ᠪᠦᠭᠦᠳᠡ ᠨᠠᠶᠢᠷᠠᠮᠳᠠᠬᠤ ᠰᠤᠯᠤᠩᠭᠤᠰ ᠤᠯᠤᠰ ᠤᠨ ᠢᠨᠴᠤᠨ ᠬᠣᠲᠠ ᠠᠴᠠ ᠤᠯᠠᠭᠠᠨᠪᠠᠭᠠᠲᠤᠷ ᠤᠷᠤᠭᠤ ᠨᠢᠰᠦᠯᠭᠡ ᠦᠢᠯᠡᠳᠴᠦ ᠪᠠᠶᠢᠭᠰᠠᠨ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠺᠣᠮᠫᠠᠨᠢ ᠶᠢᠨ ОМ-302 ᠠᠭᠠᠷ ᠤᠨ ᠬᠦᠯᠭᠡ ᠡᠨᠡ ᠰᠠᠷ᠎ᠠ ᠶᠢᠨ 21 ᠳᠦ ᠲᠧᠭᠨᠢᠭ ᠦᠨ ᠪᠠᠭᠤᠯᠲᠠ ᠬᠢᠭᠰᠡᠨ ᠨᠢ ᠭᠠᠳᠠᠭᠠᠳᠤ ᠳᠤ ᠮᠣᠩᠭᠣᠯᠴᠤᠳ ᠢ ᠮᠠᠭᠤᠬᠠᠢ ᠪᠠᠷ ᠬᠠᠷᠠᠭᠳᠠᠭᠤᠯᠬᠤ ᠦᠢᠯᠡ ᠶᠠᠪᠤᠴᠠ ᠪᠣᠯᠤᠯ᠎ᠠ᠃ ᠨᠢᠰᠦᠯᠭᠡ ᠦᠢᠯᠡᠳᠴᠦ ᠪᠠᠶᠢᠬᠤ ᠦᠶ᠎ᠡ ᠳᠦ ᠠᠭᠠᠷ ᠤᠨ ᠬᠥᠯᠭᠡ ᠶᠢᠨ ᠬᠢᠨᠠᠯᠲᠠ ᠶᠢᠨ ᠰᠠᠮᠪᠠᠷ᠎ᠠ ᠳᠤ check-in ᠭᠡᠷᠡᠯ ᠠᠰᠠᠭᠰᠠᠨ ᠲᠤᠯᠠ ᠪᠤᠴᠠᠵᠤ  ᠢᠨᠴᠤᠨ ᠢ ᠵᠣᠷᠢᠭᠰᠠᠨ ᠠᠵᠠᠢ ᠃ ᠳᠤᠭᠤᠢ ᠶᠢᠨ ᠬᠡᠰᠡᠭ ᠲᠦ ᠭᠡᠮᠲᠦᠯ ᠭᠠᠷᠤᠭᠰᠠᠨ ᠪᠠᠶᠢᠭᠰᠠᠨ ᠴᠤ ᠵᠤᠷᠴᠢᠭᠰᠠᠳ ᠢ ᠠᠶᠤᠯ ᠦᠭᠡᠢ ᠪᠠᠭᠤᠯᠭᠠᠵᠠᠢ᠃ ᠬᠠᠷᠠᠮᠰᠠᠯᠲᠠᠢ ᠨᠢ᠂ ᠮᠣᠩᠭᠣᠯᠴᠤᠳ ᠡᠰᠡᠨ ᠮᠡᠨᠳᠦ ᠭᠠᠵᠠᠷᠳᠠᠭᠰᠠᠨ ᠳᠤ ᠪᠠᠨ ᠪᠠᠶᠠᠷᠯᠠᠭᠰᠠᠨ ᠦᠭᠡᠢ᠂ ᠢᠨᠴᠤᠨ ᠤ ᠣᠯᠠᠨ ᠤᠯᠤᠰ ᠤᠨ ᠨᠢᠰᠬᠦ ᠪᠠᠭᠤᠳᠠᠯ ᠢᠶᠠᠷ ᠨᠢᠭᠡ ᠬᠡᠯᠡ ᠠᠮᠠ ᠬᠢᠵᠦ᠂ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠶᠢᠨ ᠲᠥᠯᠥᠭᠡᠯᠡᠭᠴᠢ ᠶᠢ ︽ᠪᠠᠷᠢᠵᠤ ᠢᠳᠡᠬᠦ︾ ᠨᠢ ᠬᠣᠯᠠ ᠦᠭᠡᠢ ᠠᠭᠠᠰᠢᠯᠠᠵᠠᠭᠠᠵᠤ ᠪᠤᠢ ᠪᠢᠴᠢᠯᠭᠡ ᠣᠯᠠᠨ ᠨᠡᠶᠢᠲᠡ ᠶᠢᠨ ᠰᠦᠯᠵᠢᠶᠡᠨ ᠳᠦ ᠳᠡᠯᠭᠡᠭᠳᠡᠪᠡ᠃ ᠲᠡᠳᠡᠨ ᠦ ᠡᠨᠡ ᠦᠢᠯᠡᠳᠦᠯ ᠢ ᠳᠡᠯᠡᠬᠡᠢ ᠬᠠᠷᠠᠵᠤ ᠪᠠᠶᠢᠭ᠎ᠠ ᠭᠡᠳᠡᠭ ᠢ ᠴᠤ ᠦᠯᠦ ᠲᠣᠭᠤᠭᠠᠳ ᠰᠢᠦ ᠳ᠋ᠡ᠃ ᠬᠡᠷᠪᠡ ᠪᠤᠰᠤᠳ ᠤᠯᠤᠰ ᠲᠤ ᠨᠢᠰᠬᠡᠭᠴᠢ ᠨᠠᠷ ᠨᠢ ᠲᠧᠭᠨᠢᠭ ᠦᠨ ᠰᠠᠭᠠᠲᠤᠯ ᠲᠠᠢ ᠠᠭᠠᠷ ᠤᠨ ᠬᠥᠯᠭᠡ ᠶᠢ ᠠᠮᠵᠢᠯᠲᠠ ᠲᠠᠢ ᠭᠠᠵᠠᠷᠳᠠᠭᠤᠯᠤᠭᠰᠠᠨ ᠪᠣᠯ ᠵᠣᠷᠴᠢᠭᠴᠢᠳ ᠠᠴᠠ ᠪᠠᠨ ᠲᠠᠯᠠᠷᠬᠠᠯ ᠬᠦᠯᠢᠶᠡᠬᠦ ᠦᠭᠡᠢ ᠶᠤᠮ ᠡ ᠭᠡᠬᠦᠨ᠎ᠡ ᠵᠣᠳᠣᠭᠤᠯᠬᠤ ᠳᠡᠭᠡᠷ᠎ᠡ ᠪᠡᠨ ᠲᠤᠯᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠨᠢ ᠯᠠᠪ᠃ ᠬᠠᠷᠢᠨ ᠪᠢᠳᠡᠨ ᠦ ᠮᠣᠩᠭᠣᠯᠴᠤᠳ ᠦᠭᠡᠷ᠎ᠡ᠂ ᠲᠡᠰᠪᠦᠷᠢ ᠦᠭᠡᠢ᠂ ᠲᠡᠪᠴᠢᠶᠡᠷᠢ ᠦᠭᠡᠢ ᠪᠠᠰᠠ ᠰᠦᠭᠰᠡᠯᠵᠡᠭᠦᠷ᠃ ᠰᠸᠦ᠋ᠯ ᠦᠨ ᠣᠩᠭᠣᠴᠠᠨ ᠤ ᠪᠠᠭᠤᠳᠠᠯ ᠳᠤ ᠵᠥᠪᠬᠡᠨ ᠬᠡᠳᠦᠭᠦᠯᠡ ᠪᠡᠨ ᠪᠠᠭᠤᠭᠰᠠᠨ ᠠᠶᠠᠲᠠᠢ᠂ ᠪᠦᠷ ᠵᠠᠷᠢᠮ ᠨᠢ ᠬᠡᠭᠡᠷ᠎ᠡ ᠭᠠᠭᠴᠠᠭᠠᠷ ᠢᠶᠠᠨ ᠣᠷᠢᠯᠠᠵᠤ ᠪᠠᠶᠢᠭ᠎ᠠ ᠮᠡᠲᠦ ᠰᠲᠷᠧᠰᠰᠲᠦᠵᠦ ᠪᠤᠢ ᠲᠡᠳᠡ ᠬᠦᠮᠦᠨ ᠦ ᠭᠠᠵᠠᠷ ᠶᠠᠳᠠᠵᠤ ᠯᠠ ᠤᠯᠤᠰ ᠤᠨ ᠢᠶᠠᠨ ᠨᠡᠷ᠎ᠡ ᠶᠢ ᠪᠣᠳᠣᠵᠤ ᠪᠣᠯᠬᠤ ᠪᠠᠶᠢᠯ᠎ᠠ᠃
ᠳᠥᠷᠪᠡᠨ ᠵᠢᠯ ᠦᠨ ᠡᠮᠦᠨ᠎ᠡ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠶᠢᠨ ᠣᠩᠭᠣᠴᠠ ᠭᠧᠷᠮᠠᠨ ᠳᠤ ᠴᠠᠭ ᠠᠭᠠᠷ ᠤᠨ ᠬᠦᠨᠳᠦ ᠨᠥᠬᠥᠴᠡᠯ ᠳᠦ ᠠᠮᠵᠢᠯᠲᠠ ᠲᠠᠢ ᠭᠠᠵᠠᠷᠳᠠᠬᠤ ᠳᠤ ᠠᠶᠠᠯᠠᠵᠤ ᠶᠠᠪᠤᠭᠰᠠᠨ  ᠵᠤᠷᠴᠢᠭᠰᠠᠳ ᠨᠢ ᠨᠢᠯᠪᠤᠰᠤ ᠲᠠᠢ ᠨᠢᠳᠦ ᠪᠡᠷ ᠨᠢᠰᠬᠡᠭᠴᠢ ᠨᠠᠷ ᠢ ᠲᠠᠪᠠᠷᠢᠵᠦ᠂ ︽ᠵᠢᠩᠬᠢᠨᠢ ᠱᠣᠩᠬᠣᠷ︾ ᠭᠡᠵᠦ ᠲᠠᠯᠠᠷᠬᠠᠯ ᠢᠶᠠᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠲᠤᠬᠠᠢ ᠮᠡᠳᠡᠭᠡ ᠭᠠᠷᠴᠤ ᠪᠠᠶᠢᠭᠰᠠᠨ᠃ ᠪᠢᠴᠢᠯᠭᠡ ᠨᠢ ᠴᠤ ᠲᠡᠷᠡ ᠳᠠᠷᠤᠢ youtube  ᠳᠤ ᠲᠠᠯᠪᠢᠭᠳᠠᠵᠤ᠂ ᠮᠣᠩᠭᠣᠯ ᠨᠢᠰᠬᠡᠭᠴᠢᠳ ᠦᠨ ᠤᠷ᠎ᠠ ᠴᠢᠳᠠᠪᠤᠷᠢ ᠪᠠᠷ ᠨᠢᠭᠡ ᠬᠡᠰᠡᠭ ᠲᠦ ᠪᠡᠨ ᠯᠠ ᠳᠡᠯᠡᠬᠡᠢ ᠣᠮᠣᠭᠰᠢᠭᠰᠠᠨ᠃ ᠭᠡᠲᠡᠯ᠎ᠡ ᠮᠣᠩᠭᠣᠯᠴᠤᠳ ᠨᠢᠰᠬᠡᠭᠴᠢ ᠨᠠᠷ ᠲᠤ ᠪᠠᠨ ᠲᠠᠯᠠᠷᠬᠠᠬᠤ ᠨᠢ ᠪᠠᠶᠢᠲᠤᠭᠠᠢ ᠬᠣᠭᠣᠯᠠᠨ ᠤ ᠮᠥᠩᠭᠥᠨ ᠦ ᠬᠡᠷᠡᠭᠦᠯ ᠬᠢᠵᠦ ᠣᠯᠠᠨ ᠤᠯᠤᠰ ᠲᠤ ᠰᠢᠪᠰᠢᠭ ᠢᠶᠡᠨ ᠳᠡᠯᠭᠡᠯ᠎ᠡ᠃ ᠬᠡᠳᠦᠨ ᠮᠢᠩᠭᠠᠨ ᠪᠡᠷ᠎ᠡ ᠶᠢᠨ ᠥᠨᠳᠥᠷ ᠡᠴᠡ ᠲᠧᠭᠨᠢᠭ ᠦᠨ ᠰᠠᠭᠠᠲᠠᠯ ᠲᠠᠢ ᠠᠭᠠᠷ ᠤᠨ ᠬᠥᠯᠭᠡ ᠶᠢ ᠠᠮᠵᠢᠯᠲᠠ ᠲᠠᠢ ᠭᠠᠵᠠᠷᠳᠠᠭᠤᠯᠤᠨ᠎ᠠ ᠭᠡᠳᠡᠭ ᠪᠣᠯ ᠮᠡᠳᠡᠷᠡᠮᠵᠢ᠂ ᠤᠷ᠎ᠠ ᠴᠢᠳᠠᠪᠤᠷᠢ᠂ ᠡᠷ᠎ᠡ ᠵᠣᠷᠢᠭ ᠭᠡᠳ ᠣᠯᠠᠨ ᠵᠦᠢᠯ ᠢ ᠱᠠᠭᠠᠷᠳᠠᠵᠤ ᠪᠠᠶᠢᠳᠠᠭ᠃ ᠠᠦ᠋ᠲ᠋ᠤ᠋ ᠮᠠᠰᠢᠨ ᠤᠨᠤᠭᠠᠳ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠶᠢᠨ ᠭᠤᠳᠤᠮᠵᠢ ᠪᠠᠷ ︽ᠨᠢᠰᠬᠦ︾ ᠲᠠᠢ ᠠᠳᠠᠯᠢᠳᠬᠠᠬᠤ ᠵᠦᠢᠯ ᠪᠢᠰᠢ᠃ ᠬᠠᠷᠢᠨ ᠢᠨᠴᠤᠨ ᠣᠯᠠᠨ ᠤᠯᠤᠰ ᠤᠨ ᠨᠢᠰᠬᠦ ᠪᠠᠭᠤᠳᠠᠯ ᠳᠤ ᠬᠠᠭᠤᠷᠠᠢ ᠠᠭᠰᠤᠮ ᠲᠠᠯᠪᠢᠵᠤ ᠪᠤᠢ ᠮᠣᠩᠭᠣᠯᠴᠤᠳ ᠤᠨ ᠶᠠᠷᠢᠶ᠎ᠠ ᠪᠠᠷ ᠪᠣᠯ ᠴᠢᠳᠠᠪᠤᠷᠢ ᠦᠭᠡᠢ ᠶᠠᠭᠤᠮ᠎ᠠ ᠨᠤᠭᠤᠳ ᠠᠴᠠ ᠪᠣᠯᠵᠤ᠂ ᠵᠣᠯ ᠦᠭᠡᠢ ᠨᠢᠰᠦᠯᠭᠡ ᠶᠢᠨ ᠵᠣᠯᠢᠶᠠᠰᠤ ᠪᠣᠯᠬᠤ ᠳᠥᠬᠦᠭᠰᠡᠨ ᠶᠤᠮ ᠪᠠᠶᠢᠬᠤ᠂ ᠲᠧᠭᠨᠢᠭ ᠦᠨ ᠰᠠᠭᠠᠲᠤᠯ ᠢ ᠴᠤ ᠲᠡᠷᠡ ᠳᠠᠷᠤᠢ ᠣᠯᠵᠤ ᠢᠯᠡᠷᠡᠭᠦᠯᠦᠭᠡᠳ᠂ ᠵᠠᠰᠠᠴᠢᠬᠤ ᠦᠭᠡᠢ ᠤᠷᠤᠭᠰᠢ ᠦᠭᠡᠢ ᠭᠡᠵᠦ ᠰᠢᠭᠦᠮᠵᠢᠯᠡᠪᠡ᠃ ᠬᠡᠷᠪᠡ ᠮᠣᠩᠭᠣᠯᠴᠤᠳ ᠢ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠶᠢᠨ ᠪᠤᠰᠤ ᠭᠠᠳᠠᠭᠠᠳᠤ ᠶᠢᠨ ᠺᠣᠮᠫᠠᠨᠢ ᠶᠢᠨ ᠨᠢᠰᠦᠯᠭᠡ ᠪᠡᠷ ᠵᠣᠷᠴᠢᠵᠤ ᠶᠠᠪᠤᠬᠤ ᠳᠤ ᠳᠡᠭᠡᠷᠡᠬᠢ ᠰᠠᠭᠠᠲᠤᠯ ᠭᠠᠷᠤᠭᠰᠠᠨ ᠪᠣᠯ ᠶᠠᠭᠠᠬᠢᠬᠤ ᠪᠣᠯ ᠂ ᠲᠡᠳᠡ ᠬᠡᠯᠡ ᠠᠮᠠ᠂ ᠬᠡᠷᠡᠭᠦᠯ ᠵᠠᠷᠭᠤ ᠡᠭᠦᠰᠬᠡᠵᠦ ᠴᠢᠳᠠᠬᠤ ᠪᠠᠶᠢᠭᠰᠠᠨ ᠤᠤ︖ ︽ᠭᠥᠯᠥᠭᠡ︾ ᠴᠢᠷᠠᠶᠢᠯᠠᠭᠠᠳ ᠯᠠ ᠲᠠᠷᠠᠭᠠᠭᠰᠠᠨ ᠬᠣᠭᠣᠯᠠᠨ ᠤ ᠲᠠᠯᠤᠨ ᠢ ᠨᠢ ᠠᠪᠤᠭᠠᠳ ᠨᠢᠰᠬᠦ ᠴᠠᠭ ᠢᠶᠠᠨ ᠬᠦᠯᠢᠶᠡᠭᠡᠳ ᠰᠠᠭᠤᠬᠤ ᠪᠠᠶᠢᠭᠰᠠᠨ ᠭᠡᠳᠡᠭ ᠲᠡᠢ ᠮᠥᠷᠥᠶᠢᠴᠡᠬᠦ ᠳᠦ ᠴᠤ ᠪᠡᠯᠡᠨ ᠪᠠᠶᠢᠨ᠎ᠠ᠃
ᠦᠨᠡᠨ ᠳᠦ ᠪᠡᠨ ᠪᠣᠯ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠶᠢᠨ ᠨᠢᠰᠬᠡᠭᠴᠢᠳ ᠢᠶᠡᠷ ᠪᠠᠬᠠᠷᠬᠠᠵᠤ ᠪᠠᠶᠢᠨ᠎ᠠ᠃ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ ᠰᠠᠯᠬᠢ ᠲᠠᠢ ᠰᠢᠭᠤᠷᠭ᠎ᠠ ᠲᠠᠢ᠂ ᠪᠣᠷᠣᠭ᠎ᠠ ᠲᠠᠢ᠂ ᠤᠲᠤᠭ᠎ᠠ ᠲᠠᠢ ᠶᠠᠮᠠᠷ ᠴᠤ ᠦᠶ᠎ᠡ ᠲᠠᠭᠠᠷᠠᠭᠰᠠᠨ︽ᠱᠣᠩᠬᠣᠷ︾  ᠤᠳ ᠯᠠ ᠪᠠᠭᠤᠵᠤ᠂ ᠨᠢᠰᠴᠦ᠂ ᠪᠤᠰᠤᠳ ᠺᠣᠮᠫᠠᠨᠢ ᠶᠢᠨ ᠨᠢᠰᠦᠯᠭᠡ ᠬᠣᠶᠢᠰᠢᠯᠠᠵᠤ᠂ ᠬᠦᠯᠢᠶᠡᠭᠳᠡᠵᠦ᠂ ᠴᠤᠴᠠᠯᠠᠭᠳᠠᠵᠤ ᠪᠠᠶᠢᠳᠠᠭ ᠨᠢ ᠨᠢᠭᠡᠨᠲᠡ ᠪᠢᠳᠡᠨ ᠳᠦ ᠳᠠᠰᠤᠯ ᠪᠣᠯᠤᠭᠠᠳ ᠤᠳᠠᠵᠤ ᠪᠤᠢ᠃ ᠵᠢᠱᠢᠶ᠎ᠡ ᠲᠠᠲᠠᠪᠠᠯ᠂ ᠤᠯᠠᠭᠠᠨᠪᠠᠭᠠᠲᠤᠷ ᠬᠤᠲᠠ ᠳᠤ ᠤᠲᠤᠭ᠎ᠠ ᠶᠡᠬᠡ ᠲᠡᠢ ᠪᠠᠶᠢᠭ᠎ᠠ ᠠᠴᠠ ᠦᠵᠡᠭᠳᠡᠬᠦ ᠣᠷᠴᠢᠨ ᠬᠢᠵᠠᠭᠠᠷᠯᠠᠭᠳᠠᠵᠤ᠂ ᠭᠠᠳᠠᠭᠠᠳᠤ ᠶᠢᠨ ᠤᠩᠭᠤᠴᠠ ᠨᠤᠭᠤᠳ ᠪᠤᠴᠠᠵᠤ ᠨᠢᠰᠳᠡᠭ ᠪᠣᠯ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠶᠢᠨ ᠬᠢᠨ ᠲᠡᠷᠡ ᠶᠡᠬᠡ ᠬᠠᠷ᠎ᠠ ᠤᠲᠤᠭ᠎ᠠ ᠶᠢ ᠵᠦᠰᠦᠭᠡᠳ ᠯᠠ ︽ᠴᠢᠩᠭᠢᠰ ᠬᠠᠭᠠᠨ︾ ᠣᠯᠠᠨ ᠤᠯᠤᠰ ᠤᠨ ᠨᠢᠰᠬᠦ ᠪᠠᠭᠤᠳᠠᠯ ᠳᠤ ᠭᠠᠵᠠᠷᠳᠠᠭᠰᠠᠨ ᠲᠤᠬᠠᠢ ᠰᠣᠨᠣᠰᠳᠠᠳᠠᠭ᠃
ᠪᠤᠴᠠᠭᠠᠳ ᠨᠢᠰᠪᠡᠯ ᠳᠠᠬᠢᠨ ᠠᠭᠠᠷ ᠤᠨ ᠬᠦᠯᠭᠡ ᠪᠡᠨ ᠴᠡᠨᠡᠭᠯᠡᠬᠦ ᠡᠴᠡ ᠡᠬᠢᠯᠡᠭᠡᠳ ᠵᠠᠷᠤᠳᠠᠯ ᠴᠤ ᠥᠨᠳᠥᠷ ᠭᠠᠷᠬᠤ ᠪᠢᠵᠡ᠃ ᠲᠣᠳᠣᠷᠠᠭᠤᠯᠵᠤ ᠬᠡᠯᠡᠪᠡᠯ᠂ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ ᠴᠠᠭ ᠠᠭᠠᠷ ᠲᠠᠭᠠᠯᠠᠮᠵᠢ ᠦᠭᠡᠢ᠂ ᠠᠭᠠᠷ ᠤᠨ  ᠪᠤᠬᠢᠷᠳᠤᠯ ᠶᠡᠬᠡ ᠲᠡᠢ ᠪᠠᠶᠢᠬᠤ ᠪᠦᠷᠢ ᠳᠦ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠶᠢᠨ ᠨᠢᠰᠦᠯᠭᠡ ᠪᠤᠴᠠᠳᠠᠭ ᠪᠠᠶᠢᠭᠰᠠᠨ ᠪᠣᠯ ᠥᠨᠥᠳᠥᠷ ᠡᠨᠡ ᠺᠣᠮᠫᠠᠨᠢ ᠡᠳ᠋  ᠦᠨ ᠵᠠᠰᠠᠭ ᠤᠨ ᠬᠤᠪᠢ ᠳᠤ ᠴᠤ ᠬᠦᠨᠳᠦᠬᠡᠨ ᠨᠥᠬᠥᠴᠡᠯ ᠲᠡᠢ ᠲᠤᠯᠬᠤ ᠪᠠᠶᠢᠭᠰᠠᠨ ᠢ ᠦᠭᠡᠶᠢᠰᠬᠡᠬᠦ ᠦᠭᠡᠢ᠃ ᠲᠣᠪᠴᠢᠬᠠᠨ ᠳᠤ ᠪᠠᠨ ᠡᠨᠡ ᠬᠡᠳᠦᠨ ᠨᠢᠰᠬᠡᠭᠴᠢ ᠶᠢᠨ ᠨᠢᠷᠤᠭᠤᠨ ᠳᠡᠭᠡᠷ᠎ᠡ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠣᠷᠣᠰᠢᠨ ᠲᠣᠭᠲᠠᠨᠢᠵᠤ ᠪᠠᠶᠢᠨ᠎ᠠ ᠭᠡᠵᠦ ᠬᠡᠯᠡᠬᠦ ᠳᠦ ᠴᠤ ᠬᠡᠲᠦᠷᠡᠭᠦᠯᠦᠭᠰᠡᠨ ᠪᠣᠯᠬᠤ ᠦᠭᠡᠢ ᠯᠠ ᠪᠣᠯᠪᠠ ᠤᠤ᠃ ᠵᠠᠷᠢᠮ ᠨᠢᠭᠡ ᠳᠠᠷᠤᠭ᠎ᠠ ᠨᠠᠷ ᠤᠨ ᠬᠢᠨᠢ ︽ᠢᠳᠡᠭᠰᠡᠨ ᠤᠤᠭᠤᠭᠰᠠᠨ︾᠂ ᠮᠥᠩᠭᠥ ᠤᠭᠢᠶᠠᠭᠰᠠᠨ ᠭᠡᠬᠦ ᠬᠡᠷᠡᠭ ᠡᠴᠡ ᠪᠣᠯᠵᠤ᠂ ︽ᠮᠣᠩᠭᠣᠯ ᠤᠨ ᠢᠷᠭᠡᠨ ᠦ ᠠᠭᠠᠷ ᠤᠨ ᠲᠡᠭᠡᠭᠡᠪᠦᠷᠢ︾ ᠥᠨᠥᠳᠥᠷ ᠮᠠᠭᠤ ᠨᠡᠷ᠎ᠡ ᠲᠡᠢ ᠪᠣᠯᠤᠭᠰᠠᠨ ᠠᠴᠠ ᠪᠢᠰᠢ ᠳᠡᠯᠡᠬᠡᠢ ᠳᠦ ᠪᠣᠯ ᠦᠨᠡᠯᠡᠭᠳᠡᠬᠦ ᠠᠪᠢᠶᠠᠰ ᠲᠠᠢ ᠨᠢᠰᠬᠡᠭᠴᠢ ᠲᠡᠢ ᠺᠣᠮᠫᠠᠨᠢ᠃ ᠶᠡᠷᠦ ᠨᠢ ᠪᠣᠯ ᠮᠣᠩᠭᠣᠯᠴᠤᠳ ᠠᠯᠢᠪᠠ ᠵᠦᠢᠯ ᠢ ᠡᠬᠢᠯᠡᠭᠡᠳ ᠰᠢᠭᠦᠮᠵᠢᠯᠡᠬᠦ ᠡᠴᠡ ᠪᠡᠨ ᠡᠮᠦᠨ᠎ᠡ ᠪᠣᠳᠣᠵᠤ᠂ ᠲᠤᠩᠭᠠᠵᠤ ᠪᠠᠶᠢᠵᠤ᠂ ᠦᠭᠡ ᠦᠢᠯᠡᠳᠦᠯ ᠢᠶᠡᠨ ᠴᠡᠨᠡᠵᠦ ᠶᠠᠪᠤᠬᠤ ᠦᠭᠡᠢ ᠪᠣᠯ ᠮᠠᠭᠤᠬᠠᠢ ᠮᠣᠩᠭᠣᠯ ᠵᠠᠩ ᠮᠣᠩᠭᠣᠯ ᠢ ᠳᠡᠯᠡᠬᠡᠢ ᠳᠦ ᠤᠯᠠᠮ ᠯᠠ ᠮᠠᠭᠤᠬᠠᠢ ᠪᠠᠷ ᠰᠤᠷᠲᠠᠯᠴᠢᠯᠠᠵᠤ ᠪᠠᠶᠢᠨ᠎ᠠ᠃
ᠭ᠂ ᠬᠤᠷᠯᠤ