ᠡᠨᠡ ᠡᠳᠦᠷ ᠦᠳ ᠲᠦ ᠦᠷᠭᠦᠯᠵᠢᠯᠡᠵᠦ ᠪᠠᠶᠢᠭᠠ ᠪᠧᠷᠯᠢᠨ ᠦ ᠺᠢᠨᠣ᠋ ᠨᠠᠭᠠᠳᠤᠮ ᠳᠤ ᠬᠢᠲᠠᠳ ᠤᠨ ᠨᠠᠶᠢᠷᠠᠭᠤᠯᠤᠭᠴᠢ ᠸᠠᠩ ᠴᠦ᠋ ᠨᠠᠨ ᠦ ︽ᠥᠨᠳᠡᠭᠡ︾ ᠨᠡᠷᠡ ᠲᠡᠢ ᠺᠢᠨᠣ᠋ ᠥᠷᠢᠰᠦᠯᠳᠦᠵᠦ ᠪᠠᠶᠢᠨᠠ᠃ ᠤᠭ ᠺᠢᠨᠤ᠋ ᠶᠢᠨ ᠦᠢᠯᠡ ᠶᠠᠪᠤᠳᠠᠯ ᠮᠣᠩᠭᠣᠯ ᠤᠨ ᠲᠠᠯᠠ ᠨᠤᠲᠤᠭ ᠲᠤ ᠥᠷᠨᠢᠳᠡᠭ ᠶᠤᠮ ᠪᠠᠶᠢᠨᠠ᠃ ᠸᠠᠩ ᠴᠦ᠋ ᠨᠠᠨ ᠪᠣᠯ 2007 ᠣᠨ ᠳᠤ ᠥᠪᠥᠷ ᠮᠣᠩᠭᠣᠯ ᠳᠤ ᠵᠢᠷᠤᠭ ᠢ ᠨᠢ ᠠᠪᠤᠭᠰᠠᠨ ︽ᠲᠤᠶᠠᠭᠠ ᠶᠢᠨ ᠬᠤᠷᠢᠮ︾ ᠺᠢᠨᠣ᠋ ᠪᠠᠷ ᠪᠧᠷᠯᠢᠨ ᠦ ᠠᠯᠲᠠᠨ ᠪᠠᠭᠠᠪᠠᠭᠠᠢ ᠱᠠᠩᠨᠠᠯ ᠢ ᠬᠦᠷᠲᠡᠵᠦ ᠪᠠᠶᠢᠭᠰᠠᠨ ᠤᠷᠠᠨ ᠪᠦᠲᠦᠭᠡᠯᠴᠢ ᠶᠤᠮ᠃
ᠺᠢᠨᠤ᠋ ᠮᠣᠩᠭᠣᠯ ᠤᠨ ᠲᠠᠯᠠ ᠨᠤᠲᠤᠭ ᠲᠤ ᠨᠢᠭᠡᠨ ᠡᠮᠡᠭᠲᠡᠢ ᠶᠢᠨ ᠴᠣᠭᠴᠠᠰ ᠣᠯᠳᠠᠵᠤ ᠪᠠᠶᠢᠭᠠ ᠪᠠᠷ ᠡᠬᠢᠯᠡᠳᠡᠭ᠃ ᠴᠣᠭᠴᠠᠰ ᠢ ᠮᠠᠨᠠᠭᠤᠯᠬᠤ ᠪᠠᠷ 18 ᠨᠠᠰᠤᠲᠠᠢ ᠵᠠᠯᠠᠭᠤ ᠴᠠᠭᠳᠠᠭᠠ ᠶᠢ ᠡᠵᠡᠭᠦᠢ ᠲᠠᠯᠠ ᠳᠤ ᠣᠷᠬᠢᠵᠤ ᠶᠠᠪᠤᠳᠠᠭ᠃ ᠲᠡᠭᠦᠨ ᠳᠦ ᠬᠠᠨᠢ ᠪᠣᠯᠬᠤ ᠶᠢ ᠨᠢᠭᠡᠨ ᠮᠠᠯᠴᠢᠨ ᠡᠮᠡᠭᠲᠡᠢ ᠳᠦ ᠳᠠᠭᠠᠭᠠᠯᠭᠠᠳᠠᠭ ᠪᠠᠶᠢᠨᠠ᠃ ᠬᠥᠳᠡᠭᠡ ᠨᠤᠲᠤᠭ ᠲᠤ ᠭᠠᠭᠴᠠᠭᠠᠷ ᠠᠮᠢᠳᠤᠷᠠᠳᠠᠭ ᠮᠠᠯᠴᠢᠨ ᠪᠦᠰᠡᠭᠦᠢ ᠵᠠᠯᠠᠭᠤ ᠴᠠᠭᠳᠠᠭᠠ ᠲᠠᠢ ᠬᠡᠭᠡᠷᠡ ᠬᠣᠨᠣᠬᠤ ᠳᠤ ᠪᠠᠨ ᠲᠠᠨᠢᠯᠴᠠᠨ ᠳᠣᠲᠣᠨᠣᠰᠴᠤ᠂ ᠳᠤᠯᠠᠭᠠᠴᠠᠬᠤ ᠶᠢᠨ ᠲᠤᠯᠠᠳᠠ ᠤᠤᠭᠤᠵᠤ᠂ ᠰᠡᠭᠦᠯ ᠳᠦ ᠪᠡᠨ ᠬᠡᠪᠲᠡᠵᠦ ᠪᠤᠢ ᠲᠡᠮᠡᠭᠡᠨ ᠦ ᠨᠥᠮᠥᠷᠢ ᠳᠦ ᠡᠩᠭᠡᠷ ᠵᠥᠷᠢᠭᠦᠯᠳᠡᠭ᠃ ᠪᠠᠰᠠ ᠬᠡᠭᠡᠷᠡ ᠦᠯᠡᠳᠡᠭᠰᠡᠨ ᠴᠠᠭᠳᠠᠭᠠ ᠵᠠᠯᠠᠭᠤ ᠪᠡᠶᠡ ᠪᠡᠨ ᠳᠤᠯᠠᠭᠠᠴᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠭᠠᠷ ᠤᠲᠠᠰᠤᠨ ᠳᠡᠭᠡᠷᠡ ᠪᠡᠨ ᠬᠥᠭᠵᠢᠮ ᠲᠣᠭᠯᠠᠭᠤᠯᠤᠨ ᠪᠦᠵᠢᠭᠯᠡᠵᠦ ᠪᠠᠶᠢᠭᠠ᠂ ᠮᠠᠯᠴᠢᠨ ᠡᠮᠡᠭᠲᠡᠢ ᠭᠡᠷ ᠲᠦ ᠪᠡᠨ ᠬᠢᠮᠡᠯ ᠳᠠᠭᠠᠭᠤᠯᠢ ᠶᠢᠨ ᠲᠸᠯᠸᠢᠰ ᠦᠵᠡᠳᠡᠭ ᠵᠡᠷᠭᠡ ᠲᠧᠭᠨᠣᠯᠣᠭᠢ ᠶᠢᠨ ᠳᠡᠪᠰᠢᠯ ᠢ ᠬᠠᠷᠠᠭᠤᠯᠳᠠᠭ᠃ ᠺᠢᠨᠣᠨ ᠤ ᠦᠨᠳᠦᠰᠦᠨ ᠰᠠᠨᠠᠭᠠ ᠨᠢ ᠡᠷᠲᠡ ᠭᠠᠯᠪᠠ ᠶᠢᠨ ᠦᠶᠡ ᠳᠦ ᠡᠨᠡ ᠨᠤᠲᠤᠭ ᠲᠤ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠦᠯᠦᠭ ᠭᠦᠷᠪᠡᠯ ᠦᠳ ᠦᠨᠡᠨ ᠳᠦ ᠪᠡᠨ ᠤᠰᠠᠳᠴᠤ ᠦᠭᠡᠢ ᠪᠣᠯᠤᠭᠠ ᠦᠭᠡᠢ᠂ ᠮᠠᠯᠴᠢᠨ ᠡᠮᠡᠭᠲᠡᠢ ︽ᠦᠨᠳᠡᠭᠡᠯᠡᠬᠦ︾ ᠪᠣᠯᠵᠤ᠂ ᠦᠨᠢᠶᠡ ᠲᠤᠭᠤᠯᠯᠠᠵᠤ ᠪᠠᠶᠢᠭᠠ ᠵᠡᠷᠭᠡ ᠨᠢ ᠠᠮᠢᠳᠤᠷᠠᠯ ᠲᠠᠰᠤᠷᠠᠯᠲᠠ ᠦᠭᠡᠢ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶᠢᠭᠠ ᠶᠢ ᠬᠠᠷᠠᠭᠤᠯᠵᠠᠢ᠃
