ᠪᠦᠲ᠋ᠠᠨ ᠤ ᠬᠠᠭᠠᠨᠲᠤ ᠤᠯᠤᠰ ᠤᠨ ᠵᠠᠯᠠᠭᠤ ᠭᠤᠲᠤᠯᠴᠢᠳ ᠢ ᠮᠣᠩᠭᠣᠯ ᠤᠨ 《ᠬᠣᠣᠰ ᠠᠵᠠ》 ᠺᠣᠮᠫᠠᠨᠢ ᠶᠢᠨ ᠵᠠᠬᠢᠷᠤᠯ ᠠ᠊ ∙ ᠵᠣᠷᠢᠭᠲᠤ᠂ ᠪ ∙ ᠠᠬᠠᠮᠠᠷᠠᠯ᠂ ᠪ ∙ ᠪᠠᠲᠤᠪᠠᠭᠠᠲᠤᠷ ᠨᠠᠷ ᠰᠤᠷᠭᠠᠭᠰᠠᠨ ᠲᠠᠯᠠ ᠪᠠᠷ ᠡᠨᠡᠳᠬᠡᠭ ᠲᠦ ᠰᠠᠭᠤᠭᠠ ᠮᠣᠩᠭᠣᠯ ᠤᠨ ᠡᠯᠴᠢᠨ ᠰᠠᠢᠳ ᠤᠨ ᠶᠠᠮᠤᠨ ᠠᠴᠠ ᠮᠡᠳᠡᠭᠡᠯᠡᠯᠡ᠃ ᠮᠣᠩᠭᠣᠯ ᠤᠨ ᠠᠩᠬᠠᠨ ᠤ ᠬᠤᠪᠢ ᠶᠢᠨ ᠭᠤᠲᠤᠯ ᠤᠨ ᠦᠢᠯᠡᠳᠪᠦᠷᠢ ᠪᠣᠯᠬᠤ 《ᠬᠣᠣᠰ ᠠᠵᠠ》 ᠺᠣᠮᠫᠠᠨᠢ 2005 ᠣᠨ ᠳᠤ ᠪᠠᠢᠭᠤᠯᠤᠭᠳᠠᠭᠰᠠᠨ ᠪᠥᠭᠡᠳ ᠡᠳᠦᠷ ᠲᠦ 300 ᠬᠣᠣᠰ ᠭᠤᠲᠤᠯ ᠦᠢᠯᠡᠳᠪᠦᠷᠢᠯᠡᠳᠡᠭ ᠠᠵᠡᠢ᠃ ᠮᠥᠨ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠬᠤ ᠶᠠᠮᠤᠨ᠂ ᠴᠠᠭᠳᠠᠭᠠ ᠶᠢᠨ ᠶᠡᠷᠦᠩᠬᠡᠢ ᠭᠠᠵᠠᠷ᠂ ᠬᠢᠯᠢ ᠬᠠᠮᠠᠭᠠᠯᠠᠬᠤ ᠶᠡᠷᠦᠩᠬᠡᠢ ᠭᠠᠵᠠᠷ ᠤᠨ ᠠᠯᠪᠠ ᠬᠠᠭᠠᠭᠴᠢᠳ ᠤᠨ ᠭᠤᠲᠤᠯ ᠤᠨ 80 ᠬᠤᠪᠢ ᠶᠢ ᠳᠠᠩ ᠢᠶᠠᠷ ᠢᠶᠠᠨ ᠦᠢᠯᠡᠳᠪᠦᠷᠢᠯᠡᠳᠡᠭ ᠪᠠᠢᠨᠠ᠃
ᠲᠤᠰ ᠦᠢᠯᠡᠳᠪᠦᠷᠢ ᠶᠢᠨ ᠤᠳᠤᠷᠢᠳᠤᠯᠭᠠ ᠨᠠᠷ ᠡᠢᠨ ᠬᠦ ᠪᠦᠲ᠋ᠠᠨ ᠳᠤ ᠠᠵᠢᠯᠯᠠᠵᠤ ᠪᠠᠢᠭᠠ ᠨᠢ ᠬᠣᠶᠠᠷ ᠤᠯᠤᠰ ᠤᠨ ᠬᠠᠮᠲᠤ ᠶᠢᠨ ᠠᠵᠢᠯᠯᠠᠭᠠ ᠣᠯᠠᠨ ᠲᠠᠯᠠᠪᠤᠷ ᠲᠤ ᠳᠡᠯᠭᠡᠷᠡᠵᠦ ᠪᠤᠢ ᠶᠢᠨ ᠵᠢᠱᠢᠶᠡ ᠶᠤᠮ᠃ ᠪᠦᠲ᠋ᠠᠨ ᠭᠤᠲᠤᠯ ᠢ ᠴᠣᠭᠯᠠᠮ ᠭᠡᠳᠡᠭ ᠪᠥᠭᠡᠳ ᠡᠪᠦᠳᠦᠭ ᠱᠦᠷᠭᠦᠭᠰᠡᠨ ᠤᠷᠲᠤ ᠲᠣᠷᠭᠠᠨ ᠲᠦᠷᠡᠢ ᠲᠡᠢ᠂ ᠰᠠᠪᠬᠢᠨ ᠵᠤᠯᠤᠭ ᠲᠠᠢ᠂ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠥᠩᠭᠡᠯᠢᠭ ᠬᠠᠳᠬᠤᠮᠠᠯ᠂ ᠴᠢᠮᠡᠭᠯᠡᠯ ᠲᠡᠢ ᠪᠠᠢᠳᠠᠭ᠃ ᠲᠤᠰ ᠭᠤᠲᠤᠯ ᠢ 1616 ᠣᠨ ᠳᠤ ᠲᠥᠪᠡᠳ ᠦᠨ ᠨᠠᠸᠠᠩᠨᠠᠮᠵᠢᠯ ᠯᠠᠮᠠ ᠨᠡᠪᠲᠡᠷᠡᠭᠦᠯᠦᠭᠰᠡᠨ ᠭᠡᠵᠦ ᠦᠵᠡᠳᠡᠭ ᠪᠠᠢᠨᠠ᠃ ᠰᠢᠷᠠ ᠥᠩᠭᠡ ᠶᠢᠨ ᠭᠤᠲᠤᠯ ᠢ ᠬᠠᠭᠠᠨ᠂ ᠤᠯᠠᠪᠢᠷ ᠰᠢᠷᠠ ᠶᠢ ᠲᠥᠷᠥ ᠶᠢᠨ ᠰᠠᠢᠳ ᠤᠳ᠂ ᠤᠯᠠᠭᠠᠨ ᠢ ᠲᠥᠷᠥ ᠶᠢᠨ ᠳᠡᠭᠡᠳᠦ ᠠᠯᠪᠠᠨ ᠤ ᠬᠦᠮᠦᠰ᠂ ᠬᠥᠬᠡ ᠶᠢ ᠫᠠᠷᠯᠠᠮᠧᠨᠲ ᠤᠨ ᠭᠡᠰᠢᠭᠦᠳ᠂ ᠨᠣᠭᠣᠭᠠᠨ ᠢ ᠡᠩ ᠦᠨ ᠢᠷᠭᠡᠳ ᠡᠮᠦᠰᠦᠨᠡ᠃
