ᠮᠣᠩᠭᠣᠯ ᠤᠨ ᠬᠠᠮᠤᠭ ᠤᠨ ᠣᠯᠠᠨ ᠪᠤᠶᠤ ᠨᠢᠭᠡ ᠰᠠᠶᠠ ᠭᠠᠷᠤᠢ ᠦᠢᠯᠡᠴᠢᠯᠡᠭᠦᠯᠦᠭᠴᠢ ᠲᠡᠢ ᠬᠠᠭᠠᠨ ᠪᠠᠩᠬᠢᠨ ᠠᠴᠠ ᠲᠠᠲᠠᠭᠠᠯᠵᠠᠬᠤ ᠳᠠᠪᠠᠯᠭᠠ ᠶᠢ ᠢᠷᠭᠡᠳ ᠴᠠᠬᠢᠮ ᠰᠦᠯᠵᠢᠶᠡᠨ ᠳᠦ ᠪᠡᠨ ᠡᠬᠢᠯᠡᠭᠦᠯᠵᠡᠢ᠃ ᠰᠢᠯᠲᠠᠭᠠᠨ ᠨᠢ ᠦᠢᠯᠡᠴᠢᠯᠡᠭᠦᠯᠦᠭᠴᠢ ᠶᠢᠨ ᠳᠠᠩᠰᠠᠨ ᠠᠴᠠ ᠤᠴᠢᠷ ᠪᠢᠲᠡᠭᠦᠯᠢᠭ ᠢᠶᠡᠷ 200 ᠲᠥᠭᠥᠷᠢᠭ ᠦᠨ ᠰᠢᠮᠡᠳᠭᠡᠯ ᠰᠠᠭᠤᠳᠬᠠᠨ ᠠᠪᠤᠭᠰᠠᠨ ᠪᠥᠭᠡᠳ ᠢᠷᠭᠡᠳ ᠡᠭᠦᠨ ᠢ ︽ᠪᠣᠯᠪᠠᠰᠤᠨ ᠳᠡᠭᠡᠷᠡᠮ︾ ᠭᠡᠵᠦ ᠦᠵᠡᠵᠦ ᠪᠠᠶᠢᠭᠠ ᠠᠵᠠᠢ᠃
《ᠡᠨᠡ ᠪᠣᠯ ᠴᠢᠮᠡᠭᠡ ᠦᠭᠡᠢ ᠯᠤᠶᠢᠪᠠᠷ᠃ ᠭᠦᠢᠯᠭᠡᠭᠡ ᠬᠢᠬᠦ ᠪᠦᠷᠢ ᠳᠦ ᠰᠢᠮᠡᠳᠭᠡᠯ ᠠᠪᠴᠤ ᠪᠠᠶᠢᠵᠤ᠂ ᠰᠠᠷᠠ ᠶᠢᠨ ᠡᠴᠦᠰ ᠲᠦ 200 ᠲᠥᠭᠥᠷᠢᠭ ᠰᠢᠭᠤᠳ ᠠᠪᠳᠠᠭ ᠨᠢ ᠠᠶᠤᠮᠰᠢᠭᠲᠠᠢ᠃ ᠬᠠᠮᠤᠭ ᠤᠨ ᠭᠣᠣᠯ ᠨᠢ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠠᠪᠤᠭᠰᠠᠨ ᠨᠢ ᠳᠡᠭᠡᠷᠡᠮ ᠬᠤᠯᠠᠭᠠᠢ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ᠃ ᠰᠥᠨᠢ ᠶᠢᠨ ᠳᠣᠲᠣᠷᠠ ᠨᠢᠭᠡ ᠬᠦᠮᠦᠨ ᠡᠴᠡ 200 ᠲᠥᠭᠥᠷᠢᠭ ᠰᠠᠭᠤᠳᠬᠠᠭᠰᠠᠨ ᠭᠡᠵᠦ ᠲᠣᠭᠠᠴᠠᠪᠠᠯ ᠨᠢᠭᠡ ᠰᠠᠶᠠ ᠢᠷᠭᠡᠨ ᠡᠴᠡ 200 ᠰᠠᠶᠠ ᠲᠥᠭᠥᠷᠢᠭ ᠠᠪᠤᠭᠰᠠᠨ ᠭᠡᠰᠡᠨ ᠦᠭᠡ᠃ ᠬᠡᠷᠪᠡ 200 ᠲᠥᠭᠥᠷᠢᠭ ᠦᠨ ᠬᠠᠨᠳᠢᠪ ᠤᠨ ᠠᠶᠠᠨ ᠤᠯᠤᠰ ᠣᠷᠣᠨ ᠳᠠᠶᠠᠭᠠᠷ ᠬᠡᠷᠡᠭᠵᠢᠭᠦᠯᠵᠦ 40 ᠠᠶᠢᠯ ᠢ ᠲᠠᠪᠢᠯᠭᠠ ᠲᠠᠢ ᠪᠣᠯᠭᠠᠭᠰᠠᠨ ᠪᠣᠯ ᠪᠢᠳᠡ ᠪᠤᠬᠢᠨᠢᠳᠤᠬᠤ ᠦᠭᠡᠢ ᠪᠠᠶᠢᠬᠤ ᠪᠠᠶᠢᠯᠠ᠃ ᠬᠠᠭᠠᠨ ᠪᠠᠩᠬᠢ ᠪᠠᠶᠠᠷᠲᠠᠢ 》 ᠭᠡᠬᠦ ᠰᠢᠭᠦᠮᠵᠢᠯᠡᠯ ᠥᠩᠭᠡᠷᠡᠭᠰᠡᠨ ᠪᠠᠰᠠᠩ ᠭᠠᠷᠠᠭ︵2018.11.30︶ ᠠᠴᠠ ᠨᠡᠶᠢᠭᠡᠮ ᠤᠨ ᠰᠦᠯᠵᠢᠶᠡᠨ ᠳᠦ ᠡᠷᠴᠢ ᠠᠪᠤᠭᠠᠳ ᠪᠤᠢ ᠶᠤᠮ᠃
ᠡᠨᠡ ᠲᠠᠯᠠ ᠪᠠᠷ ᠬᠠᠭᠠᠨ ᠪᠠᠩᠬᠢᠨ ᠤ ᠣᠯᠠᠨ ᠨᠡᠶᠢᠲᠡ ᠲᠡᠢ ᠬᠠᠷᠢᠯᠴᠠᠬᠤ ᠭᠠᠵᠠᠷ ᠤᠨ ᠠᠬᠠᠯᠠᠬᠤ ᠮᠡᠷᠭᠡᠵᠢᠯᠲᠡᠨ ᠭ∙ᠣᠶᠤᠨᠭᠡᠷᠡᠯ ᠡᠴᠡ ᠲᠣᠳᠣᠷᠠᠭᠤᠯᠤᠯᠠ᠃
– ᠥᠩᠭᠡᠷᠡᠭᠴᠢ ᠠᠮᠠᠷᠠᠯᠲᠠ ᠶᠢᠨ ᠡᠳᠦᠷ ᠦᠳ ᠲᠦ ᠳᠠᠩᠰᠠ ᠬᠥᠲᠥᠯᠦᠭᠰᠡᠨ ᠦ ᠬᠤᠷᠢᠶᠠᠮᠵᠢ 200 ᠲᠥᠭᠥᠷᠢᠭ ᠲᠠᠲᠠᠭᠰᠠᠨ ᠭᠡᠳ ᠲᠠᠨ ᠤ ᠬᠡᠷᠡᠭᠯᠡᠭᠴᠢᠳ ᠨᠡᠯᠢᠶᠡᠳ ᠪᠤᠬᠢᠨᠢᠳᠤᠯᠠ ᠃ ᠡᠨᠡ ᠰᠢᠨᠡ ᠪᠡᠷ ᠠᠪᠤᠭᠰᠠᠨ ᠬᠤᠷᠢᠶᠠᠮᠵᠢ ᠤᠤ ︖ ᠪᠦᠬᠦ ᠬᠡᠷᠡᠭᠯᠡᠭᠴᠢ ᠡᠴᠡ ᠪᠡᠨ ᠠᠪᠤᠭᠰᠠᠨ ᠤᠤ ︖
-ᠡᠨᠡ 200 ᠲᠥᠭᠥᠷᠢᠭ ᠨᠢ ᠢᠳᠡᠪᠬᠢᠲᠡᠢ ᠲᠥᠯᠥᠪ ᠲᠦ ᠪᠠᠶᠢᠭᠠ ᠬᠠᠷᠢᠯᠴᠠᠬᠤ ᠳᠠᠩᠰᠠᠨ ᠠᠴᠠ ᠰᠠᠷᠠ ᠳᠤ ᠨᠢᠭᠡ ᠤᠳᠠᠭᠠ ᠠᠪᠳᠠᠭ᠂ ᠳᠠᠩᠰᠠ ᠬᠥᠲᠥᠯᠦᠭᠰᠡᠨ ᠦ ᠬᠤᠷᠢᠶᠠᠮᠵᠢ ᠶᠤᠮ᠃ ᠬᠠᠷᠢᠯᠴᠠᠬᠤ ᠳᠠᠩᠰᠠ ᠲᠠᠢ ᠢᠷᠭᠡᠳ ᠡᠴᠡ ᠰᠠᠷᠠ ᠶᠢᠨ ᠡᠴᠦᠰ ᠲᠦ ᠲᠤᠬᠠᠢ ᠶᠢᠨ ᠳᠠᠩᠰᠠᠨ ᠠᠴᠠ ᠨᠢ ᠰᠠᠭᠤᠳᠬᠠᠵᠤ ᠠᠪᠳᠠᠭ ᠭᠡᠰᠡᠨ ᠦᠭᠡ᠃ ᠥᠩᠭᠡᠷᠡᠭᠴᠢ ᠪᠠᠰᠠᠩ ᠭᠠᠷᠠᠭ ᠲᠤ ᠪᠤᠶᠤ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠰᠠᠷᠠ ᠶᠢᠨ 30 ᠍ ᠳᠦ ᠮᠠᠨ ᠤ ᠬᠢ ᠡᠨᠡ ᠬᠤᠷᠢᠶᠠᠮᠵᠢ ᠪᠠᠨ ᠠᠪᠬᠤ ᠳᠤ ᠭᠦᠢᠯᠭᠡᠭᠡᠨ ᠦ ᠤᠳᠬᠠ ᠪᠤᠶᠤ ︽ᠳᠠᠩᠰᠠ ᠬᠥᠲᠥᠯᠦᠭᠰᠡᠨ ᠦ ᠬᠤᠷᠢᠶᠠᠮᠵᠢ︾ ᠭᠡᠰᠡᠨ ᠲᠠᠶᠢᠯᠪᠤᠷᠢ ᠪᠠᠨ ᠪᠢᠴᠢᠯ ᠦᠭᠡᠢ ᠣᠷᠬᠢᠭᠳᠠᠭᠤᠯᠤᠭᠰᠠᠨ᠃ ᠡᠨᠡ ᠨᠢ ᠮᠠᠨ ᠤ ᠪᠠᠶᠢᠭᠤᠯᠤᠯᠭᠠ ᠶᠢᠨ ᠪᠤᠷᠤᠭᠤ ᠤᠴᠢᠷ ᠠᠴᠠ ᠰᠡᠭᠦᠯ ᠦᠨ ᠭᠦᠢᠯᠭᠡᠭᠡ ᠴᠧᠰᠧ ᠳᠡᠭᠡᠷᠡ ᠬᠠᠷᠠᠭᠳᠠᠯ ᠦᠭᠡᠢ ᠬᠠᠷᠢᠯᠴᠠᠭᠴᠢᠳ ᠲᠤ ᠣᠶᠢᠯᠠᠭᠠᠮᠵᠢ ᠦᠭᠡᠢ ᠪᠠᠶᠢᠳᠠᠯ ᠡᠭᠦᠰᠴᠦ᠂ ᠪᠤᠬᠢᠨᠢᠳᠤᠭᠤᠯᠤᠭᠰᠠᠨ ᠳᠦ ᠪᠡᠨ ᠠᠯᠪᠠᠨ ᠶᠣᠰᠣᠭᠠᠷ ᠠᠭᠤᠴᠢᠯᠠᠯ ᠬᠦᠰᠡᠵᠦ ᠪᠠᠶᠢᠨᠠ᠃ ᠪᠠᠩᠬᠢᠨ ᠤ ᠵᠦᠭ ᠡᠴᠡ ᠠᠯᠳᠠᠭᠠ ᠪᠠᠨ ᠵᠠᠯᠠᠷᠠᠭᠤᠯᠵᠤ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠰᠠᠷᠠ ᠶᠢᠨ 1 ᠍ ᠳᠦ ᠰᠢᠯᠵᠢᠬᠦ ᠰᠥᠨᠢ ᠭᠦᠢᠯᠭᠡᠭᠡᠨ ᠦ ᠲᠠᠶᠢᠯᠪᠤᠷᠢ ᠶᠢ ᠣᠷᠣᠭᠤᠯᠤᠭᠰᠠᠨ ᠪᠠᠶᠢᠭᠠ᠃
– ᠳᠠᠩᠰᠠ ᠬᠥᠲᠥᠯᠦᠭᠰᠡᠨ ᠦ ᠬᠤᠷᠢᠶᠠᠮᠵᠢ ᠳᠤ ᠰᠠᠭᠤᠳᠬᠠᠭᠰᠠᠨ ᠮᠥᠩᠭᠥ ᠶᠢ ᠶᠠᠭᠤᠨ ᠳᠤ ᠵᠠᠷᠤᠴᠠᠭᠤᠯᠳᠠᠭ ᠪᠤᠢ ︖
– ᠳᠠᠩᠰᠠ ᠬᠥᠲᠥᠯᠦᠭᠰᠡᠨ ᠦ ᠬᠤᠷᠢᠶᠠᠮᠵᠢ ᠨᠢ ᠪᠠᠩᠬᠢᠨ ᠤ ᠦᠢᠯᠡᠴᠢᠯᠡᠭᠡᠨ ᠳᠦ ᠪᠠᠶᠢᠳᠠᠭ ᠵᠢᠱᠢᠭ ᠬᠤᠷᠢᠶᠠᠮᠵᠢ᠃ ᠭᠠᠭᠴᠠᠬᠠᠨ ᠮᠠᠨ ᠤ ᠪᠠᠩᠬᠢ ᠠᠪᠳᠠᠭ ᠦᠭᠡᠢ᠃ ᠬᠦᠮᠦᠰ ᠪᠠᠰᠠ ᠠᠰᠠᠭᠤᠭᠰᠠᠨ ᠪᠠᠶᠢᠭᠰᠠᠨ᠂ ᠢᠳᠡᠪᠬᠢᠲᠡᠢ ᠳᠠᠩᠰᠠᠨ ᠠᠴᠠ ᠠᠪᠤᠨᠠ ᠭᠡᠵᠦ ᠶᠠᠭᠤ ᠭᠡᠰᠡᠨ ᠦᠭᠡ ᠪᠤᠢ ᠭᠡᠳ᠃ ᠲᠤᠬᠠᠢ ᠶᠢᠨ ᠬᠠᠷᠢᠯᠴᠠᠬᠤ ᠳᠠᠩᠰᠠ ᠪᠠᠨ ᠠᠰᠢᠭᠯᠠᠭᠠᠳ ᠶᠠᠪᠤᠵᠤ ᠪᠠᠶᠢᠭᠠ ᠪᠣᠯ ᠢᠳᠡᠪᠬᠢᠲᠡᠢ ᠳᠦ ᠲᠣᠭᠠᠴᠠᠭᠳᠠᠨᠠ᠃ ᠬᠠᠷᠢᠨ ᠲᠤᠬᠠᠢ ᠶᠢᠨ ᠳᠠᠩᠰᠠ ᠨᠢ ᠦᠯᠡᠳᠡᠭᠳᠡᠯ ᠦᠭᠡᠢ᠂ ᠬᠡᠷᠡᠭᠯᠡᠬᠦ ᠦᠭᠡᠢ 24 ᠰᠠᠷᠠ ᠪᠣᠯᠤᠭᠰᠠᠨ ᠪᠣᠯ ᠢᠳᠡᠪᠬᠢ ᠦᠭᠡᠢ ᠲᠥᠯᠥᠪ ᠲᠦ ᠰᠢᠯᠵᠢᠭᠦᠯᠳᠡᠭ᠃ ᠶᠠᠭᠠᠬᠢᠭᠠᠳ ᠬᠤᠷᠢᠶᠠᠮᠵᠢ ᠠᠪᠳᠠᠭ ᠪᠤᠢ ᠭᠡᠰᠡᠨ ᠠᠰᠠᠭᠤᠯᠲᠠ ᠭᠠᠷᠳᠠᠭ᠃ ᠡᠨᠡ ᠣᠯᠠᠨ ᠬᠠᠷᠢᠯᠴᠠᠭᠴᠢ ᠶᠢᠨ ᠳᠠᠩᠰᠠ ᠶᠢ ᠬᠥᠲᠥᠯᠬᠦ ᠶᠢᠨ ᠲᠤᠯᠠᠳᠠ ᠲᠣᠮᠣᠬᠠᠨ ᠬᠡᠮᠵᠢᠶᠡᠨ ᠦ ᠫᠷᠤᠭ᠍ᠷᠡᠮ ᠬᠠᠩᠭᠠᠮᠵᠢ ᠶᠢ ᠭᠠᠳᠠᠨᠠ ᠠᠴᠠ ᠬᠤᠳᠠᠯᠳᠤᠵᠤ ᠠᠪᠤᠨᠠ᠂ ᠠᠰᠢᠭᠯᠠᠯᠲᠠ ᠶᠢᠨ ᠵᠠᠷᠤᠳᠠᠯ ᠰᠠᠷᠠ ᠪᠦᠷᠢ ᠲᠥᠯᠦᠨᠡ᠂ ᠬᠦᠮᠦᠨ ᠬᠦᠴᠦ᠂ ᠰᠧᠷᠸᠧᠷ᠂ ᠲᠣᠭᠠᠴᠠᠭᠠᠨ ᠤ ᠲᠥᠪ ᠠᠵᠢᠯᠯᠠᠭᠤᠯᠤᠨᠠ ᠭᠡᠳ ᠨᠢᠳᠦᠨ ᠳᠦ ᠢᠯᠡ ᠬᠠᠷᠠᠭᠳᠠᠬᠤ ᠦᠭᠡᠢ ᠵᠥᠩᠳᠡᠭᠡᠨ ᠵᠠᠷᠤᠳᠠᠯ ᠭᠠᠷᠳᠠᠭ ᠯᠠ ᠳ᠋ᠠ᠃ ᠨᠢᠭᠡᠨᠲᠡ ᠪᠢᠳᠡ ᠠᠵᠢᠯ ᠬᠢᠵᠦ ᠪᠠᠶᠢᠭᠠ ᠲᠤᠯᠠ ᠡᠨᠡ ᠵᠠᠷᠤᠳᠠᠯ ᠢᠶᠠᠨ ᠨᠥᠬᠥᠬᠥ ᠬᠡᠷᠡᠭᠲᠡᠢ ᠪᠣᠯᠤᠨᠠ᠃
