-1920 ᠍ ᠳᠦ ᠣᠨ ᠤ ᠦᠶᠡ ᠳᠦ ᠮᠣᠩᠭᠣᠯ ᠣᠷᠣᠨ ᠳᠤ ᠶᠠᠮᠠᠷ ᠬᠦ ᠰᠣᠨᠢᠨ ᠠᠳᠠᠯ ᠶᠠᠪᠤᠳᠠᠯ ᠥᠷᠨᠢᠵᠦ ᠪᠠᠶᠢᠭᠰᠠᠨ ᠢ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠭᠡᠷᠡᠴᠢ ᠶᠢᠨ ᠲᠡᠮᠳᠡᠭᠯᠡᠯ
ᠫᠤᠯᠱᠠ ᠭᠠᠷᠤᠯ ᠲᠠᠢ ᠠᠶᠠᠯᠠᠭᠴᠢ᠂ ᠵᠣᠬᠢᠶᠠᠯᠴᠢ᠂ ᠨᠡᠶᠢᠭᠡᠮ ᠤᠨ ᠵᠢᠳᠬᠦᠯᠲᠡᠨ ᠹ∙ᠣᠰᠰᠧᠨᠳᠣᠪᠰᠺᠢ ᠬᠠᠷᠠ ᠪᠠᠭᠠ ᠠᠴᠠ ᠪᠠᠨ ᠯᠠ ᠡᠴᠢᠭᠡ ᠡᠬᠡ ᠪᠡᠨ ᠳᠠᠭᠠᠨ ᠣᠷᠣᠰ ᠣᠷᠣᠨ ᠢᠶᠠᠷ ᠬᠥᠨᠳᠡᠯᠡᠨ ᠭᠤᠯᠳᠤ ᠶᠠᠪᠤᠵᠤ ᠣᠯᠠᠨ ᠶᠠᠩᠵᠤ ᠶᠢᠨ ᠠᠵᠢᠯ ᠲᠥᠷᠥᠯ ᠬᠢᠵᠦ ᠠᠳᠠᠯ ᠰᠣᠨᠢᠨ ᠠᠮᠢᠳᠤᠷᠠᠯ ᠲᠤᠭᠤᠯᠤᠭᠰᠠᠨ ᠬᠦᠮᠦᠨ ᠠᠵᠡᠢ᠃ ᠰᠢᠪᠢᠷᠢ ᠳᠦ ᠪᠠᠶᠢᠷᠢᠯᠠᠵᠤ ᠪᠠᠶᠢᠭᠰᠠᠨ ᠴᠠᠭᠠᠨᠲᠠᠨ ᠤ ᠲᠣᠯᠣᠭᠠᠶᠢᠯᠠᠭᠴᠢ ᠺᠣᠯᠴᠠᠺ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠰᠠᠩᠬᠦᠦ ᠶᠢᠨ ᠵᠥᠪᠯᠡᠬᠦ ᠬᠢᠵᠦ ᠪᠠᠶᠢᠭᠰᠠᠨ ᠪᠣᠯᠪᠠᠴᠤ ᠤᠯᠠᠭᠠᠨᠲᠠᠨ ᠨᠤᠭᠤᠳ ᠤᠨ ᠴᠤᠬᠢᠯᠲᠠ ᠳᠤ ᠥᠷᠲᠥᠨ ᠰᠦᠢᠷᠡᠭᠰᠡᠨ ᠲᠤᠯᠠ ᠪᠠᠷᠢᠪᠴᠢᠯᠠᠭᠠᠨ ᠠᠴᠠ ᠠᠮᠢ ᠵᠤᠯᠪᠠᠨ ᠵᠢᠭᠤᠳᠠᠵᠤ ᠮᠣᠩᠭᠣᠯ ᠢᠶᠠᠷ ᠳᠠᠮᠵᠢᠨ ᠨᠣᠮᠣᠬᠠᠨ ᠳᠠᠯᠠᠢ ᠶᠢᠨ ᠠᠯᠢ ᠨᠢᠭᠡ ᠣᠶᠢᠷᠠ ᠶᠢᠨ ᠪᠣᠭᠣᠮᠲᠠ ᠬᠦᠷᠴᠦ ᠡᠬᠡ ᠣᠷᠣᠨ ᠢᠶᠠᠨ ᠵᠣᠷᠢᠬᠤ ᠪᠠᠷ ᠰᠢᠢᠳᠦᠨ ᠠᠮᠢ ᠥᠷᠢᠰᠦᠭᠰᠡᠨ ᠠᠳᠠᠷᠠᠮᠠ ᠲᠠᠢ ᠬᠡᠴᠡᠭᠦᠦ ᠵᠠᠮ ᠲᠤᠭᠤᠯᠤᠭᠰᠠᠨ ᠲᠤᠬᠠᠢ ᠪᠠᠨ ᠬᠣᠵᠢᠮ ︽ᠬᠦᠮᠦᠨ᠂ ᠠᠷᠢᠶᠠᠲᠠᠨ᠂ ᠪᠤᠷᠬᠠᠳ︾ ᠨᠡᠷᠡ ᠲᠡᠢ ᠨᠣᠮ ᠪᠢᠴᠢᠭᠰᠡᠨ ᠨᠢ ᠲᠡᠷᠡ ᠳᠣᠣᠷᠠ ᠪᠠᠨ ᠯᠠ ᠧᠦ᠋ᠷᠣᠫᠠ ᠳ᠋ᠠᠬᠢᠨ ᠢ ᠱᠤᠤᠭᠢᠭᠤᠯᠵᠤ ᠳᠠᠷᠤᠢ 15 ᠬᠡᠯᠡ ᠪᠡᠷ ᠣᠷᠴᠢᠭᠤᠯᠤᠭᠳᠠᠨ ᠭᠠᠷᠴᠤ ᠵᠣᠬᠢᠶᠠᠭᠴᠢ ᠮᠠᠨᠢ 20 ᠳ᠋ᠤᠭᠠᠷ ᠵᠠᠭᠤᠨ ᠤ ᠮᠠᠷᠺᠣ ᠫᠣᠯᠣ ᠬᠡᠮᠡᠬᠦ ᠠᠯᠳᠠᠷ ᠢ ᠬᠦᠷᠲᠡᠬᠦ ᠳᠦ ᠬᠦᠷᠭᠡᠵᠡᠢ᠃
