ᠮᠣᠩᠭᠣᠯᠴᠤᠳ ᠣᠯᠠᠨ ᠮᠢᠩᠭᠠᠨ ᠵᠢᠯ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠭᠰᠡᠨ᠃ ᠦᠬᠡᠷ᠂ ᠬᠣᠨᠢ᠂ ᠢᠮᠠᠭᠠ᠂ ᠭᠠᠬᠠᠢ᠂ ᠨᠣᠬᠠᠢ᠂ ᠲᠠᠬᠢᠶᠠ ᠭᠡᠬᠦ ᠮᠠᠯ ᠢ ᠠᠷᠪᠠᠨ ᠮᠢᠩᠭᠠᠨ ᠵᠢᠯ ᠦᠨ ᠡᠮᠦᠨᠡ ᠭᠡᠷᠰᠢᠭᠦᠯᠦᠭᠰᠡᠨ᠂ ᠲᠡᠷᠡ ᠦᠶᠡ ᠳᠦ ᠰᠠᠶᠠ ᠪᠠᠷ ᠲᠣᠭᠠᠯᠠᠭᠳᠠᠵᠤ ᠪᠠᠶᠢᠭᠰᠠᠨ ᠡᠳᠡᠭᠡᠷ ᠮᠠᠯ ᠤᠨ ᠶᠡᠬᠡᠩᠬᠢ ᠠᠽᠢᠶᠠ᠂ ᠠᠹᠷᠢᠺᠠ ᠲᠢᠪ ᠲᠦ ᠪᠠᠶᠢᠭᠰᠠᠨ ᠭᠡᠵᠦ ᠶᠤ᠂ ᠨ᠂ ᠾᠠᠷᠠᠷᠢ ᠶᠢᠨ《ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠲᠣᠪᠴᠢ ᠲᠡᠦᠬᠡ》ᠨᠤᠮ ᠳᠤ ᠪᠢᠴᠢᠵᠡᠢ᠃ ᠡᠭᠦᠨ ᠡᠴᠡ ᠦᠵᠡᠪᠡᠯ ᠮᠣᠩᠭᠣᠯᠴᠤᠳ ᠲᠠᠪᠤᠨ ᠲᠥᠷᠥᠯ ᠦᠨ ᠮᠠᠯ ᠢ ᠭᠡᠷᠰᠢᠭᠦᠯᠦᠭᠰᠡᠨ᠂ ᠳᠡᠭᠡᠷᠡ ᠦᠶᠡ ᠡᠴᠡ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠶᠢ ᠣᠳᠣ ᠬᠦᠷᠲᠡᠯᠡ ᠡᠷᠬᠢᠯᠡᠵᠦ ᠪᠠᠶᠢᠭᠠ ᠣᠯᠠᠨ ᠮᠢᠩᠭᠠᠨ ᠵᠢᠯ ᠦᠨ ᠲᠤᠷᠰᠢᠯᠭᠠ ᠲᠠᠢ ᠬᠦᠮᠦᠰ ᠶᠤᠮ᠃
ᠣᠷᠴᠢᠨ ᠦᠶᠡ ᠳᠦ ᠳᠡᠯᠡᠬᠡᠢ ᠶᠢᠨ ᠶᠡᠬᠡᠩᠬᠢ ᠤᠯᠤᠰ ᠣᠷᠣᠨ ᠬᠦᠨᠡᠰᠦᠨ ᠦ ᠪᠡᠨ ᠬᠡᠷᠡᠭᠴᠡᠭᠡ ᠶᠢ ᠬᠠᠩᠭᠠᠬᠤ ᠱᠠᠭᠠᠷᠳᠠᠯᠭᠠ ᠳᠤ ᠰᠢᠬᠠᠭᠳᠠᠵᠤ ᠡᠷᠴᠢᠮᠵᠢᠭᠰᠡᠨ ᠮᠠᠯ ᠠᠵᠤ ᠠᠬᠤᠢ ᠶᠢ ᠬᠥᠭᠵᠢᠭᠦᠯᠵᠦ ᠪᠠᠶᠢᠭᠠ ᠪᠣᠯ ᠮᠣᠩᠭᠣᠯ ᠮᠡᠲᠦ ᠴᠥᠬᠡᠨ ᠤᠯᠤᠰ ᠨᠡᠭᠦᠳᠡᠯ ᠦᠨ ᠥᠪ ᠰᠤᠶᠤᠯ – ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠶᠢ ᠬᠠᠳᠠᠭᠠᠯᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠨᠠ᠃ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠵᠦ ᠪᠠᠶᠢᠭᠠ ᠡᠨᠡ ᠬᠣᠶᠠᠷ ᠰᠢᠰᠲ᠋ᠧᠮ ᠦᠨ ᠡᠶᠡᠷᠭᠦ ᠰᠥᠷᠭᠦ ᠶᠢ ᠵᠥᠪ ᠳ᠋ᠦᠩᠨᠡᠵᠦ᠂ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠪᠠᠨ ᠬᠥᠭᠵᠢᠭᠦᠯᠵᠦ᠂ ᠤᠯᠠᠮᠵᠢᠯᠠᠨ ᠠᠪᠴᠤ ᠶᠠᠪᠤᠭᠠ ᠠᠷᠭᠠ ᠲᠸᠭ᠍ᠨᠤᠯᠦᠭᠢ ᠪᠤᠶᠤ ᠠᠭᠤᠤ ᠮᠡᠳᠡᠯᠭᠡ ᠤᠬᠠᠭᠠᠨ ᠢ ᠨᠢ ᠬᠠᠳᠠᠭᠠᠯᠠᠵᠤ ᠪᠠᠶᠢᠬᠤ ᠡᠷᠬᠢᠮ ᠡᠭᠦᠷᠭᠡ ᠶᠢ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠡᠮᠦᠨᠡ ᠬᠦᠯᠢᠶᠡᠬᠦ ᠬᠦᠮᠦᠰ ᠪᠣᠯ ᠮᠣᠩᠭᠣᠯᠴᠤᠳ᠃
ᠡᠷᠴᠢᠮᠵᠢᠭᠰᠡᠨ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠵᠠᠷᠢᠮ ᠨᠢᠭᠡᠴᠡ ᠶᠢ ᠵᠥᠪᠬᠡᠨ ᠲᠣᠮᠣᠬᠠᠨ ᠬᠣᠲᠠ ᠶᠢᠨ ᠬᠦᠮᠦᠨ ᠠᠮᠠ ᠶᠢᠨ ᠰᠦᠨ ᠦ ᠬᠡᠷᠡᠭᠴᠡᠭᠡ᠂ ᠨᠡᠶᠢᠲᠡ ᠶᠢᠨ ᠬᠣᠭᠣᠯᠠᠨ ᠤ ᠭᠠᠵᠠᠷ ᠤᠨ ᠮᠢᠬᠠᠨ ᠤ ᠬᠡᠷᠡᠭᠴᠡᠭᠡ ᠶᠢ ᠵᠠᠬᠢᠶᠠᠯᠠᠭᠠ ᠶᠢᠨ ᠬᠢᠨᠢ ᠳᠠᠭᠠᠤ ᠬᠠᠩᠭᠠᠬᠤ ᠵᠣᠷᠢᠭᠤᠯᠤᠯᠲᠠ ᠪᠠᠷ᠂ ᠵᠣᠬᠢᠬᠤ ᠨᠥᠬᠥᠴᠡᠯ ᠪᠦᠷᠢᠳᠦᠭᠰᠡᠨ ᠴᠦᠭᠡᠨ ᠪᠠᠶᠢᠷᠢᠰᠢᠯ ᠳᠤ ᠪᠠᠶᠢᠭᠤᠯᠬᠤ ᠶᠢ᠂ ᠲᠡᠭᠡᠬᠦ ᠳᠦ ᠪᠡᠨ ᠮᠠᠯ ᠢᠶᠠᠨ ᠲᠣᠳᠣᠷᠬᠠᠢ ᠬᠤᠭᠤᠴᠠᠭᠠᠨ ᠳᠤ ᠵᠠᠪᠠᠯ ᠪᠡᠯᠴᠢᠭᠡᠷ ᠲᠦ ᠬᠠᠷᠢᠭᠤᠯᠳᠠᠭ ᠨᠥᠬᠥᠴᠡᠯ ᠲᠡᠢ ᠵᠥᠪᠰᠢᠶᠡᠷᠡᠳᠡᠭ ᠪᠠᠶᠢᠬᠤ ᠨᠢ ᠵᠦᠢᠲᠡᠢ ᠶᠤᠮ᠃
ᠡᠷᠴᠢᠮᠵᠢᠭᠰᠡᠨ ᠮᠠᠯ ᠠᠵᠤ ᠠᠬᠤᠢ᠂ ᠲᠡᠭᠦᠨ ᠦ ᠪᠦᠲᠦᠭᠡᠭᠳᠡᠬᠦᠨ
ᠠᠷᠪᠠᠨ ᠬᠣᠶᠠᠷ ᠮᠢᠩᠭᠠ ᠣᠷᠴᠢᠮ ᠵᠢᠯ ᠦᠨ ᠡᠮᠦᠨᠡ 5-8 ᠰᠠᠶᠠ ᠪᠠᠷ ᠲᠣᠭᠠᠯᠠᠭᠳᠠᠳᠠᠭ ᠪᠠᠶᠢᠭᠰᠠᠨ ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠬᠦᠮᠦᠨ ᠠᠮᠠ ᠣᠳᠣ ᠳᠤᠯᠤᠭᠠᠨ ᠲᠡᠷᠪᠤᠮ︵ ᠨᠢᠭᠡ ᠲᠡᠷᠪᠤᠮ ᠨᠢ ᠠᠷᠪᠠᠨ ᠳ᠋ᠦᠩᠰᠢᠭᠤᠷ ᠲᠠᠢ ᠲᠡᠩᠴᠡᠨᠡ︶ ᠪᠣᠯᠲᠠᠯᠠ ᠥᠰᠬᠦ ᠳᠦ ᠪᠡᠨ ᠬᠡᠳᠦᠨ ᠰᠠᠶᠠ ᠪᠠᠶᠢᠭᠰᠠᠨ ᠮᠠᠯ ᠢ ᠣᠯᠠᠨ ᠲᠡᠷᠪᠤᠮ ᠪᠣᠯᠲᠠᠯᠠ ᠨᠡᠮᠡᠭᠳᠡᠭᠦᠯᠵᠡᠢ᠃ ᠣᠷᠴᠢᠨ ᠦᠶᠡ ᠳᠦ ᠳᠡᠯᠡᠬᠡᠢ ᠳᠡᠭᠡᠷᠡ ᠲᠠᠬᠢᠶᠠ ᠬᠠᠮᠤᠭ ᠤᠨ ᠶᠡᠬᠡ ᠪᠤᠶᠤ 25 ᠲᠡᠷᠪᠤᠮ᠂ ᠬᠣᠨᠢ᠂ ᠦᠬᠡᠷ᠂ ᠭᠠᠬᠠᠢ ᠲᠤᠰ ᠪᠦᠷᠢ ᠲᠡᠷᠪᠤᠮ ᠪᠠᠶᠢᠭᠠ ᠭᠡᠳᠡᠭ᠃
ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ ᠣᠯᠠᠨ ᠮᠢᠩᠭᠠ ᠳᠠᠬᠢᠨ ᠥᠰᠦᠭᠰᠡᠨ ᠬᠦᠮᠦᠨ ᠠᠮᠠ ᠮᠢᠬᠠᠨ ᠤ ᠪᠠᠨ ᠬᠡᠷᠡᠭᠴᠡᠭᠡ ᠶᠢ ᠵᠥᠪᠬᠡᠨ ᠮᠠᠯ ᠤᠨ ᠲᠣᠭᠠᠨ ᠤ ᠥᠰᠦᠯᠲᠡ ᠪᠡᠷ ᠬᠠᠩᠭᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠠᠶᠢᠭᠰᠠᠨ ᠤᠴᠢᠷ ᠠᠴᠠ ᠡᠷᠴᠢᠮᠵᠢᠭᠰᠡᠨ ᠮᠠᠯ ᠠᠵᠤ ᠠᠬᠤᠢ ᠶᠢ ᠪᠤᠢ ᠪᠣᠯᠭᠠᠭᠰᠠᠨ ᠪᠠᠶᠢᠨᠠ᠃ ᠡᠷᠴᠢᠮᠵᠢᠭᠰᠡᠨ ᠮᠠᠯ ᠠᠵᠤ ᠠᠬᠤᠢ ᠭᠡᠳᠡᠭ ᠶᠠᠭᠤ ᠪᠤᠢ ᠭᠡᠪᠡᠯ᠄ ᠮᠠᠯ ᠢ ᠬᠠᠰᠢᠶᠠ ᠬᠤᠷᠤᠭᠠᠨ ᠳᠤ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠬᠣᠷᠢᠨᠠ᠂ ᠴᠥᠭᠡᠨ ᠲᠥᠷᠥᠯ ᠦᠨ ᠲᠡᠵᠢᠭᠡᠯ ᠦᠨ ᠤᠷᠭᠤᠮᠠᠯ ᠤᠨ ᠦᠷᠡ ᠰᠦᠷᠡᠯ ᠬᠣᠶᠠᠷ ᠢ ᠨᠡᠶᠢᠯᠡᠭᠦᠯᠵᠦ ᠲᠡᠭᠡᠷᠮᠡᠳᠡᠭᠡᠳ ᠵᠠᠷᠢᠮ ᠸᠢᠲ᠋ᠠᠮᠢᠨ ᠢᠶᠠᠷ ᠪᠠᠶᠠᠵᠢᠭᠤᠯᠵᠤ ᠪᠠᠭᠰᠤᠷᠤᠭᠰᠠᠨ ᠲᠡᠵᠢᠭᠡᠯ ᠢᠶᠡᠷ ᠪᠣᠷᠳᠣᠨᠠ᠂ ᠴᠢᠯᠦᠭᠡᠲᠦ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠤᠯᠭᠠᠭᠰᠠᠨ ᠮᠠᠯ ᠤᠨ ᠪᠤᠯᠴᠢᠩ ᠬᠥᠭᠵᠢᠳᠡᠭ ᠦᠭᠡᠢ ᠤᠴᠢᠷ ᠠᠴᠠ ᠮᠢᠬᠠ ᠨᠢ ᠵᠥᠭᠡᠯᠡᠨ ᠪᠣᠯᠳᠠᠭ ᠭᠡᠵᠦ ᠦᠵᠡᠳᠡᠭ᠃ ᠴᠡᠪᠡᠷ ᠠᠭᠠᠷ ᠤᠨ ᠳᠤᠲᠠᠭᠳᠠᠯ᠂ ᠪᠠᠶᠢᠭᠠᠯᠢ ᠣᠷᠴᠢᠨ ᠤ ᠪᠤᠬᠢᠷᠳᠤᠯ᠂ ᠡᠯᠳᠡᠪ ᠮᠢᠺᠷᠣᠪ ᠸᠢᠷᠦ᠋ᠰ ᠦᠨ ᠦᠷᠡᠵᠢᠬᠦ ᠤᠷᠴᠢᠨ ᠳᠤ ᠪᠠᠶᠢᠳᠠᠭ᠃
ᠡᠶᠢᠮᠦ ᠠᠵᠤ ᠠᠬᠤᠢ ᠶᠢᠨ ᠮᠠᠯ ᠪᠣᠭᠣᠨᠢ ᠬᠤᠭᠤᠴᠠᠭᠠᠨ ᠳᠤ ᠮᠢᠬᠠ᠂ ᠰᠦ ᠪᠣᠯᠵᠤ ᠬᠤᠪᠢᠷᠠᠳᠠᠭ᠂ ᠬᠠᠭᠠᠰ ᠠᠮᠢᠲᠠᠢ ᠠᠮᠢᠲᠠᠨ ᠭᠡᠮᠡᠷ ᠶᠠᠭᠤᠮᠠ ᠪᠣᠯᠳᠠᠭ ᠪᠠᠶᠢᠨᠠ᠃ ᠬᠡᠲᠦᠷᠡᠭᠦᠯᠭᠡ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ᠃ ᠭᠡᠪᠡᠴᠦ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ᠂ ᠲᠡᠭᠦᠨ ᠦ ᠪᠤᠰᠤᠳ ᠠᠮᠢᠲᠠᠳ ᠲᠠᠢ ᠬᠡᠷᠴᠡᠭᠡᠢ ᠬᠠᠷᠢᠴᠠᠵᠤ ᠪᠠᠶᠢᠭᠰᠠᠨ ᠲᠡᠦᠬᠡ ᠲᠠᠯᠠ ᠠᠴᠠ ᠦᠵᠡᠪᠡᠯ ᠬᠡᠲᠦᠷᠡᠭᠦᠯᠭᠡ ᠪᠢᠰᠢ ᠶᠤᠮ᠃ ᠲᠡᠷᠡ ᠲᠡᠦᠬᠡ ᠶᠢ ᠲᠣᠪᠴᠢ ᠪᠠᠷ ᠦᠭᠦᠯᠡᠪᠡᠯ᠄ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠡᠬᠢᠯᠡᠭᠡᠳ ᠵᠡᠷᠯᠢᠭ ᠠᠮᠢᠲᠠᠳ ᠢ ᠠᠩᠨᠠᠵᠤ ᠢᠳᠡᠭᠰᠡᠭᠡᠷ ᠪᠠᠶᠢᠭᠠᠳ ᠶᠡᠬᠡᠩᠬᠢ ᠶᠢ ᠤᠰᠠᠳᠬᠠᠭᠰᠠᠨ᠂ ᠵᠠᠷᠢᠮ ᠬᠡᠰᠡᠭ ᠢ ᠨᠢ ᠭᠡᠷᠰᠢᠭᠦᠯᠦᠭᠰᠡᠨ᠂ ᠣᠳᠣ ᠭᠡᠷᠰᠢᠭᠦᠯᠦᠭᠰᠡᠨ ᠢ ᠪᠡᠨ ᠠᠮᠢ ᠲᠡᠳᠦᠢ ᠠᠮᠢᠲᠠᠨ ᠪᠣᠯᠭᠠᠵᠤ ᠮᠢᠬᠠ ᠦᠢᠯᠡᠳᠪᠦᠷᠢᠯᠡᠬᠦ ᠬᠡᠷᠡᠭᠰᠡᠯ ᠪᠣᠯᠭᠠᠵᠤ ᠪᠠᠶᠢᠭᠠ ᠲᠡᠦᠬᠡ ᠶᠤᠮ᠃
ᠡᠨᠡ ᠲᠡᠦᠬᠡᠨ ᠠᠮᠢᠳᠤᠷᠠᠯ ᠤᠨ ᠦᠷᠡ ᠳ᠋ᠦᠩ ᠳᠦ ᠣᠯᠠᠨ ᠲᠡᠷᠪᠤᠮ ᠢᠶᠠᠷ ᠲᠣᠭᠠᠯᠠᠭᠳᠠᠳᠠᠭ ᠮᠠᠯ ᠭᠡᠭᠴᠢ ᠡᠴᠡ ᠭᠠᠷᠭᠠᠵᠤ ᠠᠪᠴᠤ ᠪᠠᠶᠢᠭᠠ ᠮᠢᠬᠠ᠂ ᠰᠦ ᠨᠡᠷᠡᠲᠡᠢ ᠬᠦᠨᠡᠰᠦᠨ ᠦ ᠪᠦᠲᠦᠭᠡᠭᠳᠡᠬᠦᠨ ᠦ ᠪᠦᠲᠦᠴᠡ ᠴᠢᠨᠠᠷ ᠡᠷᠡᠰ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠠᠶᠢᠨᠠ᠃ ᠡᠷᠴᠢᠮᠵᠢᠭᠰᠡᠭᠡᠷ ᠪᠠᠶᠢᠭᠠ ᠠᠵᠤ ᠠᠬᠤᠢ ᠳᠤ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠮᠢᠬᠠᠨ ᠤ ᠠᠮᠲᠠ ᠮᠠᠭᠤ ᠤᠴᠢᠷ ᠠᠴᠠ ᠲᠡᠭᠦᠨ ᠢ ᠵᠥᠪᠬᠡᠨ ᠡᠯᠳᠡᠪ ᠶᠠᠩᠵᠤ ᠶᠢᠨ ᠠᠮᠲᠠᠯᠠᠭᠴᠢ ᠲᠠᠢ ᠬᠡᠷᠡᠭᠯᠡᠵᠦ ᠪᠣᠯᠳᠠᠭ᠃ ᠢᠷᠡᠭᠡᠳᠦᠢ ᠳᠦ ᠡᠷᠴᠢᠮᠵᠢᠭᠰᠡᠨ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠬᠦᠨᠡᠰᠦᠨ ᠦ ᠭᠡᠬᠦ ᠪᠦᠲᠦᠭᠡᠭᠳᠡᠬᠦᠨ ᠦ ᠠᠮᠲᠠ ᠴᠢᠨᠠᠷ ᠰᠠᠶᠢᠵᠢᠷᠠᠬᠤ ᠦᠭᠡᠢ᠂ ᠲᠡᠭᠦᠨ ᠦ ᠥᠩᠭᠡ ᠦᠵᠡᠮᠵᠢ ᠶᠢ ᠶᠠᠭᠠᠬᠢᠵᠤ ᠴᠤ ᠭᠣᠶᠣ ᠪᠣᠯᠭᠠᠭᠠᠳ ᠠᠮᠲᠠᠯᠠᠭᠠᠳ ᠴᠤ ᠬᠡᠷᠡᠭᠯᠡᠬᠦ ᠠᠷᠭᠠ ᠦᠭᠡᠢ ᠪᠣᠯᠵᠤ ᠮᠠᠭᠠᠳ᠃ ᠬᠠᠷᠢᠨ ᠪᠡᠯᠴᠢᠭᠡᠷ ᠦᠨ ᠮᠠᠯ ᠤᠨ ᠮᠢᠬᠠ᠂ ᠰᠦ ᠣᠯᠵᠤ ᠬᠡᠷᠡᠭᠯᠡᠬᠦ ᠶᠠᠪᠤᠳᠠᠯ ᠠᠵᠠ ᠵᠢᠷᠭᠠᠯ ᠲᠠᠢ᠂ ᠡᠷᠡᠭᠦᠯ ᠠᠮᠢᠳᠤᠷᠠᠬᠤ ᠬᠦᠰᠡᠯ ᠲᠡᠢ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠮᠥᠷᠦᠭᠡᠳᠳᠡᠭ ᠵᠦᠢᠯ ᠪᠣᠯᠤᠨᠠ᠃
ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ᠂ ᠲᠡᠭᠦᠨ ᠦ ᠪᠦᠲᠦᠭᠡᠭᠳᠡᠬᠦᠨ
ᠭᠠᠳᠠᠭᠠᠳᠤ ᠶᠢᠨ ᠵᠣᠴᠢᠳ ᠮᠣᠩᠭᠣᠯ ᠦᠨᠳᠦᠰᠦᠨ ᠦ ᠬᠣᠭᠣᠯᠠ ᠬᠦᠨᠡᠰᠦ ᠶᠢ ᠰᠣᠨᠢᠷᠬᠠᠳᠠᠭ᠃ ᠮᠢᠨᠦ ᠲᠠᠨᠢᠯᠴᠠᠭᠰᠠᠨ ᠣᠷᠣᠰ᠂ ᠦᠺᠷᠠᠶᠢᠨ᠂ ᠫᠤᠯᠱᠠ᠂ ᠴᠸᠬᠤ᠋᠂ ᠭᠧᠷᠮᠠᠨ ᠵᠡᠷᠭᠡ ᠣᠯᠠᠨ ᠬᠦᠮᠦᠨ ᠠᠩᠬᠠ ᠮᠣᠩᠭᠣᠯ ᠳᠤ ᠢᠷᠡᠬᠦ ᠳᠦ ᠪᠡᠨ ᠬᠣᠨᠢᠨ ᠤ ᠮᠢᠬᠠ ᠶᠢ ᠦᠨᠦᠷ ᠠᠮᠲᠠ ᠨᠢ ᠲᠠᠭᠠᠯᠠᠭᠳᠠᠳᠠᠭ ᠦᠭᠡᠢ ᠤᠴᠢᠷ ᠠᠴᠠ ᠢᠳᠡᠬᠦ ᠦᠭᠡᠢ᠂ ᠦᠬᠡᠷ ᠲᠠᠬᠢᠶᠠᠨ ᠤ ᠮᠢᠬᠠ ᠢᠳᠡᠳᠡᠭ ᠭᠡᠳᠡᠭ ᠪᠠᠶᠢᠯᠠ᠃ ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ ᠳᠠᠷᠠᠭᠠ ᠨᠥᠭᠥᠭᠡ ᠨᠥᠬᠥᠷ ᠮᠠᠨᠢ ᠬᠣᠨᠢᠨ ᠤ ᠮᠢᠬᠠ ᠶᠢ ᠮᠣᠩᠭᠣᠯᠴᠤᠳ ᠲᠠᠢ ᠠᠳᠠᠯᠢ ᠵᠥᠪᠬᠡᠨ ᠳᠠᠪᠤᠰᠤᠯᠠᠵᠤ ᠴᠢᠨᠠᠭᠠᠳ ᠶᠠᠮᠠᠷ ᠴᠤ ᠠᠮᠲᠠᠯᠠᠭᠴᠢ ᠦᠭᠡᠢ ᠪᠡᠷ ᠠᠮᠲᠠᠷᠬᠠᠨ ᠵᠣᠭᠣᠭᠯᠠᠳᠠᠭ ᠪᠣᠯᠤᠭᠰᠠᠨ ᠪᠠᠶᠢᠳᠠᠭ ᠪᠠᠶᠢᠪᠠ᠃ ᠣᠳᠣ ᠴᠤ ᠭᠠᠳᠠᠭᠠᠳᠤ ᠶᠢᠨ ᠬᠢᠨ ᠲᠡᠶᠢᠮᠦ᠃ ᠰᠤᠽᠢᠶᠠᠯᠢᠰᠮ ᠤᠨ ᠦᠶᠡ ᠳᠦ ᠮᠣᠩᠭᠣᠯ ᠠᠴᠠ ᠲᠡᠷᠡ ᠦᠶᠡ ᠶᠢᠨ ᠵᠥᠪᠯᠡᠯᠲᠦ ᠳᠦ ᠭᠠᠷᠭᠠᠵᠤ ᠪᠠᠶᠢᠭᠰᠠᠨ ᠮᠠᠯ ᠤᠨ ᠮᠢᠬᠠᠨ ᠤ ᠴᠢᠨᠠᠷ ᠥᠨᠳᠥᠷ ᠦᠨᠡᠯᠡᠭᠳᠡᠳᠡᠭ ᠪᠠᠶᠢᠭᠰᠠᠨ᠃ ᠭᠤᠷᠪᠠᠨ ᠵᠢᠯ ᠦᠨ ᠡᠮᠦᠨᠡ ᠪᠢ ᠶᠠᠫᠣᠨ ᠤᠯᠤᠰ ᠲᠤ ᠮᠣᠩᠭᠣᠯ ᠤᠨ ᠲᠤᠬᠠᠢ ᠢᠯᠡᠳᠭᠡᠯ ᠤᠩᠰᠢᠬᠤ ᠪᠠᠷ ᠣᠴᠢᠬᠤ ᠳᠤ ᠪᠠᠨ ᠴᠢᠯᠦᠭᠡᠲᠦ ᠶᠠᠷᠢᠯᠴᠠᠯᠭᠠ ᠲᠠᠢ ᠠᠭᠤᠯᠵᠠᠯᠲᠠ ᠳᠤ ᠣᠷᠣᠯᠴᠠᠬᠤ ᠳᠤ ᠨᠢᠭᠡ ᠶᠠᠫᠣᠨ ᠬᠦᠮᠦᠨ᠄ ᠮᠣᠩᠭᠣᠯ ᠬᠣᠨᠢᠨ ᠤ ᠮᠢᠬᠠ ᠣᠨᠴᠠᠭᠠᠢ ᠰᠠᠶᠢᠬᠠᠨ ᠠᠮᠲᠠᠲᠠᠢ ᠶᠤᠮ ᠪᠢᠯᠡ᠂ ᠶᠠᠮᠠᠷ ᠤᠴᠢᠷ ᠲᠠᠢ ᠪᠤᠢ ᠭᠡᠵᠦ ᠠᠰᠠᠭᠤᠭᠰᠠᠨ᠃ ᠪᠢ᠄ ᠮᠣᠩᠭᠣᠯ ᠳᠤ ᠮᠠᠯ ᠢ ᠪᠡᠯᠴᠢᠭᠡᠷ ᠲᠦ ᠮᠠᠯᠯᠠᠳᠠᠭ ᠤᠴᠢᠷ ᠠᠴᠠ ᠮᠢᠬᠠ ᠨᠢ ᠠᠮᠲᠠᠲᠠᠢ ᠪᠠᠶᠢᠳᠠᠭ ᠭᠡᠵᠦ ᠬᠠᠷᠢᠭᠤᠯᠵᠤ ᠪᠢᠯᠡ᠃
ᠮᠣᠩᠭᠣᠯ ᠳᠤ ᠤᠯᠠᠮᠵᠢᠯᠠᠨ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠠ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠲᠠᠪᠤᠨ ᠲᠥᠷᠥᠯ ᠦᠨ ᠮᠠᠯ ᠨᠢ ᠴᠡᠪᠡᠷ ᠬᠦᠷᠦᠰᠦᠨ ᠳᠦ ᠵᠢᠮᠠ ᠪᠠᠷ ᠢᠶᠠᠨ ᠤᠷᠭᠤᠵᠤ ᠪᠠᠶᠢᠭᠠ ᠣᠯᠠᠨ ᠲᠥᠷᠥᠯ ᠦᠨ ᠤᠷᠭᠤᠮᠠᠯ ᠠᠴᠠ ᠥᠪᠡᠷ ᠲᠡᠭᠡᠨ ᠲᠠᠭᠠᠯᠠᠭᠳᠠᠳᠠᠭ ᠢ ᠰᠣᠩᠭᠣᠵᠤ ᠢᠳᠡᠵᠦ᠂ ᠴᠡᠩᠭᠡᠭ ᠤᠰᠤ ᠤᠤᠭᠤᠵᠤ᠂ ᠴᠡᠪᠡᠷ ᠠᠭᠠᠷ ᠲᠤ ᠪᠠᠶᠢᠩᠭᠤ ᠶᠢᠨ ᠬᠥᠳᠡᠯᠭᠡᠭᠡᠨ ᠲᠡᠢ ᠪᠠᠶᠢᠳᠠᠭ ᠤᠴᠢᠷ ᠠᠴᠠ ᠮᠢᠬᠠ ᠨᠢ ᠠᠮᠲᠠ ᠴᠢᠨᠠᠷ ᠤᠨ ᠬᠤᠪᠢ ᠳᠤ ᠡᠷᠴᠢᠮᠵᠢᠭᠰᠡᠨ ᠠᠵᠤ ᠠᠬᠤᠢ ᠳᠤ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠮᠢᠬᠠᠨ ᠠᠴᠠ ᠡᠷᠡᠰ ᠥᠭᠡᠷᠡ ᠪᠤᠶᠤ ᠭᠠᠶᠢᠬᠠᠯᠲᠠᠢ ᠰᠠᠶᠢᠨ ᠪᠠᠶᠢᠳᠠᠭ᠃ ᠠᠯᠲᠠᠢ ᠶᠢᠨ ᠠᠭᠤᠯᠠᠨ ᠳᠤ ᠡᠮ ᠦᠨ ᠭᠡᠵᠦ ᠪᠣᠯᠬᠤ ᠬᠣᠪᠣᠷ ᠡᠪᠡᠰᠦ ᠤᠷᠭᠤᠮᠠᠯ ᠢᠶᠠᠷ ᠬᠣᠭᠣᠯᠠᠯᠠᠳᠠᠭ ᠤᠴᠢᠷ ᠠᠴᠠ ᠮᠢᠬᠠ ᠨᠢ ᠡᠪᠡᠳᠴᠢᠨ ᠰᠢᠷᠬᠠ ᠡᠳᠡᠭᠡᠭᠡᠳᠡᠭ ᠰᠢᠳᠢ ᠲᠡᠢ᠂ ᠲᠡᠶᠢᠮᠦ ᠤᠴᠢᠷ ᠠᠴᠠ ᠮᠣᠩᠭᠣᠯᠴᠤᠳ ᠠᠩᠨᠠᠬᠤ ᠶᠢ ᠴᠡᠭᠡᠷᠯᠡᠵᠦ ᠪᠠᠶᠢᠳᠠᠭ ᠬᠤᠢᠯᠤᠭ ᠬᠡᠮᠡᠬᠦ ᠬᠣᠪᠣᠷ ᠰᠢᠪᠠᠭᠤ ᠪᠤᠢ᠃ ᠮᠣᠩᠭᠣᠯ ᠤᠨ ᠪᠡᠯᠴᠢᠭᠡᠷ ᠦᠨ ᠮᠠᠯ ᠬᠣᠶᠢᠯᠣᠭ ᠰᠢᠪᠠᠭᠤ ᠲᠠᠢ ᠪᠠᠷᠤᠭ ᠠᠳᠠᠯᠢ ᠢᠳᠡᠰᠢᠯᠡᠳᠡᠭ ᠤᠴᠢᠷ ᠠᠴᠠ ᠮᠢᠬᠠ ᠨᠢ ᠪᠠᠰᠠ ᠬᠦᠴᠦ ᠳᠠᠷᠬᠠᠯᠠᠭᠠ ᠳᠤ ᠨᠥᠯᠦᠭᠡᠯᠡᠳᠡᠭ ᠪᠠᠶᠢᠵᠤ ᠪᠣᠯᠬᠤ᠃ ᠣᠯᠠᠨ ᠵᠠᠭᠤᠨ ᠰᠠᠶᠠ ᠬᠦᠮᠦᠨ ᠠᠮᠠ ᠲᠠᠢ ᠤᠯᠤᠰ ᠤᠳ ᠤᠨ ᠳᠡᠯᠡᠬᠡᠢ᠂ ᠲᠢᠪ᠂ ᠣᠯᠢᠮᠫ ᠤᠨ ᠠᠪᠤᠷᠭᠤ ᠲᠠᠮᠢᠷᠴᠢᠳ ᠤᠨ ᠳᠡᠷᠭᠡᠳᠡ ᠮᠠᠨ ᠤ ᠭᠤᠷᠪᠠᠬᠠᠨ ᠰᠠᠶᠠ ᠮᠣᠩᠭᠣᠯᠴᠤᠳ ᠠᠴᠠ ᠲᠦᠷᠦᠭᠰᠡᠨ ᠠᠪᠤᠷᠭᠤ ᠵᠠᠯᠠᠭᠤᠴᠤᠳ ᠪᠠᠶᠢᠭᠠ᠃
