ᠤᠷᠢᠶᠠᠩᠬᠠᠢ ᠰᠤᠷ ᠤᠨ ᠬᠦᠨᠳᠦᠲᠦ ᠮᠡᠷᠭᠡᠨ᠂ ᠮᠣᠩᠭᠣᠯ ᠤᠯᠤᠰ ᠤᠨ ᠭᠠᠪᠢᠶᠠᠲᠤ ᠪᠠᠭᠰᠢ ᠲ∙ᠢᠳᠠᠮᠵᠠᠪ ᠤᠨ ᠨᠡᠷᠡᠮᠵᠢᠲᠦ ︽ᠤᠨᠲ᠋ᠤᠴᠠᠬᠤ︾ ᠬᠠᠷᠪᠤᠭᠠ ᠶᠢ ᠮᠣᠩᠭᠣᠯ ᠤᠨ ᠤᠷᠢᠶᠠᠩᠬᠠᠢ ᠰᠤᠷ ᠤᠨ ᠬᠣᠯᠪᠣᠭᠠᠨ ᠠᠴᠠ ᠳᠥᠷᠪᠡᠳᠦᠭᠡᠷ ᠰᠠᠷᠠ ᠶᠢᠨ 13᠍ ᠳᠦ ᠠᠩᠬᠠ ᠤᠳᠠᠭᠠ ᠵᠣᠬᠢᠶᠠᠨ ᠪᠠᠶᠢᠭᠤᠯᠤᠯᠠ᠃ ᠨᠡᠶᠢᠲᠡ ᠳᠦ ᠪᠡᠨ 73 ᠬᠠᠷᠪᠤᠭᠠᠴᠢ ᠴᠡᠴᠡ ᠮᠡᠷᠭᠡᠨ ᠢᠶᠡᠨ ᠰᠣᠷᠢᠭᠰᠠᠨ ᠠᠴᠠ ᠤᠯᠤᠰ ᠤᠨ ᠮᠡᠷᠭᠡᠨ ᠳᠣᠯᠣᠭᠠ᠂ ᠰᠫᠣᠷᠲ ᠤᠨ ᠮᠠᠰᠲ᠋ᠸᠷ 20᠂ ᠳᠡᠳ᠋ ᠮᠠᠰᠲ᠋ᠸᠷ ᠶᠢᠰᠦᠨ ᠬᠠᠷᠪᠤᠭᠠᠴᠢ ᠤᠷᠤᠯᠴᠠᠪᠠ᠃
ᠲᠡᠷᠢᠭᠦᠨ ᠪᠠᠶᠢᠷᠢ ᠶᠢ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠶᠢᠨ ᠨᠠᠯᠠᠶᠢᠬᠤ ᠳᠡᠭᠦᠷᠭᠡ ᠶᠢᠨ ᠬᠠᠷᠢᠶᠠᠲᠤ ︽ᠮᠣᠨᠳᠡᠢ︾ ᠪᠠᠭ ᠤᠨ ᠬᠠᠷᠪᠤᠭᠠᠴᠢ ᠤᠷᠢᠶᠠᠩᠬᠠᠢ ᠰᠤᠷ ᠤᠨ ᠤᠯᠤᠰ ᠤᠨ ᠮᠡᠷᠭᠡᠨ ᠪ∙ ᠬᠠᠲᠤᠨᠰᠠᠶᠢᠬᠠᠨ ᠲᠦᠷᠦᠭᠦᠯᠡᠵᠦ᠂ ᠪᠠᠶᠠᠨ-ᠥᠯᠥᠭᠡᠢ ᠶᠢᠨ ᠠᠶᠢᠮᠠᠭ ᠤᠨ ᠪᠤᠯᠠᠭᠠᠨ ᠰᠤᠮᠤ ᠶᠢᠨ ᠬᠠᠷᠢᠶᠠᠲᠤ ᠵᠠᠯᠠᠭᠤ ᠬᠠᠷᠪᠤᠭᠠᠴᠢ ᠴ∙ᠣᠳᠬᠣᠨᠳᠠᠯᠠᠢ ᠠᠩᠬᠠ ᠤᠳᠠᠭᠠ ᠲᠡᠮᠡᠴᠡᠭᠡᠨ ᠳᠦ ᠣᠷᠣᠯᠴᠠᠨ ᠤᠳᠠᠭᠠᠯᠠᠯᠠ᠃ ᠬᠦᠷᠡᠯ ᠮᠧᠳᠠᠯ ᠢ ᠳᠣᠷᠣᠨᠠᠲᠤ ᠠᠶᠢᠮᠠᠭ ᠤᠨ ᠪᠤᠯᠠᠭᠠᠨ ᠰᠤᠮᠤ ᠶᠢᠨ ᠬᠠᠷᠢᠶᠠᠲᠤ᠂ ︽ᠠᠨᠳᠠ ᠨᠤᠭᠤᠳ︾ ᠪᠠᠭ ᠤᠨ ᠬᠠᠷᠪᠤᠭᠠᠴᠢ ᠪ∙ᠨᠢᠮᠠᠪᠠᠶᠠᠷ᠂ ᠬᠣᠪᠳᠣ ᠠᠶᠢᠮᠠᠭ ᠤᠨ ᠳᠠᠭᠤᠲᠤ ᠰᠤᠮᠤ ᠶᠢᠨ ᠬᠠᠷᠢᠶᠠᠲᠤ ︽ᠮᠣᠨᠳᠡᠢ ︾ ᠪᠠᠭ ᠤᠨ ᠬᠠᠷᠪᠤᠭᠠᠴᠢ ᠪ∙ᠴᠣᠭᠲᠤᠲᠡᠮᠦᠷ ᠨᠠᠷ ᠬᠦᠷᠲᠡᠭᠰᠡᠨ ᠶᠤᠮ᠃
ᠡᠨᠡ ᠤᠳᠠᠭᠠ ᠶᠢᠨ ᠬᠠᠷᠪᠤᠭᠠ ᠶᠢ ᠪᠤᠰᠤᠳ ᠬᠠᠷᠪᠤᠭᠠᠨ ᠠᠴᠠ ᠳᠦᠷᠢᠮ ᠦᠨ ᠬᠤᠪᠢ ᠳᠤ ᠥᠪᠡᠷᠮᠢᠴᠡ ᠳᠡᠭ ᠵᠠᠶ᠋ᠢᠭ ᠢᠶᠠᠷ ᠵᠣᠬᠢᠶᠠᠭᠰᠠᠨ ᠃.ᠲᠤᠬᠠᠶᠢᠯᠠᠪᠠᠯ᠂ ᠡᠷᠲᠡᠨ ᠦ ᠤᠯᠠᠮᠵᠢᠯᠠᠯ ᠢ ᠰᠢᠩᠭᠡᠭᠡᠵᠦ ᠬᠠᠷᠪᠤᠭᠠᠴᠢᠳ ᠣᠨᠲ᠋ᠤᠴᠠᠨ ︵ᠬᠠᠭᠠᠯᠴᠠᠬᠤ ᠂ ᠬᠠᠷᠪᠤᠯᠴᠠᠬᠤ︶ ᠳᠠᠪᠠᠭᠠᠴᠢᠯᠠᠭᠰᠠᠨ ᠢᠶᠠᠷ ᠬᠣᠶᠠᠷ ᠬᠠᠷᠪᠤᠭᠠᠴᠢ ᠶᠢᠨ ᠬᠣᠭᠣᠷᠣᠨᠳᠣ ᠶᠢᠨ ᠥᠷᠢᠰᠦᠯᠳᠦᠭᠡᠨ ᠢ ᠢᠯᠡᠭᠦᠦ ᠭᠠᠷᠭᠠᠭᠰᠠᠨ ᠪᠠᠶᠢᠨᠠ᠃ ᠡᠬᠢᠨ ᠦ ᠳᠠᠪᠠᠭᠠᠨ ᠳᠤ ᠪᠦᠬᠦ ᠬᠠᠷᠪᠤᠭᠠᠴᠢ ᠶᠢᠰᠦᠨ ᠰᠤᠮᠤ ᠲᠠᠯᠪᠢᠵᠤ᠂ ᠬᠣᠶᠠᠳᠤᠭᠠᠷ ᠳᠠᠪᠠᠭᠠᠨ ᠳᠤ ᠬᠠᠮᠤᠭ ᠤᠨ ᠪᠠᠭᠠ ᠣᠨᠣᠭᠠ ᠲᠠᠢ ᠬᠠᠷᠪᠤᠭᠠᠴᠢᠳ ᠢ ᠣᠨᠣᠭᠠᠯᠲᠠ ᠪᠠᠷ ᠬᠣᠶᠠᠷ ᠬᠣᠶᠠᠷ ᠢᠶᠠᠷ ᠨᠢ ᠥᠷᠢᠰᠦᠯᠳᠦᠭᠦᠯᠵᠦ ᠢᠯᠠᠭᠰᠠᠨ ᠬᠠᠷᠪᠤᠭᠠᠴᠢ ᠶᠢ ᠭᠤᠷᠪᠠᠳᠤᠭᠠᠷ ᠳᠠᠪᠠᠭᠠᠨ ᠤ 64 ᠬᠠᠷᠪᠤᠭᠠᠴᠢ ᠳᠤ ᠦᠯᠡᠳᠡᠭᠡᠭᠰᠡᠨ ᠶᠤᠮ᠃ ᠢᠩᠭᠢᠭᠡᠳ ᠦᠯᠡᠳᠡᠭᠰᠡᠨ 64 ᠬᠠᠷᠪᠤᠭᠠᠴᠢ ᠶᠢ ᠨᠤᠭᠤᠯᠵᠤ ᠵᠢᠷᠭᠤᠭᠠᠨ ᠰᠤᠮᠤ ᠬᠠᠷᠪᠤᠭᠤᠯᠵᠤ ᠂ ᠢᠯᠠᠭᠰᠠᠨ ᠨᠢ 32 ᠲᠦ ᠦᠯᠡᠳᠡᠵᠦ ᠥᠨᠳᠥᠷ ᠴᠣᠯᠠ ᠲᠠᠢ ᠬᠠᠷᠪᠤᠭᠠᠴᠢᠳ ᠳᠠᠷᠠᠭᠠ ᠶᠢᠨ ᠳᠠᠪᠠᠭᠠ ᠨᠤᠭᠤᠳ ᠲᠤ ᠠᠮᠠᠯᠠᠬᠤ ᠪᠠᠶᠢᠳᠠᠯ ᠢᠶᠠᠷ ᠬᠠᠷᠪᠤᠯᠠ᠃ ᠥᠪᠡᠷᠮᠢᠴᠡ ᠮᠥᠨ ᠡᠷᠲᠡᠨ ᠦ ᠤᠯᠠᠮᠵᠢᠯᠠᠯ ᠢ ᠰᠢᠩᠭᠡᠭᠡᠭᠰᠡᠨ ᠥᠷᠢᠰᠦᠯᠳᠦᠭᠡᠨ ᠲᠡᠢ ᠡᠨᠡᠬᠦ ᠬᠠᠷᠪᠤᠭᠠ ᠶᠢ ᠴᠢᠨᠠᠭᠰᠢᠳᠠ ᠤᠯᠠᠮᠵᠢᠯᠠᠯ ᠪᠣᠯᠭᠠᠨ ᠶᠠᠪᠤᠭᠤᠯᠬᠤ ᠨᠢ ᠵᠦᠢᠲᠡᠢ ᠭᠡᠳᠡᠭ ᠢ ᠬᠠᠷᠪᠤᠭᠠᠴᠢᠳ ᠣᠨᠴᠠᠯᠠᠵᠤ ᠪᠠᠶᠢᠪᠠ᠃