ᠳᠠᠶᠢᠨ ᠰᠠᠮᠠᠭᠤᠨ ᠦᠢᠮᠡᠭᠡᠨ ᠪᠤᠵᠢᠭᠢᠨᠠᠭᠠᠨ ᠲᠠᠢ ᠬᠦᠨᠳᠦ ᠬᠡᠴᠡᠭᠦᠦ ᠴᠠᠭ ᠲᠤ ᠲᠡᠷᠡ ᠪᠡᠷ ᠰᠢᠪᠢᠷᠢ ᠶᠢᠨ ᠣᠢ ᠳᠤ ᠬᠦᠮᠦᠨ ᠵᠣᠨ ᠤ ᠨᠢᠳᠦᠨ ᠡᠴᠡ ᠨᠢᠭᠤᠭᠳᠠᠨ ᠬᠣᠶᠠᠷ ᠰᠠᠷᠠ ᠭᠠᠷᠤᠢ ᠤᠷᠤᠴᠠ ᠣᠪᠣᠬᠠᠢ ᠳᠤ ᠠᠮᠢᠳᠤᠷᠠᠵᠤ᠂ ᠠᠩ ᠭᠦᠷᠦᠭᠡ ᠬᠢᠵᠦ ᠬᠡᠷᠬᠢᠨ ᠠᠵᠤ ᠲᠦᠷᠦᠭᠰᠡᠨ ᠬᠢᠭᠡᠳ ᠠᠶᠤᠯ ᠲᠠᠢ ᠨᠢᠭᠤᠷ ᠲᠤᠯᠤᠭᠰᠠᠨ ᠴᠤ ᠠᠵᠠ ᠪᠠᠷ ᠮᠡᠨᠳᠦ ᠮᠤᠯᠲᠤᠷᠠᠭᠰᠠᠨ ᠲᠤᠬᠠᠢ ᠪᠠᠨ ᠢᠷᠠᠭᠤ ᠰᠠᠶᠢᠬᠠᠨ ᠢᠶᠠᠷ ᠬᠦᠦᠷᠨᠢᠨ ᠦᠭᠦᠯᠡᠨᠡ᠃ ᠤᠷᠢᠶᠠᠩᠬᠠᠢ ᠪᠠᠷ ᠳᠠᠮᠵᠢᠨ ᠪᠠᠷᠠᠭᠤᠨ ᠮᠣᠩᠭᠣᠯ ᠳᠤ ᠨᠡᠪᠲᠡᠷᠡᠬᠦ ᠵᠣᠷᠢᠯᠭᠠ ᠲᠠᠢ ᠭᠠᠵᠠᠷᠴᠢ ᠬᠥᠯᠥᠰᠥᠯᠡᠨ ᠠᠶᠠᠨ ᠵᠠᠮ ᠳᠤ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠬᠠᠮᠢᠭᠠ ᠰᠠᠢ ᠦᠭᠡᠢ ᠤᠯᠠᠭᠠᠨᠲᠠᠨ ᠨᠤᠭᠤᠳ ᠡᠭᠦᠷᠯᠡᠭᠰᠡᠨ ᠲᠡᠳᠦᠢ ᠦᠭᠡᠢ ᠳᠡᠭᠡᠷᠡᠮᠴᠢᠨ ᠲᠤᠨᠤᠭᠠᠴᠢᠳ ᠭᠠᠵᠠᠷ ᠪᠦᠬᠦᠨ ᠳᠦ ᠬᠣᠯᠬᠢᠯᠳᠤᠵᠤ᠂ ᠬᠦᠮᠦᠨ ᠦ ᠠᠮᠢ ᠶᠢ ᠶᠠᠭᠤᠮᠠᠨ ᠴᠢᠨᠡᠭᠡ ᠲᠣᠭᠤᠬᠤ ᠪᠠᠨ ᠪᠠᠶᠢᠭᠰᠠᠨ ᠴᠦᠪ ᠦᠨ ᠴᠠᠭ ᠲᠤᠯᠠ ᠴᠢᠭᠯᠡᠯ ᠢᠶᠡᠨ ᠥᠭᠡᠷᠡᠴᠢᠯᠡᠨ ᠳᠠᠷᠬᠠᠳ ᠤᠨ ᠨᠢᠷᠤᠭᠤ ᠪᠠᠷ ᠳᠠᠮᠵᠢᠨ ᠬᠥᠪᠰᠥᠭᠥᠯ ᠦᠨ ᠬᠠᠳᠬᠠᠯ ᠢᠶᠠᠷ ᠣᠷᠣᠵᠤ ᠢᠷᠡᠵᠡᠢ᠃ ᠵᠠᠮ ᠳᠤ ᠪᠠᠨ ᠥᠪᠡᠷ ᠲᠡᠢ ᠨᠢ ᠠᠳᠠᠯᠢ ᠵᠢᠰᠦ ᠪᠤᠷᠤᠭᠤᠯᠠᠨ ᠳᠦᠷᠪᠡᠭᠰᠡᠨ ᠴᠠᠭᠠᠨ ᠠᠷᠮᠢ ᠶᠢᠨ ᠣᠹᠢᠼᠧᠷ ᠦᠳ ᠲᠡᠢ ᠭᠠᠨᠵᠤᠭᠠ ᠨᠡᠶᠢᠯᠡᠵᠦ ᠠᠮᠢ ᠳ᠋ᠦᠢᠭᠰᠡᠨ ᠣᠰᠣᠯ ᠲᠠᠢ ᠭᠠᠵᠠᠷ ᠤᠳ ᠢᠶᠠᠷ ᠬᠡᠷᠬᠢᠨ ᠶᠠᠭᠠᠬᠢᠵᠤ ᠮᠡᠨᠳᠦ ᠭᠠᠷᠤᠭᠰᠠᠨ ᠲᠤᠬᠠᠢ ᠪᠠᠨ ᠲᠣᠳᠣᠷᠬᠠᠢ ᠰᠠᠶᠢᠬᠠᠨ ᠳᠤᠷᠠᠳᠴᠠᠢ᠃
