ᠮᠣᠩᠭᠣᠯ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ︽ᠡᠷᠳᠡᠨᠢᠰ ᠲᠠᠪᠤᠨᠲᠣᠯᠣᠭᠠᠢ︾ ᠺᠣᠮᠫᠠᠨᠢ ᠶᠢᠨ ᠬᠤᠪᠢᠴᠠᠭᠠᠨ ᠤ 20 ᠬᠤᠪᠢ ᠪᠣᠯᠬᠤ ᠭᠤᠷᠪᠠᠨ ᠲᠡᠷᠪᠤᠮ ᠰᠢᠷᠬᠡᠭ ᠬᠤᠪᠢᠴᠠᠭᠠ ᠶᠢ 2012 ᠣᠨ ᠤ ᠳᠥᠷᠪᠡᠳᠦᠭᠡᠷ ᠰᠠᠷᠠ ᠶᠢᠨ 11 ᠡᠴᠡ ᠡᠮᠦᠨᠡ ᠲᠦᠷᠦᠭᠰᠡᠨ ᠢᠷᠭᠡᠨ ᠪᠦᠷᠢ ᠳᠦ ᠡᠵᠡᠮᠰᠢᠭᠦᠯᠬᠦ ᠪᠡᠷ ᠪᠣᠯᠤᠭᠰᠠᠨ᠃ ᠢᠩᠭᠢᠭᠰᠡᠨ ᠢᠶᠡᠷ ᠨᠢᠭᠡ ᠢᠷᠭᠡᠨ ᠳᠦ 1072 ᠰᠢᠷᠬᠡᠭ ᠬᠤᠪᠢᠴᠠᠭᠠ ᠨᠣᠭᠳᠠᠭᠰᠠᠨ ᠶᠤᠮ᠃ ᠵᠠᠷᠢᠮ ᠢᠷᠭᠡᠨ ᠰᠤᠷᠭᠠᠯᠲᠠ ᠶᠢᠨ ᠲᠥᠯᠥᠪᠦᠷᠢ᠂ ᠡᠬᠡ ᠣᠷᠣᠨ ᠤ ᠬᠤᠪᠢ ᠬᠡᠰᠢᠭ ᠬᠡᠯᠪᠡᠷᠢ ᠪᠡᠷ ᠬᠤᠪᠢᠴᠠᠭᠠ ᠪᠠᠨ ᠠᠪᠤᠭᠰᠠᠨ ᠪᠣᠯ ᠬᠤᠪᠢᠴᠠᠭᠠ ᠪᠠᠨ ᠠᠪᠤᠭᠠ ᠦᠭᠡᠢ ᠢᠷᠭᠡᠳ ᠪᠷᠣᠺᠧᠷ ᠳ᠋ᠢᠯᠯᠧᠷ ᠦᠨ ᠺᠣᠮᠫᠠᠨᠢ ᠳᠤ ᠬᠠᠨᠳᠤᠵᠤ᠂ ᠲᠥᠪᠯᠡᠷᠡᠭᠰᠡᠨ ᠬᠠᠳᠠᠭᠠᠯᠠᠮᠵᠢ ᠶᠢᠨ ᠳᠠᠩᠰᠠ ᠨᠡᠭᠡᠭᠡᠯᠭᠡᠭᠡᠳ ᠬᠤᠪᠢᠴᠠᠭᠠ ᠪᠠᠨ ᠪᠠᠲᠤᠯᠠᠭᠠᠵᠢᠭᠤᠯᠬᠤ ᠥᠪᠡᠷ ᠦᠨ ᠡᠵᠡᠮᠰᠢᠯ ᠦᠨ ᠪᠣᠯᠭᠠᠬᠤ ᠶᠣᠰᠣᠲᠠᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠲᠠᠨ ᠤ ᠨᠡᠭᠡᠭᠡᠯᠭᠡᠭᠰᠡᠨ ᠦᠨᠡᠲᠦ ᠴᠠᠭᠠᠰᠤᠨ ᠤ ᠳᠠᠩᠰᠠᠨ ᠳᠤ ︽ᠡᠷᠳᠡᠨᠢᠰ ᠲᠠᠪᠤᠨᠲᠣᠯᠣᠭᠠᠢ︾ ᠶᠢᠨ ᠬᠤᠪᠢᠴᠠᠭᠠ ᠪᠠᠶᠢᠷᠢᠰᠢᠵᠤ᠂ ᠤᠯᠠᠮ ᠢᠶᠠᠷ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠰᠢᠢᠳᠪᠦᠷᠢ ᠭᠠᠷᠴᠤ ᠠᠷᠠᠯᠵᠢᠶᠠ ᠡᠬᠢᠯᠡᠬᠦ ᠦᠶᠡ ᠳᠦ ᠲᠠ ᠬᠤᠪᠢᠴᠠᠭᠠ ᠪᠠᠨ ᠵᠠᠬᠢᠷᠤᠨ ᠵᠠᠷᠤᠴᠠᠭᠤᠯᠬᠤ ᠡᠷᠬᠡ ᠲᠡᠢ ᠪᠣᠯᠬᠤ ᠶᠤᠮ᠃ ᠬᠤᠪᠢᠴᠠᠭᠠᠨ ᠤ ᠳᠠᠩᠰᠠ ᠨᠡᠭᠡᠭᠡᠯᠭᠡ ᠦᠭᠡᠢ ᠢᠷᠭᠡᠳ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠰᠢᠢᠳᠪᠦᠷᠢ ᠭᠠᠷᠤᠭᠰᠠᠨ ᠴᠤ ᠲᠤᠬᠠᠢ ᠶᠢᠨ ᠬᠤᠪᠢᠴᠠᠭᠠ ᠶᠢ ᠵᠠᠬᠢᠷᠤᠨ ᠵᠠᠷᠤᠴᠠᠭᠤᠯᠬᠤ ᠡᠷᠬᠡ ᠦᠭᠡᠢ ᠪᠣᠯᠬᠤ ᠶᠤᠮ᠃
ᠣᠳᠣ ᠪᠠᠷ ᠮᠣᠩᠭᠣᠯ ᠤᠯᠤᠰ ᠤᠨ ᠢᠷᠭᠡᠳ ᠦᠨ ᠭᠤᠷᠪᠠᠨ ᠤ ᠨᠢᠭᠡ ᠨᠢ ᠪᠤᠶᠤ ᠨᠢᠭᠡ ᠰᠠᠶᠠ ᠭᠠᠷᠤᠢ ᠨᠢ ᠦᠨᠡᠲᠦ ᠴᠠᠭᠠᠰᠤᠨ ᠤ ᠳᠠᠩᠰᠠ ᠨᠡᠭᠡᠭᠡᠯᠭᠡᠵᠡᠢ᠃ ᠳᠠᠩᠰᠠ ᠨᠡᠭᠡᠭᠡᠯᠭᠡᠬᠦ ᠡᠴᠦᠰ ᠦᠨ ᠬᠤᠭᠤᠴᠠᠭᠠ ᠶᠢ ᠵᠢᠭᠠᠭᠠ ᠦᠭᠡᠢ ᠪᠠᠶᠢᠭᠠ ᠴᠤ᠂ ᠭᠠᠳᠠᠭᠤᠷ ᠵᠠᠷᠢᠮ ᠪᠷᠣᠺᠧᠷ ᠳ᠋ᠢᠯᠯᠧᠷ ᠤᠨ ᠺᠣᠮᠫᠠᠨᠢ᠂ ᠬᠤᠪᠢ ᠬᠦᠮᠦᠰ ᠬᠤᠪᠢᠴᠠᠭᠠᠨ ᠤ ᠳᠠᠩᠰᠠ ᠨᠡᠭᠡᠭᠡᠯᠭᠡᠬᠦ ᠬᠤᠭᠤᠴᠠᠭᠠ ᠳᠠᠭᠤᠰᠬᠤ ᠳᠤ ᠴᠥᠭᠡᠨ ᠬᠣᠨᠣᠭ ᠦᠯᠡᠳᠡᠯᠡ ᠭᠡᠬᠦ ᠬᠤᠳᠠᠯ ᠴᠤᠤᠷᠬᠠᠯ ᠲᠠᠷᠠᠭᠠᠵᠤ ᠪᠠᠶᠢᠭᠠ ᠶᠢ ᠰᠠᠩᠬᠦᠦ ᠶᠢᠨ ᠵᠣᠬᠢᠴᠠᠭᠤᠯᠬᠤ ᠬᠣᠷᠢᠶᠠᠨ ᠠᠴᠠ ᠮᠡᠳᠡᠭᠳᠡᠭᠰᠡᠨ ᠪᠠᠶᠢᠨᠠ᠃ ᠬᠡᠷᠪᠡ ᠢᠷᠭᠡᠳ ᠦᠨᠡᠲᠦ ᠴᠠᠭᠠᠰᠤᠨ ᠤ ᠳᠠᠩᠰᠠ ᠨᠡᠭᠡᠭᠡᠯᠭᠡᠬᠦ ᠶᠢ ᠬᠦᠰᠡᠪᠡᠯ 5000 ᠲᠥᠭᠥᠷᠢᠭ᠂ ᠢᠷᠭᠡᠨ ᠦ ᠦᠨᠡᠮᠯᠡᠬᠦ᠂ ᠠᠯᠢ ᠨᠢᠭᠡ ᠪᠠᠩᠬᠢ ᠳ᠋ᠡᠬᠢ ᠥᠪᠡᠷ ᠦᠨ ᠳᠠᠩᠰᠠᠨ ᠤ ᠳ᠋ᠤᠭᠠᠷ ᠲᠠᠢ ᠪᠠᠷ ᠥᠪᠡᠷ ᠲᠦ ᠣᠶᠢᠷᠠ ᠪᠠᠶᠢᠭᠠ ᠪᠷᠣᠺᠧᠷ ᠳ᠋ᠢᠯᠯᠧᠷ ᠤᠨ ᠺᠣᠮᠫᠠᠨᠢ ᠳᠤ ᠬᠠᠨᠳᠤᠬᠤ ᠪᠣᠯᠤᠮᠵᠢ ᠲᠠᠢ᠃