ᠮᠣᠩᠭᠣᠯᠴᠤᠳ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠪᠠᠨ ᠬᠠᠳᠠᠭᠠᠯᠠᠵᠤ ᠬᠥᠭᠵᠢᠭᠦᠯᠬᠦ ᠶᠣᠰᠣᠲᠠᠢ᠃ ᠳᠡᠯᠡᠬᠡᠢ ᠳᠦ ᠣᠳᠣ 30 ᠣᠷᠴᠢᠮ ᠲᠡᠷᠪᠤᠮ ᠮᠠᠯ ᠪᠠᠶᠢᠳᠠᠭ᠂ ᠬᠠᠷᠢᠨ ᠮᠠᠨ ᠤ ᠤᠯᠤᠰ ᠲᠤ ᠦᠷᠡᠵᠢᠭᠦᠯᠳᠡᠭ ᠲᠠᠪᠤᠨ ᠲᠥᠷᠥᠯ ᠦᠨ ᠮᠠᠯ ᠳᠡᠯᠡᠬᠡᠢ ᠶᠢᠨ ᠤᠯᠤᠰ ᠣᠷᠣᠨ ᠨᠤᠭᠤᠳ ᠲᠤ ᠪᠠᠷᠤᠭᠴᠠᠭᠠᠯᠠᠪᠠᠯ 5 ᠲᠡᠷᠪᠤᠮ ᠣᠷᠴᠢᠮ ᠪᠠᠶᠢᠳᠠᠭ ᠪᠣᠯᠤᠯᠲᠠᠢ᠃ ᠪᠡᠯᠴᠢᠭᠡᠷ ᠠᠰᠢᠭᠯᠠᠵᠤ ᠮᠠᠯ ᠠᠵᠤ ᠠᠬᠤᠢ ᠪᠠᠨ ᠠᠪᠴᠤ ᠶᠠᠪᠤᠳᠠᠭ᠂ ᠨᠡᠭᠦᠳᠡᠯᠴᠢᠨ ᠥᠪ ᠰᠤᠶᠤᠯ᠂ ᠨᠡᠭᠦᠳᠡᠯᠴᠢᠨ ᠰᠡᠳᠬᠢᠬᠦᠢ ᠪᠡᠨ ᠬᠠᠳᠠᠭᠠᠯᠠᠵᠤ ᠠᠮᠢᠳᠤᠷᠠᠳᠠᠭ ᠠᠷᠠᠳ ᠢᠷᠭᠡᠳ ᠵᠥᠪᠬᠡᠨ ᠮᠠᠨ ᠤ ᠮᠣᠩᠭᠣᠯ ᠳᠤ᠂ ᠮᠥᠨ ᠪᠦᠭᠦᠳᠡ ᠨᠠᠶᠢᠷᠠᠮᠳᠠᠬᠤ ᠬᠢᠲᠠᠳ ᠠᠷᠠᠳ ᠤᠯᠤᠰ ᠤᠨ ᠥᠪᠥᠷ ᠮᠣᠩᠭᠣᠯ᠂ ᠣᠷᠣᠰ ᠤᠨ ᠲᠤᠸᠠ ᠳᠦ ᠪᠠᠶᠢᠨᠠ᠃
ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠠᠴᠠ ᠬᠣᠶᠢᠰᠢᠬᠢ ᠭᠤᠴᠢᠭᠠᠳ ᠵᠢᠯ ᠳᠦ ᠮᠠᠨ ᠤ ᠤᠯᠤᠰ ᠤᠨ ᠨᠡᠶᠢᠭᠡᠮ ᠡᠳ᠋ ᠦᠨ ᠵᠠᠰᠠᠭ᠂ ᠡᠭᠦᠨ ᠦ ᠳᠣᠲᠣᠷᠠ ᠬᠥᠳᠡᠭᠡ ᠶᠢᠨ ᠢᠷᠭᠡᠳ ᠦᠨ ᠠᠮᠢᠳᠤᠷᠠᠯ᠂ ᠲᠡᠳᠡᠨ ᠦ ᠭᠣᠣᠯᠯᠠᠨ ᠡᠷᠬᠢᠯᠡᠳᠡᠭ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠰᠠᠯᠪᠤᠷᠢ ᠶᠢᠨ ᠦᠢᠯᠡᠳᠪᠦᠷᠢᠯᠡᠯ ᠳᠦ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠭᠰᠠᠨ᠃ ᠬᠦᠮᠦᠨ ᠠᠮᠠ 1990 ᠣᠨ ᠳᠤ 2.15 ᠰᠠᠶᠠ︵ ᠨᠢᠭᠡ ᠰᠠᠶᠠ ᠨᠢ ᠵᠠᠭᠤᠨ ᠲᠦᠮᠡ ᠲᠠᠢ ᠲᠡᠩᠴᠡᠨᠡ︶ ᠪᠠᠶᠢᠭᠰᠠᠨ ᠪᠣᠯ 2019 ᠣᠨ ᠳᠤ 3.3 ᠰᠠᠶᠠ ᠪᠣᠯᠤᠭᠰᠠᠨ᠃ ᠨᠢᠳᠤᠯᠠᠭᠠᠨ ᠤ ᠵᠢᠩ ᠢᠶᠡᠷ 1990 ᠣᠨ ᠳᠤ 249 ᠮᠢᠩᠭᠠᠨ ᠲᠣᠨ ᠮᠢᠬᠠ ᠦᠢᠯᠡᠳᠪᠦᠷᠢᠯᠡᠵᠦ ᠪᠠᠶᠢᠭᠰᠠᠨ ᠪᠣᠯ 2019 ᠣᠨ ᠳᠤ 450 ᠣᠷᠴᠢᠮ ᠮᠢᠩᠭᠠᠨ ᠲᠣᠨ ᠢ ᠦᠢᠯᠡᠳᠪᠦᠷᠢᠯᠡᠳᠡᠭ ᠪᠣᠯᠤᠭᠰᠠᠨ᠃ ᠨᠢᠭᠡ ᠬᠦᠮᠦᠨ ᠳᠦ ᠣᠨᠣᠭᠳᠠᠬᠤ ᠮᠢᠬᠠᠨ ᠤ ᠦᠢᠯᠡᠳᠪᠦᠷᠢᠯᠡᠯ 116 ᠣᠷᠴᠢᠮ ᠺᠢᠯᠦᠭᠷᠡᠮ ᠪᠠᠶᠢᠭᠰᠠᠨ ᠪᠣᠯ 140 ᠣᠷᠴᠢᠮ ᠺᠢᠯᠦᠭᠷᠡᠮ ᠪᠣᠯᠵᠤ ᠨᠡᠮᠡᠭᠳᠡᠭᠰᠡᠨ ᠪᠠᠶᠢᠭᠠ᠃ ᠮᠢᠬᠠᠨ ᠤ ᠦᠢᠯᠡᠳᠪᠦᠷᠢᠯᠡᠯ ᠡᠶᠢᠨᠬᠦᠦ ᠨᠡᠮᠡᠭᠳᠡᠭᠰᠡᠨ ᠨᠢ ᠮᠠᠯ ᠤᠨ ᠲᠣᠭᠠᠨ ᠤ ᠥᠰᠦᠯᠲᠡ ᠲᠡᠢ ᠬᠣᠯᠪᠣᠭᠠ ᠲᠠᠢ᠃ ᠮᠣᠩᠭᠣᠯ ᠤᠯᠤᠰ 1990 ᠣᠨ ᠳᠤ 25.8 ᠰᠠᠶᠠ︵2580 ᠲᠦᠮᠡ︶ ᠮᠠᠯ ᠲᠠᠢ ᠪᠠᠶᠢᠭᠰᠠᠨ ᠪᠣᠯ 2019 ᠣᠨ ᠳᠤ 70 ᠰᠠᠶᠠ︵7000 ᠲᠦᠮᠡ︶ ᠮᠠᠯ ᠲᠠᠢ ᠪᠣᠯᠤᠯᠠ᠃ 30 ᠵᠢᠯ ᠦᠨ ᠬᠤᠭᠤᠴᠠᠭᠠᠨ ᠳᠤ ᠮᠠᠯ ᠤᠨ ᠲᠣᠭᠠ 2.7 ᠳᠠᠬᠢᠨ ᠨᠡᠮᠡᠭᠳᠡᠭᠰᠡᠨ᠃ ᠠᠳᠤᠭᠤ 2.26 ᠰᠠᠶᠠ ᠠᠴᠠ 4.4 ᠰᠠᠶᠠ︵440 ᠲᠦᠮᠡ︶᠂ ᠦᠬᠡᠷ 2.85 ᠰᠠᠶᠠ ᠠᠴᠠ 4.9 ᠰᠠᠶᠠ︵490 ᠲᠦᠮᠡ︶᠂ ᠬᠣᠨᠢ 15.1 ᠰᠠᠶᠠ ᠠᠴᠠ 32 ᠰᠠᠶᠠ᠂ ᠢᠮᠠᠭᠠ 5.1 ᠰᠠᠶᠠ ᠠᠴᠠ 29.2 ᠰᠠᠶᠠ ᠬᠦᠷᠲᠡᠯᠡ ᠨᠡᠮᠡᠭᠳᠡᠵᠡᠢ᠃
ᠰᠡᠭᠦᠯ ᠦᠨ ᠭᠤᠴᠢᠭᠠᠳ ᠵᠢᠯ ᠦᠨ ᠬᠤᠭᠤᠴᠠᠭᠠᠨ ᠳᠤ ᠮᠠᠯᠴᠢᠨ ᠢᠷᠭᠡᠳ ᠦᠨ ᠲᠣᠭᠠ ᠬᠤᠶᠠᠷ ᠳᠠᠬᠢᠨ ᠨᠡᠮᠡᠭᠳᠡᠭᠰᠡᠨ᠂ ᠨᠢᠭᠡ ᠮᠠᠯᠴᠢᠨ ᠳᠤ ᠳᠤᠮᠳᠠᠴᠢ ᠪᠠᠷ 174 ᠮᠠᠯ ᠣᠨᠣᠭᠳᠠᠵᠤ ᠪᠠᠶᠢᠭᠰᠠᠨ ᠪᠣᠯ 229 ᠮᠠᠯ ᠣᠨᠣᠭᠳᠠᠳᠠᠭ ᠪᠣᠯᠤᠭᠰᠠᠨ᠃ ᠮᠠᠯ ᠠᠵᠤ ᠠᠬᠤᠢ ᠭᠣᠣᠯᠯᠠᠨ ᠡᠷᠬᠢᠯᠡᠵᠦ ᠪᠠᠶᠢᠭᠠ ᠬᠥᠳᠡᠭᠡ ᠶᠢᠨ ᠢᠷᠭᠡᠳ ᠦᠨ ᠭᠡᠷ ᠪᠦᠯᠢ ᠶᠢᠨ ᠲᠣᠭᠠ ᠡᠨᠡ ᠬᠤᠭᠤᠴᠠᠭᠠᠨ ᠳᠤ 85 ᠮᠢᠩᠭᠠ ᠪᠠᠷ ᠨᠡᠮᠡᠭᠳᠡᠭᠰᠡᠨ᠃ ᠮᠣᠩᠭᠣᠯ ᠤᠯᠤᠰ ᠤᠨ ᠡᠳ᠋ ᠦᠨ ᠵᠠᠰᠠᠭ ᠲᠤ᠂ ᠬᠦᠮᠦᠨ ᠠᠮᠠ ᠶᠢᠨ ᠬᠦᠨᠡᠰᠦᠨ ᠦ ᠬᠡᠷᠡᠭᠴᠡᠭᠡ ᠶᠢ ᠬᠠᠩᠭᠠᠬᠤ ᠳᠤ ᠰᠢᠢᠳᠪᠦᠷᠢᠯᠡᠬᠦ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠡᠨᠡ ᠰᠠᠯᠪᠤᠷᠢ ᠶᠢ ᠠᠪᠴᠤ ᠶᠠᠪᠤᠭᠠ ᠣᠯᠠᠨ ᠮᠢᠩᠭᠠᠨ ᠮᠣᠩᠭᠣᠯ ᠮᠠᠯᠴᠢᠳ ᠪᠣᠯ ᠪᠡᠯᠴᠢᠭᠡᠷ ᠠᠰᠢᠭᠯᠠᠵᠤ᠂ ᠮᠠᠯ ᠢᠶᠠᠨ ᠦᠷᠡᠵᠢᠭᠦᠯᠬᠦ ᠣᠯᠠᠨ ᠮᠢᠩᠭᠠᠨ ᠵᠢᠯ ᠦᠨ ᠠᠷᠭᠠ ᠲᠧᠭᠨᠣᠯᠣᠭᠢ ᠶᠢ ᠡᠵᠡᠮᠰᠢᠨ ᠬᠠᠳᠠᠭᠠᠯᠠᠵᠤ᠂ ᠨᠡᠭᠦᠳᠡᠯ ᠦᠨ ᠥᠪ ᠰᠤᠶᠤᠯ ᠢᠶᠠᠨ ᠤᠯᠠᠮᠵᠢᠯᠠᠵᠤ ᠪᠠᠶᠢᠭᠠ ᠡᠷᠬᠢᠮ ᠬᠦᠮᠦᠰ᠃
ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ᠂ ᠨᠡᠭᠦᠳᠡᠯ ᠦᠨ ᠥᠪ ᠰᠤᠶᠤᠯ ᠢᠶᠠᠨ ᠬᠠᠳᠠᠭᠠᠯᠠᠬᠤ ᠨᠢ ᠮᠣᠩᠭᠣᠯᠴᠤᠳ ᠪᠢᠳᠡᠨ ᠦ ᠬᠠᠮᠤᠭ ᠤᠨ ᠡᠷᠬᠢᠮᠯᠡᠬᠦ ᠵᠦᠢᠯ᠃ ᠡᠨᠡ ᠡᠷᠬᠢᠮ ᠵᠣᠷᠢᠯᠲᠠ ᠪᠠᠨ ᠪᠡᠯᠴᠢᠭᠡᠷ ᠢᠶᠡᠨ ᠬᠠᠮᠠᠭᠠᠯᠠᠵᠤ᠂ ᠮᠠᠯᠴᠢᠳ ᠢᠶᠠᠨ ᠬᠠᠳᠠᠭᠠᠯᠠᠵᠤ ᠴᠢᠳᠠᠭᠰᠠᠨ ᠨᠥᠬᠥᠴᠡᠯ ᠳᠦ ᠯᠠ ᠬᠡᠷᠡᠭᠵᠢᠭᠦᠯᠦᠨᠡ᠃
ᠪᠡᠯᠴᠢᠭᠡᠷ ᠬᠠᠮᠠᠭᠠᠯᠠᠬᠤ ᠴᠢᠭᠯᠡᠯ ᠢᠶᠡᠷ ᠰᠢᠢᠳᠬᠦ ᠠᠰᠠᠭᠤᠳᠠᠯ
ᠮᠣᠩᠭᠣᠯᠴᠤᠳ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠵᠦ ᠪᠠᠶᠢᠭᠰᠠᠨ ᠤ ᠠᠴᠢ ᠪᠠᠷ ᠨᠤᠲᠤᠭ ᠤᠨ ᠢᠶᠠᠨ ᠬᠠᠩᠭᠠᠢ᠂ ᠬᠡᠭᠡᠷᠡ᠂ ᠭᠣᠪᠢ ᠶᠢᠨ ᠪᠠᠶᠢᠭᠠᠯᠢ ᠣᠷᠴᠢᠨ ᠢᠶᠠᠨ ᠤᠨᠠᠭᠠᠨ ᠲᠥᠷᠬᠥ ᠪᠡᠷ ᠨᠢ ᠣᠯᠠᠨ ᠮᠢᠩᠭᠠᠨ ᠵᠢᠯ ᠳᠦ ᠬᠠᠳᠠᠭᠠᠯᠠᠵᠤ ᠠᠰᠢᠭᠯᠠᠭᠰᠠᠨ ᠶᠤᠮ᠃ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠬᠦ ᠦᠭᠡᠢ ᠪᠣᠯ ᠪᠡᠯᠴᠢᠭᠡᠷ ᠦᠭᠡᠢ᠂ ᠮᠠᠯ ᠠᠵᠤ ᠠᠬᠤᠢ ᠦᠭᠡᠢ ᠪᠣᠯᠤᠨᠠ᠃ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠠᠴᠠ ᠬᠣᠶᠢᠰᠢᠬᠢ ᠭᠤᠴᠢᠭᠠᠳ ᠵᠢᠯ ᠳᠦ 2.7 ᠳᠠᠬᠢᠨ ᠦᠰᠴᠦ᠂ 70 ᠰᠠᠶᠠ ᠳᠤ ᠬᠦᠷᠦᠭᠰᠡᠨ ᠮᠠᠯ ᠤᠨ ᠲᠣᠭᠠ ᠶᠢ ᠪᠡᠯᠴᠢᠭᠡᠷ ᠦᠨ ᠳᠠᠭᠠᠭᠠᠴᠠ ᠠᠴᠠ ᠬᠡᠲᠦᠷᠡᠭᠰᠡᠨ᠂ ᠴᠥᠭᠡᠨ ᠲᠣᠭᠠᠨ ᠤ ᠴᠢᠨᠠᠷ ᠲᠠᠢ ᠮᠠᠯ ᠲᠠᠢ ᠪᠠᠶᠢᠬᠤ ᠨᠢ ᠵᠥᠪ ᠭᠡᠵᠦ ᠦᠵᠡᠳᠡᠭ ᠪᠣᠯᠤᠭᠰᠠᠨ᠃ ᠮᠠᠯ ᠤᠨ ᠢᠶᠠᠨ ᠪᠡᠯᠴᠢᠭᠡᠷ ᠢ ᠬᠠᠮᠠᠭᠠᠯᠠᠬᠤ᠂ ᠮᠠᠯ ᠤᠨ ᠲᠣᠭᠠ ᠬᠡᠲᠦ ᠦᠰᠴᠦ ᠪᠡᠯᠴᠢᠭᠡᠷ ᠲᠠᠯᠬᠠᠯᠠᠭᠳᠠᠬᠤ ᠠᠴᠠ ᠰᠡᠷᠭᠡᠶᠢᠯᠡᠬᠦ ᠶᠢᠨ ᠲᠤᠯᠠ ᠬᠡᠷᠡᠭᠵᠢᠭᠦᠯᠬᠦ ᠱᠠᠭᠠᠷᠳᠠᠯᠭᠠ ᠲᠠᠢ᠂ ᠬᠠᠷᠢᠯᠴᠠᠨ ᠤᠶᠠᠯᠳᠤᠭᠠ ᠲᠠᠢ ᠠᠵᠢᠯ ᠤᠳ ᠪᠣᠯ᠄
– ᠪᠡᠯᠴᠢᠭᠡᠷ ᠦᠨ ᠳᠠᠭᠠᠭᠠᠴᠠ ᠳᠤ ᠲᠣᠬᠢᠷᠠᠭᠰᠠᠨ ᠲᠣᠭᠠ ᠪᠦᠬᠦᠢ ᠴᠢᠨᠠᠷ ᠲᠠᠢ ᠮᠠᠯ ᠲᠠᠢ ᠪᠠᠶᠢᠬᠤ᠂ ᠵᠠᠷᠢᠮ ᠮᠠᠯ ᠤᠨ ᠲᠣᠭᠠ ᠶᠢ ᠠᠭᠠᠵᠢᠮ ᠴᠥᠭᠡᠷᠡᠭᠦᠯᠬᠦ᠂
– ᠮᠠᠯ ᠤᠨ ᠲᠣᠭᠠᠨ ᠤ ᠥᠰᠦᠯᠲᠡ ᠶᠢ ᠬᠢᠵᠠᠭᠠᠷᠯᠠᠵᠤ᠂ ᠪᠡᠯᠴᠢᠭᠡᠷ ᠦᠨ ᠳᠠᠭᠠᠭᠠᠴᠠ ᠳᠤ ᠲᠣᠬᠢᠷᠠᠭᠰᠠᠨ ᠬᠡᠮᠵᠢᠶᠡᠨ ᠳᠦ ᠪᠠᠶᠢᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠲᠤᠬᠠᠢ ᠶᠢᠨ ᠵᠢᠯ ᠳᠦ ᠪᠣᠶᠢᠵᠢᠭᠤᠯᠵᠤ ᠪᠠᠶᠢᠭᠠ ᠲᠥᠯ ᠦᠨ ᠲᠣᠭᠠᠨ ᠠᠴᠠ ᠪᠠᠭᠠ ᠦᠭᠡᠢ ᠮᠠᠯ ᠢ ᠵᠠᠷᠤᠵᠤ ᠪᠠᠶᠢᠬᠤ᠂
– ᠵᠠᠷᠤᠬᠤ ᠮᠠᠯ ᠢ ᠦᠷᠡ ᠠᠰᠢᠭ ᠲᠠᠢ ᠠᠰᠢᠭᠯᠠᠬᠤ ᠶᠢᠨ ᠲᠤᠯᠠᠳᠠ ᠢᠷᠭᠡᠳ ᠦᠨ ᠬᠡᠷᠡᠭᠴᠡᠭᠡᠨ ᠡᠴᠡ ᠢᠯᠡᠭᠦᠦ ᠦᠢᠯᠡᠳᠪᠦᠷᠢᠯᠡᠭᠳᠡᠬᠦ ᠮᠠᠯ ᠤᠨ ᠮᠢᠬᠠ ᠶᠢ ᠭᠠᠳᠠᠭᠠᠳᠤ ᠳᠤ ᠭᠠᠷᠭᠠᠵᠤ ᠪᠠᠶᠢᠬᠤ᠂
– ᠭᠠᠳᠠᠭᠠᠳᠤ ᠳᠤ ᠬᠤᠳᠠᠯᠳᠤᠬᠤ ᠪᠣᠯᠤᠨ ᠳᠣᠲᠣᠭᠠᠳᠤ ᠶᠢᠨ ᠲᠥᠪᠯᠡᠷᠡᠭᠰᠡᠨ ᠬᠡᠷᠡᠭᠴᠡᠭᠡᠨ ᠳᠦ ᠵᠠᠷᠤᠴᠠᠭᠤᠯᠬᠤ ᠮᠠᠯ ᠢ ᠲᠥᠬᠥᠭᠡᠷᠡᠬᠦ᠂ ᠮᠢᠬᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠦᠢᠯᠡᠪᠦᠷᠢ ᠨᠦᠭᠦᠳ ᠢ ᠪᠤᠢ ᠪᠣᠯᠭᠠᠬᠤ ᠠᠰᠠᠭᠤᠳᠠᠯ ᠢ ᠶᠠᠭᠠᠷᠠᠯᠲᠠᠢ ᠰᠢᠢᠳᠬᠦ