ᠬᠦᠷᠢᠶᠡ ᠤᠷᠤᠬᠤ ᠵᠠᠮ ᠠᠶᠤᠯ ᠲᠠᠢ ᠪᠣᠯᠤᠭᠰᠠᠨ ᠲᠤᠯᠠ ᠮᠥᠨ ᠯᠠ ᠵᠦᠭ ᠪᠤᠷᠤᠭᠤᠯᠠᠵᠤ ᠵᠠᠰᠠᠭᠲᠤ ᠬᠠᠨ ᠢᠶᠠᠷ ᠳᠠᠮᠵᠢᠨ ᠲᠦᠪᠡᠳ ᠢ ᠵᠦᠭᠯᠡᠭᠰᠡᠨ ᠪᠠᠶᠢᠨᠠ᠃ ᠬᠦᠨᠳᠦ ᠬᠡᠴᠡᠭᠦᠦ ᠵᠠᠮ ᠲᠤᠭᠤᠯᠤᠨ ᠭᠠᠨᠰᠤ ᠮᠤᠵᠢ ᠪᠠᠷ ᠳᠠᠮᠵᠢᠨ ᠬᠥᠬᠡᠨᠠᠭᠤᠷ ᠲᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠨᠤᠲᠤᠭ ᠤᠨ ᠲᠤᠨᠤᠭᠠᠴᠢᠨ ᠬᠤᠩᠬᠠᠤᠵᠠ ᠵᠠᠮ ᠢ ᠨᠢ ᠬᠠᠭᠠᠭᠰᠠᠨ ᠲᠤᠯᠠ ᠠᠮᠢ ᠥᠷᠢᠰᠦᠨ ᠲᠤᠯᠤᠯᠳᠤᠵᠤ ᠪᠤᠴᠠᠬᠤ ᠠᠴᠠ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠳᠠᠭ᠃ ᠪᠤᠴᠠᠵᠤ ᠢᠷᠡᠬᠦ ᠳᠦ ᠪᠡᠨ ᠡᠮᠦᠨᠡ ᠨᠢ ᠳᠠᠭᠠᠷᠢᠵᠤ ᠥᠩᠭᠡᠷᠡᠭᠰᠡᠨ ᠨᠠᠷᠠᠪᠠᠨᠴᠢᠨ ᠬᠡᠶᠢᠳ ᠦᠨ ᠳ᠋ᠢᠯᠤᠪᠠ ᠬᠤᠲᠤᠭᠲᠤ ᠵᠠᠮᠰᠦ᠋ᠷᠦᠩᠵᠠᠪ ᠲᠠᠢ ᠳᠠᠬᠢᠨ ᠠᠭᠤᠯᠵᠠᠵᠤ ᠂ ᠬᠤᠪᠢᠯᠭᠠᠨ ᠴᠢᠳᠠᠯ ᠢ ᠨᠢ ᠨᠢᠳᠦ ᠪᠡᠷ ᠦᠵᠡᠵᠦ ᠭᠠᠶᠢᠬᠠᠨ ᠪᠢᠰᠢᠷᠡᠭᠰᠡᠨ ᠲᠤᠬᠠᠢ ᠪᠠᠨ ᠦᠭᠦᠯᠡᠵᠡᠢ᠃ ᠬᠤᠲᠤᠭᠲᠤ ᠲᠡᠭᠦᠨ ᠳᠦ ᠭᠡᠷ ᠪᠦᠯᠢ ᠶᠢᠨ ᠬᠢᠨᠢ ᠬᠡᠷᠬᠢᠨ ᠠᠮᠢᠳᠤᠷᠠᠵᠤ ᠪᠤᠢ ᠶᠢ ᠬᠣᠭᠣᠰᠣᠨ ᠠᠴᠠ ᠳᠦᠷᠰᠦ ᠡᠭᠦᠰᠬᠡᠨ ᠦᠵᠡᠭᠦᠯᠦᠭᠰᠡᠨ ᠢ ᠬᠠᠮᠲᠤ ᠶᠠᠪᠤᠭᠰᠠᠨ ᠨᠥᠬᠥᠳ ᠨᠢ ᠦᠵᠡᠵᠦ ᠪᠦᠭᠦᠳᠡ ︽ᠮᠡᠯ ᠭᠠᠶᠢᠬᠠᠨ ᠴᠡᠯ ᠬᠦᠭᠡᠷᠡᠵᠡᠢ︾ ᠃ ᠤᠯᠠᠭᠠᠨᠲᠠᠨ᠂ ᠴᠠᠭᠠᠨᠲᠠᠨ᠂ ᠬᠢᠲᠠᠳ᠂ ᠬᠤᠩᠬᠠᠤᠵᠠ ᠭᠡᠳ ᠵᠢᠰᠦᠨ ᠵᠦᠢᠯ ᠦᠨ ᠠᠮᠢᠲᠠᠳ ᠨᠠᠰᠢ ᠴᠠᠰᠢ ᠬᠣᠯᠬᠢᠯᠳᠤᠨ ᠪᠡᠶᠡ ᠪᠡᠶᠡ ᠪᠡᠨ ᠠᠯᠠᠵᠤ ᠲᠠᠯᠠᠵᠤ ᠪᠠᠶᠢᠭᠰᠠᠨ ᠬᠦᠨᠳᠦ ᠬᠡᠴᠡᠭᠦᠦ ᠴᠠᠭ ᠲᠤ ᠲᠥᠷᠥᠯᠬᠢ ᠶᠢᠨ ᠤᠬᠠᠭᠠᠨ ᠰᠡᠷᠭᠦᠯᠡᠩ᠂ ᠤᠪᠵᠢᠨ ᠵᠠᠯᠢ ᠲᠠᠢ ᠣᠰᠰᠧᠨᠳᠣᠪᠰᠺᠢ ᠶᠠᠭᠠᠭᠢᠵᠤ ᠡᠶᠢᠭᠡᠳ ᠯᠠ ᠠᠷᠭᠠ ᠡᠪ ᠢ ᠨᠢ ᠣᠯᠵᠤ ᠵᠠᠭᠤᠴᠢ ᠶᠢᠨ ᠡᠭᠦᠷᠭᠡ ᠭᠦᠢᠴᠡᠳᠭᠡᠨ ᠲᠤᠬᠠᠢ ᠶᠢᠨ ᠴᠠᠭ ᠦᠶᠡ ᠶᠢᠨ ᠨᠡᠷᠡ ᠠᠯᠳᠠᠷ ᠲᠠᠢ ᠬᠦᠮᠦᠰ ᠲᠡᠢ ᠪᠡᠶᠡᠴᠢᠯᠡᠨ ᠠᠭᠤᠯᠵᠠᠵᠤ ᠂ ᠠᠮᠢ ᠨᠠᠰᠤ ᠨᠢ ᠬᠢᠲᠤᠭᠠᠨ ᠤ ᠢᠷ᠂ ᠳᠡᠭᠡᠰᠦᠨ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠠᠶᠢᠪᠠᠴᠤ ᠵᠣᠷᠢᠭ ᠰᠢᠨᠲᠠᠷᠠᠵᠤ ᠤᠬᠤᠷᠢᠬᠤ ᠵᠠᠮ ᠲᠡᠭᠦᠨ ᠳᠦ ᠪᠠᠶᠢᠭᠰᠠᠨ ᠦᠭᠡᠢ᠃ ᠤᠯᠢᠶᠠᠰᠤᠲᠠᠢ ᠳᠤ ᠬᠡᠰᠡᠭ ᠵᠠᠭᠤᠷᠠ ᠴᠠᠭ ᠤᠨ ᠪᠠᠶᠢᠳᠠᠯ ᠢ ᠠᠵᠢᠨ ᠰᠠᠭᠤᠬᠤ ᠵᠠᠭᠤᠷᠠ ᠬᠣᠪᠳᠣ ᠳᠤ ᠴᠢᠬᠤᠯᠠ ᠵᠠᠷᠤᠯᠭᠠ ᠪᠠᠷ ᠶᠠᠪᠤᠬᠤ ᠳᠤ ᠪᠠᠨ ᠠᠯᠳᠠᠷᠲᠤ ᠲᠦᠰᠢᠶᠡ ᠭᠦᠩ ᠯᠠᠮᠠ ᠳᠠᠮᠪᠢᠵᠠ ᠲᠠᠢ ᠠᠭᠤᠯᠵᠠᠭᠰᠠᠨ ᠲᠤᠬᠠᠢ ᠮᠠᠰᠢ ᠰᠣᠨᠢᠷᠬᠠᠯᠲᠠᠢ ᠦᠭᠦᠯᠡᠵᠦ᠂ ᠲᠡᠭᠦᠨ ᠢ ᠮᠣᠩᠭᠣᠯ ᠤᠨ ᠲᠤᠰᠠᠭᠠᠷ ᠲᠤᠭᠲᠠᠨᠢᠯ ᠡᠷᠬᠡ ᠴᠢᠯᠦᠭᠡᠨ ᠦ ᠲᠥᠯᠥᠭᠡ ᠲᠡᠮᠡᠴᠡᠭᠴᠢ ᠬᠡᠮᠡᠨ ᠳ᠋ᠦᠩᠨᠡᠭᠰᠡᠨ ᠪᠠᠶᠢᠨᠠ᠃
ᠳ᠋ᠢᠯᠤᠪᠠ ᠬᠤᠲᠤᠭᠲᠤ ᠶᠢᠨ ᠢᠪᠡᠭᠡᠯ ᠢᠶᠡᠷ ᠬᠦᠷᠢᠶᠡᠨ ᠦ ᠵᠦᠭ ᠶᠠᠪᠤᠬᠤ ᠳᠤ ᠪᠠᠨ ᠪᠠᠰᠠ ᠯᠠ ᠠᠳᠠᠯ ᠰᠣᠨᠢᠨ ᠶᠠᠪᠤᠳᠠᠯ ᠤᠳ ᠢᠶᠠᠷ ᠳᠦᠭᠦᠷᠡᠩ ᠠᠶᠠᠨ ᠵᠠᠮ ᠢ ᠲᠤᠭᠤᠯᠤᠭᠰᠠᠨ ᠪᠠᠶᠢᠨᠠ᠃ ᠵᠠᠶᠠ ᠶᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠢᠷᠡᠵᠦ ᠴᠡᠯ ᠵᠠᠯᠠᠭᠤᠬᠠᠨ ᠣᠷᠣᠰ ᠴᠡᠷᠢᠭ ᠦᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠵᠠᠶᠠ ᠭᠡᠭᠡᠨ ᠲᠡᠢ ᠤᠴᠠᠷᠠᠵᠤ ᠂ ᠡᠷᠳᠡᠨᠢᠵᠤᠤ ᠬᠡᠶᠢᠳ ᠦᠨ ᠡᠷᠭᠢᠨ ᠲᠣᠭᠣᠷᠢᠨ ᠢᠶᠠᠷ ᠠᠶᠠᠯᠠᠬᠤ ᠳᠤ ᠪᠠᠨ ᠣᠯᠠᠨ ᠲᠡᠦᠬᠡ ᠳᠣᠮᠣᠭ ᠰᠣᠨᠣᠰᠴᠤ ᠬᠠᠮᠲᠤ ᠳᠤ ᠪᠠᠨ ᠠᠩ ᠭᠦᠷᠦᠭᠡ ᠬᠢᠭᠰᠡᠨ ᠲᠤᠬᠠᠢ ᠪᠢᠴᠢᠵᠡᠢ᠃ ᠸᠠᠩ ᠤᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠢᠷᠡᠭᠡᠳ ︽ᠳᠠᠶᠢᠨ ᠤ ᠲᠩᠷᠢ︾ ᠂ ︽ᠴᠢᠰᠤᠲᠤ ᠭᠧᠨᠧᠷᠠᠯ︾ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠪᠠᠷᠤᠨ ᠤᠩᠭ᠍ᠸᠷᠡᠨ ᠲᠠᠢ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠭᠰᠠᠨ ᠲᠡᠳᠦᠢ ᠦᠭᠡᠢ ᠲᠡᠭᠦᠨ ᠦ ᠢᠲᠡᠭᠡᠯ ᠢ ᠣᠯᠤᠭᠰᠠᠨ ᠲᠤᠯᠠ ᠬᠦᠷᠢᠶᠡᠨ ᠡᠴᠡ ᠭᠠᠷᠬᠤ ᠬᠦᠷᠲᠡᠯᠡ ᠬᠠᠮᠲᠤ ᠪᠠᠶᠢᠬᠤ ᠶᠢ ᠪᠠᠷᠤᠨ ᠭᠤᠶᠤᠵᠤ ᠥᠪᠡᠷ ᠢ ᠨᠢ ᠮᠠᠨᠵᠤᠤᠷ ᠤᠷᠤᠭᠤ ᠡᠰᠡᠨ ᠮᠡᠨᠳᠦ ᠬᠦᠷᠭᠡᠵᠦ ᠥᠭᠬᠦ ᠪᠡᠨ ᠠᠮᠠᠯᠠᠵᠠᠢ᠃ ᠳᠣᠮᠣᠭᠲᠤ ᠪᠠᠷᠤᠨ ᠲᠡᠭᠦᠨ ᠳᠦ ᠭᠧᠷᠮᠠᠨ ᠾᠦᠩᠨᠤ ᠮᠠᠵᠠᠷ ᠴᠢᠰᠤ ᠬᠣᠯᠢᠯᠳᠤᠭᠰᠠᠨ ᠳᠠᠶᠢᠴᠢᠨ ᠤᠳᠤᠮ ᠲᠠᠢ ᠡᠪᠦᠭᠡ ᠳᠡᠭᠡᠳᠦᠰ ᠦᠨ ᠢᠶᠡᠨ ᠲᠡᠦᠬᠡ ᠶᠢ ᠬᠦᠦᠷᠨᠢᠵᠦ᠂ ᠥᠪᠡᠷ ᠢ ᠪᠡᠨ ᠪᠤᠳ᠋ᠳ᠋ᠾᠠ ᠶᠢᠨ ᠱᠠᠰᠢᠨ ᠢ ᠬᠠᠮᠠᠭᠠᠯᠠᠭᠴᠢ ᠳᠠᠶᠢᠨ ᠤ ᠰᠠᠬᠢᠭᠤᠰᠤ ᠭᠡᠳᠡᠭ ᠢᠶᠡᠨ ᠣᠶᠢᠯᠠᠭᠠᠭᠤᠯᠵᠠᠢ᠃ ᠲᠡᠷᠡ ᠪᠡᠷ ᠪᠠᠷᠤᠨ ᠢ ᠶᠠᠮᠠᠷ ᠴᠤ ᠲᠠᠭᠠᠭᠳᠠᠰᠢ ᠦᠭᠡᠢ ᠦᠢᠯᠡ ᠶᠢ ᠰᠡᠳᠦᠬᠦ ᠴᠢᠳᠠᠪᠤᠷᠢ ᠪᠦᠬᠦᠢ ᠲᠤᠩ ᠠᠶᠤᠯᠲᠠᠢ ᠬᠦᠮᠦᠨ ᠭᠡᠵᠦ ᠳ᠋ᠦᠩᠨᠡᠭᠰᠡᠨ ᠪᠠᠶᠢᠨᠠ᠃ ᠦᠷᠭᠦᠭᠡᠨ ᠦ ᠲᠥᠯᠭᠡᠴᠢ ᠡᠪᠦᠭᠡᠨ ᠲᠡᠭᠦᠨ ᠦ ᠢᠷᠡᠭᠡᠳᠦᠢ ᠶᠢᠨ ᠬᠤᠪᠢ ᠵᠠᠶᠠᠭᠠ ᠶᠢ ᠮᠡᠷᠭᠡᠯᠡᠵᠦ ᠥᠭᠭᠦᠭᠰᠡᠨ ᠲᠡᠳᠦᠢ ᠦᠭᠡᠢ ᠡᠷᠯᠢᠭ ᠦᠨ ᠡᠯᠴᠢ ᠲᠡᠢ ᠬᠢᠯᠭᠠᠰᠤᠨ ᠤ ᠴᠢᠨᠡᠭᠡ ᠵᠠᠢ ᠪᠠᠷ ᠵᠥᠷᠢᠬᠦ ᠲᠤᠬᠠᠢ᠂ ᠡᠮᠡᠭᠡᠯ ᠦᠨ ᠲᠣᠯᠣᠭᠠᠢ ᠲᠠᠢ ᠬᠦᠮᠦᠨ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠶᠠᠪᠤᠬᠤ ᠶᠢ ᠠᠩᠬᠠᠷᠤᠭᠤᠯᠤᠨ ᠬᠡᠯᠡᠭᠰᠡᠨ ᠨᠢ ᠶᠠᠭ ᠲᠠᠭ ᠪᠡᠶᠡᠯᠡᠭᠰᠡᠨ ᠢ ᠭᠠᠶᠢᠬᠠᠭᠠᠳ ᠪᠠᠷᠠᠰᠢ ᠦᠭᠡᠢ ᠠᠵᠡᠢ᠃ ᠬᠦᠷᠢᠶᠡᠨ ᠳᠦ ᠢᠷᠡᠭᠰᠡᠨ ᠬᠣᠶᠢᠨᠠ ᠨᠢ ᠲᠡᠭᠦᠨ ᠢ ᠪᠠᠷᠤᠨ ᠤ ᠴᠡᠷᠢᠭ ᠦᠨ ᠺᠣᠮᠧᠨᠳᠠᠲ ᠬᠠᠷᠭᠢᠰ ᠬᠡᠷᠴᠡᠭᠡᠢ ᠪᠡᠷ ᠢᠶᠡᠨ ᠠᠯᠳᠠᠷᠰᠢᠭᠰᠠᠨ ᠬᠤᠷᠠᠨᠳᠠ ᠰᠸᠫᠠᠶᠢᠯᠤᠪ ᠪᠠᠶᠢᠩᠭᠤ ᠮᠥᠷᠳᠡᠵᠦ ᠠᠮᠢ ᠨᠠᠰᠤᠨ ᠳᠤ ᠨᠢ ᠵᠠᠨᠤᠯᠬᠢᠯᠡᠵᠦ ᠪᠠᠶᠢᠭᠰᠠᠨ ᠨᠢ ᠲᠥᠯᠭᠡᠴᠢ ᠡᠪᠦᠭᠡᠨ ᠦ ᠤᠷᠢᠳᠴᠢᠯᠠᠨ ᠬᠡᠯᠡᠭᠰᠡᠨ ︽ ᠡᠮᠡᠭᠡᠯ ᠦᠨ ᠲᠤᠯᠤᠭᠠᠶᠢᠲᠤ︾ ᠭᠡᠭᠴᠢ ᠨᠢ ᠮᠥᠨ ᠪᠣᠯᠬᠤ ᠶᠢ ᠮᠡᠳᠡᠭᠡᠳ ᠮᠠᠰᠢᠳᠠ ᠪᠣᠯᠭᠣᠮᠵᠢᠲᠠᠢ ᠪᠠᠶᠢᠭᠰᠠᠨ ᠤ ᠬᠦᠴᠦᠨ ᠳᠦ ᠠᠮᠢᠳᠤ ᠮᠡᠨᠳᠦ ᠮᠤᠯᠲᠤᠷᠠᠨᠠ᠃
ᠣᠰᠰᠧᠨᠳᠣᠪᠰᠺᠢ ᠬᠦᠷᠢᠶᠡᠨ ᠳᠦ ᠪᠠᠶᠢᠬᠤ ᠳᠤ ᠪᠠᠨ ᠪᠠᠷᠤᠨ ᠤᠩᠭᠧᠷᠠᠨ ᠤ ᠬᠠᠮᠲᠤ ︽ᠠᠮᠢᠳᠤ ᠪᠤᠷᠬᠠᠨ︾ ᠬᠡᠮᠡᠨ ᠬᠦᠨᠳᠦᠯᠡᠭᠳᠡᠭᠰᠡᠨ ᠪᠣᠭᠳᠠ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠬᠠᠵᠤ ᠳᠠᠷᠠᠭᠠ ᠨᠢ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠠᠭᠤᠯᠵᠠᠵᠤ ᠠᠶᠢᠯᠠᠳᠪᠤᠷᠢ ᠯᠦᠩᠳᠦᠩ ᠢ ᠨᠢ ᠰᠣᠨᠣᠰᠤᠭᠰᠠᠨ ᠲᠤᠬᠠᠢ ᠮᠠᠰᠢ ᠰᠣᠨᠢᠷᠬᠠᠯᠲᠠᠢ ᠳᠡᠯᠭᠡᠷᠡᠩᠭᠦᠢ ᠪᠢᠴᠢᠵᠡᠢ᠃ ᠮᠣᠩᠭᠣᠯ ᠣᠷᠣᠨ ᠤ ᠬᠦᠮᠦᠨ ᠠᠷᠠᠳ ᠤᠨ ᠠᠵᠤ ᠲᠥᠷᠥᠯ᠂ ᠵᠠᠩ ᠵᠠᠩᠰᠢᠯ ᠢ ᠨᠠᠷᠢᠨ ᠭᠢᠷᠬᠠᠢ ᠠᠵᠢᠭᠯᠠᠵᠤ᠂ ᠵᠠᠮ ᠭᠤᠳᠤᠰ ᠲᠠᠭᠠᠷᠠᠭᠰᠠᠨ ᠰᠣᠨᠢᠨ ᠬᠡᠯᠪᠡᠷᠢ ᠬᠢᠴᠡᠲᠡᠢ ᠠᠭᠤᠯᠠ ᠨᠢᠷᠤᠭᠤ᠂ ᠬᠠᠳᠠ ᠠᠰᠬᠠ᠂ ᠠᠰᠢᠭᠲᠤ ᠮᠠᠯᠲᠠᠮᠠᠯ᠂ ᠡᠪᠡᠰᠦ ᠤᠷᠭᠤᠮᠠᠯ᠂ ᠵᠡᠷᠯᠢᠭ ᠠᠮᠢᠲᠠᠳ ᠲᠡᠳᠡᠭᠡᠷ ᠦᠨ ᠵᠠᠩ ᠲᠥᠷᠬᠥ ᠶᠢᠨ ᠲᠠᠯᠠ ᠪᠠᠷ ᠰᠣᠨᠢᠨ ᠰᠠᠶᠢᠬᠠᠨ ᠰᠠᠨᠠᠭᠳᠠᠭᠰᠠᠨ ᠵᠦᠢᠯᠡᠰ ᠢᠶᠡᠨ ᠤᠷᠠᠨ ᠴᠢᠳᠠᠪᠤᠷᠢᠯᠢᠭ ᠢᠶᠠᠷ ᠳᠦᠷᠰᠦᠯᠡᠨ ᠦᠵᠡᠭᠦᠯᠦᠭᠰᠡᠨ ᠨᠢ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠰᠣᠨᠢᠷᠬᠠᠯ ᠲᠠᠲᠠᠨᠠ᠃ ᠰᠣᠨᠢᠭᠤᠴᠢ ᠵᠠᠩ ᠲᠠᠢ ᠠᠴᠠ ᠭᠠᠳᠠᠨᠠ ᠠᠵᠢᠭᠴᠢ ᠭᠢᠷᠠᠬᠠᠢ᠂ ᠣᠯᠠᠨ ᠲᠠᠯᠠ ᠶᠢᠨ ᠥᠷᠭᠡᠨ ᠮᠡᠳᠡᠯᠭᠡ ᠲᠡᠢ᠂ ᠬᠠᠷᠠᠭᠰᠠᠨ ᠦᠵᠡᠭᠰᠡᠨ ᠵᠦᠢᠯ ᠢᠶᠡᠨ ᠣᠢ ᠳᠤᠢ ᠳᠤ ᠪᠠᠨ ᠰᠠᠶᠢᠲᠤᠷ ᠲᠣᠭᠲᠠᠭᠠᠵᠤ ᠲᠡᠭᠦᠨ ᠢ ᠪᠡᠨ ᠦᠭᠡ ᠪᠡᠷ ᠢᠯᠡᠷᠬᠡᠶᠢᠯᠡᠨ ᠭᠠᠷᠭᠠᠬᠤ ᠳᠤ ᠪᠠᠨ ᠨᠡᠩ ᠤᠷᠠᠨ ᠴᠢᠳᠠᠪᠤᠷᠢᠯᠢᠭ ᠪᠠᠶᠢᠭᠠ ᠨᠢ ᠰᠠᠶᠢᠨ ᠵᠣᠬᠢᠶᠠᠯᠴᠢ ᠶᠤᠮ ᠭᠡᠬᠦ ᠪᠣᠳᠣᠯ ᠲᠥᠷᠦᠭᠦᠯᠦᠨᠡ᠃
