ᠮᠣᠩᠭᠣᠯ ᠤᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶᠢᠨ ᠬᠣᠯᠪᠣᠭᠠᠨ ᠤ ᠲᠡᠷᠢᠭᠦᠨ᠂ ᠰᠣᠶᠣᠯ ᠤᠷᠠᠯᠢᠭ ᠤᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ᠂ ᠦᠨᠳᠦᠰᠦᠨ ᠣ ᠪᠥᠬᠡ ᠶ᠋ᠢᠨ ᠮᠠᠩᠯᠠᠢ ᠵᠠᠰᠠᠭᠤᠯ ᠂ ᠪᠥᠬᠡ ᠶ᠋ᠢᠨ ᠴᠣᠯᠠ ᠳᠠᠭᠤᠳᠠᠭᠠᠴᠢ ᠂ ᠭᠠᠪᠢᠶᠠᠲᠤ ᠵᠦᠴᠦᠭᠡᠴᠢᠨ᠂ ᠤᠷᠲᠤ ᠶ᠋ᠢᠨ ᠳᠠᠭᠤᠴᠢᠨ ᠪᠠᠰᠠᠩᠬᠦᠦ ᠶ᠋ᠢᠨ ᠪᠠᠲᠤᠪᠣᠯᠣᠳ ᠲᠠᠢ ᠶᠠᠷᠢᠯᠴᠠᠯᠠ ᠃
ᠦᠨᠳᠦᠰᠦᠨ ᠣ ᠪᠥᠬᠡ ᠶ᠋ᠢᠨ ᠴᠣᠯᠠ ᠳᠠᠭᠤᠳᠠᠬᠤ ᠤᠯᠤᠰ ᠤᠨ ᠤᠷᠤᠯᠳᠤᠭᠠᠨ ᠳᠤ ᠣᠷᠣᠯᠴᠠᠭᠠᠳ ᠬᠡᠳᠦᠨᠲᠡ ᠲᠦᠷᠦᠭᠦᠯᠡᠵᠦ ᠪᠠᠶᠢᠭᠰᠠᠨ ᠰᠠᠨᠠᠭᠳᠠᠨᠠ᠃
ᠲᠡᠶᠢᠮᠦ ᠡ᠂ 1999 ᠣᠨ ᠳᠤ ᠲᠡᠷᠢᠭᠦᠨ ᠪᠠᠶᠢᠷᠢ ᠡᠵᠡᠯᠡᠵᠦ᠂ 2003᠂ 2006 ᠣᠨ ᠳᠤ ᠤᠯᠤᠰ ᠤᠨ ᠶᠡᠬᠡ ᠪᠠᠶᠠᠷ ᠨᠠᠭᠠᠳᠤᠮ ᠤᠨ ᠰᠢᠯᠢᠳᠡᠭ ᠪᠥᠬᠡ ᠴᠣᠯᠠᠯᠠᠭᠠᠴᠢ ᠪᠣᠯᠣᠭᠰᠠᠨ ᠃ ᠪᠢ 2011 ᠣᠨ ᠳᠤ ᠦᠨᠳᠦᠰᠦᠨ ᠣ ᠪᠥᠬᠡ ᠶ᠋ᠢᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠲᠡᠷᠢᠭᠦᠨ ᠮᠠᠩᠨᠠᠢ᠂ 2012 ᠣᠨ ᠳᠤ ᠮᠣᠩᠭᠣᠯ ᠤᠯᠤᠰ ᠤᠨ ᠮᠠᠩᠯᠠᠢ ᠵᠠᠰᠠᠭᠤᠯ ᠴᠣᠯᠠ ᠬᠦᠷᠲᠡᠪᠡ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠥ ᠪᠥᠬᠡ ᠶ᠋ᠢᠨ ᠴᠣᠯᠠ ᠳᠠᠭᠤᠳᠠᠬᠤ ᠤᠷᠤᠯᠳᠤᠭᠠᠨ ᠤ ᠰᠡᠭᠦᠯᠴᠢ ᠶ᠋ᠢᠨ ᠰᠢᠯᠭᠠᠷᠠᠭᠤᠯᠤᠯᠲᠠ ᠳ᠋ᠤ ᠦᠯᠡᠳᠡᠭᠰᠡᠨ ᠵᠢᠷᠭᠤᠭᠠᠨ ᠬᠥᠮᠥᠨ ᠢ ᠰᠫᠣᠷᠲ ᠤᠨ ᠲᠥᠪ ᠣᠷᠳᠣᠨ ᠳᠤ ᠪᠣᠯᠣᠭᠰᠠᠨ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠳ᠋ᠤ ᠪᠥᠬᠡ ᠴᠣᠯᠠᠯᠠᠭᠤᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠪᠠᠷᠢᠯᠳᠤᠭᠠᠨ ᠳ᠋ᠤ ᠪᠢ ᠤᠯᠤᠰ ᠤᠨ ᠵᠠᠭᠠᠨ ᠷ᠊·ᠳᠠᠸᠠᠨᠢᠮᠠ᠂ ᠤᠯᠤᠰ ᠤᠨ ᠭᠠᠷᠤᠳᠢ ᠳ᠋᠊· ᠪᠠᠶᠠᠷ ᠤᠨ ᠴᠣᠯᠠ ᠶ᠋ᠢ ᠳᠠᠭᠤᠳᠠᠭᠰᠠᠨ ᠃ ᠣᠯᠠᠨ ᠵᠢᠯ ᠪᠥᠬᠡ ᠶ᠋ᠢᠨ ᠵᠠᠰᠠᠭᠤᠯ ᠬᠢᠭᠰᠡᠨ ᠬᠦᠮᠦᠰ ᠲᠠᠢ ᠥᠷᠢᠰᠦᠯᠳᠦᠵᠦ᠂ ᠳᠥᠷᠪᠡᠳᠦᠭᠡᠷ ᠪᠠᠶᠢᠷᠢ ᠳᠤ ᠰᠢᠯᠭᠠᠷᠠᠬᠤ ᠳ᠋ᠤ ᠦᠵᠡᠭᠴᠢᠳ︽ᠪᠦᠬᠡ ᠴᠣᠯᠠᠯᠠᠭᠠᠴᠢ ᠵᠠᠯᠠᠭᠤ ᠲᠦᠷᠦᠯᠡ︾ ᠭᠡᠵᠦ ᠠᠯᠠᠭᠠ ᠲᠠᠰᠢᠨ᠂ ᠤᠷᠮᠠ ᠥᠭᠴᠦ ᠪᠢᠯᠡ᠃ ᠪᠠᠭᠰᠢ ︽ᠪ᠊·ᠪᠠᠲᠤᠪᠣᠯᠣᠳ ᠢ ᠵᠡᠭᠦᠨ ᠦ ᠮᠠᠩᠨᠠᠢ ᠳᠦ ᠭᠠᠷᠭᠠᠵᠤ ᠪᠣᠯᠣᠨᠠ︾ ᠭᠡᠵᠦ ᠬᠡᠯᠡᠭᠰᠡᠨ ᠢᠶ᠋ᠡᠷ ᠵᠢᠯ ᠪᠦᠷᠢ ᠶ᠋ᠢᠨ ᠪᠠᠶᠠᠷ ᠨᠠᠭᠠᠳᠤᠮ ᠢᠶᠠᠷ ᠵᠡᠭᠦᠨ ᠦ ᠮᠠᠩᠨᠠᠢ ᠳᠦ ᠵᠣᠭᠰᠣᠳᠠᠭ ᠪᠣᠯᠣᠭᠰᠠᠨ᠃ ᠪᠢ ᠬᠡᠳᠦᠢ ᠮᠠᠩᠯᠠᠢ ᠵᠠᠰᠠᠭᠤᠯ ᠪᠣᠯᠣᠭᠰᠠᠨ ᠴᠦ ᠠᠬᠠᠮᠠᠳ ᠤᠳ ᠡᠴᠠ ᠪᠠᠨ ᠰᠤᠷᠤᠯᠴᠠᠭᠰᠠᠭᠠᠷ ᠯᠡ ᠶᠠᠪᠤᠭᠠ᠃
