ᠦᠨᠳᠦᠰᠦᠨ ᠦ ᠪᠥᠬᠡ ᠶᠢᠨ ᠳᠠᠷᠬᠠᠨ ᠠᠪᠤᠷᠭᠤ᠂ ︽ᠵᠠᠭᠤᠨ ᠤ ᠮᠠᠩᠯᠠᠢ︾ ᠪᠥᠬᠡ ᠬ∙ᠪᠠᠶᠠᠨᠮᠦ᠋ᠩᠬᠡ ᠡᠴᠡ ᠳᠠᠷᠠᠭᠠᠬᠢ ᠲᠣᠳᠣᠷᠠᠭᠤᠯᠭᠠ ᠶᠢ ᠬᠢᠯᠡ᠃
– ᠪᠥᠬᠡᠴᠦᠳ ᠰᠡᠷᠭᠡᠭᠡᠰᠢ ᠳᠤ ᠬᠣᠯᠪᠣᠭᠳᠠᠬᠤ ᠨᠢ ᠶᠡᠬᠡᠰᠦᠯᠡ᠃ ᠲᠠ ᠡᠨᠡ ᠲᠠᠯᠠ ᠪᠠᠷ ᠶᠠᠭᠤ ᠬᠡᠯᠡᠬᠦ ᠪᠤᠢ︖
– ︽ᠮᠣᠩᠭᠣᠯ ᠤᠯᠤᠰ ᠤᠨ ᠪᠠᠶᠠᠷ ᠨᠠᠭᠠᠳᠤᠮ ᠤᠨ ᠲᠤᠬᠠᠢ︾ ᠬᠠᠤᠯᠢ ᠳᠤ᠄ ᠰᠢᠪᠦᠭᠡ ᠶᠢᠨ 16 ᠳᠦ ᠦᠯᠡᠳᠡᠭᠰᠡᠨ ᠪᠥᠬᠡᠴᠦᠳ ᠡᠴᠡ ᠰᠡᠷᠭᠡᠭᠡᠰᠢ ᠶᠢᠨ ᠰᠢᠨᠵᠢᠯᠡᠭᠡ ᠠᠪᠤᠨᠠ ᠭᠡᠵᠦ ᠵᠢᠭᠠᠭᠰᠠᠨ ᠪᠠᠶᠢᠳᠠᠭ᠃ ᠭᠡᠲᠡᠯᠡ ᠥᠨᠥᠳᠥᠷ ᠬᠡᠨ ᠳᠤᠷᠠᠲᠠᠢ ᠪᠥᠬᠡ ᠡᠴᠡ ᠰᠢᠨᠵᠢᠯᠡᠭᠡ ᠠᠪᠴᠤ ᠪᠠᠶᠢᠨᠠ᠃ ᠰᠡᠷᠭᠡᠭᠡᠰᠢ ᠶᠢᠨ ᠰᠢᠨᠵᠢᠯᠡᠭᠡ ᠶᠢ ᠠᠪᠴᠤ ᠪᠣᠯᠬᠤ ᠴᠤ ᠬᠠᠤᠯᠢ ᠳᠤ ᠵᠢᠭᠠᠭᠰᠠᠨ ᠡᠷᠬᠡ ᠶᠢᠨ ᠳᠠᠭᠠᠤ ᠠᠪᠬᠤ ᠶᠣᠰᠣᠲᠠᠢ᠃
ᠪᠠᠶᠠᠷ ᠨᠠᠭᠠᠳᠤᠮ ᠤᠨ ᠲᠤᠬᠠᠢ ᠬᠠᠤᠯᠢ ᠳᠤ ᠨᠡᠮᠡᠯᠲᠡ ᠥᠭᠡᠷᠡᠴᠢᠯᠡᠯᠲᠡ ᠬᠢᠬᠦ ᠬᠡᠷᠡᠭᠲᠡᠢ᠃ ᠮᠥᠨ ᠪᠥᠬᠡᠴᠦᠳ ᠡᠴᠡ ᠰᠢᠨᠵᠢᠯᠡᠭᠡ ᠠᠪᠤᠭᠰᠠᠨ ᠲᠣᠬᠢᠶᠠᠯᠳᠤᠯ ᠳᠤ ᠬᠦᠨᠳᠡᠯᠡᠨ ᠦ ᠭᠡᠷᠡᠴᠢ ᠶᠢ ᠣᠷᠤᠯᠴᠠᠭᠤᠯᠬᠤ ᠶᠣᠰᠣᠲᠠᠢ᠃ ᠪᠢ ᠳᠡᠯᠡᠬᠡᠢ ᠳᠦ 16 ᠵᠢᠯ ᠰᠡᠷᠭᠡᠭᠡᠰᠢ ᠶᠢᠨ ᠰᠢᠨᠵᠢᠯᠡᠭᠡ ᠥᠭᠴᠦ ᠪᠠᠶᠢᠭᠰᠠᠨ᠃ ᠲᠡᠭᠡᠬᠦ ᠳᠦ ᠳᠠᠰᠬᠠᠯᠵᠢᠭᠤᠯᠤᠭᠴᠢ᠂ ᠪᠠᠭ ᠤᠨ ᠠᠬᠠᠯᠠᠭᠴᠢ ᠨᠠᠷ ᠢ ᠵᠠᠪᠠᠯ ᠬᠠᠵᠠᠭᠤᠳᠠ ᠨᠢ ᠪᠠᠶᠢᠯᠭᠠᠳᠠᠭ ᠪᠠᠶᠢᠭᠰᠠᠨ᠃
– ᠯ∙ᠴᠢᠩᠪᠠᠲᠤ ᠪᠣᠯᠤᠨ ᠪ∙ᠪᠠᠲᠤᠡᠷᠳᠡᠨᠢ ᠨᠠᠷ ᠤᠨ ᠬᠣᠯᠪᠣᠭᠠ ᠭᠡᠳ ᠳᠣᠲᠣᠷᠠ ᠪᠠᠨ ᠬᠣᠶᠠᠷ ᠬᠤᠪᠢᠶᠠᠭᠳᠠᠴᠢᠬᠠᠯᠠ᠃ ᠭᠡᠲᠡᠯᠡ ᠪᠥᠬᠡ ᠶᠢᠨ ᠲᠥᠯᠥᠭᠡ ᠬᠢᠬᠦ ᠮᠥᠷ ᠦᠨ ᠬᠥᠲᠥᠯᠪᠦᠷᠢ ᠪᠡᠨ ᠲᠠᠨᠢᠯᠴᠠᠭᠤᠯᠤᠭᠠ ᠦᠭᠡᠢ ᠬᠢᠷᠢᠨᠡ ᠪᠢᠳᠡ ᠬᠠᠤᠯᠢ ᠶᠣᠰᠣᠨ ᠤ ᠬᠢ ᠭᠡᠳ ᠶᠠᠪᠤᠭᠠᠳ ᠪᠠᠶᠢᠭᠠ ᠶᠢ ᠶᠠᠭᠤ ᠭᠡᠬᠦ ᠪᠤᠢ ︖
– ᠲᠡᠶᠢᠮᠦ ᠪᠠᠶᠢᠵᠤ ᠮᠠᠭᠠᠳ ᠦᠭᠡᠢ᠃ ᠡᠨᠡ ᠶᠡᠬᠡ ᠵᠥᠪ ᠠᠰᠠᠭᠤᠯᠲᠠ ᠪᠠᠶᠢᠨᠠ᠃ ᠮᠥᠷ ᠦᠨ ᠬᠥᠲᠥᠯᠪᠦᠷᠢ ᠪᠡᠨ ᠲᠠᠨᠢᠯᠴᠠᠭᠤᠯᠤᠨᠠ᠃
– ᠪᠥᠬᠡ ᠶᠢᠨ ᠨᠡᠷᠡ ᠬᠦᠨᠳᠦ ᠤᠨᠠᠵᠤ ᠪᠠᠶᠢᠨᠠ ᠰᠢᠦ ᠳ᠋ᠡ᠃ ᠲᠠ ᠪᠦᠬᠦᠨ ᠶᠠᠭᠤ ᠬᠢᠬᠦ ᠪᠤᠢ ︖
