ᠮᠣᠩᠭᠣᠯ ᠤᠨ ᠦᠨᠳᠦᠰᠦᠨ ᠦ ᠮᠦᠽᠧᠢ ᠲᠡᠢ ᠬᠠᠮᠲᠤᠷᠠᠨ ᠲᠠᠨᠢᠯᠴᠠᠭᠤᠯᠵᠤ ᠪᠤᠢ 《ᠠᠯᠲᠠᠨ ᠰᠠᠩ ᠬᠦᠮᠦᠷᠭᠡ》 ᠴᠤᠪᠤᠷᠠᠯ ᠤᠨ ᠡᠨᠡ ᠤᠳᠠᠭᠠ ᠶᠢᠨ ᠳ᠋ᠤᠭᠠᠷ ᠲᠤ ᠠᠷᠪᠠᠨ ᠭᠤᠷᠪᠠ ᠳᠦᠷᠪᠡᠳᠦᠭᠡᠷ ᠵᠠᠭᠤᠨ ᠤ ᠦᠶᠡ ᠳᠦ ᠬᠤᠯᠪᠤᠭᠳᠠᠬᠤ 《ᠢᠵᠠᠭᠤᠷᠲᠠᠨ ᠤ ᠳᠡᠪᠡᠯ》ᠦᠵᠡᠮᠦᠷᠢ ᠶᠢ ᠣᠨᠴᠠᠯᠠᠵᠤ ᠪᠠᠶᠢᠨᠠ᠃
ᠣᠨ ᠴᠠᠭ᠄ ᠠᠷᠪᠠᠨ ᠭᠤᠷᠪᠠ ᠳᠦᠷᠪᠡᠳᠦᠭᠡᠷ ᠵᠠᠭᠤᠨ
ᠮᠠᠲ᠋ᠧᠷᠢᠶᠠᠯ᠄ ᠲᠣᠷᠭᠠ᠂ ᠫᠠᠨᠽᠠ᠂ ᠬᠣᠷᠭᠣᠢ᠂ ᠳᠠᠪᠤᠤ᠂ ᠠᠯᠲᠠᠨ ᠤᠲᠠᠰᠤ
ᠬᠡᠮᠵᠢᠶᠡ᠄ 128×110 ᠰᠠᠨᠲ᠋ᠢᠮᠧᠲ᠋ᠷ
ᠡᠨᠡᠬᠦ ᠳᠡᠪᠡᠯ ᠢ ᠮᠣᠩᠭᠣᠯ ᠤᠨ ᠦᠨᠳᠦᠰᠦᠨ ᠦ ᠮᠦᠽᠧᠢ ᠶᠢᠨ ᠰᠤᠳᠤᠯᠤᠭᠠᠴᠢᠳ 2003 ᠣᠨ ᠳᠤ ᠬᠡᠨᠲᠡᠢ ᠠᠶᠢᠮᠠᠭ ᠤᠨ ᠳᠡᠯᠭᠡᠷᠬᠠᠨ ᠰᠤᠮᠤ ᠶᠢᠨ ᠨᠤᠲᠤᠭ ᠪᠤᠬᠠ ᠶᠢᠨ ᠬᠣᠰᠢᠭᠤ ᠬᠡᠮᠡᠬᠦ ᠭᠠᠵᠠᠷ ᠲᠤ ᠪᠤᠢ ᠮᠣᠩᠭᠣᠯ ᠤᠨ ᠡᠵᠡᠨᠲᠦ ᠭᠦᠷᠦᠨ ᠦ ᠦᠶᠡ ᠶᠢᠨ ᠪᠤᠯᠠᠰᠢᠨ ᠠᠴᠠ ᠢᠯᠡᠷᠡᠭᠦᠯᠦᠨ ᠣᠯᠵᠠᠢ᠃ ᠡᠨᠳᠡ ᠡᠴᠡ ᠭᠤᠷᠪᠠᠨ ᠳᠡᠪᠡᠯ ᠭᠠᠷᠤᠭᠰᠠᠨ ᠤ ᠨᠢᠭᠡ ᠨᠢ ᠤᠷᠠᠨ ᠲᠠᠩᠰᠤᠭ ᠬᠢᠴᠡ᠂ ᠵᠠᠭᠪᠤᠷ ᠲᠠᠢ ᠠᠭᠠᠳ ᠠᠯᠲᠠᠨ ᠤᠲᠠᠰᠤ ᠪᠦᠬᠦᠢ ᠦᠨᠡᠲᠦ ᠲᠣᠷᠭᠠ ᠪᠠᠷ ᠬᠢᠭᠳᠡᠵᠡᠢ᠃ ᠢᠵᠠᠭᠤᠷᠲᠠᠨ ᠤ ᠳᠡᠪᠡᠯ ᠨᠢ ᠮᠣᠩᠭᠣᠯ ᠤᠨ ᠦᠨᠳᠦᠰᠦᠨ ᠦ ᠮᠦᠽᠧᠢ ᠶᠢᠨ ᠳᠦᠷᠪᠡᠳᠦᠭᠡᠷ ᠲᠠᠩᠬᠢᠮ ᠳᠤ ᠪᠠᠶᠢᠳᠠᠭ᠃ ᠤᠭ ᠳᠡᠪᠡᠯ ᠨᠢ ᠲᠠᠰᠢᠭᠤ ᠵᠠᠬᠠ ᠲᠠᠢ᠂ ᠤᠷᠲᠤ ᠨᠠᠷᠢᠨ ᠬᠠᠨᠴᠤᠢ ᠲᠠᠢ ᠪᠡᠯᠬᠡᠭᠦᠰᠦ ᠪᠡᠷ ᠢᠶᠡᠨ ᠨᠢᠭᠲᠠ ᠨᠢᠭᠡᠨ ᠵᠢᠭᠳᠡ ᠬᠤᠨᠢᠶᠠᠰᠤ ᠲᠠᠢ᠂ ᠳᠡᠷᠪᠡᠭᠡᠷ ᠬᠣᠷᠮᠣᠢ ᠲᠠᠢ᠂ ᠨᠢᠮᠭᠡᠨ ᠲᠣᠷᠭᠠᠨ ᠭᠠᠳᠠᠷ ᠲᠠᠢ᠃ ᠳᠡᠪᠡᠯ ᠦᠨ ᠠᠩᠬᠠᠨ ᠤ ᠥᠩᠭᠡ ᠨᠡᠯᠢᠶᠡᠳ ᠬᠤᠪᠢᠷᠠᠵᠤ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠥᠭᠡᠳ ᠣᠳᠣ ᠪᠣᠷᠣ ᠥᠩᠭᠡ ᠲᠡᠢ᠃ ᠳᠡᠪᠡᠯ ᠦᠨ ᠡᠩᠭᠡᠷ᠂ ᠮᠥᠷᠥ ᠠᠷᠤ ᠳᠠᠯᠤ ᠨᠢᠷᠤᠭᠤ ᠨᠥᠮᠦᠷᠦᠭᠦᠯᠦᠨ ᠦᠷᠭᠦᠯᠵᠢᠯᠡᠭᠰᠡᠨ ᠡᠪᠡᠷ ᠤᠭᠠᠯᠵᠠ ᠬᠡ ᠶᠢ ᠬᠣᠷᠭᠣᠢ ᠲᠣᠷᠭᠠ ᠪᠠᠷ ᠬᠠᠶᠢᠴᠢᠯᠠᠨ ᠵᠠᠬᠠ ᠪᠠᠷ ᠨᠢ ᠠᠯᠲᠠᠨ ᠤᠲᠠᠰᠤ ᠪᠠᠷ ᠵᠡᠭᠡᠭ ᠳᠠᠷᠤᠭᠤᠯᠤᠨ ᠣᠶᠣᠵᠠᠢ᠃ ᠠᠯᠲᠠᠨ ᠤᠲᠠᠰᠤ ᠲᠠᠢ ᠲᠣᠷᠭᠠ ᠪᠠᠷ ᠡᠪᠡᠷ ᠤᠭᠠᠯᠵᠠᠨ ᠬᠡ ᠶᠢ ᠨᠢᠭᠡᠨ ᠵᠢᠭᠳᠡ ᠬᠡᠮᠵᠢᠶᠡ ᠲᠡᠢ ᠣᠯᠠᠨ ᠢ ᠡᠰᠬᠡᠨ ᠪᠡᠯᠡᠳᠬᠡᠵᠦ᠂ ᠳᠡᠪᠡᠯ ᠦᠨ ᠡᠩᠭᠡᠷ᠂ ᠰᠤᠮᠤ᠂ ᠬᠠᠨᠴᠤᠢ ᠶᠢᠨ ᠦᠵᠦᠭᠦᠷ᠂ ᠪᠤᠭᠤᠯᠭᠠ᠂ ᠬᠣᠷᠮᠣᠢ ᠳᠠᠭᠠᠭᠤᠯᠤᠨ ᠡᠮᠵᠢᠶᠡᠷᠢᠯᠡᠨ ᠣᠶᠣᠵᠠᠢ᠃ ᠬᠡ ᠶᠢᠨ ᠬᠣᠶᠠᠷ ᠲᠠᠯᠠ ᠪᠠᠷ ᠪᠣᠷᠣ ᠳᠠᠪᠤᠤ ᠳᠡᠪᠢᠰᠬᠡᠷ ᠲᠡᠢ ᠬᠣᠰᠢᠶᠠ ᠤᠷᠠᠯᠠᠵᠠᠢ᠃
ᠳᠡᠪᠡᠯ ᠦᠨ ᠪᠡᠯᠬᠡᠭᠦᠰᠦ ᠣᠷᠴᠢᠮ ᠢᠶᠠᠷ 20 ᠰᠠᠨᠲ᠋ᠢᠮᠧᠲ᠋ᠷ ᠥᠷᠭᠡᠨ ᠲᠡᠢ ᠪᠤᠷᠤᠭᠤ ᠵᠥᠪ ᠡᠷᠴᠢᠯᠡᠭᠰᠡᠨ ᠠᠯᠲᠠᠨ ᠤᠲᠠᠰᠤᠨ ᠵᠡᠭᠡᠭ ᠢ ᠵᠡᠷᠭᠡᠴᠡᠭᠡᠯᠡᠨ ᠳᠠᠷᠤᠵᠤ ᠣᠶᠣᠭᠰᠠᠨ ᠨᠢ ᠳᠡᠪᠡᠯ ᠢ ᠮᠠᠰᠢᠳᠠ ᠤᠷᠠᠨ ᠨᠢᠮᠪᠠᠢ ᠬᠢᠭᠰᠡᠨ ᠢ ᠭᠡᠷᠡᠴᠢᠯᠡᠨᠡ᠃ ᠳᠣᠲᠣᠭᠠᠳᠤ ᠡᠩᠭᠡᠷ ᠨᠢ ᠵᠡᠭᠦᠨ ᠭᠠᠷ ᠲᠠᠯᠠ ᠳᠤ ᠪᠠᠨ ᠯᠠᠪ ᠳᠠᠷᠤᠭᠰᠠᠨ᠂ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠠᠨ ᠭᠤᠷᠪᠠᠨ ᠲᠣᠷᠭᠠᠨ ᠪᠦᠴᠡ ᠲᠡᠢ᠃ ᠵᠡᠭᠦᠨ ᠲᠠᠯᠠ ᠳᠤ ᠪᠠᠨᠬᠤᠷᠮᠤᠢ ᠠᠴᠠ ᠪᠦᠰᠡᠯᠡᠬᠡᠢ ᠬᠦᠷᠲᠡᠯᠡ ᠣᠨᠣᠭᠠ ᠲᠠᠢ᠃ ᠤᠭ ᠳᠤᠷᠠᠰᠬᠠᠯ ᠢ 2013 ᠣᠨ ᠳᠤ ᠮᠣᠩᠭᠣᠯ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ 227 ᠳ᠋ᠤᠭᠠᠷ ᠲᠣᠭᠲᠠᠭᠠᠯ ᠢᠶᠠᠷ 《ᠬᠣᠣᠰ ᠦᠭᠡᠢ ᠦᠨᠡᠲᠦ》 ᠳᠤᠷᠠᠰᠬᠠᠯᠲᠤ ᠵᠦᠢᠯ ᠢᠶᠡᠷ ᠪᠠᠲᠤᠯᠠᠵᠤ ᠭᠡᠷᠡᠴᠢᠯᠡᠭᠡ ᠣᠯᠭᠤᠵᠠᠢ᠃