ᠮᠤᠩᠭᠤᠯᠴᠤᠳ ᠨᠠᠷᠠ᠂ ᠨᠤᠳᠤᠭ᠂ ᠮᠠᠯ ᠭᠤᠷᠪᠠ ᠪᠠᠨ ᠲᠠᠭᠠᠵᠤ᠂ ᠲᠤᠯᠭᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠪᠠᠨ ᠲᠦᠰᠢᠨ ᠠᠮᠢ ᠠᠮᠢᠵᠢᠷᠠᠯ ᠤᠨ ᠭᠠᠯ ᠢᠶᠠᠨ ᠭᠦᠭᠵᠢᠭᠡᠵᠤ ᠢᠷᠡᠭᠰᠡᠨ ᠨᠢ ᠪᠦᠷ ᠴᠦ ᠡᠴᠢᠨᠠ ᠲᠠᠯᠳᠠ ᠶᠢᠨ ᠤᠴᠢᠷ ᠲᠠᠢ ᠪᠠᠶᠢᠭᠰᠠᠨ ᠠᠵᠤᠭᠤ᠃ ᠡᠷᠡ᠂ ᠡᠮᠡ᠂ ᠭᠡᠦᠭᠡᠳ ᠭᠤᠷᠪᠠ ᠪᠠᠷ ᠠᠮᠢᠳᠤᠷᠠᠬᠤᠢ ᠨᠢ ᠦᠷᠭᠦᠯᠵᠢᠯᠡᠳᠡᠭ ᠮᠤᠩᠭᠤᠯᠴᠤᠳ ᠮᠢᠨᠢ ᠶᠡᠭᠡ ᠡᠷᠳᠡᠨ ᠠᠴᠠ ᠪᠦᠭᠦᠶᠢᠯᠠ ᠨᠡᠶᠢᠭᠡᠮ ᠠᠮᠢᠳᠤᠷᠠᠯ ᠢᠶᠠᠨ︽ᠶᠢᠷᠳᠢᠨᠴᠤ ᠶᠢᠨ ᠭᠤᠷᠪᠠ︾ ᠪᠠᠷ ᠳ᠋ᠦᠩᠨᠠᠨ ᠬᠤᠷᠢᠶᠠᠩᠭᠤᠶᠢᠯᠠᠳᠠᠭ ᠪᠦᠭᠡᠳ ᠦᠷᠡ ᠭᠡᠦᠭᠡᠳ ᠲᠤ ᠪᠠᠨ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠦᠨᠢ ᠪᠠᠶᠢᠯᠳᠤᠳᠠᠭ᠂ ᠭᠤᠷᠪᠠᠨᠳᠠ ᠦᠭᠦᠵᠤ ᠭᠤᠷᠪᠠᠨᠳᠠ ᠰᠡᠭᠡᠳᠡᠭ᠂ᠭᠤᠷᠪᠠᠨᠳᠠ ᠰᠢᠷᠬᠠᠲᠤᠬᠤ ᠪᠠᠷ ᠭᠤᠷᠪᠠᠨ ᠵᠢᠯ ᠤᠨᠳᠠᠳᠠᠭ᠂ ᠭᠤᠷᠪᠠᠨ ᠰᠦᠨᠡᠰᠤ ᠲᠠᠢ︽ᠭᠤᠷᠪᠠᠨ ᠨᠠᠰᠤᠳᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠳᠤᠷ︾ᠮᠡᠳᠤ ᠶᠢᠨ ᠦᠯᠢᠭᠡᠷ ᠲᠤᠤᠯᠢᠰ ᠪᠠᠷ ᠠᠮᠤᠷ ᠰᠠᠶᠢᠨ ᠳᠤ ᠪᠠᠨ ᠵᠢᠷᠭᠠᠬᠤ ᠶᠢᠨ ᠤᠬᠠᠭᠠᠨ ᠢ ᠡᠭᠢᠯᠠᠨ ᠲᠠᠨᠢᠭᠤᠯᠳᠠᠭ ᠪᠠᠢᠭᠰᠠᠨ ᠶᠤᠮ ᠪᠠᠢᠨᠠ᠃
ᠨᠠᠶᠢᠷ ᠤᠨ ᠭᠤᠷᠪᠠᠨ ᠲᠠᠭᠤᠤ ᠪᠠᠨ ᠲᠠᠭᠤᠯᠠᠨ᠂ ᠨᠠᠭᠠᠳᠤᠮ ᠤᠨ ᠭᠤᠷᠪᠠᠨ ᠲᠠᠪᠠᠭᠠ ᠲᠠᠪᠠᠭᠤᠯᠤᠨ ᠡᠷᠳᠡᠮ ᠴᠢᠳᠠᠯ ᠪᠦᠷᠢᠯᠳᠦᠭᠰᠡᠨ ᠰᠠᠶᠢᠨ ᠡᠷᠡ ᠪᠤᠯᠵᠤ ᠭᠤᠷᠪᠠ ᠤᠳᠠᠭᠠ ᠭᠡᠮᠨᠡᠨ ᠵᠠᠰᠠᠭᠰᠠᠨ ᠭᠤᠷᠪᠠᠨ ᠬᠤᠨᠳᠠᠭᠠ ᠠᠷᠢᠭᠢ ᠶᠢ ᠨᠢ ᠲᠡᠭᠷᠢ᠂ ᠭᠠᠵᠠᠷ᠂ ᠲᠡᠭᠡᠳᠤᠰ ᠲᠤ ᠪᠠᠨ ᠭᠡᠵᠤ ᠭᠤᠷᠪᠠᠨᠳᠠ ᠢᠳᠡᠮᠯᠠᠨ ᠤᠤᠭᠤᠳᠠᠭ ᠨᠢ ᠪᠦᠷ ᠴᠦ ᠤᠳᠬᠠ ᠠᠭᠤᠯᠭᠠ ᠲᠠᠢ᠃ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠤᠷᠤᠯᠳᠤᠵᠤ ᠢᠷᠡᠭᠰᠡᠨ ᠮᠤᠷᠢ ᠪᠠᠨ ᠭᠦᠷᠳᠡᠯᠡ ᠪᠠᠶᠠ ᠪᠠᠨ ᠲᠤᠭᠤᠷᠢᠭᠤᠯᠤᠨ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠤᠶᠠᠭᠠᠨ ᠲᠡᠭᠡᠷᠡ ᠤᠶᠠᠬᠤ ᠪᠤᠶᠤ ᠭᠤᠷᠪᠠᠨ ᠠᠯᠠᠭᠠ ᠲᠠᠢ ᠴᠢᠳᠦᠷ ᠢᠶᠠᠷ ᠴᠢᠳᠤᠷᠯᠠᠨ ᠪᠡᠯᠴᠢᠭᠡᠷᠯᠡᠭᠦᠯᠳᠡᠭ ᠨᠢ ᠭᠤᠷᠪᠠ ᠭᠡᠭᠦ ᠲᠤᠭᠠᠨ ᠠᠴᠠ ᠰᠠᠯᠤᠰᠢ ᠦᠭᠡᠢ ᠬᠤᠯᠪᠤᠭᠠ ᠲᠠᠢ᠃
ᠬᠠᠭᠤᠴᠢᠨ ᠤ ᠦᠭᠡᠨ ᠳᠤ︽ᠡᠷᠡ ᠭᠦᠮᠦᠨ ᠭᠤᠷᠪᠠᠨ ᠭᠤᠮᠤᠳᠠᠯ ᠲᠠᠢ᠂ ᠡᠷᠡ ᠮᠤᠷᠢ ᠭᠤᠷᠪᠠᠨ ᠭᠦᠶᠦᠳᠡᠯ ᠲᠠᠢ︾ᠭᠡᠳᠡᠭ᠃ ᠶᠢᠰᠦ ᠶᠢᠰᠤ ᠨᠠᠶᠠᠨ ᠨᠢᠭᠡ ᠱᠠᠳᠤ ᠶᠢ ᠲᠠᠪᠠᠮᠠᠨᠵᠢᠨ ᠮᠦᠷᠭᠦᠵᠤ ᠲᠠᠶᠢᠯᠳᠡᠭ ᠴᠢᠩᠭᠢᠰ ᠤᠨ ᠤᠩᠭᠤᠨ ᠲᠠᠢ ᠮᠤᠩᠭᠤᠯᠴᠤᠳ ᠪᠦᠭᠡᠯᠡᠭᠦ ᠶᠢᠨ ᠡᠮᠦᠨᠠ ᠬᠤᠶᠠᠭ ᠲᠠᠪᠠᠯ᠂ ᠤᠷᠭᠤᠢ ᠲᠠᠷᠤᠭᠤᠯᠭᠠ ᠪᠠᠨ ᠭᠠᠯ ᠤᠨ ᠲᠡᠭᠡᠭᠦᠷ ᠭᠤᠷᠪᠠᠨ ᠤᠳᠠᠭᠠ ᠡᠷᠭᠢᠭᠦᠯᠵᠤ ᠰᠡᠭᠰᠦᠷᠦᠭᠡᠳ ᠭᠡᠩᠭᠡᠷᠭᠡ ᠪᠠᠨ ᠭᠤᠷᠪᠠᠨᠳᠠ ᠲᠠᠯᠡᠳᠴᠤ ᠠᠪᠤᠭᠠᠳ ᠪᠦᠭᠡᠯᠡᠵᠤ ᠡᠭᠢᠯᠡᠳᠡᠭ ᠪᠦᠭᠡᠳ ᠰᠢᠨᠠ ᠶᠢᠨ ᠭᠤᠷᠪᠠᠨ᠂ ᠠᠷᠪᠠᠨ ᠭᠤᠷᠪᠠᠨ᠂ ᠬᠤᠷᠢᠨ ᠭᠤᠷᠪᠠᠨ ᠳᠤ ᠤᠪᠤᠭᠠ ᠤᠷᠤᠳ ᠢᠶᠠᠨ ᠲᠤᠭᠰᠢᠷᠠᠭᠤᠯᠤᠨ ᠲᠠᠭᠢᠵᠤ᠂ ᠠᠳᠠᠭᠠᠳᠤ ᠭᠤᠴᠢᠨ ᠭᠤᠷᠪᠠᠨ ᠲᠡᠭᠷᠢ ᠪᠠᠨ ᠪᠠᠶᠠᠰᠬᠠᠨ ᠪᠤᠷᠤᠭᠠᠨ ᠬᠤᠷᠠ ᠭᠤᠶᠤᠳᠠᠭ ᠲᠡᠯᠡᠭᠡᠢ ᠳᠤ ᠭᠠᠭᠴᠠ ᠦᠨᠳᠦᠰᠦᠳᠠᠨ ᠃
ᠭᠤᠷᠪᠠᠨ ᠴᠡᠭ ᠨᠢᠭᠡ ᠬᠠᠪᠳᠠᠭᠠᠢ ᠶᠢ ᠲᠤᠭᠳᠠᠭᠠᠳᠠᠭ᠂ ᠭᠤᠷᠪᠠᠯᠵᠢᠨ ᠢᠶᠠᠷ ᠶᠠᠮᠠᠷᠪᠠ ᠲᠦᠷᠰᠦ ᠶᠢ ᠪᠦᠳᠦᠭᠡᠵᠤ ᠪᠤᠯᠳᠠᠭ᠃ ᠬᠠᠷᠠᠪᠳᠤᠷ ᠰᠢᠪᠠᠭᠤ ᠨᠠᠷᠨᠨ ᠵᠦᠪ ᠡᠷᠭᠢᠵᠤ ᠭᠤᠷᠪᠠᠨ ᠡᠳᠦᠷ ᠲᠤᠩᠭᠤᠳᠤᠭᠠᠳ ᠮᠡᠨᠳᠤᠯᠡᠭᠰᠡᠨ ᠴᠢᠩᠭᠢᠰ ᠤᠨ ᠤᠳᠤᠮ ᠤᠭᠰᠠᠭᠠ᠂ ᠨᠤᠳᠤᠭ ᠤᠨ ᠨᠠᠪᠳᠠᠭ ᠰᠠᠪᠳᠠᠭ᠂ ᠤᠪᠤᠭᠠ ᠤᠷᠤᠳ᠂ ᠰᠠᠩ ᠤᠨ ᠰᠦᠷᠦ᠂ ᠡᠪᠦᠭᠡ ᠲᠡᠭᠡᠳᠤᠰ ᠤᠨ ᠭᠡᠭᠦᠷ ᠤᠩᠭᠤᠨ ᠢᠶᠠᠨ ᠨᠠᠷᠠᠨ ᠵᠦᠪ ᠭᠤᠷᠪᠠ ᠡᠷᠭᠢᠭᠡᠳ ᠠᠷᠢᠭᠢ ᠰᠦ ᠪᠠᠨ ᠭᠤᠷᠪᠠᠨᠳᠠ ᠡᠷᠭᠦᠵᠦ᠂ ᠭᠤᠷᠪᠠᠨ ᠲᠤᠯᠤᠭᠠᠢ ᠮᠦᠷᠭᠦᠳᠡᠭ ᠨᠢ ᠵᠦᠭᠡᠷ︽ᠭᠤᠷᠪᠠ︾ ᠶᠢᠨ ᠲᠤᠭᠠ ᠶᠢ ᠭᠦᠢᠴᠡᠭᠡᠵᠤ ᠪᠠᠶᠢᠭᠠ ᠭᠡᠷᠡᠭ ᠪᠢᠰᠢ᠃ ᠡᠨᠡ ᠭᠦ ᠭᠤᠷᠪᠠ ᠪᠤᠯ ᠪᠦᠭᠦᠶᠢᠯᠠ ᠪᠦᠷᠢᠨ ᠶᠢᠷᠳᠢᠨᠴᠤ᠂ ᠲᠡᠭᠦᠰ ᠲᠡᠭᠦᠯᠳᠡᠷ ᠤᠨ ᠨᠤᠳᠠᠯᠠᠭᠠ ᠪᠤᠶᠤ ᠬᠠᠮᠤᠭ ᠠᠩᠬᠠᠨ ᠤ ᠤᠯᠠᠨ ᠢ ᠲᠦᠯᠦᠭᠡᠯᠡᠭᠰᠡᠨ ᠰᠤᠨᠳᠤᠭᠤᠢ ᠲᠤᠭᠠ᠂ ᠢᠮᠠᠭᠳᠠ ᠦᠯᠦ ᠲᠡᠭᠰᠢᠷᠡᠵᠤ ᠤᠯᠠᠮ ᠤᠯᠠᠰᠢᠷᠠᠵᠤ ᠪᠠᠶᠢᠬᠤ ᠶᠢᠨ ᠴᠢᠨᠠᠳᠤ ᠤᠴᠢᠷ ᠤᠳᠬᠠ ᠶᠢ ᠠᠭᠤᠯᠤᠭᠰᠠᠨ ᠤᠨᠴᠠᠭᠠᠢ ᠲᠤᠭᠠ ᠶᠤᠮ᠃ ᠡᠪᠦᠭᠡ ᠲᠡᠭᠡᠳᠤᠰ ᠮᠢᠨᠢ ᠡᠶᠢᠮᠤ ᠯᠠ ᠠᠭᠤᠤ ᠤᠬᠠᠭᠠᠨ ᠲᠠᠢ ᠪᠠᠶᠢᠵᠤ ᠳ᠋ᠠ ᠁