– ᠮᠢᠬᠠ ᠲᠥᠬᠥᠭᠡᠷᠡᠬᠦ᠂ ᠮᠢᠬᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠦᠢᠯᠡᠳᠪᠦᠷᠢ ᠨᠦᠭᠦᠳ ᠢ ᠰᠤᠮᠤᠳ ᠲᠤ ᠪᠠᠶᠢᠭᠤᠯᠬᠤ᠃ ᠡᠳᠡᠭᠡᠷ ᠦᠨ ᠳᠣᠲᠣᠷᠠ ᠰᠢᠢᠳᠪᠦᠷᠢᠯᠡᠬᠦ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠭᠣᠣᠯ ᠠᠵᠢᠯ ᠨᠢ ᠰᠤᠮᠤᠳ ᠲᠤ ᠮᠠᠯ ᠲᠥᠬᠥᠭᠡᠷᠡᠬᠦ᠂ ᠮᠢᠬᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠦᠢᠯᠡᠳᠪᠦᠷᠢ ᠪᠠᠶᠢᠭᠤᠯᠬᠤ ᠶᠤᠮ᠃ ᠰᠤᠮᠤ ᠪᠣᠯᠭᠠᠨ ᠢ ᠡᠶᠢᠮᠦ ᠦᠢᠯᠡᠳᠪᠦᠷᠢ ᠲᠡᠢ ᠪᠤᠯᠭᠠᠭᠰᠠᠨ ᠢᠶᠠᠷ᠄
– ᠣᠷᠣᠨ ᠳᠠᠶᠠᠭᠠᠷ ᠲᠠᠷᠬᠠᠨ ᠪᠠᠶᠢᠷᠢᠰᠢᠵᠤ ᠬᠥᠳᠡᠯᠮᠦᠷᠢᠯᠡᠳᠡᠭ ᠣᠯᠠᠨ ᠮᠢᠩᠭᠠᠨ ᠮᠠᠯᠴᠢᠨ ᠢᠷᠭᠡᠳ ᠬᠤᠪᠢ ᠶᠢᠨ ᠬᠡᠷᠡᠭᠴᠡᠭᠡᠨ ᠡᠴᠡ ᠢᠯᠡᠭᠦᠦ ᠮᠠᠯ ᠢᠶᠠᠨ ᠨᠤᠲᠤᠭ ᠲᠤ ᠪᠠᠨ ᠪᠣᠷᠣᠯᠠᠭᠤᠯᠳᠠᠭ ᠪᠣᠯᠵᠤ ᠣᠷᠣᠯᠭᠠ ᠨᠢ ᠨᠡᠮᠡᠭᠳᠡᠨᠡ᠂ ᠮᠠᠯᠴᠢᠳ ᠣᠯᠠᠰᠢᠷᠠᠵᠤ ᠲᠥᠪᠯᠡᠷᠡᠯ ᠰᠠᠭᠠᠷᠠᠬᠤ ᠳᠤ ᠨᠥᠯᠦᠭᠡᠯᠡᠨᠡ᠂ ᠰᠤᠮᠤᠳ ᠤᠨ ᠲᠦᠪ ᠲᠦ ᠦᠨᠳᠦᠰᠦᠨ ᠦᠢᠯᠡᠳᠪᠦᠷᠢ ᠪᠣᠯᠤᠨ ᠲᠡᠭᠦᠨ ᠢ ᠳᠠᠭᠠᠭᠰᠠᠨ ᠲᠤᠰᠠᠯᠠᠬᠤ ᠦᠢᠯᠡᠳᠪᠦᠷᠢ ᠦᠢᠯᠡᠴᠢᠯᠡᠭᠡᠨ ᠦ ᠠᠵᠢᠯ ᠤᠨ ᠣᠯᠠᠨ ᠪᠠᠶᠢᠷᠢ ᠪᠤᠢ ᠪᠣᠯᠤᠨᠠ᠂
– ᠳᠣᠲᠣᠭᠠᠳᠤ ᠬᠡᠷᠡᠭᠴᠡᠭᠡ ᠪᠣᠯᠤᠨ ᠭᠠᠳᠠᠭᠠᠳᠤ ᠵᠠᠬᠠ ᠵᠡᠭᠡᠯᠢ ᠶᠢᠨ ᠴᠢᠨᠠᠷ ᠰᠲ᠋ᠠᠨᠳᠠᠷᠲ ᠤᠨ ᠱᠠᠭᠠᠷᠳᠠᠯᠭᠠ ᠬᠠᠩᠭᠠᠭᠰᠠᠨ ᠮᠢᠬᠠ ᠮᠢᠬᠠᠨ ᠪᠦᠲᠦᠭᠡᠭᠳᠡᠬᠦᠨ ᠦᠢᠯᠡᠳᠪᠦᠷᠢᠯᠡᠭᠳᠡᠳᠡᠭ ᠪᠣᠯᠤᠨᠠ᠃
– ᠦᠢᠯᠡᠳᠪᠦᠷᠢ ᠶᠢᠨ ᠨᠥᠬᠥᠴᠡᠯ ᠳᠦ ᠲᠥᠬᠦᠭᠡᠷᠦᠭᠰᠡᠨ ᠮᠠᠯ ᠤᠨ ᠭᠡᠮᠲᠦᠯ ᠦᠭᠡᠢ ᠦᠪᠴᠢᠭᠳᠡᠵᠦ᠂ ᠳᠠᠪᠤᠰᠤᠯᠠᠭᠳᠠᠭᠰᠠᠨ ᠠᠷᠠᠰᠤ ᠰᠢᠷᠢ ᠶᠢ ᠪᠦᠷᠢᠨ ᠪᠣᠯᠪᠠᠰᠤᠷᠠᠭᠤᠯᠵᠤ ᠠᠰᠢᠭᠯᠠᠬᠤ ᠪᠣᠯᠤᠮᠵᠢ ᠲᠠᠢ ᠪᠣᠯᠤᠨᠠ᠃
– ᠵᠢᠯ ᠦᠨ ᠬᠤᠭᠤᠴᠠᠭᠠᠨ ᠳᠤ ᠠᠰᠢᠭᠲᠠᠢ ᠦᠨᠡ ᠪᠡᠷ ᠬᠤᠳᠠᠯᠳᠤᠭᠠᠯᠠᠭᠳᠠᠵᠤ ᠪᠠᠶᠢᠬᠤ ᠮᠢᠬᠠ ᠮᠢᠬᠠᠨ ᠪᠦᠲᠦᠭᠡᠭᠳᠡᠬᠦᠨ ᠵᠠᠬᠠ ᠵᠡᠭᠡᠯᠢ ᠳᠦ ᠭᠠᠷᠴᠤ ᠪᠠᠶᠢᠬᠤ ᠤᠴᠢᠷ ᠠᠴᠠ ᠪᠠᠩᠬᠢ ᠰᠠᠩᠬᠦᠦ ᠶᠢᠨ ᠰᠠᠯᠪᠤᠷᠢ ᠶᠢᠨ ᠬᠥᠭᠵᠢᠯ ᠳᠦ ᠡᠶᠡᠷᠭᠦ ᠨᠦᠯᠦᠭᠡᠯᠡᠬᠦ ᠨᠢ ᠵᠠᠶᠢᠯᠠᠰᠢ ᠦᠭᠡᠢ᠃
ᠡᠳ᠋ ᠦᠨ ᠵᠠᠰᠠᠭ ᠨᠡᠶᠢᠭᠡᠮ ᠤᠨ ᠬᠥᠭᠵᠢᠯ ᠳᠦ ᠨᠦᠯᠦᠭᠡᠯᠡᠬᠦ ᠡᠢᠮᠤ ᠤᠯᠠᠨ ᠲᠠᠯᠠ ᠶᠢᠨ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠦᠢᠯᠡᠳᠪᠦᠷᠢᠯᠡᠯ ᠦᠨ ᠦᠷᠡ ᠠᠰᠢᠭ ᠢ ᠳᠡᠭᠡᠭᠰᠢᠯᠡᠭᠦᠯᠬᠦ᠂ ᠮᠠᠯᠴᠢᠳ ᠤᠨ ᠬᠥᠳᠡᠯᠮᠦᠷᠢ ᠠᠬᠤᠢ ᠶᠢᠨ ᠨᠥᠬᠥᠴᠡᠯ ᠢ ᠰᠠᠶᠢᠵᠢᠷᠠᠭᠤᠯᠬᠤ ᠳᠤ ᠰᠢᠢᠳᠪᠦᠷᠢᠯᠡᠬᠦ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠤᠴᠢᠷ ᠠᠴᠠ ᠡᠨᠡ ᠠᠵᠢᠯ ᠢ ᠮᠠᠯᠴᠢᠳ ᠬᠥᠳᠡᠭᠡ ᠶᠢᠨ ᠬᠥᠳᠡᠯᠮᠦᠷᠢᠴᠢᠳ ᠳᠡᠮᠵᠢᠬᠦ ᠪᠣᠯᠤᠨᠠ᠃ ᠮᠠᠯ ᠲᠥᠬᠥᠭᠡᠷᠡᠬᠦ ᠮᠢᠬᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠦᠢᠯᠡᠳᠪᠦᠷᠢ ᠨᠦᠭᠦᠳ ᠢ ᠲᠤᠬᠠᠢ ᠶᠢᠨ ᠰᠤᠮᠤ ᠶᠢᠨ ᠮᠠᠯᠴᠢᠳ ᠲᠤ ᠬᠤᠪᠢᠴᠢᠯᠠᠬᠤ ᠶᠢ ᠴᠤ ᠳᠡᠮᠵᠢᠨᠡ᠃ ᠡᠶᠢᠮᠦ ᠦᠢᠯᠡᠳᠪᠦᠷᠢ ᠶᠢ ᠡᠬᠢᠨ ᠦ ᠡᠭᠡᠯᠵᠢᠨ ᠳᠦ ᠭᠤᠷᠪᠠᠨ ᠰᠤᠮᠤ ᠪᠣᠯᠭᠠᠨ ᠤ ᠳᠤᠮᠳᠠ ᠨᠢᠭᠡ ᠪᠤᠶᠤ100 ᠰᠤᠮᠤᠨ ᠳᠤ ᠪᠠᠶᠢᠭᠤᠯᠤᠭᠠᠳ ᠵᠥᠪ ᠠᠵᠢᠯᠯᠠᠭᠤᠯᠬᠤ ᠪᠠᠷ᠂ ᠴᠢᠨᠠᠭᠰᠢᠳᠠ ᠰᠤᠮᠤ ᠪᠣᠯᠭᠠᠨ ᠡᠶᠢᠮᠦ ᠦᠢᠯᠡᠳᠪᠦᠷᠢ ᠲᠡᠢ ᠪᠣᠯᠬᠤ ᠬᠥᠳᠡᠯᠭᠡᠭᠡᠨ ᠦᠷᠨᠢᠬᠦ ᠪᠣᠯᠤᠨᠠ᠃
ᠮᠠᠯᠴᠢᠳ ᠢᠶᠠᠨ ᠬᠠᠳᠠᠭᠠᠯᠠᠬᠤ ᠴᠢᠭᠯᠡᠯ ᠢᠶᠡᠷ ᠰᠢᠢᠳᠬᠦ ᠠᠰᠠᠭᠤᠳᠠᠯ
ᠮᠣᠩᠭᠣᠯ ᠤᠨ ᠮᠠᠯᠴᠢᠳ ᠪᠣᠯ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠶᠢ ᠡᠷᠬᠢᠯᠡᠬᠦ ᠠᠮᠢᠳᠤᠷᠠᠯ ᠤᠨ ᠶᠡᠬᠡ ᠰᠤᠷᠭᠠᠭᠤᠯᠢ᠂ ᠲᠡᠭᠦᠨ ᠦ ᠪᠠᠭᠰᠢ ᠨᠠᠷ᠃ ᠮᠣᠩᠭᠣᠯ ᠤᠯᠤᠰ ᠲᠤ᠂ ᠲᠡᠭᠦᠨ ᠦ ᠪᠠᠶᠢᠭᠠᠯᠢ ᠤᠷᠴᠢᠨ ᠳᠤ᠂ ᠴᠠᠭ ᠠᠭᠠᠷ ᠤᠨ ᠳᠥᠷᠪᠡᠨ ᠤᠯᠠᠷᠢᠯ ᠤᠨ ᠨᠥᠬᠥᠴᠡᠯ ᠳᠦ ᠲᠠᠪᠤᠨ ᠲᠥᠷᠥᠯ ᠦᠨ ᠮᠠᠯ ᠢ ᠪᠡᠯᠴᠢᠭᠡᠷ ᠠᠰᠢᠭᠯᠠᠵᠤ ᠦᠷᠡᠵᠢᠭᠦᠯᠬᠦ ᠡᠷᠳᠡᠮ ᠤᠬᠠᠭᠠᠨ ᠢ ᠮᠡᠳᠡᠳᠡᠭ᠂ ᠲᠡᠷᠡ ᠮᠡᠳᠡᠯᠭᠡ ᠪᠡᠨ ᠠᠰᠢᠭᠯᠠᠵᠤ ᠴᠢᠳᠠᠳᠠᠭ ᠬᠣᠪᠣᠷ ᠬᠦᠮᠦᠰ ᠪᠣᠯ ᠮᠠᠨ ᠤ ᠮᠠᠯᠴᠢᠳ᠃ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠬᠦ ᠤᠬᠠᠭᠠᠨ ᠢ ᠪᠢᠴᠢᠭᠰᠡᠨ ᠨᠣᠮ ᠪᠠᠶᠢᠳᠠᠭ ᠦᠭᠡᠢ ᠤᠴᠢᠷ ᠠᠴᠠ ᠪᠢ ᠲᠡᠭᠡᠵᠦ ᠪᠣᠳᠣᠳᠠᠭ᠃
