ᠳᠤᠮᠳᠠᠭᠤᠪᠢ ᠠᠢᠮᠠᠭ ᠤᠨ ᠮᠦᠽᠧᠢ ᠬᠦᠷᠡᠯ ᠡᠳ᠋ᠯᠡᠯ ᠦᠨ ᠦᠵᠡᠮᠦᠷᠢ ᠪᠡᠷ ᠢᠶᠡᠨ ᠪᠤᠰᠤᠳ ᠠᠢᠮᠠᠭ ᠤᠨ ᠮᠦᠽᠧᠢ ᠡᠴᠡ ᠣᠨᠴᠠᠯᠢᠭ ᠲᠠᠢ᠃ ᠲᠤᠰ ᠠᠢᠮᠠᠭ ᠤᠨ ᠨᠤᠲᠤᠭ ᠲᠤ ᠬᠦᠷᠡᠯ ᠵᠡᠪᠰᠡᠭ ᠦᠨ ᠦᠶᠡ ᠳᠦ ᠬᠣᠯᠪᠣᠭᠳᠠᠬᠤ ᠳᠥᠷᠪᠡᠯᠵᠢᠨ ᠪᠤᠯᠠᠰᠢ᠂ ᠬᠢᠷᠭᠢᠰᠬᠡᠭᠦᠷ᠂ ᠬᠠᠳᠠᠨ ᠤ ᠵᠢᠷᠤᠭ ᠵᠡᠷᠭᠡ ᠳᠤᠷᠠᠰᠬᠠᠯ ᠣᠯᠠᠨ ᠪᠤᠢ᠃ ᠲᠤᠰ ᠮᠦᠽᠧᠢ ᠳᠦ 700 ᠣᠷᠴᠢᠮ ᠬᠦᠷᠡᠯ ᠡᠳ᠋ᠯᠡᠯ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠨᠠ᠃ ᠬᠦᠷᠡᠯ ᠦᠨ ᠴᠤᠭᠯᠠᠭᠤᠯᠭᠠ ᠶᠢᠨ ᠨᠢᠭᠡ ᠨᠢ 《ᠬᠦᠷᠡᠯ ᠵᠠᠭᠠᠯᠮᠠᠢ》 ᠶᠤᠮ᠃ ᠡᠨᠡ ᠬᠦ ᠠᠷᠬᠧᠣᠯᠣᠭᠢ ᠶᠢᠨ ᠣᠯᠳᠠᠪᠤᠷᠢ 4.6x 4 ᠰᠠᠨᠲ᠋ᠢᠮᠧᠲ᠋ᠷ ᠤᠨ ᠬᠡᠮᠵᠢᠶᠡ ᠲᠡᠢ ᠪᠠ ᠭᠣᠶᠣᠯᠠᠯ ᠴᠢᠮᠡᠭᠯᠡᠯ ᠦᠨ ᠡᠳ᠋ ᠵᠦᠢᠯ ᠳᠦ ᠬᠠᠮᠢᠶᠠᠷᠤᠨᠠ᠃
ᠮᠦᠽᠧᠢ ᠶᠢᠨ ᠲᠠᠢᠯᠪᠤᠷᠢ ᠳᠤ ᠪᠢᠴᠢᠭᠰᠡᠨ ᠢᠶᠡᠷ ᠡᠨᠡ ᠬᠦ ᠬᠦᠷᠡᠯ ᠦᠵᠡᠮᠦᠷᠢ ᠣᠷᠴᠢᠨ ᠦᠶᠡ ᠶᠢᠨ ᠾᠷᠢᠰᠲ᠋ᠤᠰ ᠤᠨ ᠵᠠᠭᠠᠯᠮᠠᠢ ᠶᠢᠨ ᠬᠡᠯᠪᠡᠷᠢ ᠲᠡᠢ ᠪᠥᠭᠡᠳ ᠬᠥᠨᠳᠡᠯᠡᠨ ᠬᠡᠰᠡᠭ ᠪᠣᠯᠤᠨ ᠪᠣᠰᠤᠭᠠ ᠬᠡᠰᠡᠭ ᠦᠨ ᠳᠡᠭᠡᠳᠦ ᠲᠠᠯᠠ ᠨᠤᠭᠤᠳ ᠪᠣᠭᠣᠨᠢ᠃ ᠳᠡᠭᠡᠳᠦ ᠬᠡᠰᠡᠭ ᠨᠢ ᠬᠤᠭᠤᠷᠠᠭᠰᠠᠨ᠂ ᠵᠠᠭᠠᠯᠮᠠᠢ ᠶᠢᠨ ᠦᠵᠦᠭᠦᠷ ᠦᠳ ᠭᠤᠷᠪᠠ ᠰᠠᠯᠠᠭᠠᠯᠠᠭᠰᠠᠨ ᠴᠡᠴᠡᠭ ᠨᠠᠪᠴᠢ ᠮᠠᠶ᠋ᠢᠭ ᠤᠨ ᠬᠡᠯᠪᠡᠷᠢ ᠲᠡᠢ᠂ ᠲᠡᠭᠦᠨ ᠳᠡᠭᠡᠷᠡ ᠴᠠᠭᠠᠰᠢ ᠬᠣᠩᠬᠣᠢᠯᠭᠠᠨ ᠴᠣᠭᠣᠯᠪᠤᠷᠢᠯᠠᠭᠰᠠᠨ ᠣᠯᠠᠨ ᠵᠢᠵᠢᠭ ᠨᠦᠬᠡ ᠲᠡᠢ ᠶᠤᠮ᠃ ᠡᠨᠡ ᠬᠦ ᠦᠵᠡᠮᠦᠷᠢ ᠨᠢ ᠠᠷᠪᠠᠳᠤᠭᠠᠷ ᠵᠠᠭᠤᠨ ᠤ ᠦᠶᠡ ᠶᠢᠨ ᠮᠣᠩᠭᠣᠯ ᠤᠨ ᠨᠡᠭᠦᠳᠡᠯᠴᠢᠨ ᠠᠢᠮᠠᠭ ᠤᠳ ᠤᠨ ᠨᠢᠭᠡ ᠬᠡᠷᠡᠢᠳ ᠠᠢᠮᠠᠭ ᠤᠨ ᠬᠢᠨ ᠦ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠡᠳ᠋ ᠵᠦᠢᠯ ᠬᠡᠮᠡᠨ ᠲᠣᠳᠣᠷᠬᠠᠢᠯᠠᠳᠠᠭ᠃
