ᠳᠤᠮᠳᠠᠭᠤᠪᠢ ᠠᠶᠢᠮᠠᠭ ᠤᠨ ᠡᠷᠳᠡᠨᠢᠳᠠᠯᠠᠢ ᠰᠤᠮᠤ ᠶᠢᠨ ᠤᠭᠲᠤᠭᠠᠯ ᠰᠠᠩ ᠤᠨ ᠳᠠᠯᠠᠢ ᠬᠡᠶᠢᠳ ᠦᠨ ᠳᠠᠮᠪᠠᠳᠠᠷᠵᠠᠯᠢᠨ ᠴᠣᠭᠴᠢᠨ ᠳᠤᠭᠠᠩ ᠤᠨ 100 ᠵᠢᠯ ᠦᠨ ᠣᠢ ᠲᠣᠬᠢᠶᠠᠵᠤ ᠪᠠᠶᠢᠭᠠ ᠲᠠᠢ ᠬᠣᠯᠪᠣᠭᠳᠠᠭᠤᠯᠤᠨ ᠲᠤᠰ ᠬᠡᠶᠢᠳ ᠦᠨ ᠤᠷᠳᠤ ᠲᠠᠯᠠ ᠳᠤ ᠴᠡᠴᠡᠷᠯᠢᠭᠲᠦ ᠬᠦᠷᠢᠶᠡᠯᠡᠩ ᠪᠠᠶᠢᠭᠤᠯᠵᠤ᠂ ᠯᠠᠮᠠ ᠨᠠᠷ ᠤᠨ ᠪᠠᠶᠢᠷᠢᠯᠠᠬᠤ ᠪᠠᠶᠢᠷᠢ ᠶᠢ ᠪᠠᠷᠢᠵᠤ᠂ ᠨᠡᠭᠡᠭᠡᠯᠲᠡ ᠪᠡᠨ ᠬᠢᠭᠰᠡᠨ ᠪᠠᠶᠢᠨᠠ᠃ ᠨᠡᠭᠡᠭᠡᠯᠲᠡ ᠳᠦ ᠠᠪᠤᠷᠠᠯ ᠢᠲᠡᠭᠡᠯᠲᠦ ᠶᠢᠰᠦᠳᠦᠭᠡᠷ ᠪᠣᠭᠳᠠ ᠵᠢᠪᠽᠤᠨᠳᠠᠮᠪᠠ ᠬᠤᠲᠤᠭᠲᠤ ᠶᠢᠨ ᠲᠠᠭᠠᠯᠠᠯ ᠤᠨ ᠱᠠᠪᠢ ᠲᠦᠭᠰᠠᠷᠠᠢ ᠷᠢᠮᠪᠦᠴᠸ᠂ ᠬᠡᠶᠢᠳ ᠦᠨ ᠲᠥᠯᠥᠭᠡᠯᠡᠯ ᠯᠠᠮᠠ ᠬᠤᠸᠠᠷᠠᠭ ᠤᠳ᠂ ᠰᠤᠮᠤ ᠶᠢᠨ ᠤᠳᠤᠷᠢᠳᠤᠯᠭᠠ ᠨᠠᠷ ᠰᠦᠰᠦᠭᠲᠡᠨ ᠣᠯᠠᠨ ᠣᠷᠣᠯᠴᠠᠵᠠᠢ᠃ ᠡᠨᠡ ᠦᠶᠡ ᠪᠡᠷ ᠨᠠᠢᠮᠠᠳᠤᠭᠠᠷ ᠪᠣᠭᠳᠠ ᠬᠠᠭᠠᠨ ᠤ ᠮᠣᠩᠭᠣᠯ ᠤᠨ ᠠᠷᠠᠳ ᠲᠦᠮᠡᠨ ᠳᠦ ᠪᠡᠨ ᠵᠣᠷᠢᠭᠤᠯᠤᠨ ᠠᠶᠢᠯᠠᠳᠤᠭᠰᠠᠨ ᠠᠶᠢᠯᠠᠳᠪᠤᠷᠢ ᠰᠤᠷᠭᠠᠯ ᠢ ᠪᠦᠷᠢᠨ ᠪᠠᠭᠲᠠᠭᠠᠭᠰᠠᠨ ︽ᠮᠣᠩᠭᠣᠯ ᠤᠯᠤᠰ ᠤᠨ ᠬᠠᠭᠠᠨ᠂ ᠨᠠᠢᠮᠠᠳᠤᠭᠠᠷ ᠪᠣᠭᠳᠠ ᠵᠢᠪᠽᠤᠨᠳᠠᠮᠪᠠ ᠬᠤᠲᠤᠭᠲᠤ ᠶᠢᠨ ᠪᠤᠮᠤᠨ ᠵᠠᠷᠯᠢᠭ︾ ᠬᠡᠮᠡᠬᠦ ᠨᠣᠮ ᠢ ᠬᠡᠪᠯᠡᠭᠦᠯᠵᠦ᠂ ᠬᠡᠶᠢᠳ ᠦᠨ ᠪᠦᠲᠦᠭᠡᠨ ᠪᠠᠶᠢᠭᠤᠯᠤᠯᠲᠠ ᠳᠤ ᠬᠤᠪᠢ ᠨᠡᠮᠡᠷᠢ ᠪᠡᠨ ᠣᠷᠣᠭᠤᠯᠤᠭᠰᠠᠨ ᠰᠦᠰᠦᠭᠲᠡᠨ ᠤᠯᠠᠨ ᠳᠤ ᠳᠤᠷᠠᠰᠬᠠᠯ ᠪᠣᠯᠭᠠᠵᠤ ᠭᠠᠷᠳᠠᠭᠤᠯᠤᠭᠰᠠᠨ ᠠᠵᠠᠢ ᠃
ᠤᠭᠲᠤᠭᠠᠯ ᠰᠠᠩ ᠤᠨ ᠳᠠᠯᠠᠢ ᠬᠡᠶᠢᠳ ᠢ 1810 ᠣᠨ ᠳᠤ ᠪᠠᠶᠢᠭᠤᠯᠤᠭᠰᠠᠨ ᠪᠥᠭᠡᠳ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠢ ᠮᠠᠨᠳᠤᠭᠤᠯᠬᠤ ᠴᠣᠭᠴᠢᠨ ᠳᠤᠭᠠᠩ ᠢ ᠲᠦᠮᠡᠨ ᠠᠮᠢᠲᠠᠨ ᠢ ᠠᠮᠤᠷ ᠲᠠᠶᠢᠪᠤᠩ ᠪᠠᠶᠢᠯᠭᠠᠬᠤ ᠵᠣᠷᠢᠯᠭᠠ ᠪᠠᠷ 1918-1919 ᠣᠨ ᠳᠤ ᠪᠠᠷᠢᠵᠠᠢ᠃ ᠲᠦᠰᠢᠶᠡᠲᠦ ᠬᠠᠨ ᠠᠶᠢᠮᠠᠭ ᠤᠨ ᠭᠣᠪᠢ ᠲᠦᠰᠢᠶᠡ ᠭᠦᠩ ᠦᠨ ᠬᠣᠰᠢᠭᠤᠨ ᠤ ᠲᠤᠲ᠋ᠢ ᠭᠠᠯᠢᠳᠠ ᠭᠡᠭᠴᠢ ᠬᠦᠮᠦᠨ ᠴᠣᠭᠴᠢᠨ ᠳᠤᠭᠠᠩ ᠤᠨ ᠡᠮᠦᠨᠡ 1- 2 ᠺᠢᠯᠣᠮᠧᠲ᠋ᠷ ᠤᠨ ᠵᠠᠢ ᠳᠤ ᠪᠠᠶᠢᠳᠠᠭ ᠤᠨᠳᠤᠷᠭᠠ ᠰᠠᠶᠢᠲᠠᠢ ᠤᠰᠤᠨ ᠳᠤ ᠠᠳᠤᠭᠤ ᠪᠠᠨ ᠤᠰᠤᠯᠠᠵᠤ᠂ ᠬᠠᠷᠠ ᠪᠤᠲᠤᠩ ᠤᠨ ᠳᠡᠨᠵᠢ ᠳᠡᠭᠡᠷᠡ ᠨᠣᠮ ᠤᠨ ᠪᠠᠶᠢᠰᠢᠩ ᠪᠠᠷᠢᠭᠤᠯᠤᠭᠰᠠᠨ ᠢᠶᠠᠷ ᠰᠠᠩ ᠤᠨ ᠳᠠᠯᠠᠢ ᠬᠡᠶᠢᠳ ᠭᠡᠵᠦ ᠠᠷᠠᠳ ᠨᠡᠶᠢᠲᠡ ᠳᠦ ᠨᠡᠷᠡᠯᠡᠭᠳᠡᠬᠦ ᠪᠣᠯᠤᠭᠰᠠᠨ ᠲᠡᠦᠬᠡ ᠲᠡᠢ᠃