– ᠪᠥᠬᠡ ᠶᠢᠨ ᠬᠥᠭᠵᠢᠯ ᠦᠨ ᠲᠥᠯᠥᠭᠡ ᠰᠢᠨᠡᠴᠢᠯᠡᠯ ᠬᠢᠬᠦ ᠱᠠᠭᠠᠷᠳᠠᠯᠭᠠ ᠪᠠᠶᠢᠭᠠ᠃ 10 ᠭᠠᠷᠤᠢ ᠰᠢᠨᠡᠴᠢᠯᠡᠯ ᠬᠢᠬᠦ ᠱᠠᠭᠠᠷᠳᠠᠯᠭᠠ ᠲᠠᠢ᠃ ᠭᠡᠬᠦ ᠳᠦ ᠪᠡᠨ ᠦᠨᠳᠦᠰᠦᠨ ᠦ ᠪᠡᠨ ᠤᠯᠠᠮᠵᠢᠯᠠᠯᠲᠤ ᠳᠠᠷᠬᠠᠯᠠᠭᠠ ᠶᠢ ᠬᠠᠳᠠᠭᠠᠯᠠᠭᠠᠳ ᠣᠷᠴᠢᠨ ᠦᠶᠡ ᠶᠢᠨ ᠰᠫᠣᠷᠲ ᠢ ᠬᠥᠭᠵᠢᠭᠦᠯᠵᠦ ᠪᠠᠶᠢᠭᠠ ᠳᠡᠯᠡᠬᠡᠢ ᠨᠡᠶᠢᠲᠡ ᠶᠢᠨ ᠵᠢᠱᠢᠭ ᠢ ᠣᠷᠣᠭᠤᠯᠤᠭᠠᠳ ᠰᠢᠨᠡᠴᠢᠯᠡᠯ ᠬᠢᠬᠦ ᠪᠣᠯᠤᠮᠵᠢ ᠲᠠᠢ᠃ ᠥᠩᠭᠡᠷᠡᠭᠰᠡᠨ 16 ᠵᠢᠯ ᠪᠢᠳᠡ ᠮᠡᠷᠭᠡᠵᠢᠯ ᠦᠨ ᠬᠤᠪᠢ ᠳᠤ ᠶᠡᠬᠡ ᠬᠣᠴᠣᠷᠤᠭᠰᠠᠨ᠃
– ᠲᠠ ᠪᠦᠬᠦᠨ ᠶᠠᠮᠠᠷ ᠰᠢᠨᠡᠴᠢᠯᠡᠯ ᠬᠢᠬᠦ ᠪᠤᠢ ︖
– ᠰᠡᠷᠭᠡᠭᠡᠰᠢ ᠶᠢᠨ ᠰᠢᠨᠵᠢᠯᠡᠭᠡᠨ ᠦ ᠲᠠᠯᠠ ᠪᠠᠷ᠂ ᠨᠠᠴᠢᠨ ᠤ ᠨᠠᠶᠢᠷᠠᠭᠠ ᠭᠡᠳ ᠪᠦᠭᠦᠳᠡ ᠶᠢ ᠤᠰᠠᠳᠬᠠᠬᠤ ᠬᠡᠷᠡᠭᠲᠡᠢ᠃ ᠬᠤᠷᠠᠯ ᠢᠶᠠᠷ ᠪᠠᠲᠤᠯᠠᠭᠤᠯᠤᠭᠠᠳ ᠤᠰᠠᠳᠬᠠᠶᠠ᠃ ᠲᠠ ᠪᠦᠬᠦᠨ ᠨᠢᠭᠡ ᠵᠦᠢᠯ ᠢ ᠠᠩᠬᠠᠷᠤᠭᠠᠷᠠᠢ᠃ ᠪᠥᠬᠡ ᠶᠢᠨ ᠥᠷᠭᠥᠭᠡ ᠶᠢ ᠪᠤᠯᠢᠶᠠᠴᠠᠯᠳᠤᠵᠤ ᠪᠠᠶᠢᠨᠠ ᠭᠡᠵᠦ ᠨᠡᠶᠢᠭᠡᠮ ᠳᠦ ᠵᠣᠷᠢᠭᠤᠳᠠ ᠪᠠᠷ ᠲᠠᠰᠢᠶᠠ ᠮᠡᠳᠡᠭᠡᠯᠡᠯ ᠲᠠᠷᠬᠠᠭᠠᠭᠠᠳ ᠪᠠᠶᠢᠨᠠ᠃ ᠥᠪᠡᠷᠰᠡᠳ ᠦᠨ ᠢᠶᠡᠨ ᠬᠤᠤᠳᠤᠤ ᠲᠠᠢ ᠵᠦᠢᠯ ᠢ ᠨᠢᠭᠤᠬᠤ ᠶᠢᠨ ᠲᠤᠯᠠᠳᠠ ᠪᠥᠬᠡ ᠶᠢᠨ ᠥᠷᠭᠥᠭᠡ ᠭᠡᠵᠦ ᠬᠡᠯᠡᠭᠡᠳ ᠪᠠᠶᠢᠨᠠ᠃ ᠦᠨᠡᠨ ᠴᠢᠨᠠᠷ ᠲᠤ ᠪᠠᠨ ᠪᠥᠬᠡ ᠶᠢᠨ ᠥᠷᠭᠥᠭᠡ ᠶᠢ ᠪᠤᠯᠢᠶᠠᠴᠠᠯᠳᠤᠭᠰᠠᠨ ᠨᠢᠭᠡ ᠴᠤ ᠬᠦᠮᠦᠨ ᠪᠠᠶᠢᠬᠤ ᠦᠭᠡᠢ᠃ ᠬᠠᠷᠢᠨ ᠲᠥᠷᠥ ᠳᠦ ᠥᠭᠬᠦ ᠪᠡᠷ ᠰᠢᠢᠳᠪᠡᠯ ᠣᠯᠠᠨ ᠡᠵᠡᠨ ᠭᠠᠷᠴᠤ ᠢᠷᠡᠨᠡ᠃ ᠲᠡᠷᠡ ᠦᠶᠡ ᠳᠦ ᠯᠠ ᠵᠢᠩᠬᠢᠨᠢ ᠪᠤᠯᠢᠶᠠᠴᠠᠯᠳᠤᠨᠠ᠃
– ᠯ∙ᠴᠢᠩᠪᠠᠲᠤ ᠡᠨᠡ ᠲᠠᠯᠠ ᠪᠠᠷ ᠶᠠᠭᠤ ᠭᠡᠵᠦ ᠪᠠᠶᠢᠨᠠ ᠪᠤᠢ ︖
– ᠡᠨᠡ ᠮᠠᠷᠭᠤᠭᠠᠨ ᠤ ᠲᠠᠯᠠ ᠪᠠᠷ ᠯ∙ᠴᠢᠩᠪᠠᠲᠤ ᠰᠢᠭᠦᠬᠦ ᠶᠢᠨ ᠲᠠᠯᠠ ᠪᠠᠨ ᠪᠠᠷᠢᠵᠤ ᠪᠠᠶᠢᠭᠠ ᠃ ︽ᠰᠢᠭᠦᠬᠦ ᠶᠢᠨ ᠰᠢᠢᠳᠪᠦᠷᠢ ᠪᠡᠨ ᠬᠠᠷᠠᠨᠠ᠃ ᠨᠠᠳᠠ ᠳᠤ ᠲᠡᠷᠢᠭᠦᠨ ᠬᠢᠬᠦ ᠭᠡᠳ ᠪᠠᠶᠢᠬᠤ ᠬᠦᠰᠡᠯ ᠪᠠᠶᠢᠬᠤ ᠦᠭᠡᠢ᠃ ᠪᠢ ᠰᠢᠭᠦᠬᠦ ᠶᠢᠨ ᠰᠢᠢᠳᠪᠦᠷᠢ ᠪᠡᠷ ᠵᠥᠪ ᠶᠠᠭᠤᠮᠠ ᠬᠢᠵᠦ ᠶᠠᠪᠤᠵᠠᠢ ᠭᠡᠳᠡᠭ ᠢᠶᠡᠨ ᠯᠠ ᠬᠠᠷᠠᠭᠤᠯᠬᠤ ᠶᠤᠮ ︾ ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭᠠ᠃
