ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤᠨ ᠠᠯᠳᠠᠷᠲᠤ ᠪᠦᠲᠦᠭᠡᠯ ᠨᠣᠭᠣᠭᠠᠨ ᠳ᠋ᠠᠷᠠ ᠡᠬᠡ ᠪᠤᠷᠬᠠᠨ ᠬᠤᠯᠠᠭᠠᠢ ᠳᠤ ᠠᠯᠳᠠᠭᠳᠠᠭᠰᠠᠨ ᠂ ᠬᠠᠭᠤᠯᠪᠤᠷᠢ ᠪᠦᠲᠦᠭᠡᠯ ᠨᠢ ᠪᠣᠭᠳᠠ ᠬᠠᠭᠠᠨ ᠤ ᠣᠷᠳᠣᠨ ᠮᠦᠽᠧᠢ ᠳ᠋ᠦ ᠪᠠᠶᠢᠳᠠᠭ ᠬᠡᠮᠡᠨ ᠣᠯᠠᠨ ᠨᠡᠶᠢᠲᠡ ᠶ᠋ᠢᠨ ᠰᠦᠯᠵᠢᠶᠡᠨ ᠳ᠋ᠥ ᠪᠠᠭᠠ ᠦᠭᠡᠢ ᠰᠢᠭᠦᠮᠵᠢᠯᠡᠯ ᠳᠠᠭᠠᠭᠤᠯᠵᠤ ᠪᠤᠢ ᠪᠢᠯᠡ ᠃ ᠲᠡᠭᠡᠪᠡᠯ ᠡᠨᠡ ᠠᠰᠠᠭᠤᠳᠠᠯ ᠢᠶᠠᠷ ᠪᠣᠭᠳᠠ ᠬᠠᠭᠠᠨ ᠤ ᠣᠷᠳᠣᠨ ᠮᠦᠽᠧᠢ ᠶ᠋ᠢᠨ ᠰᠠᠩ ᠬᠥᠮᠥᠷᠭᠡ ᠂ ᠪᠦᠷᠢᠳᠬᠡᠯ ᠰᠤᠳᠤᠯᠭᠠᠨ ᠤ ᠠᠯᠪᠠᠨ ᠡᠴᠠ ᠠᠯᠪᠠᠨ ᠶᠣᠰᠣᠨ ᠤ ᠲᠠᠶᠢᠯᠪᠤᠷᠢ ᠬᠢᠵᠡᠢ ᠃ ᠲᠤᠰ ᠲᠠᠶᠢᠯᠪᠤᠷᠢ ᠳᠤ ᠄ ᠪᠣᠭᠳᠠ ᠬᠠᠭᠠᠨ ᠤ ᠣᠷᠳᠣᠨ ᠮᠦᠽᠧᠢ ᠶ᠋ᠢᠨ ᠦᠵᠡᠮᠦᠷᠢ ᠳ᠋ᠦ ᠪᠤᠢ ᠠᠩᠬᠠᠳᠤᠭᠠᠷ ᠪᠣᠭᠳᠠ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤᠨ ᠤᠷᠠᠯᠠᠭᠰᠠᠨ ︽ ᠨᠣᠭᠣᠭᠠᠨ ᠳ᠋ᠠᠷᠠ ᠡᠬᠡ ︾ ᠰᠢᠲᠦᠭᠡᠨ ᠨᠢ 1706 ᠣᠨ ᠤ ᠣᠷᠴᠢᠮ ᠪᠦᠲᠦᠭᠡᠭᠳᠡᠭᠰᠡᠨ ᠪᠣᠯᠪᠠ ᠦᠦ ᠬᠡᠮᠡᠨ ᠲᠠᠭᠠᠮᠠᠭᠯᠠᠭᠳᠠᠳᠠᠭ ᠪᠥᠭᠡᠳ ᠴᠠᠭ ᠤᠨ ᠤᠷᠤᠭᠠ ᠪᠤᠰᠬᠠᠭᠠ ᠶ᠋ᠢ ᠲᠤᠭᠤᠯᠵᠤ ᠡᠳᠦᠭᠡ ᠪᠢᠳᠠᠨ ᠳᠤ ᠦᠪᠯᠡᠭᠳᠡᠬᠦ ᠳᠦ ᠪᠡᠨ ᠠᠩᠬᠠᠨ ᠡᠬᠡ ᠲᠥᠷᠬᠦ ᠪᠡᠷ ᠢᠶ᠋ᠡᠨ ᠦᠶᠡ ᠳᠡᠮᠵᠢᠨ ᠢᠷᠡᠭᠰᠡᠨ ᠳᠡᠯᠡᠬᠡᠢ ᠶ᠋ᠢᠨ ᠤᠷᠠᠯᠢᠭ ᠤᠨ ᠬᠣᠶᠢᠮᠤᠷ ᠲᠤ ᠵᠣᠬᠢᠬᠤ ᠶᠣᠰᠣᠨ ᠤ ᠪᠠᠶᠢᠷᠢ ᠰᠠᠭᠤᠷᠢ ᠪᠠᠨ ᠡᠵᠡᠯᠡᠭᠰᠡᠨ ᠰᠣᠳᠣ ᠪᠦᠲᠦᠭᠡᠯ ᠪᠢᠯᠡ ᠃ ᠭᠤᠷᠪᠠᠨ ᠴᠠᠭ ᠤᠨ ᠪᠤᠷᠬᠠᠳ ᠤᠨ ᠡᠬᠡ ᠪᠣᠯᠬᠤ ᠨᠣᠭᠣᠭᠠᠨ ᠳ᠋ᠠᠷᠠ ᠡᠬᠡ ᠨᠢ ᠨᠢᠭᠦᠯᠡᠰᠦᠩᠭᠦᠢ ᠪᠣᠳᠢ ᠰᠡᠳᠭᠢᠯᠲᠦ ᠡᠬᠡ ᠬᠥᠮᠥᠨ ᠤ ᠰᠣᠩᠭᠣᠮᠠᠯ ᠳᠦᠷᠢ ᠪᠥᠭᠡᠳ ᠮᠣᠩᠭᠣᠯ ᠡᠮᠡᠭᠲᠡᠢ ᠶ᠋ᠢᠨ ᠲᠡᠭᠦᠰ ᠭᠠᠯᠪᠢᠷ ᠢ ᠪᠤᠷᠬᠠᠨ ᠤ ᠲᠢᠭ ᠲᠠᠢ ᠵᠣᠬᠢᠷᠠᠭᠤᠯᠵᠤ ᠂ ᠵᠥᠪᠬᠡᠨ ᠵᠠᠨᠠᠪᠠᠽᠠᠷ ᠤᠨ ᠯᠡ ᠭᠡᠬᠦ ︽ ᠲᠡᠭᠦᠰ ︾ ᠲᠢᠭ ᠢ ᠪᠤᠢ ᠪᠣᠯᠭᠠᠭᠰᠠᠨ ᠃ ᠳᠠᠬᠢᠨ ᠳᠠᠪᠲᠠᠬᠤ ᠂ ᠬᠠᠭᠤᠯᠪᠤᠷᠢᠯᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠂ ᠵᠥᠪᠬᠡᠨ ᠵᠠᠨᠠᠪᠠᠽᠠᠷ ᠤᠨ ᠯᠡ ᠭᠡᠬᠦ ᠲᠣᠳᠣᠳᠬᠠᠯ ᠪᠦᠬᠦᠢ ︽ ᠨᠡᠷᠡᠬᠦ ︾ ᠠᠷᠭᠠ ᠪᠡᠷ ᠴᠢᠳᠬᠤᠭᠰᠠᠨ᠃ ᠡᠨᠡ ᠨᠢ ᠬᠦᠷᠡᠯ ᠢ ᠲᠣᠳᠣᠷᠬᠠᠢ ᠰᠣᠷᠢᠴᠠ ᠪᠦᠬᠦᠢ ᠶᠢᠰᠦᠨ ᠡᠷᠳᠡᠨᠢ ᠪᠡᠷ ᠪᠠᠶᠠᠵᠢᠭᠤᠯᠵᠤ ᠳᠤᠲᠤᠷ ᠢ ᠨᠢ ᠬᠥᠨᠳᠡᠢ ᠴᠢᠳᠬᠤᠵᠤ᠂ ᠠᠯᠲᠠ ᠪᠡᠷ ᠰᠢᠷᠠᠭᠰᠠᠨ ᠪᠥᠭᠡᠳ ᠭᠠᠭᠴᠠ ᠬᠦ ᠵᠠᠨᠠᠪᠠᠽᠠᠷ ᠤᠨ ᠲᠢᠭ ᠰᠤᠷᠭᠠᠭᠤᠯᠢ ᠪᠤᠶᠤ ᠭᠠᠷ ᠤᠨ ᠱᠠᠪᠢ ᠨᠠᠷ ᠲᠤ ᠨᠢ ᠯᠡ ᠢᠩᠭᠢᠵᠦ ᠴᠢᠳᠬᠤᠬᠤ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠠᠶᠢᠵᠠᠢ ᠃
ᠭᠡᠲᠡᠯᠡ ᠴᠠᠬᠢᠮ ᠣᠷᠴᠢᠨ ᠳᠤ ᠬᠡᠨ ᠨᠢᠭᠡᠨ ᠤ ᠨᠡᠷᠡ ᠬᠦᠨᠳᠦ ᠳ᠋ᠦ ᠨᠥᠯᠥᠭᠡᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠤᠭ ᠪᠦᠲᠦᠭᠡᠯ ᠢ ᠵᠠᠨᠠᠪᠠᠽᠠᠷ ᠤᠨ ᠮᠤᠲᠤᠷ ᠤᠨ ᠪᠦᠲᠦᠭᠡᠯ ᠪᠤᠰᠤ ᠬᠠᠭᠤᠯᠪᠤᠷᠢ ᠭᠡᠬᠦ ᠲᠠᠰᠢᠶᠠ ᠮᠡᠳᠡᠭᠡᠯᠡᠯ ᠢ ᠨᠡᠶᠢᠭᠡᠮ ᠤᠨ ᠰᠦᠯᠵᠢᠶᠡ ᠪᠡᠷ ᠵᠣᠷᠢᠭᠤᠳᠠ ᠲᠠᠷᠠᠭᠠᠵᠤ ᠪᠤᠢ ᠨᠢ ᠮᠠᠨ ᠤ ᠮᠦᠽᠧᠢ ᠶ᠋ᠢᠨ ᠠᠵᠢᠯᠲᠠᠨ ᠠᠯᠪᠠᠨ ᠬᠠᠭᠠᠭᠴᠢ ᠂ ᠤᠷᠠᠯᠢᠭ ᠰᠤᠳᠤᠯᠤᠯ ᠤᠨ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠂ ᠭᠠᠳᠠᠭᠠᠳᠤ ᠶ᠋ᠢᠨ ᠪᠣᠯᠣᠨ ᠳᠣᠲᠣᠭᠠᠳᠤ ᠶ᠋ᠢᠨ ᠮᠢᠩᠭᠠ ᠮᠢᠩᠭᠠᠨ ᠦᠵᠡᠭᠴᠢ ᠦᠢᠯᠡᠴᠢᠯᠡᠭᠦᠯᠦᠭᠴᠢᠳ ᠢ ᠢᠯᠡᠳᠲᠡ ᠳ᠋ᠤ ᠪᠠᠰᠤᠮᠵᠢᠯᠠᠭᠰᠠᠨ ᠦᠢᠯᠡᠳᠦᠯ ᠲᠤᠯᠠ ᠤᠭ ᠣᠷᠣ ᠦᠨᠳᠦᠰᠦ ᠦᠭᠡᠢ ᠮᠡᠳᠡᠭᠡᠯᠡᠯ ᠳ᠋ᠥ ᠠᠪᠲᠠᠬᠤ ᠦᠭᠡᠢ ᠪᠠᠢᠬᠤ᠂ ᠤᠯᠠᠮ ᠢᠶᠠᠷ ᠲᠦᠭᠡᠭᠡᠬᠦ ᠦᠭᠡᠢ ᠪᠠᠶᠢᠬᠤ ᠶ᠋ᠢ ᠤᠷᠢᠶᠠᠯᠠᠵᠤ ᠪᠠᠶᠢᠨᠠ ᠭᠡᠵᠡᠢ ᠃