ᠮᠣᠩᠭᠣᠯ ᠤᠯᠤᠰ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠠᠺᠠᠳᠧᠮᠢ ᠶᠢᠨ ᠠᠷᠬᠧᠣᠯᠣᠭᠢ ᠶᠢᠨ ᠬᠦᠷᠢᠶᠡᠯᠡᠩ ᠪᠣᠯᠤᠨ ᠠᠮᠧᠷᠢᠺᠠ ᠶᠢᠨ ᠮᠢᠴᠢᠭᠠᠨ ᠦ ᠶᠡᠬᠡ ᠰᠤᠷᠭᠠᠭᠤᠯᠢ︵ᠰᠤᠳᠤᠯᠤᠭᠠᠴᠢ ᠳ᠋ᠣᠺᠲ᠋ᠣᠷ ᠪᠷᠠᠶᠠᠨ ᠮᠢᠯᠯᠧᠷ︶ ᠶᠢᠨ ᠬᠠᠮᠲᠤᠷᠠᠭᠰᠠᠨ ᠰᠤᠳᠤᠯᠭᠠᠨ ᠦ ᠪᠠᠭ ᠬᠥᠪᠰᠥᠭᠥᠯ ᠠᠢᠮᠠᠭ ᠤᠨ ᠠᠷᠤᠪᠤᠯᠠᠭ ᠰᠤᠮᠤ ᠶᠢᠨ 《ᠭᠣᠣᠯ ᠮᠣᠳᠣ》ᠬᠡᠮᠡᠬᠦ ᠭᠠᠵᠠᠷ ᠲᠤ 2026 ᠣᠨ ᠦ ᠲᠠᠪᠤᠳᠤᠭᠠᠷ ᠰᠠᠷᠠ ᠶᠢᠨ 12–27 ᠦ ᠡᠳᠦᠷ ᠤᠳ ᠲᠦ ᠠᠷᠬᠧᠣᠯᠣᠭᠢ ᠶᠢᠨ ᠮᠠᠯᠲᠠᠯᠭᠠ᠂ ᠰᠤᠳᠤᠯᠭᠠᠨ ᠦ ᠠᠵᠢᠯ ᠬᠢᠵᠦ᠂ ᠮᠣᠩᠭᠣᠯ ᠤᠨ ᠡᠵᠡᠨᠲᠦ ᠭᠦᠷᠦᠨ ᠤ ᠦᠶᠡ ᠳᠤ ᠬᠣᠯᠪᠣᠭᠳᠠᠬᠤ ᠳᠣᠯᠣᠭᠠᠨ ᠪᠤᠯᠠᠰᠢ ᠶᠢ ᠮᠠᠯᠲᠠᠨ ᠰᠤᠳᠤᠯᠵᠠᠢ᠃
ᠮᠠᠯᠲᠠᠯᠭᠠ᠂ ᠰᠤᠳᠤᠯᠭᠠᠨ ᠤ ᠶᠠᠪᠤᠴᠠ ᠳᠤ ᠥᠷᠥᠮᠡ ᠲᠡᠢ ᠱᠠᠭᠠᠵᠠᠩ ᠸᠠᠭᠠᠷ᠂ ᠡᠮᠡᠭᠡᠯ᠂ ᠳᠥᠷᠥᠭᠡ᠂ ᠠᠮᠠᠭᠠᠢ ᠵᠡᠷᠭᠡ ᠮᠣᠷᠢᠨ ᠤ ᠢᠵᠢ ᠪᠦᠷᠢᠨ ᠲᠣᠨᠣᠭ ᠬᠡᠷᠡᠭᠯᠡᠯ᠂ ᠲᠡᠮᠦᠷ ᠵᠡᠪᠡ᠂ ᠰᠠᠭᠠᠳᠠᠭ ᠤᠨ ᠲᠣᠨᠣᠭᠯᠠᠯ᠂ ᠲᠥᠷᠥᠯ ᠪᠦᠷᠢ ᠶᠢᠨ ᠴᠢᠮᠡᠭᠯᠡᠯ ᠵᠡᠷᠭᠡ ᠮᠣᠩᠭᠣᠯ ᠤᠨ ᠡᠵᠡᠨᠲᠦ ᠭᠦᠷᠦᠨ ᠤ ᠦᠶᠡ ᠶᠢᠨ ᠨᠡᠢᠭᠡᠮ᠂ ᠰᠤᠶᠤᠯ ᠠᠬᠤᠢ ᠶᠢ ᠰᠤᠳᠤᠯᠬᠤ ᠳᠦ ᠥᠨᠳᠥᠷ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠦᠨᠡᠲᠦ ᠣᠯᠳᠠᠪᠤᠷᠢ ᠨᠤᠭᠤᠳ ᠢᠯᠡᠷᠡᠵᠡᠢ᠃
ᠰᠤᠳᠤᠯᠭᠠᠨ ᠤ ᠪᠠᠭ ᠤᠨ ᠠᠬᠠᠯᠠᠭᠴᠢ᠂ ᠮᠣᠩᠭᠣᠯ ᠤᠯᠤᠰ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠠᠺᠠᠳᠧᠮᠢ ᠶᠢᠨ ᠠᠷᠬᠧᠣᠯᠣᠭᠢ ᠶᠢᠨ ᠬᠦᠷᠢᠶᠡᠯᠡᠩ ᠤᠨ ᠬᠦᠷᠡᠯ᠂ ᠲᠡᠮᠦᠷ ᠦᠨ ᠲᠦᠷᠦᠭᠦᠦ ᠦᠶᠡ ᠶᠢᠨ ᠰᠤᠳᠤᠯᠭᠠᠨ ᠤ ᠰᠠᠯᠪᠤᠷᠢ ᠶᠢᠨ ᠡᠷᠬᠢᠯᠡᠭ᠍ᠴᠢ ᠳ᠋ᠣᠺᠲ᠋ᠣᠷ ᠵ ∙ ᠪᠠᠶᠠᠷᠰᠠᠢᠬᠠᠨ᠄ ᠡᠨᠡ ᠳᠤᠷᠠᠰᠬᠠᠯ ᠲᠣᠳᠣᠷᠬᠠᠢ ᠬᠡᠮᠵᠢᠶᠡ ᠪᠡᠷ ᠲᠣᠨᠣᠭᠳᠠᠭᠰᠠᠨ᠃ ᠬᠦᠮᠦᠨ ᠦ ᠶᠠᠰᠤ᠂ ᠶᠣᠰᠣ ᠲᠠᠬᠢᠯ ᠤᠨ ᠬᠡᠰᠡᠭ ᠢ ᠰᠦᠢᠳᠭᠡᠭ᠍ᠰᠡᠨ ᠡᠷᠲᠡᠨ ᠦ ᠲᠣᠨᠣᠭᠤᠯ ᠤᠨ ᠮᠥᠷ ᠮᠠᠯᠲᠠᠯᠭᠠ ᠶᠢᠨ ᠶᠠᠪᠤᠴᠠ ᠳᠤ ᠢᠯᠡᠷᠡᠭᠰᠡᠨ᠃ ᠭᠡᠬᠦ ᠳᠦ ᠪᠡᠨ ᠡᠨᠡ ᠳᠤᠷᠠᠰᠬᠠᠯ ᠤᠨ ᠨᠢᠭᠡ ᠪᠤᠯᠤᠩ ᠳᠤ ᠲᠣᠮᠣ ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠤ ᠠᠷᠤ ᠳᠤ ᠬᠠᠢᠷᠴᠠᠭᠯᠠᠵᠤ ᠬᠢᠭᠰᠡᠨ ᠭᠠᠵᠠᠷ ᠠᠴᠠ ᠥᠷᠥᠮᠡ ᠲᠡᠢ ᠸᠠᠭᠠᠷ ᠤᠨ ᠬᠡᠰᠡᠭ ᠣᠯᠳᠠᠭᠰᠠᠨ᠃
2019 ᠣᠨ ᠳᠤ ᠤᠯᠠᠭᠠᠨ-ᠠᠭᠤᠯᠠ ᠰᠤᠮᠤ ᠶᠢᠨ ᠬᠣᠷᠢᠭ ᠠᠭᠤᠯᠠᠨ ᠠᠴᠠ ᠴᠡᠪᠳᠡᠭ ᠲᠦ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠥᠷᠥᠮᠡ ᠰᠢᠷᠠ ᠲᠣᠰᠣ ᠶᠢ ᠠᠩᠬᠠ ᠤᠳᠠᠭᠠ ᠣᠯᠵᠤ ᠪᠠᠢᠭᠰᠠᠨ᠃ ᠡᠢᠨᠬᠦᠦ ᠬᠤᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠴᠠᠭᠠᠨ ᠢᠳᠡᠭᠡ᠂ ᠴᠡᠪᠳᠡᠭ ᠲᠦ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠥᠷᠥᠮᠡ ᠲᠡᠢ ᠸᠠᠭᠠᠷ ᠢ ᠣᠯᠤᠯᠠ᠃
