Twitter.com сайтад идэвхитэй жиргэдэг Монголын жиргээчдийн тоо сүүлийн жилүүдэд хурдацтай нэмэгдэн, албан бус тоогоор 60,000 хол давжээ. Жирийн  иргэнээс эхлээд  улс төрчид,  урлаг, спортынхон хүртэл нэгдсэн тус сайтын олон мянган хэрэглэгчид нийгмийн дуу хоолойн өнгийг илэрхийлэх талбар болоод буй.

Тэгвэл цахим ертөнцийн хамгийн нээлттэй, илэн далангуй гэгддэг жиргээчдийн төлөөллүүд  есдүгээр сарын 26-нд буюу маргааш 18:30 цагт “Tsuki House Lounge”-д нүүр тулан уулзалдаж, жиргээчдийн хамгийн том баярыг тэмдэглэх гэж байна. “UBTwestival”-д орчин үеийн шинэ хамтлаг, дуучид оролцож, ая дуугаа өргөнө. Хамгийн сонирхолтой нь, жиргээчид маргааш энэ оны хамгийн “Бэлэн цэцэн” жиргээчийг өргөмжлөх гэнэ лээ.

“UBTwestival” нь “Гэгээн үндэс” ТББ-ын санаачилсан “Бидний хүүхдүүд” төслийг санхүүжүүлэх зорилго агуулж байгаа бөгөөд таван сая төгрөгийн хандив цуглуулахаар төлөвлөжээ.

 Twitter+Festival буюу Twestival нь олон улсын хүмүүнлэгийн хөдөлгөөний нэгээхэн хэсэг ба энэ жил дэлхийн 73 хотод тэмдэглэсэн байна.