1957 ᠣᠨ ᠤ 12 ᠰᠠᠷᠠ ᠶᠢᠨ ᠳᠥᠷᠪᠡᠨ ᠳᠦ ᠠᠯᠲᠠᠢ ᠶᠢᠨ ᠨᠢᠷᠤᠭᠤᠨ ᠤ ᠶᠡᠭᠡ ᠪᠣᠭᠳᠠ ᠳᠤ ᠳᠡᠯᠡᠬᠡᠢ ᠶᠢᠨ ᠴᠢᠬᠢ ᠶᠢ ᠳᠡᠯᠳᠡᠢᠯᠭᠡᠭ᠍ᠰᠡᠨ ᠬᠦᠴᠦᠲᠡᠢ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠪᠣᠯᠣᠭᠰᠠᠨ᠃ ᠬᠦᠴᠦᠲᠡᠢ ᠳᠡᠯᠪᠡᠷᠡᠯᠲᠡ ᠠᠳᠡᠯᠢ ᠴᠢᠮᠡᠭᠡ ᠭᠠᠷᠴᠤ᠂ ᠲᠩᠷᠢ ᠳᠤ ᠲᠤᠯᠤᠭᠰᠠᠨ ᠰᠢᠷᠤᠶ ᠲᠣᠭᠤᠰᠤ 230 ᠺᠢᠯᠣᠮᠧᠲᠷ ᠦᠷᠭᠦᠯᠵᠢᠯᠡᠭ᠍ᠰᠡᠨ ᠠᠭᠤᠯᠠ ᠨᠢᠷᠤᠭᠤ ᠶᠢ ᠪᠦᠷᠬᠦᠵᠦ᠂ 100 ᠮᠧᠲᠷ ᠡᠴᠡ ᠴᠠᠭᠠᠰᠢ ᠶᠠᠭᠤᠮᠠ ᠦᠵᠡᠭ᠍ᠳᠡᠬᠦ ᠪᠡᠨ ᠪᠠᠢᠵᠤ᠂ ᠬᠣᠶᠠᠷ ᠬᠣᠨᠣᠭ ᠤᠨ ᠳᠠᠷᠠᠭᠠ ᠯᠡ ᠠᠭᠠᠷ ᠴᠡᠪᠡᠷᠰᠢᠵᠡᠢ᠃
ᠭᠠᠵᠠᠷ ᠳᠣᠣᠷᠠ 30 ᠺᠢᠯᠣᠮᠧᠲᠷ ᠪᠠᠢᠭᠰᠠᠨ ᠭᠣᠯᠣᠮᠲᠠ ᠳᠤ 11-12 ᠳᠡᠰ︵ ᠪᠠᠯᠯ︶ᠬᠦᠷᠦᠭ᠍ᠰᠡᠨ ᠭᠡᠳᠡᠭ᠃ 12 ᠪᠣᠯ ᠲᠡᠭᠡᠳᠦ ᠳᠡᠰ︵ ᠵᠥᠪᠯᠡᠯᠲᠦ ᠶᠢᠨ ᠦᠶᠡ ᠶᠢᠨ ᠪᠠᠷᠢᠮᠵᠢᠶᠠ︶᠃ 80 ᠺᠢᠯᠣᠮᠧᠲᠷ ᠦᠷᠭᠦᠯᠵᠢᠯᠡᠭ᠍ᠰᠡᠨ ᠠᠭᠤᠯᠠ ᠨᠢᠷᠤᠭᠤ 8.5 ᠮᠧᠲᠷ ᠡᠷᠭᠦᠭ᠍ᠳᠡᠭ᠍ᠰᠡᠨ ᠪᠠᠢᠳᠠᠭ᠃ ᠡᠨᠡ ᠨᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠳᠤ ᠪᠠᠲᠤᠲᠠᠶ ᠪᠦᠷᠢᠳᠬᠡᠭ᠍ᠳᠡᠭ᠍ᠰᠡᠨ ᠲᠡᠭᠡᠳᠦ ᠭᠡᠮᠵᠢᠶᠠ᠃ 10 ᠮᠧᠲᠷ ᠦᠡᠳᠦᠷ ᠴᠢᠯᠠᠭᠤᠨ ᠳᠠᠪᠠᠯᠭᠠ ᠮᠡᠲᠦ ᠪᠦᠲᠦᠴᠡ ᠲᠤᠷᠤᠮᠬᠠᠨ ᠭᠡᠳᠡᠭ ᠭᠠᠵᠠᠷ ᠡᠭᠦᠰᠴᠦ᠂ ᠪᠠᠬᠠᠷ ᠠᠭᠤᠯᠠ ᠶᠢᠨ ᠣᠷᠣᠢ ᠬᠡᠰᠡᠭ ᠨᠤᠷᠠᠵᠤ ᠤᠨᠠᠬᠤ ᠳᠤ ᠪᠠᠨ ᠬᠣᠶᠠᠷ ᠭᠣᠣᠯ ᠤᠨ ᠬᠥᠨᠳᠡᠢ ᠶᠢ ᠬᠠᠭᠠᠭᠰᠠᠨ ᠢᠶᠠᠷ ᠣᠭ᠍ᠶᠤ᠂ ᠨᠣᠮᠢᠨ ᠭᠡᠬᠦ ᠨᠠᠭᠤᠷ ᠪᠣᠢ ᠪᠣᠯᠵᠠᠢ᠃
ᠡᠢᠮᠦ ᠬᠦᠴᠦᠲᠡᠢ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠬᠠᠭᠤᠷᠠᠢ ᠭᠠᠵᠠᠷ ᠬᠤᠪᠦᠷ ᠲᠣᠬᠢᠶᠠᠯᠳᠤᠨᠠ᠃ ᠭᠠᠵᠠᠷ 300 ᠺᠢᠯᠣᠮᠧᠲᠷ ᠤᠷᠲᠤ ᠬᠠᠭᠠᠷᠠᠵᠤ᠂ ᠬᠠᠭᠠᠷᠬᠠᠢ ᠶᠢᠨ ᠬᠣᠶᠠᠷ ᠲᠡᠯᠠ ᠳᠡᠭᠡᠭ᠍ᠰᠢ ᠳᠣᠭᠣᠭ᠌ᠰᠢ ᠶᠡᠭᠡ ᠵᠥᠷᠢᠵᠦ᠂ ᠭᠠᠷᠤᠭᠰᠠᠨ ᠭᠤᠤ ᠭᠠᠩᠭᠠ ᠳᠤ ᠣᠯᠠᠨ ᠮᠠᠯ ᠤᠨᠠᠵᠤ ᠦᠬᠦᠵᠡᠢ᠃ ᠡᠷᠭᠦᠭ᠍ᠳᠡᠭ᠍ᠰᠡᠨ ᠬᠡᠰᠡᠭ ᠡᠷᠭᠦᠭ᠍ᠳᠡᠭᠡ ᠦᠭᠡᠢ ᠬᠡᠰᠡᠭ ᠢᠶᠡᠨ ᠳᠠᠪᠠᠵᠤ ᠨᠥᠮᠥᠷᠦᠨ ᠲᠤᠬᠳᠡᠬᠤ᠂ ᠭᠠᠵᠠᠷ ᠬᠤᠢᠰᠢ ᠰᠢᠯᠵᠢᠭ᠍ᠰᠡᠨ᠂ ᠠᠲᠤᠷᠢᠭ᠌ᠰᠠᠨ᠂ ᠣᠪᠣᠢᠭᠰᠠᠨ ᠭᠡᠳ ᠰᠣᠳᠤᠨ ᠲᠣᠭᠲᠠᠴᠠ ᠪᠣᠢ ᠪᠣᠯᠵᠠᠢ᠃
ᠡᠬᠢᠯᠡᠭᠡᠳ 5 ᠳᠡᠰ ᠭᠠᠵᠠᠷ ᠬᠥᠳᠡᠯᠬᠦ ᠳᠤ ᠬᠥᠮᠥᠰ ᠪᠠᠷᠢᠯᠭᠠ ᠪᠠᠢᠰᠢᠩ ᠠᠴᠠ ᠭᠠᠷᠤᠭᠰᠠᠨ᠂ ᠳᠠᠬᠢᠨ ᠬᠥᠳᠡᠯᠬᠦ ᠳᠤ ᠪᠠᠷᠢᠯᠭᠠ ᠪᠠᠢᠰᠢᠩ ᠤᠳ ᠨᠤᠷᠠᠭᠰᠠᠨ᠃ ᠲᠡᠷᠢᠶᠠ ᠰᠢᠭ᠍ᠰᠢᠬᠦ ᠮᠡᠲᠦ ᠦᠩᠬᠦᠷᠢᠳᠴᠦ᠂ ᠬᠥᠮᠦᠨ ᠮᠠᠯ ᠦᠭᠡᠢ ᠬᠥᠯ ᠳᠡᠭᠡᠷᠡ ᠪᠠᠨ ᠲᠣᠭᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ ᠭᠡᠵᠦ ᠬᠥᠮᠥᠰ ᠳᠤᠷᠠᠰᠤᠭᠰᠠᠨ ᠪᠠᠢᠳᠠᠭ᠃ ᠠᠭᠤᠯᠠ ᠶᠢᠨ ᠴᠢᠯᠠᠭᠤ ᠪᠡᠯ ᠤᠷᠤᠭᠤ ᠪᠠᠨ ᠶᠡᠬᠡ ᠪᠠᠷ ᠥᠩᠬᠥᠷᠢᠭ᠍ᠰᠡᠨ ᠪᠥᠭᠡᠳ ᠬᠣᠯᠠ ᠠᠴᠠ ᠬᠠᠷᠠᠬᠤ ᠳᠤ ᠣᠯᠠᠨ ᠰᠡᠷᠯᠦᠬ ᠲᠣᠭᠤᠰᠤ ᠬᠠᠳᠠᠭᠠᠨ ᠪᠠᠭᠤᠵᠤ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠭᠰᠠᠨ ᠭᠡᠨᠡ᠃ ᠭᠠᠵᠠᠷ ᠠᠴᠠ ᠤᠰᠤ ᠣᠷᠭᠢᠯᠵᠤ᠂ 30 ᠭᠠᠷᠦᠢ ᠺᠢᠯᠣᠮᠧᠲᠷ ᠤᠷᠲᠤ ᠤᠷᠤᠰᠤᠭᠰᠠᠨ ᠭᠣᠣᠯ ᠭᠠᠷᠤᠭᠠᠳ᠂ ᠳᠥᠷᠪᠡᠨ ᠵᠢᠯ ᠦᠨ ᠳᠠᠷᠠᠭᠠ ᠲᠠᠲᠠᠷᠠᠪᠠ᠃
700 ᠺᠢᠯᠣᠮᠧᠲᠷ ᠵᠠᠢᠲᠠᠢ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ 5-6 ᠳᠡᠰ ᠳᠣᠷᠭᠢᠵᠤ᠂ ᠬᠠᠨᠠ ᠴᠤᠭᠤᠷᠠᠬᠤ᠂ ᠰᠢᠪᠠᠷ ᠴᠣᠬᠤᠢ ᠤᠨᠠᠬᠤ᠂ ᠪᠠᠷᠢᠯᠭᠠ ᠰᠠᠭᠤᠬᠤ ᠵᠡᠷᠭᠡ ᠭᠡᠮᠲᠦᠯ ᠭᠠᠷᠤᠭᠰᠠᠨ᠃ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠᠨ ᠤ ᠶᠠᠮᠤᠨ ᠳᠤ ᠴᠢᠬᠤᠯᠠ ᠬᠤᠷᠠᠯ ᠪᠣᠯᠵᠤ ᠪᠠᠢᠬᠤ ᠳᠤ ᠳᠡᠭᠡᠪᠤᠷ ᠠᠴᠠ ᠰᠢᠷᠤᠶ ᠭᠣᠭᠣᠵᠢᠭ᠌ᠰᠠᠨ᠂ ᠬᠥᠳᠡᠭᠡ ᠨᠢᠭᠡ ᠬᠤᠷᠠᠯ ᠪᠣᠯᠵᠤ ᠪᠠᠢᠲᠠᠯᠠ ᠰᠦᠬᠡ ᠵᠠᠩᠵᠤᠨ ᠤ ᠪᠠᠷᠢᠮᠠᠯ ᠲᠣᠯᠤᠭᠠᠢ ᠰᠡᠭ᠍ᠰᠦᠷᠦᠭ᠍ᠰᠡᠨ ᠴᠤ ᠭᠡᠵᠦ ᠬᠥᠮᠥᠰ ᠳᠤᠷᠠᠰᠳᠠᠭ᠃ 1000᠂1300 ᠺᠢᠯᠣᠮᠧᠲᠷ ᠵᠠᠢᠲᠠᠢ ᠤᠯᠠᠭᠠᠨ ᠦᠳᠠ᠂ ᠴᠢᠲ᠋ᠠ ᠳᠤ 4 ᠳᠡᠰ ᠦᠨ ᠭᠠᠵᠠᠷ ᠳᠣᠷᠭᠢᠭ᠌ᠰᠠᠨ᠃ ᠡᠷᠬᠦᠦ ᠳᠦ ᠣᠯᠠᠨ ᠪᠠᠷᠢᠯᠭᠠ ᠪᠠᠢᠭᠤᠯᠤᠮᠵᠢ ᠳᠤ ᠪᠡᠭᠠ ᠵᠡᠷᠭᠡ ᠭᠡᠮᠲᠦᠯ ᠤᠴᠠᠷᠠᠵᠤ᠂ ᠰᠣᠨᠢᠷᠬᠠᠯᠲᠠᠢ ᠨᠢ ᠡᠷᠬᠦᠦ ᠶᠢᠨ ᠤᠰᠤᠨ ᠴᠠᠬᠢᠯᠭᠠᠨ ᠰᠲ᠋ᠠᠨᠼ ᠤᠨ ᠰᠢᠷᠤᠢ ᠶᠢᠨ ᠳᠠᠯᠠᠩ ᠨᠢᠭ᠌ᠲᠠᠷᠠᠵᠤ᠂ ᠤᠰᠤ ᠰᠢᠭᠦᠷᠬᠦ ᠮᠠᠭᠠᠳᠯᠠᠯ ᠢ ᠦᠭᠡᠢ ᠪᠣᠯᠭᠠᠭᠰᠠᠨ ᠭᠡᠨᠡ᠃ ᠡᠨᠡ ᠨᠢ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠪᠠᠷᠢᠯᠭᠠ ᠪᠠᠢᠭᠤᠯᠤᠮᠵᠢ ᠳᠦ ᠰᠠᠢᠨ ᠨᠦᠯᠤᠬᠡ ᠦᠵᠡᠭᠦᠯᠦᠭ᠍ᠰᠡᠨ ᠮᠠᠰᠢ ᠬᠤᠪᠦᠷ ᠲᠣᠬᠢᠶᠠᠯᠳᠤᠯ ᠶᠤᠮ ᠪᠠᠢᠨᠠ᠃
ᠭᠠᠵᠠᠷ ᠬᠥᠳᠡᠯᠦᠯᠲᠡ ᠳᠦ 13 ᠬᠥᠮᠦᠨ ᠠᠮᠢ ᠨᠠᠰᠤ ᠪᠠᠨ ᠠᠯᠳᠠᠵᠤ᠂ 1000 ᠭᠠᠷᠦᠢ ᠮᠠᠯ ᠬᠠᠳᠠ ᠴᠢᠯᠠᠭᠤᠨ ᠳᠤ ᠴᠣᠬᠢᠭ᠌ᠳᠠᠨ ᠦᠬᠦᠭ᠍ᠰᠡᠨ ᠪᠠᠢᠨᠠ᠃ ᠬᠣᠶᠠᠷ ᠠᠢᠮᠠᠭ ᠤᠨ ᠳᠥᠷᠪᠡᠨ ᠰᠤᠮᠤ ᠶᠢᠨ ᠲᠥᠪ ᠭᠠᠵᠠᠷ ᠤᠨ ᠬᠥᠷᠥᠰᠥ ᠡᠴᠡ ᠠᠷᠴᠢᠭ᠌ᠳᠠᠵᠤ᠂ 10 ᠰᠠᠶᠠ︵ᠲᠡᠷᠡ ᠦᠶᠡ ᠶᠢᠨ ᠦᠨᠡ ᠬᠠᠩᠰᠢ ᠪᠠᠷ ᠪᠣᠯ ᠶᠡᠬᠡ ᠮᠥᠩᠭᠥ︶ᠲᠥᠭᠥᠷᠢᠭ ᠦᠨ ᠬᠣᠬᠢᠷᠠᠯ ᠤᠴᠠᠷᠠᠭᠰᠠᠨ᠃ ᠬᠣᠪᠣᠷᠬᠠᠨ ᠬᠦᠴᠦᠲᠡᠢ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠬᠥᠮᠦᠨ ᠠᠮᠠ ᠰᠡᠢᠷᠡᠭ ᠨᠤᠲᠤᠭ ᠲᠤ ᠪᠣᠯᠣᠭᠰᠠᠨ ᠢᠶᠠᠷ ᠬᠠᠷᠢᠴᠠᠩᠭᠤᠢ ᠪᠡᠭᠠ ᠱᠤᠤᠭᠢᠶᠠᠨ ᠳᠡᠭ᠍ᠳᠡᠭᠡᠭ᠍ᠰᠡᠨ ᠴᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠳᠤ ᠲᠣᠳᠣ ᠶᠢᠨ ᠲᠣᠳᠣ ᠪᠠᠷ ᠲᠡᠮᠳᠡᠭ᠍ᠯᠡᠭ᠍ᠳᠡᠨ ᠦᠯᠡᠳᠡᠵᠡᠢ᠃
