ᠡᠮᠦᠨᠡᠭᠣᠪᠢ ᠠᠶᠢᠮᠠᠭ ᠤᠨ ᠶᠢᠰᠦᠨ ᠭᠠᠶᠢᠬᠠᠮᠰᠢᠭ ᠤᠨ ᠨᠢᠭᠡ ᠳᠦ ᠠᠯᠳᠠᠷᠲᠤ ᠨᠣᠶᠠᠨ ᠰᠡᠪᠷᠡᠢ ᠬᠢᠴᠡ ᠶᠢᠨ ᠮᠥᠩᠭᠥᠨ ᠡᠳ᠋ᠯᠡᠯ ᠣᠷᠣᠳᠠᠭ ᠪᠠᠶᠢᠨᠠ᠃ ᠡᠨᠡᠬᠦ ᠬᠠᠯᠬᠠ ᠳᠤ ᠠᠯᠳᠠᠷᠲᠠᠢ ᠬᠢᠴᠡ ᠨᠢ ᠥᠨᠢ ᠡᠷᠲᠡᠨ ᠡᠴᠡ ᠥᠨᠥ ᠶᠢ ᠬᠦᠷᠲᠡᠯᠡ ᠦᠶᠡ ᠳᠠᠮᠵᠢᠨ ᠤᠯᠠᠮᠵᠢᠯᠠᠨ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠰᠤᠶᠤᠯ ᠤᠨ ᠪᠡᠶᠡᠲᠦ ᠪᠤᠰᠤ ᠥᠪ ᠶᠤᠮ᠃ ᠨᠣᠶᠠᠨ ᠰᠡᠪᠷᠡᠢ ᠶᠢᠨ ᠬᠢᠴᠡ ᠶᠢᠨ ᠵᠣᠬᠢᠶᠠᠭᠴᠢ ᠶᠢᠨ ᠡᠷᠬᠡ ᠶᠢ ᠰᠤᠨᠤᠮᠰᠢᠷᠠᠪ ᠤᠨ ᠡᠷᠳᠡᠨᠢ ᠠᠪᠤᠭᠰᠠᠨ ᠪᠠᠶᠢᠳᠠᠭ ᠪᠠᠶᠢᠨᠠ᠃ ᠮᠣᠩᠭᠣᠯ ᠤᠯᠤᠰ ᠤᠨ ᠬᠡᠮᠵᠢᠶᠡᠨ ᠳᠦ ᠳᠠᠷᠢᠭᠠᠩᠭᠠ᠂ ᠨᠣᠶᠠᠨ ᠰᠡᠪᠷᠡᠢ ᠶᠢᠨ ᠬᠢᠴᠡ ᠭᠡᠰᠡᠨ ᠬᠣᠶᠠᠷ ᠲᠥᠷᠥᠯ ᠦᠨ ᠮᠥᠩᠭᠥᠨ ᠠᠶᠠᠭᠠ ᠪᠠᠶᠢᠳᠠᠭ᠃ ᠡᠭᠦᠨ ᠡᠴᠡ ᠨᠣᠶᠠᠨ ᠰᠡᠪᠷᠡᠢ ᠶᠢᠨ ᠬᠢᠴᠡ ᠶᠢᠨ ᠢᠯᠭᠠᠭᠠ ᠨᠢ ᠮᠥᠩᠭᠥᠨ ᠠᠶᠠᠭᠠ ᠶᠢ ᠤᠲᠠᠰᠤ ᠰᠤᠪᠢᠮᠠᠯ ᠤᠨ ᠠᠷᠭᠠ ᠪᠠᠷ ᠬᠢᠳᠡᠭ ᠪᠠᠶᠢᠨᠠ᠃ ᠭᠣᠣᠯ ᠣᠨᠴᠠᠯᠢᠭ ᠨᠢ ᠵᠤᠵᠠᠭᠠᠨ ᠣᠷᠣᠴᠠ ᠠᠷᠪᠢᠨ ᠲᠠᠢ᠂ ᠡᠳ᠋ᠯᠡᠭᠡ ᠤᠳᠠᠭᠠᠨ ᠲᠠᠢ᠂ ᠤᠯᠠᠮᠵᠢᠯᠠᠯᠲᠤ ᠭᠠᠷ ᠠᠷᠭᠠ ᠪᠠᠷ ᠬᠢᠭᠰᠡᠨ ᠢᠶᠡᠷ ᠢᠶᠡᠨ ᠤᠯᠤᠰ ᠲᠤ ᠠᠯᠳᠠᠷ ᠲᠠᠢ ᠠᠵᠡᠢ᠃ ᠤᠭ ᠬᠢᠴᠡ ᠶᠢᠨ ᠶᠡᠬᠡ ᠭᠠᠷ ᠤᠨ ᠠᠶᠠᠭᠠᠨ ᠳᠤ 32-35 ᠯᠠᠩ᠂ ᠳᠤᠮᠳᠠ ᠭᠠᠷ ᠤᠨ ᠠᠶᠠᠭᠠᠨ ᠳᠤ 17-20 ᠯᠠᠩ᠂ ᠵᠢᠵᠢᠭ ᠠᠶᠠᠭᠠᠨ ᠳᠤ 8-10 ᠯᠠᠩ ᠮᠥᠩᠭᠥ ᠣᠷᠣᠳᠠᠭ ᠪᠠᠶᠢᠨᠠ᠃
1938 ᠣᠨ ᠳᠤ ᠭᠠᠷᠤᠭᠰᠠᠨ ᠰᠤᠳᠤᠯᠭᠠ ᠪᠠᠷ ᠫᠠᠭᠮᠠ ᠶᠢᠨ ᠮᠥᠩᠬᠡ᠂ ᠴᠢᠯᠠᠭᠤᠨ ᠤ ᠪᠠᠯᠵᠤᠤᠷ᠂ ᠴᠢᠯᠠᠭᠤᠨ ᠤ ᠶᠤᠨᠳᠤᠨ᠂ ᠳᠣᠯᠣᠭᠠᠷ ᠤᠨ ᠳᠠᠨᠽᠠᠨ᠂ ᠮᠠᠭᠰᠠᠷ ᠤᠨ ᠭᠣᠨᠴᠣᠭ᠂ ᠮᠣᠯᠣᠮ ᠤᠨ ᠪᠠᠳᠢᠷᠴᠢ ᠨᠠᠷ ᠢ ᠤᠷᠠᠨ ᠳᠠᠷᠬᠠᠨ ᠬᠦᠮᠦᠰ ᠳᠡᠭᠡᠷᠡᠬᠢ ᠮᠥᠩᠭᠥᠨ ᠡᠳ᠋ᠯᠡᠯ ᠦᠨ ᠬᠢᠴᠡ ᠶᠢ ᠬᠢᠬᠦ ᠠᠷᠭᠠ ᠪᠠᠷᠢᠯ ᠢ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠠ ᠪᠠᠷ ᠪᠦᠷᠢᠳᠬᠡᠵᠡᠢ᠃ ᠬᠠᠷᠢᠨ ᠣᠳᠣ ᠪᠠᠷ ᠨᠢᠳᠦᠨ ᠬᠡᠮᠡᠬᠦ ᠷᠢᠨᠴᠢᠨ᠂ ᠮᠢᠳᠤᠭ ᠤᠨ ᠳᠠᠨᠽᠠᠨ᠂ ᠨᠠᠸᠠᠩ ᠤᠨ ᠴᠢᠮᠡᠳᠳᠣᠷᠵᠢ᠂ ᠰᠤᠨᠤᠮᠰᠢᠷᠠᠪ ᠤᠨ ᠰᠤᠭᠢᠷ᠂ ᠰᠣᠨᠣᠮᠰᠢᠷᠠᠪ ᠤᠨ ᠡᠷᠳᠡᠨᠢ᠂ ᠠᠳᠢᠶᠠ ᠶᠢᠨ ᠴᠣᠣᠵᠢ ᠨᠠᠷ ᠨᠣᠶᠠᠨ ᠰᠡᠪᠷᠡᠢ ᠬᠢᠴᠡ ᠶᠢᠨ ᠮᠥᠩᠭᠥᠨ ᠤᠷᠠᠯᠠᠯ ᠤᠨ ᠰᠠᠶᠢᠨ ᠳᠠᠷᠬᠠᠴᠤᠳ ᠠᠵᠠᠢ ᠃