– ᠰᠢᠭᠦᠬᠦ ᠶᠢᠨ ᠰᠢᠢᠳᠪᠦᠷᠢ ᠭᠠᠷᠬᠤ ᠳᠤ ᠠᠯᠢ ᠨᠢᠭᠡ ᠬᠣᠯᠪᠣᠭᠠ ᠨᠢ ᠦᠢᠯᠡ ᠠᠵᠢᠯᠯᠠᠭᠠ ᠶᠠᠪᠤᠭᠤᠯᠬᠤ ᠪᠣᠯᠤᠮᠵᠢ ᠦᠭᠡᠢ ᠳᠠᠬᠢᠨ ︽ᠶᠡᠬᠡ ᠡᠶᠡ︾ ᠬᠤᠷᠠᠯ ᠢ ᠬᠢᠨᠡ ᠭᠡᠵᠦ ᠲᠠ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠰᠢᠦ ᠳ᠋ᠡ︖
– ᠬᠤᠪᠢᠶᠠᠭᠳᠠᠮᠠᠯ ᠪᠠᠶᠢᠳᠠᠯ ᠳᠠᠬᠢᠨ ᠡᠭᠦᠰᠬᠦ ᠤᠴᠢᠷ ᠦᠢᠯᠡ ᠠᠵᠢᠯᠯᠠᠭᠠ ᠶᠢ ᠠᠪᠴᠤ ᠶᠠᠪᠤᠬᠤ ᠪᠣᠯᠤᠮᠵᠢ ᠪᠠᠶᠢᠬᠤ ᠦᠭᠡᠢ᠃ ᠲᠡᠶᠢᠮᠦ ᠡᠴᠡ ᠪᠢᠳᠡ ᠰᠢᠭᠦᠬᠦ ᠪᠡᠷ ᠡᠷᠬᠡ ᠪᠡᠨ ᠠᠪᠤᠭᠰᠠᠨ ᠬᠣᠯᠪᠣᠭᠠ ᠲᠠᠢ ᠯᠠ ᠠᠵᠢᠯᠯᠠᠨᠠ᠃
– ᠰᠢᠨᠡ ᠣᠨ ᠠᠴᠠ ᠡᠬᠢᠯᠡᠨ ᠪᠥᠬᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠪᠥᠬᠡ ᠶᠢᠨ ᠥᠷᠭᠦᠭᠡᠨ ᠳᠦ ᠪᠡᠨ ᠪᠣᠯᠬᠤ ᠬᠡᠪ ᠢᠶᠡᠷ ᠢᠶᠡᠨ ᠤᠤ ︖
– ᠪᠣᠯᠤᠨᠠ ᠭᠡᠵᠦ ᠣᠶᠢᠯᠠᠭᠠᠵᠤ ᠪᠣᠯᠤᠨᠠ᠃ ᠪᠥᠬᠡ ᠶᠢᠨ ᠥᠷᠭᠥᠭᠡ ᠶᠢ ᠨᠡᠭᠡᠭᠡᠬᠦ ᠳᠦ ᠴᠡᠪᠡᠷᠯᠡᠭᠡ ᠬᠢᠬᠦ ᠡᠴᠡ ᠡᠬᠢᠯᠡᠭᠡᠳ ᠬᠢᠬᠦ ᠠᠵᠢᠯ ᠶᠡᠬᠡ ᠪᠠᠶᠢᠨᠠ᠃ ᠪᠡᠷᠬᠡᠰᠢᠶᠡᠯ ᠪᠤᠢ᠂ ᠭᠡᠬᠦ ᠳᠦ ᠪᠡᠨ ᠳᠠᠪᠠᠨᠠ᠃
