ᠰᠤᠶᠤᠯ ᠰᠤᠳᠤᠯᠤᠯ ᠤᠨ ᠤᠬᠠᠭᠠᠨ ᠤ ᠳ᠋ᠣᠺᠲ᠋ᠣᠷ᠂ ᠰᠤᠳᠤᠯᠤᠭᠠᠴᠢ ᠲ∙ᠶᠧᠲ᠋ᠧᠺᠪᠠᠢ ︽ᠮᠣᠩᠭᠣᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠍ ᠤ ᠰᠣᠩᠭᠣᠳᠠᠭ ᠡᠬᠡ ᠶᠢ ᠬᠠᠰᠠᠭ ᠬᠡᠯᠡᠨ ᠳᠤ ᠣᠷᠴᠢᠭᠤᠯᠵᠤ ᠰᠠᠶ᠋ᠢᠬᠠᠨ ᠤᠯᠠᠭᠠᠨᠪᠠᠭᠠᠲᠤᠷ ᠬᠤᠲᠠ ᠳᠤ ᠬᠡᠪᠯᠡᠭᠦᠯᠵᠡᠢ ᠃ ᠡᠨᠡ ᠨᠢ ᠤᠭ ᠨᠣᠮ ᠢ ᠬᠠᠰᠠᠭ ᠬᠡᠯᠡᠨ ᠳᠦ ᠣᠷᠴᠢᠭᠤᠯᠤᠭᠰᠠᠨ ᠬᠤᠶᠠᠳᠠᠬᠢ ᠠᠵᠢᠯ ᠪᠥᠭᠡᠳ ᠮᠣᠩᠭᠣᠯ ᠤᠯᠤᠰ ᠤᠨ ᠠᠷᠠᠳ ᠤᠨ ᠤᠷᠠᠨ ᠵᠣᠬᠢᠶᠠᠯᠴᠢ ᠰ∙ᠮᠠᠭᠠᠦ᠋ᠢᠶᠠ ᠠᠺᠠᠳᠧᠮᠢᠴᠢ ᠼ∙ᠳᠠᠮᠳᠢᠨᠰᠦ᠋ᠷᠦᠩ ᠤᠨ ᠬᠥᠷᠪᠡᠭᠦᠯᠦᠭᠰᠡᠨ ᠠᠩᠬᠠᠨ ᠤ ᠬᠤᠪᠢᠯᠪᠤᠷᠢ ᠪᠠᠷ ᠨᠢ 1979 ᠣᠨ ᠳᠤ ᠣᠷᠴᠢᠭᠤᠯᠵᠤ ᠪᠠᠶᠢᠴᠠᠢ᠃ ᠲᠤᠬᠠᠢ ᠶᠢᠨ ᠣᠷᠴᠢᠭᠤᠯᠭᠠ ᠬᠡᠯᠡ ᠰᠢᠨᠵᠢᠯᠡᠯ ᠦᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠳ᠋ᠣᠺᠲ᠋ᠣᠷ ᠪ∙ᠪᠠᠽᠢᠯᠬᠠᠨ ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪ∙ᠢᠮᠠᠱᠬᠠᠨ ᠨᠠᠷ ᠤᠨ ᠷᠧᠳᠠᠺᠲ᠋ᠣᠷᠯᠠᠭᠰᠠᠨ ᠢᠶᠠᠷ 1998 ᠣᠨ ᠳᠤ ᠬᠠᠰᠠᠭᠰᠲ᠋ᠠᠨ ᠤ ᠠᠯᠮᠠᠲ᠋ᠢ ᠬᠤᠲᠠ ᠳᠤ ︔ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠷ∙ᠰᠤᠷᠠᠭᠠᠨ ᠤ ᠷᠧᠳᠠᠺᠲ᠋ᠣᠷᠯᠠᠭᠰᠠᠨ ᠢᠶᠠᠷ 2006 ᠣᠨ ᠳᠤ ᠥᠯᠥᠭᠡᠢ ᠬᠤᠲᠠ ᠳᠤ ᠲᠤᠰ ᠲᠤᠰ ᠳᠠᠬᠢᠨ ᠬᠡᠪᠯᠡᠭᠳᠡᠵᠦ ᠪᠠᠶᠢᠵᠠᠢ ᠃
2004 ᠣᠨ ᠳᠤ ᠮᠣᠩᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠶᠢᠯᠡᠭᠴᠢ ᠶᠢᠨ ᠵᠠᠷᠯᠢᠭ ᠢᠶᠠᠷ ᠠᠺᠠᠳᠧᠮᠢᠴᠢ ᠱ∙ ᠪᠢᠷᠠ᠂ ᠳ∙ᠲᠡᠮᠦᠷᠲᠣᠭᠣᠭᠠ᠂ ᠳ∙ᠴᠡᠷᠡᠩᠰᠤᠳᠨᠠᠮ᠂ ᠫᠷᠣᠹᠧᠰᠰᠣᠷ ᠲ∙ᠳᠠᠰᠢᠼᠡᠳᠡᠨ᠂ ᠱ∙ᠴᠣᠶᠢᠮᠠ᠂ ᠪ∙ᠰᠤᠮᠢᠶᠠᠪᠠᠭᠠᠲᠤᠷ ᠵᠡᠷᠭᠡ ᠡᠷᠳᠡᠮᠲᠡᠳ ᠦᠨ ᠣᠷᠣᠯᠴᠠᠭᠠ ᠲᠠᠢ ᠪᠠᠷ ᠬᠢᠲᠠᠳ ᠭᠠᠯᠢᠭ ᠢᠶᠠᠷ ᠪᠢᠴᠢᠭᠳᠡᠭᠰᠡᠨ ᠬᠤᠪᠢᠯᠪᠤᠷᠢ᠂ ᠲᠡᠦᠬᠡᠨ ᠪᠠᠷᠢᠮᠲᠠ ᠨᠤᠭᠤᠳ᠂ ᠪᠤᠰᠤᠳ ᠡᠷᠳᠡᠮᠲᠡᠨ ᠰᠤᠳᠤᠯᠤᠭᠠᠴᠢᠳ ᠤᠨ ᠪᠦᠲᠦᠭᠡᠯ ᠦᠳ ᠢ ᠰᠤᠳᠤᠯᠵᠤ ᠦᠵᠡᠭᠰᠡᠨ ᠦ ᠦᠨᠳᠦᠰᠦᠨ ᠳᠦ ︽ᠮᠣᠩᠭᠣᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠤ ᠣᠷᠴᠢᠨ ᠴᠠᠭ ᠤᠨ ᠮᠣᠩᠭᠣᠯ ᠬᠡᠯᠡ ᠳᠡᠭᠡᠷᠡᠬᠢ ᠬᠥᠷᠪᠡᠭᠦᠯᠭᠡ ᠳᠦ ᠵᠠᠷᠢᠮ ᠨᠢᠭᠡ ᠥᠭᠡᠷᠡᠴᠢᠯᠡᠯᠲᠡ ᠨᠦᠭᠦᠳ ᠢ ᠣᠷᠣᠭᠤᠯᠤᠭᠰᠠᠨ᠃ ᠡᠨᠡᠬᠦ ᠰᠣᠩᠭᠣᠳᠠᠭ ᠡᠬᠡ ᠶᠢ ᠬᠠᠰᠠᠭ ᠬᠡᠯᠡ ᠪᠡᠷ ᠣᠯᠠᠨ ᠲᠦᠮᠡᠨ ᠳᠦ ᠬᠦᠷᠭᠡᠬᠦ ᠱᠠᠭᠠᠷᠳᠠᠯᠭᠠ ᠭᠠᠷᠤᠭᠰᠠᠨ ᠲᠤᠯᠠ ᠰᠡᠭᠦᠯ ᠦᠨ ᠨᠢᠭᠡ ᠵᠢᠯ ᠢ ᠨᠣᠮ ᠣᠷᠴᠢᠭᠤᠯᠬᠤ ᠳᠤ ᠵᠠᠷᠤᠴᠠᠭᠤᠯᠤᠯᠠ᠃ ᠬᠠᠰᠠᠭ ᠬᠡᠯᠡ ᠳᠡᠭᠡᠷᠡᠬᠢ ᠨᠣᠮ ᠮᠠᠨᠢ ᠰᠠᠶ᠋ᠢᠬᠠᠨ ᠠᠺᠠᠳᠧᠮᠢᠴᠢ ᠳ∙ ᠴᠡᠷᠡᠩᠰᠤᠳᠨᠠᠮ ᠭᠤᠸᠠᠢ ᠶᠢᠨ ᠮᠢᠯᠢᠶᠠᠯᠭᠠ ᠶᠢᠨ ᠦᠭᠡ ᠪᠡᠷ ᠬᠡᠪᠯᠡᠭᠳᠡᠵᠦ ᠭᠠᠷᠤᠭᠰᠠᠨ ᠬᠡᠮᠡᠨ ᠣᠷᠴᠢᠭᠤᠯᠤᠭᠴᠢ ᠬᠡᠯᠡᠵᠦ ᠪᠠᠶᠢᠨᠠ᠃ ᠣᠷᠴᠢᠭᠤᠯᠭᠠ ᠶᠢᠨ ᠷᠸᠳᠠᠺᠲ᠋ᠤᠷ ᠢᠶᠠᠷ ᠨᠢ ᠳ᠋ᠣᠺᠲ᠋ᠣᠷ᠂ ᠫᠷᠣᠹᠧᠰᠰᠣᠷ ᠮ∙ᠬᠤᠷᠮᠸᠲᠾᠠᠨ᠂ ︽ᠮᠣᠩᠭᠣᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠍ ᠤ ᠲᠤᠬᠠᠢ ᠲᠦᠷᠺ ᠬᠡᠯᠡ ᠪᠡᠷ ᠡᠷᠳᠡᠮ ᠦᠨ ᠵᠡᠷᠭᠡ ᠬᠠᠮᠠᠭᠠᠯᠠᠭᠰᠠᠨ ᠡᠷᠳᠡᠮᠲᠡᠨ ᠮ ∙ ᠤᠤᠭᠠᠨᠪᠠᠶᠠᠷ ᠨᠠᠷ ᠠᠵᠢᠯᠯᠠᠵᠠᠢ᠃