ᠬᠠᠮᠤᠭ ᠤᠨ ᠰᠡᠭᠦᠯ ᠦᠨ ᠰᠤᠳᠤᠯᠭᠠ ᠪᠠᠷ ᠳᠡᠯᠡᠬᠡᠢ ᠶᠢᠨ 40 ᠣᠷᠴᠢᠮ ᠬᠡᠯᠡ ᠪᠡᠷ ᠣᠷᠴᠢᠭᠤᠯᠤᠭᠳᠠᠵᠤ ᠂ 185 ᠤᠳᠠᠭᠠ ᠬᠡᠪᠯᠡᠭᠳᠡᠭᠰᠡᠨ ᠭᠡᠰᠡᠨ ᠲᠣᠶᠢᠮᠣ ᠪᠠᠶᠢᠬᠤ ᠪᠠ ᠮᠠᠨ ᠤ ᠳᠤ ᠪᠠᠰᠠ ᠯᠠ ᠴᠢᠮᠠᠭᠦᠢ ᠣᠯᠠᠨ ᠤᠳᠠᠭᠠ ᠳᠠᠬᠢᠨ ᠬᠡᠪᠯᠡᠭᠳᠡᠵᠦ ᠪᠠᠶᠢᠨᠠ᠃ ᠡᠨᠡ ᠨᠤᠮ ᠳᠤ ᠳᠤᠷᠠᠳᠤᠭᠳᠠᠭᠰᠠᠨ ᠣᠯᠠᠨ ᠪᠤᠱᠤᠭᠤ᠂ ᠵᠥᠩᠨᠡᠯ᠂ ᠯᠦᠩᠳᠦᠩ ᠬᠣᠵᠢᠮ ᠨᠢ ᠪᠠᠲᠤᠯᠠᠭᠳᠠᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠪᠠᠷ ᠲᠡᠷᠡ ᠦᠶᠡ ᠶᠢᠨ ᠭᠡᠭᠡᠭᠡᠨᠲᠡᠨ ᠂ ᠬᠤᠲᠤᠭᠲᠤ ᠬᠤᠪᠢᠯᠭᠠᠳ ᠦᠨᠡᠬᠡᠷ ᠭᠠᠷᠮᠠᠭᠠᠢ ᠭᠣᠴᠣ ᠬᠦᠮᠦᠰ ᠪᠠᠶᠢᠭᠰᠠᠨ ᠨᠢ ᠮᠡᠳᠡᠷᠡᠭᠳᠡᠨᠡ᠃ ᠲᠤᠬᠠᠶᠢᠯᠠᠪᠠᠯ ᠪᠠᠷᠤᠨ ᠤᠩᠭᠧᠷᠠᠨ ᠳᠤ 130 ᠬᠣᠨᠣᠭ ᠤᠨ ᠨᠠᠰᠤ ᠦᠯᠡᠳᠡᠭᠰᠡᠨ ᠲᠤᠬᠠᠢ ᠲᠦᠯᠭᠡ ᠪᠡᠶᠡᠯᠡᠭᠰᠡᠨ ᠡᠴᠡ ᠡᠬᠢᠯᠡᠭᠡᠳ ᠵᠥᠪᠯᠡᠯᠲᠦ ᠵᠠᠰᠠᠭ ᠨᠤᠷᠠᠬᠤ ᠬᠦᠷᠲᠡᠯᠡᠬᠢ ᠣᠯᠠᠨ ᠠᠶᠢᠯᠠᠳᠪᠤᠷᠢ ᠨᠤᠭᠤᠳ ᠦᠨᠡᠨ ᠪᠣᠳᠠᠲᠠᠢ ᠪᠠᠶᠢᠭᠰᠠᠨ ᠢ ᠮᠡᠳᠡᠵᠦ ᠪᠣᠯᠤᠨᠠ᠃ ᠮᠥᠨ ᠳ᠋ᠢᠯᠤᠪᠠ ᠬᠤᠲᠤᠭᠲᠤ ᠂ ᠪᠣᠭᠳᠠ ᠬᠠᠭᠠᠨ ᠨᠠᠷ ᠠᠴᠠ ᠱᠠᠮᠪᠠᠯ ᠤᠨ ᠲᠤᠬᠠᠢ ᠦᠭᠦᠯᠡᠭᠰᠡᠨ ᠠᠶᠢᠯᠠᠳᠪᠤᠷᠢ ᠨᠤᠭᠤᠳ ᠢ ᠲᠡᠮᠳᠡᠭᠯᠡᠨ ᠦᠯᠡᠳᠡᠭᠡᠭᠰᠡᠨ ᠪᠠᠶᠢᠨᠠ᠃ ᠡᠨᠡ ᠨᠣᠮ ᠠᠴᠠ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠬᠤᠷᠢᠭᠠᠳ ᠣᠨ ᠤ ᠦᠶᠡ ᠳᠦ ᠮᠣᠩᠭᠣᠯ ᠣᠷᠣᠨ ᠳᠤ ᠶᠠᠮᠠᠷ ᠰᠣᠨᠢᠨ ᠠᠳᠠᠯ ᠶᠠᠪᠤᠳᠠᠯ ᠥᠷᠨᠢᠵᠦ ᠪᠠᠶᠢᠭᠰᠠᠨ ᠢ ᠲᠡᠭᠦᠨ ᠢ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠭᠡᠷᠡᠴᠢ ᠶᠢᠨ ᠪᠢᠴᠢᠭᠰᠡᠨ ᠡᠴᠡ ᠠᠮᠲᠠᠷᠬᠠᠨ ᠤᠩᠰᠢᠵᠤ᠂ ᠵᠣᠬᠢᠶᠠᠭᠴᠢ ᠶᠢᠨ ᠤᠷᠠᠨ ᠴᠢᠳᠠᠪᠤᠷᠢ᠂ ᠣᠷᠴᠢᠭᠤᠯᠤᠭᠴᠢ ᠶᠢᠨ ᠴᠢᠳᠠᠯ ᠴᠢᠨᠰᠠᠭᠠ ᠶᠢ ᠪᠠᠬᠠᠳᠤᠨ ᠪᠢᠰᠢᠷᠡᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠃ ᠭᠠᠳᠠᠭᠠᠳᠤ ᠶᠢᠷᠲᠢᠨᠴᠦ ᠡᠴᠡ ᠲᠠᠰᠤᠯᠤᠭᠳᠠᠨ ᠰᠤᠷᠠᠭ ᠴᠢᠮᠡᠭᠡ ᠨᠢ ᠲᠠᠰᠤᠷᠠᠭᠰᠠᠨ ᠴᠢᠩᠭᠢᠰ ᠦᠨ ᠮᠣᠩᠭᠣᠯ ᠢ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ ᠰᠣᠨᠣᠷ ᠲᠤ ᠳᠠᠬᠢᠨ ᠬᠦᠷᠭᠡᠵᠦ ᠠᠩᠬᠠᠷᠤᠯ ᠢ ᠨᠢ ᠲᠠᠲᠠᠵᠤ ᠴᠢᠳᠠᠭᠰᠠᠨ ᠠᠪᠢᠶᠠᠰᠯᠢᠭ ᠵᠣᠬᠢᠶᠠᠯᠴᠢ ᠶᠢᠨ ᠪᠠᠷᠢᠮᠲᠠᠲᠤ ᠤᠷᠠᠨ ᠰᠠᠶᠢᠬᠠᠨ ᠤ ᠡᠯᠡ ᠪᠦᠲᠦᠭᠡᠯ ᠨᠢ ᠰᠣᠨᠢᠨ ᠰᠣᠳᠣᠨ᠂ ᠰᠠᠨᠠᠭᠠᠨ ᠳᠤ ᠤᠷᠤᠮᠠ ᠦᠭᠡᠢ ᠬᠠᠴᠢᠨ ᠵᠢᠭᠲᠡᠢ ᠦᠢᠯᠡ ᠶᠠᠪᠤᠳᠠᠯ ᠤᠳ ᠢᠶᠠᠷ ᠢᠶᠠᠨ ᠶᠠᠮᠠᠷ ᠴᠤ ᠠᠳᠠᠯ ᠶᠠᠪᠤᠳᠠᠯᠲᠤ ᠵᠣᠬᠢᠶᠠᠯ ᠠᠴᠠ ᠳᠤᠲᠠᠬᠤ ᠦᠭᠡᠢ ᠲᠡᠳᠦᠢ ᠦᠭᠡᠢ ᠦᠢᠯᠡ ᠶᠠᠪᠤᠳᠠᠯ ᠤᠨ ᠬᠢᠨᠢ ᠭᠣᠣᠯ ᠪᠠᠭᠠᠲᠤᠷ ᠠᠮᠢᠳᠤ ᠭᠡᠷᠡᠴᠢ ᠨᠢ ᠵᠣᠬᠢᠶᠠᠯᠴᠢ ᠥᠪᠡᠷ ᠢᠶᠡᠨ ᠪᠠᠶᠢᠭᠰᠠᠨ ᠨᠢ ᠣᠯᠠᠨ ᠲᠦᠮᠡᠨ ᠦ ᠰᠣᠨᠢᠷᠬᠠᠯ ᠱᠣᠬᠣᠭᠣᠷᠬᠠᠯ ᠢ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠲᠠᠲᠠᠵᠤ ᠳᠡᠯᠡᠬᠡᠢ ᠳᠦ ᠠᠯᠳᠠᠷ ᠲᠠᠢ ᠪᠣᠯᠵᠠᠢ ᠭᠡᠵᠦ ᠪᠣᠳᠣᠨᠠ ᠃ ᠬᠡᠳᠦᠢ ᠪᠡᠷ ᠤᠷᠠᠨ ᠰᠠᠶᠢᠬᠠᠨ ᠤ ᠪᠣᠯᠪᠠᠰᠤᠷᠠᠭᠤᠯᠤᠯᠲᠠ ᠬᠢᠵᠦ ᠬᠠᠴᠢᠷ ᠨᠡᠮᠡᠭᠰᠡᠨ ᠴᠤ ᠭᠡᠯᠡ ᠲᠤᠬᠠᠢ ᠶᠢᠨ ᠴᠠᠭ ᠦᠶᠡ ᠶᠢᠨ ᠲᠡᠦᠬᠡ᠂ ᠨᠥᠬᠥᠴᠡᠯ ᠪᠠᠶᠢᠳᠠᠯ ᠢ ᠣᠶᠢᠯᠠᠭᠠᠵᠤ ᠤᠬᠠᠭᠠᠷᠠᠬᠤ ᠳᠤ ᠡᠨᠡ ᠨᠣᠮ ᠶᠡᠬᠡᠳᠡ ᠲᠤᠰᠠᠲᠠᠢ ᠭᠡᠵᠦ ᠪᠣᠳᠣᠯᠠ᠃