ᠪᠥᠬᠡ ᠳ᠋ᠦ ᠪᠡᠨ ᠵᠥᠪᠯᠡᠵᠦ᠂ ᠪᠠᠷᠢᠯᠳᠤᠭᠠᠨ ᠤ ᠮᠡᠬᠡ ᠵᠢᠭᠠᠬᠤ᠂ ᠰᠡᠳᠬᠢᠯ ᠵᠣᠷᠢᠭ ᠢ ᠨᠢ ᠬᠤᠷᠴᠠᠯᠠᠬᠤ ᠭᠡᠳ ᠵᠠᠰᠠᠭᠤᠯ ᠬᠥᠮᠥᠨ ᠣ ᠡᠭᠦᠷᠭᠡ ᠶᠡᠬᠡ᠃ ᠵᠡᠭᠦᠨ ᠦ ᠮᠠᠩᠨᠠᠢ ᠳᠤ ᠴᠣᠯᠠ ᠳᠠᠭᠤᠳᠠᠳᠠᠭ ᠲᠠᠨ ᠤ ᠮᠦᠷᠦᠨ ᠳᠡᠭᠡᠷᠡ ᠡᠴᠡ ᠤᠯᠤᠰ ᠤᠨ ᠠᠪᠤᠷᠭᠤ᠂ ᠠᠷᠰᠯᠠᠨ ᠴᠤᠯᠠᠲᠠᠳ ᠲᠥᠷᠥᠭᠰᠡᠨ ᠳ᠋ᠡ ᠃
ᠨᠠᠭᠠᠳᠤᠮ ᠳᠤ ᠬᠡᠨ ᠲᠦᠷᠦᠭᠦᠯᠡᠬᠦ ᠶ᠋ᠢ ᠲᠠᠭᠠᠬᠤ ᠠᠷᠭᠠ ᠦᠭᠡᠢ ᠃ ᠵᠠᠰᠠᠭᠤᠯ ᠬᠥᠮᠥᠨ ᠪᠥᠬᠡ ᠶ᠋ᠢᠨ ᠢᠶ᠋ᠡᠨ ᠪᠠᠭᠰᠢ᠂ ᠵᠥᠪᠯᠡᠭᠴᠢ᠂ ᠰᠢᠭᠦᠭᠴᠢ ᠨᠢ᠃ ᠶᠠᠮᠠᠷ ᠴᠦ ᠵᠠᠰᠠᠭᠤᠯ ᠴᠣᠯᠠ ᠶ᠋ᠢ ᠨᠢ ᠳᠠᠭᠤᠳᠠᠭᠰᠠᠨ ᠪᠥᠬᠡ ᠪᠡᠨ ᠲᠠᠭᠠᠷᠠᠤ ᠪᠠᠷᠢᠯᠳᠤᠭᠠᠰᠠᠢ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠃ ᠲᠡᠶᠢᠮᠦ ᠳ᠋ᠦ ᠪᠡᠨ ᠴᠦ ᠵᠠᠩ ᠢ ᠨᠢ ᠰᠠᠶᠢᠨ ᠮᠡᠳᠡᠳᠡᠭ ᠪᠠᠶᠢᠬᠤ ᠶᠣᠰᠣᠲᠠᠢ ᠃ ᠮᠢᠨᠤ ᠮᠦᠷᠦᠨ ᠳᠡᠭᠡᠷᠡ ᠡᠴᠡ ᠤᠯᠤᠰ ᠤᠨ ᠠᠷᠰᠯᠠᠨ ᠴᠣᠯᠠ ᠬᠦᠷᠲᠡᠵᠦ ᠪᠠᠶᠢᠯᠠ ᠃ ᠮᠢᠨᠤ ᠮᠦᠷᠦᠨ ᠳᠡᠭᠡᠷᠡ ᠡᠴᠡ ᠰ᠊·ᠮᠦᠩᠬᠡᠪᠠᠲᠤ ᠂ ᠴ᠊·ᠰᠠᠩᠵᠠᠶᠢᠳᠠᠮᠪᠠ ᠤᠯᠤᠰ ᠤᠨ ᠠᠪᠤᠷᠭᠤ ᠂ ᠨ᠊·ᠪᠠᠲᠤᠰᠠᠭᠤᠷᠢ ᠂ ᠴ᠊·ᠰᠣᠳᠨᠠᠮᠳᠣᠷᠵᠢ ᠨᠠᠷ ᠠᠷᠰᠯᠠᠨ ᠴᠣᠯᠠ ᠬᠦᠷᠲᠡᠭᠰᠡᠨ᠃ ᠪᠠᠷᠢᠯᠳᠤᠭᠠᠨ ᠪᠣᠯᠭᠠᠨ ᠳ᠋ᠤ ᠰ᠊· ᠮᠦᠩᠬᠡᠪᠠᠲᠤ ︽ᠠᠬᠠ ᠶ᠋ᠢᠨ ᠮᠦᠷᠦᠨ ᠳᠡᠭᠡᠷᠡ ᠡᠴᠡ ᠭᠠᠷᠬᠤ ᠰᠠᠶᠢᠬᠠᠨ ᠪᠠᠶᠢᠳᠠᠭ︾ ᠭᠡᠳᠡᠭ ᠶᠤᠮ ᠃
