᠠᠯ ᠵᠣᠬᠢᠮᠵᠢᠲᠠᠢ ᠭᠡᠵᠦ ᠠᠬᠠᠮᠠᠳ ᠮᠠᠯᠴᠢᠳ ᠰᠠᠨᠠᠭᠤᠯᠵᠤ ᠪᠠᠶᠢᠪᠠ᠃