ᠠᠩᠭ᠍ᠯᠢ ᠤᠯᠤᠰ ᠲᠤ ᠰᠠᠮᠤᠶ᠋ᠸᠯ ᠰᠮᠠᠶᠢᠯᠠᠰ ᠭᠡᠳᠡᠭ ᠬᠦᠮᠦᠨ 170 ᠣᠷᠴᠢᠮ ᠵᠢᠯ ᠦᠨ ᠡᠮᠦᠨᠡ《ᠥᠪᠡᠷᠲᠡᠭᠡᠨ ᠲᠤᠰᠠᠯᠠᠬᠤ ᠤᠬᠠᠭᠠᠨ》ᠨᠡᠷᠡ ᠲᠠᠢ ᠠᠯᠳᠠᠷᠲᠠᠢ ᠨᠣᠮ ᠪᠢᠴᠢᠭᠰᠡᠨ᠂ ᠲᠡᠭᠦᠨ ᠢ ᠣᠳᠣ ᠬᠦᠷᠲᠡᠯᠡ ᠣᠯᠠᠨ ᠤᠯᠤᠰ ᠲᠤ ᠣᠷᠴᠢᠭᠤᠯᠵᠤ ᠤᠩᠰᠢᠳᠠᠭ ᠶᠤᠮ ᠪᠠᠶᠢᠨᠠ᠃ ᠠᠮᠢᠳᠤᠷᠠᠯ ᠢᠶᠠᠷ ᠰᠢᠯᠭᠠᠭᠳᠠᠭᠰᠠᠨ ᠮᠡᠳᠡᠯᠭᠡ ᠪᠣᠯᠪᠠᠰᠤᠷᠠᠯ ᠣᠨᠴᠠ ᠴᠢᠬᠤᠯᠠ ᠭᠡᠵᠦ ᠲᠡᠷᠡ ᠨᠤᠮ ᠳᠤ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ᠃ ᠲᠤᠬᠠᠶᠢᠯᠠᠪᠠᠯ᠄ ᠠᠮᠢᠳᠤᠷᠠᠯ ᠲᠦᠰᠢᠭᠰᠡᠨ ᠪᠣᠯᠪᠠᠰᠤᠷᠠᠯ ᠦᠷᠡ ᠦᠭᠭᠦᠭᠡᠵᠢ ᠪᠡᠷ ᠬᠠᠪᠢ ᠦᠭᠡᠢ ᠶᠡᠬᠡ ᠪᠠᠶᠢᠳᠠᠭ᠃ ᠪᠣᠳᠠᠲᠤ ᠠᠮᠢᠳᠤᠷᠠᠯ ᠢ ᠰᠠᠶᠢᠨ ᠠᠵᠢᠪᠠᠯ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠳᠥᠬᠥᠵᠦ ᠣᠴᠢᠭᠠ ᠦᠭᠡᠢ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠠᠴᠠ ᠬᠠᠪᠢ ᠦᠭᠡᠢ ᠢᠯᠡᠭᠦᠦ ᠮᠡᠳᠡᠯᠭᠡ ᠤᠬᠠᠭᠠᠨ ᠢ ᠠᠮᠢᠳᠤᠷᠠᠯ ᠠᠴᠠ ᠣᠯᠵᠤ ᠠᠪᠳᠠᠭ᠃ ᠬᠦᠮᠦᠨ ᠪᠢᠴᠢᠭ ᠨᠣᠮ ᠠᠴᠠ ᠪᠤᠰᠤ ᠠᠵᠢᠯ ᠬᠥᠳᠡᠯᠮᠦᠷᠢ ᠪᠡᠷ ᠥᠪᠡᠷ ᠢ ᠪᠡᠨ ᠲᠡᠭᠦᠰᠵᠢᠭᠦᠯᠳᠡᠭ᠃ ᠬᠦᠮᠦᠨ ᠢ ᠥᠭᠡᠳᠡ ᠨᠢ ᠲᠠᠲᠠᠬᠤ ᠵᠦᠢᠯ ᠪᠣᠯ ᠤᠷᠠᠨ ᠵᠣᠬᠢᠶᠠᠯ ᠪᠤᠰᠤ ᠠᠮᠢᠳᠤᠷᠠᠯ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠪᠤᠰᠤ ᠦᠢᠯᠡᠳᠦᠯ᠂ ᠨᠠᠮᠲᠠᠷ ᠴᠠᠳᠢᠭ ᠪᠤᠰᠤ ᠲᠡᠷᠡ ᠬᠦᠮᠦᠨ ᠦ ᠤᠭ ᠤᠨ ᠬᠦᠮᠦᠵᠢᠯ ᠬᠦᠮᠦᠯᠢᠭ ᠴᠢᠨᠠᠷ ᠮᠥᠨ ᠪᠣᠯᠠᠢ ᠭᠡᠵᠦ ᠪᠢᠴᠢᠵᠡᠢ᠃ ᠠᠮᠢᠳᠤᠷᠠᠯ ᠤᠨ ᠤᠬᠠᠭᠠᠨ ᠲᠠᠢ ᠮᠠᠨ ᠤ ᠮᠠᠯᠴᠢᠳ ᠢ ᠬᠠᠷᠠᠭᠠᠳ ᠪᠢᠴᠢᠭᠰᠡᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃
ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠬᠦ ᠠᠷᠭᠠ ᠤᠬᠠᠭᠠᠨ ᠤ ᠲᠠᠯᠠ ᠪᠠᠷ ᠵ᠂ ᠰᠠᠮᠪᠤᠤ ᠭᠤᠸᠠᠢ ᠶᠢᠨ ᠲᠣᠪᠴᠢ ᠪᠢᠴᠢᠭᠰᠡᠨ ᠨᠣᠮ ᠪᠠᠶᠢᠳᠠᠭ᠃ ᠮᠠᠯᠴᠢᠳ ᠤᠨ ᠠᠵᠢᠯ ᠤᠨ ᠲᠤᠷᠰᠢᠯᠭᠠ᠂ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠬᠣᠯᠪᠣᠭᠳᠠᠯ ᠲᠠᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠣᠯᠤᠯᠲᠠ ᠪᠠᠷ ᠪᠢᠴᠢᠭᠰᠡᠨ ᠨᠣᠮ᠂ ᠮᠠᠯᠴᠢᠨ ᠠᠷᠠᠳ ᠤᠨ ᠠᠵᠢᠯ ᠠᠮᠢᠳᠤᠷᠠᠯ ᠢ ᠬᠠᠷᠠᠭᠤᠯᠤᠭᠰᠠᠨ ᠺᠢᠨᠣ᠋᠂ ᠤᠷᠠᠨ ᠵᠣᠬᠢᠶᠠᠯ ᠤᠨ ᠪᠦᠲᠦᠭᠡᠯ ᠦᠳ ᠪᠠᠶᠢᠳᠠᠭ᠃ ᠭᠡᠪᠡᠴᠦ ᠪᠡᠯᠴᠢᠭᠡᠷ ᠦᠨ ᠮᠠᠯ ᠠᠵᠤ ᠠᠬᠤᠢ ᠶᠢ ᠨᠡᠭᠦᠳᠡᠯ ᠦᠨ ᠥᠪ ᠰᠤᠶᠤᠯ ᠲᠠᠢ ᠬᠣᠣᠰᠯᠠᠭᠤᠯᠵᠤ ᠠᠪᠴᠤ ᠶᠠᠪᠤᠳᠠᠭ ᠮᠡᠳᠡᠯᠭᠡ ᠤᠬᠠᠭᠠᠨ ᠢ ᠭᠦᠨᠵᠡᠭᠡᠢ ᠰᠤᠳᠤᠯᠵᠤ ᠭᠠᠷᠭᠠᠭᠰᠠᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠪᠦᠲᠦᠭᠡᠯ ᠪᠠᠶᠢᠳᠠᠭ ᠦᠭᠡᠢ᠃ ᠪᠠᠶᠢᠬᠤ ᠴᠤ ᠠᠷᠭᠠ ᠦᠭᠡᠢ ᠪᠠᠶᠢᠬᠤ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠰᠠᠮᠤᠶ᠋ᠸᠯ ᠰᠮᠠᠶᠢᠯᠠᠰ ᠦᠨ ᠬᠡᠯᠡᠭᠰᠡᠨᠴᠢᠯᠡᠨ ᠠᠮᠢᠳᠤᠷᠠᠯ ᠲᠦᠰᠢᠭᠰᠡᠨ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠴᠤ ᠳᠥᠬᠥᠵᠦ ᠣᠴᠢᠭᠠ ᠦᠭᠡᠢ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠠᠴᠠ ᠬᠠᠪᠢ ᠦᠭᠡᠢ ᠢᠯᠡᠭᠦᠦ ᠮᠡᠳᠡᠯᠭᠡ ᠤᠬᠠᠭᠠᠨ ᠢ ᠮᠠᠨ ᠤ ᠮᠠᠯᠴᠢᠳ ᠨᠣᠮ ᠠᠴᠠ ᠪᠤᠰᠤ᠂ ᠠᠵᠢᠯ ᠬᠥᠳᠡᠯᠮᠦᠷᠢ ᠪᠡᠷ ᠣᠯᠵᠤ ᠠᠪᠴᠤ ᠥᠪᠡᠷ ᠢᠶᠡᠨ ᠲᠡᠭᠦᠯᠳᠡᠷᠵᠢᠭᠦᠯᠵᠦ ᠪᠠᠶᠢᠳᠠᠭ᠃ ᠮᠠᠨ ᠤ ᠮᠠᠯᠴᠢᠨ ᠬᠦᠮᠦᠨ ᠪᠦᠬᠦᠨ ᠡᠳᠦᠷ ᠳᠤᠲᠠᠮ ᠤᠨ ᠢᠶᠠᠨ ᠠᠮᠢᠳᠤᠷᠠᠯ ᠬᠥᠳᠡᠯᠮᠦᠷᠢ ᠪᠡᠷ ᠥᠪᠡᠷ ᠢ ᠪᠡᠨ ᠬᠥᠭᠵᠢᠭᠦᠯᠵᠦ ᠪᠠᠶᠢᠳᠠᠭ ᠲᠤᠰ ᠲᠤᠰ ᠲᠤ ᠪᠠᠨ ᠦᠨᠡᠲᠡᠢ ᠡᠷᠳᠡᠨᠢ᠃ ᠡᠨᠡ ᠪᠦᠬᠦ ᠡᠷᠳᠡᠨᠢ ᠶᠢᠨ ᠨᠡᠶᠢᠯᠡᠪᠦᠷᠢ ᠪᠠᠶᠢᠪᠠᠯ ᠮᠡᠳᠡᠯᠭᠡ ᠤᠬᠠᠭᠠᠨ ᠤ ᠲᠣᠮᠣ ᠠᠭᠤᠷᠬᠠᠢ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ᠃
ᠲᠡᠶᠢᠮᠦ ᠠᠶᠢᠮᠠᠭ ᠤᠨ᠂ ᠲᠡᠶᠢᠮᠦ ᠰᠤᠮᠤ ᠶᠢᠨ᠂ ᠲᠡᠶᠢᠮᠦ ᠪᠠᠭ ᠤᠨ ᠮᠠᠯᠴᠢᠨ ᠲᠡᠷᠡ ᠭᠡᠪᠡᠯ ᠰᠤᠷᠠᠭᠯᠠᠭᠠᠳ ᠣᠯᠵᠤ ᠪᠣᠯᠤᠨᠠ᠃ ᠬᠠᠮᠢᠭᠠ ᠨᠤᠲᠤᠭᠯᠠᠵᠤ ᠠᠮᠢᠳᠤᠷᠠᠳᠠᠭ ᠪᠤᠢ ᠭᠡᠪᠡᠯ ᠵᠥᠪᠬᠡᠨ ᠲᠡᠷᠡ ᠨᠤᠲᠤᠭ ᠤᠨ ᠬᠦᠮᠦᠨ ᠤᠯᠬᠤ ᠪᠣᠯᠪᠠᠴᠤ᠂ ᠴᠤᠬᠤᠮ ᠶᠠᠮᠠᠷ ᠨᠡᠷᠡ ᠲᠡᠢ ᠠᠭᠤᠯᠠ ᠤᠰᠤᠨ ᠤ ᠶᠠᠮᠠᠷ ᠨᠡᠷᠡ ᠲᠡᠢ ᠡᠪᠦᠯᠵᠢᠶᠡ ᠬᠠᠪᠤᠷᠵᠢᠶᠠ ᠶᠢ ᠨᠢ ᠬᠡᠯᠡᠬᠦ ᠦᠭᠡᠢ ᠪᠣᠯ ᠣᠯᠬᠤ ᠦᠭᠡᠢ᠃ ᠮᠠᠨ ᠤ ᠤᠯᠤᠰ ᠤᠨ 1.5 ᠰᠠᠶᠠ ᠭᠠᠷᠤᠢ ᠲᠡᠭᠰᠢ ᠳᠦᠷᠪᠡᠯᠵᠢᠨ ᠺᠢᠯᠤᠮᠸᠲᠷ ᠨᠤᠲᠤᠭ ᠤᠨ ᠪᠦᠬᠦ ᠠᠭᠤᠯᠠ ᠣᠪᠣᠭᠠ᠂ ᠭᠣᠣᠯ ᠨᠠᠭᠤᠷ᠂ ᠬᠤᠳᠳᠤᠭ ᠱᠠᠩᠳᠠ᠂ ᠡᠪᠦᠯᠵᠢᠶᠡ ᠬᠠᠪᠤᠷᠵᠢᠶᠠ᠂ ᠳᠤᠷᠠᠰᠬᠠᠯᠲᠤ ᠭᠠᠵᠠᠷ ᠵᠡᠷᠭᠡ ᠪᠦᠭᠦᠳᠡ ᠨᠡᠷᠡ ᠲᠡᠢ᠂ ᠲᠡᠷᠡ ᠪᠦᠬᠦᠨ ᠢ ᠨᠤᠲᠤᠭ ᠤᠨ ᠬᠢᠨᠢ ᠢᠷᠭᠡᠨ ᠮᠠᠯᠴᠢᠳ ᠯᠠ ᠮᠡᠳᠡᠨᠡ᠃ ᠲᠡᠷᠡ ᠬᠦᠮᠦᠰ ᠲᠦ ᠶᠠᠮᠠᠷ ᠴᠤ ᠵᠦᠭ ᠵᠢᠭᠠᠭᠴᠢ᠂ ᠭᠠᠵᠠᠷ ᠤᠨ ᠵᠢᠷᠤᠭ ᠬᠡᠷᠡᠭ ᠦᠭᠡᠢ᠃ ᠮᠠᠯᠴᠢᠨ ᠪᠣᠯᠭᠠᠨ ᠨᠤᠲᠤᠭᠯᠠᠳᠠᠭ ᠭᠠᠵᠠᠷ ᠤᠨ ᠢᠶᠠᠨ ᠴᠠᠭ ᠠᠭᠤᠷ ᠤᠨ ᠨᠥᠬᠥᠴᠡᠯ᠂ ᠡᠪᠡᠰᠦ ᠤᠷᠭᠤᠮᠠᠯ ᠤᠨ ᠪᠦᠲᠦᠴᠡ ᠶᠢ ᠮᠡᠳᠡᠨᠡ᠂ ᠬᠠᠷᠠᠩᠭᠤᠢ ᠰᠥᠨᠢ ᠵᠥᠪᠬᠡᠨ ᠠᠯᠲᠠᠨ ᠭᠠᠳᠠᠰᠤ ᠣᠳᠣ ᠯᠠ ᠬᠠᠷᠠᠭᠳᠠᠵᠤ ᠪᠠᠶᠢᠪᠠᠯ ᠵᠣᠷᠢᠭᠰᠠᠨ ᠭᠠᠵᠠᠷ ᠢᠶᠠᠨ ᠣᠯᠤᠭᠠᠳ ᠣᠴᠢᠨᠠ᠃ ᠲᠡᠶᠢᠮᠦ ᠤᠴᠢᠷ ᠠᠴᠠ ᠪᠢ ᠮᠠᠯᠴᠢᠨ ᠠᠷᠠᠳ ᠢᠶᠠᠨ ᠥᠪᠡᠷ ᠢ ᠪᠡᠨ ᠲᠡᠭᠦᠰᠵᠢᠭᠦᠯᠦᠭᠰᠡᠨ ᠲᠤᠰ ᠲᠤᠰ ᠤᠨ ᠦᠨᠡᠲᠦ ᠡᠷᠳᠡᠨᠢ ᠭᠡᠵᠦ ᠪᠣᠳᠣᠳᠠᠭ᠃ ᠲᠡᠶᠢᠮᠦ ᠤᠴᠢᠷ ᠠᠴᠠ ᠮᠠᠯᠴᠢᠳ ᠢᠶᠠᠨ ᠬᠠᠯᠠᠮᠵᠢᠯᠠᠬᠤ᠂ ᠤᠯᠠᠮᠵᠢᠯᠠᠭᠤᠯᠤᠨ ᠬᠠᠳᠠᠭᠠᠯᠠᠬᠤ ᠶᠢ ᠮᠣᠩᠭᠣᠯ ᠤᠯᠤᠰ ᠤᠨ ᠲᠥᠷᠥ ᠵᠠᠰᠠᠭ ᠤᠨ ᠡᠷᠬᠢᠮᠯᠡᠵᠦ ᠬᠡᠷᠡᠭᠵᠢᠭᠦᠯᠬᠦ ᠪᠣᠳᠣᠯᠭᠠ ᠪᠠᠶᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠳᠠᠭ᠃
ᠲᠦᠷᠦᠭᠰᠡᠨ ᠨᠤᠲᠤᠭ ᠲᠤ ᠪᠠᠨ᠂ ᠡᠴᠢᠭᠡ ᠡᠬᠡ ᠶᠢᠨ ᠢᠶᠡᠨ ᠬᠠᠯᠠᠮᠵᠢ ᠳᠤ ᠦᠰᠴᠦ ᠬᠦᠮᠦᠵᠢᠵᠦ᠂ ᠮᠠᠯ ᠮᠠᠯᠯᠠᠬᠤ ᠠᠷᠠᠴᠢᠯᠠᠬᠤ ᠠᠵᠢᠯ ᠳᠤ ᠣᠷᠣᠯᠴᠠᠨ ᠰᠤᠷᠴᠤ᠂ ᠲᠡᠷᠡ ᠠᠮᠢᠳᠤᠷᠠᠯ ᠠᠴᠠ ᠥᠪᠡᠷ ᠢ ᠪᠡᠨ ᠲᠡᠭᠦᠰᠵᠢᠭᠦᠯᠵᠤ᠂ ᠨᠤᠲᠤᠭ ᠣᠷᠴᠢᠨ ᠢᠶᠠᠨ ᠮᠡᠳᠡᠳᠡᠭ ᠪᠣᠯᠵᠤ ᠦᠰᠴᠦ ᠬᠦᠮᠦᠵᠢᠭᠰᠡᠨ ᠬᠡᠦᠬᠡᠳ ᠦᠳ ᠮᠣᠩᠭᠣᠯ ᠤᠨ ᠡᠷᠳᠡᠮ ᠤᠬᠠᠭᠠᠨ ᠲᠠᠢ ᠮᠠᠯᠴᠢᠨ ᠪᠣᠯᠤᠨᠠ᠃ ᠡᠨᠡ ᠡᠭᠦᠳᠡᠨ ᠡᠴᠡ ᠪᠢ ᠮᠠᠯᠴᠢᠳ ᠤᠨ ᠬᠡᠦᠬᠡᠳ ᠢ ᠵᠢᠷᠭᠤᠭᠠᠨ ᠨᠠᠰᠤ ᠲᠠᠢ ᠳᠤ ᠨᠢ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠵᠦ ᠠᠮᠢᠳᠤᠷᠠᠳᠠᠭ ᠨᠥᠬᠥᠴᠡᠯ ᠡᠴᠡ ᠨᠢ ᠬᠣᠯᠠᠳᠠᠭᠤᠯᠵᠤ ᠪᠠᠶᠢᠭᠠ ᠶᠢ ᠪᠤᠷᠤᠭᠤ ᠪᠣᠯᠤᠭᠰᠠᠨ᠂ ᠶᠢᠰᠦ ᠬᠦᠷᠲᠡᠯᠡ ᠨᠠᠰᠤ ᠬᠦᠷᠭᠡᠵᠦ ᠪᠠᠶᠢᠵᠤ ᠰᠤᠷᠭᠠᠭᠤᠯᠢ ᠳᠤ ᠣᠷᠣᠭᠤᠯᠳᠠᠭ ᠪᠠᠶᠢᠬᠤ ᠶᠢ ᠮᠠᠯᠴᠢᠨ ᠡᠷᠦᠬᠡ ᠶᠢᠨ ᠡᠵᠡᠳ ᠲᠦ ᠵᠥᠪᠰᠢᠶᠡᠷᠡᠳᠡᠭ ᠪᠠᠶᠢᠬᠤ ᠨᠢ ᠵᠥᠪ ᠭᠡᠵᠦ ᠪᠣᠳᠣᠳᠠᠭ᠃ ᠡᠨᠡ ᠪᠦᠬᠦ ᠰᠠᠨᠠᠯ ᠪᠣᠳᠣᠯ ᠢ ᠨᠢᠭᠡ ᠪᠥᠷᠢᠴᠢᠯᠡᠨ ᠮᠠᠯᠴᠢᠳ ᠲᠠᠢ ᠪᠠᠨ ᠵᠥᠪᠯᠡᠵᠦ ᠰᠢᠢᠳᠬᠦ ᠶᠤᠮ ᠰᠠᠨ ᠭᠡᠰᠡᠨ ᠳᠦ ᠪᠡᠨ ᠪᠢᠴᠢᠯᠡ᠃
（ᠮᠣᠩᠭᠣᠯ ᠤᠯᠤᠰ ᠤᠨ ᠠᠷᠪᠠᠨ ᠳᠦᠷᠪᠡᠳᠡᠬᠢ ᠶᠡᠷᠦᠩᠬᠡᠢ ᠰᠠᠶᠢᠳ ᠳ᠂ ᠰᠣᠳᠨᠠᠮ）