ᠠᠷᠤᠬᠠᠩᠭᠠᠢ ᠠᠢᠮᠠᠭ ᠤᠨ 《ᠭᠣᠣᠯ ᠮᠣᠳᠣ》ᠭᠡᠳᠡᠭ ᠭᠠᠵᠠᠷ ᠲᠤ ᠾᠦᠩᠨᠤ ᠶᠢᠨ ᠡᠵᠡᠨᠳᠦ ᠭᠦᠷᠦᠨ ᠦ ᠬᠣᠶᠠᠷ ᠲᠣᠮᠣ ᠢᠵᠠᠭᠤᠷᠲᠠᠨ ᠤ ᠪᠤᠯᠠᠰᠢ ᠢᠯᠡᠷᠡᠵᠦ᠂ ᠴᠢᠬᠤᠯᠠ ᠬᠣᠪᠣᠷ ᠣᠯᠳᠠᠪᠤᠷᠢ ᠨᠤᠭᠤᠳ ᠣᠯᠳᠠᠵᠤ᠂ ᠰᠤᠳᠤᠯᠭᠠ ᠬᠢᠭᠰᠡᠨ᠃ ᠮᠣᠩᠭᠣᠯ ᠤᠨ ᠡᠵᠡᠨᠲᠦ ᠭᠦᠷᠦᠨ ᠦ ᠳᠤᠷᠠᠰᠬᠠᠯᠲᠤ ᠭᠠᠵᠠᠷ《ᠭᠣᠣᠯ ᠮᠣᠳᠣ》 ᠭᠡᠳᠡᠭ ᠨᠡᠷᠡ ᠲᠡᠢ ᠪᠠᠢᠭᠠ ᠨᠢ ᠨᠡᠷᠡ ᠤᠰᠤ ᠴᠢᠬᠤᠯᠠ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠶᠢ ᠢᠯᠡᠷᠬᠡᠢᠢᠯᠡᠵᠦ ᠪᠠᠢᠨᠠ᠃ ᠡᠷᠲᠡ ᠡᠳᠦᠭᠡ ᠦᠶᠡ ᠶᠢᠨ ᠲᠣᠨᠣᠭᠤᠯ ᠬᠤᠯᠠᠭᠠᠢ ᠮᠣᠩᠭᠣᠯ ᠳᠤ ᠮᠠᠰᠢ ᠶᠡᠬᠡ ᠪᠠᠢᠨᠠ᠃ ᠲᠡᠢᠮᠦ ᠡᠴᠡ ᠲᠣᠨᠣᠭᠤᠯ ᠬᠤᠯᠠᠭᠠᠢ ᠶᠢ ᠵᠣᠭᠰᠣᠭᠠᠬᠤ᠂ ᠲᠡᠦᠬᠡ ᠰᠤᠶᠤᠯ ᠤᠨ ᠳᠤᠷᠠᠰᠬᠠᠯ ᠢ ᠬᠠᠮᠠᠭᠠᠯᠠᠬᠤ ᠬᠡᠷᠡᠭᠲᠡᠢ᠃
ᠪᠢᠳᠡ ᠳᠣᠯᠣᠭᠠᠨ ᠳᠤᠷᠠᠰᠬᠠᠯ ᠮᠠᠯᠲᠠᠯᠠ᠂ ᠪᠠᠷᠤᠭ 90 ᠬᠤᠪᠢ ᠨᠢ ᠡᠷᠲᠡ ᠦᠶᠡ ᠳᠦ ᠪᠡᠨ ᠲᠣᠨᠣᠭᠳᠠᠭᠰᠠᠨ ᠪᠠᠢᠯᠠ᠃ ᠡᠭᠦᠨ ᠳᠦ ᠬᠠᠷᠢᠴᠠᠩᠭᠤᠢ ᠨᠢᠭᠡ ᠪᠦᠷᠢᠨ ᠪᠦᠲᠦᠨ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠳᠤᠷᠠᠰᠬᠠᠯ ᠢ ᠮᠠᠯᠲᠠᠨ ᠰᠤᠳᠤᠯᠵᠤ᠂ ᠮᠣᠩᠭᠣᠯ ᠤᠨ ᠡᠵᠡᠨᠲᠦ ᠭᠦᠷᠦᠨ ᠦ ᠲᠡᠦᠬᠡᠨ ᠳᠦ ᠬᠣᠯᠪᠣᠭᠳᠠᠬᠤ ᠬᠣᠪᠣᠷ ᠰᠣᠨᠢᠨ ᠣᠯᠳᠠᠪᠤᠷᠢ ᠬᠡᠷᠡᠭᠯᠡᠭᠳᠡᠬᠦᠨ ᠢ ᠢᠯᠡᠷᠡᠭᠦᠯᠦᠯᠡ᠃ ᠲᠡᠷᠡ ᠨᠢ ᠨᠡᠯᠢᠶᠡᠳ ᠥᠨᠳᠥᠷ ᠲᠡᠢ ᠨᠠᠰᠤᠲᠠᠢ ᠡᠮᠡᠭᠲᠡᠢ ᠬᠦᠮᠦᠨ ᠦ ᠪᠤᠯᠠᠰᠢ ᠪᠠᠢᠭᠰᠠᠨ᠃ ᠤᠭ ᠪᠤᠯᠠᠰᠢᠨ ᠠᠴᠠ ᠡᠮᠡᠭᠡᠯ᠂ ᠳᠥᠷᠥᠭᠡ᠂ ᠲᠤᠬᠠᠢ ᠶᠢᠨ ᠦᠶᠡ ᠳᠦ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠮᠣᠷᠢᠨ ᠤ ᠲᠣᠨᠣᠭ ᠬᠡᠷᠡᠭᠰᠡᠯ ᠦᠳ ᠪᠦᠷᠢᠨ ᠡᠬᠡ ᠪᠡᠷ ᠢᠶᠡᠨ ᠭᠠᠷᠤᠭᠰᠠᠨ ᠬᠡᠮᠡᠨ ᠶᠠᠷᠢᠯᠠ᠃
ᠬᠥᠪᠰᠥᠭᠥᠯ ᠠᠢᠮᠠᠭ ᠤᠨ ᠵᠠᠰᠠᠭ ᠳᠠᠷᠤᠭᠠ ᠯ ∙ ᠲᠡᠮᠦᠷᠪᠠᠭᠠᠲᠤᠷ ᠰᠤᠳᠤᠯᠭᠠᠨ ᠤ ᠪᠠᠭ ᠤᠨ ᠠᠵᠢᠯ ᠲᠠᠢ ᠭᠠᠵᠠᠷ ᠳᠡᠭᠡᠷᠡ ᠨᠢ ᠲᠠᠨᠢᠯᠴᠠᠵᠤ᠂ ᠲᠡᠦᠬᠡ ᠰᠤᠶᠤᠯ ᠤᠨ ᠥᠪ ᠢ ᠬᠠᠮᠠᠭᠠᠯᠠᠬᠤ᠂ ᠴᠢᠨᠠᠭᠰᠢᠳᠠ ᠶᠢᠨ ᠰᠤᠳᠤᠯᠭᠠᠨ ᠦ ᠠᠵᠢᠯ ᠢ ᠳᠡᠮᠵᠢᠨ᠂ ᠬᠠᠮᠲᠤᠷᠠᠨ ᠠᠵᠢᠯᠯᠠᠬᠤ ᠪᠠᠨ ᠬᠡᠯᠡᠭᠰᠡᠨ ᠪᠠᠢᠨᠠ᠃
ᠣᠳᠣ ᠪᠠᠷ ᠢᠯᠡᠷᠡᠭᠰᠡᠨ ᠣᠯᠳᠠᠪᠤᠷᠢ ᠨᠤᠭᠤᠳ ᠢ ᠪᠦᠷᠢᠳᠬᠡᠨ ᠪᠠᠷᠢᠮᠲᠠᠵᠢᠭᠤᠯᠬᠤ᠂ ᠰᠡᠷᠭᠦᠭᠡᠨ ᠵᠠᠰᠠᠪᠤᠷᠢᠯᠠᠬᠤ᠂ ᠨᠠᠷᠢᠪᠴᠢᠯᠠᠭᠰᠠᠨ ᠰᠢᠨᠵᠢᠯᠡᠭᠡ ᠬᠢᠬᠦ ᠠᠵᠢᠯ ᠤᠳ ᠦᠷᠭᠦᠯᠵᠢᠯᠡᠵᠦ ᠪᠠᠢᠭᠠ ᠪᠥᠭᠡᠳ ᠰᠤᠳᠤᠯᠭᠠᠨ ᠤ ᠦᠷᠡ ᠳ᠋ᠦᠩ ᠢᠶᠠᠨ ᠣᠯᠠᠨ ᠨᠡᠢᠲᠡ ᠳᠦ ᠦᠶᠡ ᠱᠠᠲᠤ ᠲᠠᠢ ᠪᠠᠷ ᠲᠠᠨᠢᠯᠴᠠᠭᠤᠯᠬᠤ ᠶᠤᠮ ᠪᠠᠢᠨᠠ᠃
